An kabugtoan ha Bethel nagtrabaho hin sobra usa ka tuig basi himoon an estasyon han radyo nga WBBR ha Staten Island, New York City. Katapos han paghawan han lote, nagtukod hira hin daku nga balay para ha mga magtatrabaho ngan usa pa nga bilding para ha mga equipment. Han natapos ini nga trabaho, an kabugtoan nagtikang pag-asembol han equipment nga kinahanglan basi makabrodkast ha radyo. Pero kinahanglan nira masolusyonan an pipira nga problema.

Nakurian gud an kabugtoan ha pagtaod han main antenna para ha estasyon. An 91 ka metro nga kahilaba nga antenna kinahanglan ihigot paluyoluyo ha duha nga kahoy nga poste nga 61 ka metro an kahitaas. Waray maglampos an siyahan nga pagtesting. Tungod han ira pagsarig ha bulig ni Jehova, naglampos gihap an kabugtoan. Hi Calvin Prosser nga nagtrabaho hito nga proyekto, nagsiring, “Kon an amon siyahan nga pagtesting naglampos, nakasiring unta kami ha amon kalugaringon, ‘Kitaa an aton ginhimo!’” Lugod gindayaw hini nga kabugtoan hi Jehova tungod han ira kalamposan, pero may-ada pa hira iba nga mga problema.

Bag-o pa gud la an pagbrodkast ha radyo, ngan diri masayon an pagpalit han ginkikinahanglan nga equipment. Salit an kabugtoan nakakuha la hin gamit na nga 500 watts nga transmitter nga amo la an available ha ira lugar. Imbes nga pumalit hin mikropono, gumamit hira hin ordinaryo nga telepono. Ha usa nga gab-i han Pebrero, an kabugtoan nagdesisyon nga testingan an ngatanan hini nga simple nga equipment. Nagkinahanglan hira hin programa nga ibubrodkast, salit an kabugtoan nagkanta hin mga Kingdom song. Hi Ernest Lowe nakahinumdom hin makatatawa nga istorya nga samtang nagkakaranta  an kabugtoan, gintawagan hira ni Judge Rutherford, b nga nakabati ha ira pagkanta ha iya radyo ha Brooklyn, nga mga 25 ka kilometro an kahirayo.

“Iundang ito kay diri maopay pamation,” siring ni Brother Rutherford. “An iyo tingog baga hin mga misay!” Tungod kay medyo naawod an kabugtoan ginparong dayon nira an transmitter, pero may kompyansa hira nga andam na hira ha siyahan nga pagbrodkast.

Han Pebrero 24, 1924, ha siyahan nga opisyal nga pagbrodkast, igindedikar ni Brother Rutherford an estasyon han radyo “para ha mga buruhaton han ginhadian han Mesias.” Hiya nagsiring nga an katuyoan han estasyon amo an “pagbulig ha katawohan nga masabtan an Biblia, anoman an ira gintotoohan o denominasyon ngan an importante nga panahon kon diin kita nabubuhi.”

Malampuson gud an siyahan nga pagbrodkast. An WBBR gin-gamit ha sulod hin 33 ka tuig basi ibrodkast an mga programa ha radyo han katawohan ni Jehova.

Han Hulyo 1924, an mga Estudyante han Biblia nagkatirok para ha kombensyon ha Columbus, Ohio. An mga delegado tikang ha bug-os nga kalibotan, ngan nabatian nira an mga pahayag ha Arabic, English, French, German, Greek, Hungarian, Italian, Lithuanian, Polish, Russian, Scandinavian nga mga linggwahe, ngan Ukrainian. An pipira nga bahin han programa iginbrodkast ha radyo ngan nagplano nga adlaw-adlaw nga ibalita han Ohio State Journal an mahitungod ha kombensyon.

Han Huwebes, Hulyo 24, sobra 5,000 nga inatender ha kombensyon an nakigbahin ha pagsangyaw. Nakapanaltag hira hin haros 30,000 nga libro ngan nakagtikang hin yinukot nga Bible study. Gintawag han The Watch Tower ini nga adlaw nga “an pinakamakalilipay nga bahin han kombensyon.”

Han Biernes, Hulyo 25, ha pahayag ni Brother Rutherford maisugon nga ginbasa niya an usa nga dokumento, nga nagkukondenar ha mga klero. Siring niya nga an mga lider ha politika, relihiyon, ngan komersyo nagpupugong ha mga tawo nga mahibaro han kamatuoran mahitungod ha Ginhadian han Dios nga ginagamit niya ha pagbendisyon ha katawohan. Dugang pa, nagsiring ito nga ini nga mga tawo “nag-endorso han League of Nations ngan igindeklara sugad nga ‘politikal nga ekspresyon han Ginhadian han Dios ha tuna.’” Sigurado  nga an mga Estudyante han Biblia nagkinahanglan hin kaisog basi padayon nga maisangyaw an mensahe ha katawohan.

Sugad nga sumaryo han epekto han kombensyon, an The Watch Tower nasiring: “Ini nga gutiay nga kasundalohan han Ginoo nga nagkatirok ha Columbus Convention binaya nga may marig-on nga pagtoo . . . , diri mapipirde han bisan ano nga gahum o naglalaga nga mga pana nga bangin igpauran han mga kaaway ha ira.” Hi Leo Claus, nga inatender ha kombensyon, nagsiring: “Binaya kami ha asembleya nga eksayted ha pagpanaltag han tract ha amon teritoryo.”

Han Oktubre, an mga Estudyante han Biblia nagtikang pagpanaltag han minilyon nga kopya han tract nga Ecclesiastics Indicted, an inimprinta nga bersyon nga ginbasa ni Brother Rutherford kontra ha mga klero. Ha gutiay nga bungto han Cleveland, Oklahoma, natapos ni Frank Johnson an panaltag han mga tract 20 ka minuto antes hiya kuhaon han iba nga magwarali. Diri hiya puydi basta la nga maghulat ha lugar nga masayon la hiya makit-an kay ginbibiling hiya han kalalakin-an nga nasisina ha iya pagsangyaw. Nagtago hi Brother Johnson ha hirani nga singbahan. Tungod kay waray tawo hito nga singbahan nagbutang hiya hin mga kopya han Ecclesiastics Indicted ha Biblia han parawali ha singbahan ngan ha kada lingkoran. Binaya hiya ha singbahan sugad kadagmit han iya pagsulod. May-ada pa hiya panahon, salit kinadto hiya ha duha pa nga singbahan, ngan sugad liwat hito an iya ginbuhat.

Nagdagmit hi Frank pagbalik ha lugar kon diin hiya kukuhaon. Nagtago hiya ha luyo han gasolinahan, nga nagbibinantay ha kalalakin-an nga namimiling ha iya. Inagi an kalalakin-an, pero waray hiya makit-i. Pakalahos nira inabot an mga igkasi-magwarali ni Frank, nga nagsangyaw ha hirani, basi kuhaon hiya ngan nagkalarga hira ngatanan.

“Samtang nabaya kami ha bungto,” nagsiring an usa nga bugto, “ginlabyan namon an tulo nga singbahan. May-ada mga 50 ka tawo nga natindog ha atubangan ha gawas han tagsa nga singbahan. An pipira nagbabasa han tract, an iba naman nakaalsa an kamot kapot an tract basi makita ito han parawali. Eksakto gud la an amon pagbaya basi malikyan an bisan ano nga problema! Pero nagpapasalamat kami kan Jehova nga aton Dios han iya pagprotektar ngan han iya paghatag hin kahibaro basi malamposan ini nga mga kaaway han Ginhadian.”

An mga Estudyante han Biblia ha iba nga mga nasud nagsangyaw liwat nga may kaisog. Ha norte han France, nagsangyaw hi Józef Krett ha dayo nga mga Polish nga mga trabahador ha minahan. May eskedyol hiya ha pagpahayag nga may tema nga “Hirani Na an Pagkabanhaw han mga Patay.” Han naipanaltag na an mga imbitasyon ha mga residente han bungto, usa nga padi hito nga lugar an nagpahamangno ha mga membro han singbahan nga diri umatender. Nagkaada hin kabaliktaran nga epekto an iya pahamangno. Sobra 5,000 an inatender han pahayag, upod na an padi! Gin-imbitar ni Brother Krett an padi basi depensahan an iya mga gintotoohan, pero diniri hiya. Ginpanaltag ni Brother Krett ha mga tawo an ngatanan nga literatura nga may-ada hiya kay karuyag gud nira nga mahibaro pa hin dugang mahitungod ha Pulong han Dios.​—Amos 8:11.

Ha Africa, iginpasamwak ni Claude Brown an maopay nga sumat ha Gold Coast, nga gintatawag na yana nga Ghana. An iya mga pahayag ngan an literatura nga iya ginpanaltag nakabulig nga madagmit nga maipasamwak an kamatuoran hito nga nasud. Hi John Blankson, nga ineskwela basi magin pharmacist, inatender ha usa han mga pahayag ni Brother Brown. Nasantop dayon niya nga nahiagian  niya an kamatuoran. “Nagin malipayon gud ako tungod han kamatuoran,” siring ni John, “ngan iginsusumat ko ito ha damu nga tawo ha pharmacy school.”

Usa ka adlaw, binisita hi John ha usa nga singbahan han Anglican basi pakianhan an padi mahitungod ha Trinidad, kay nasabtan na ni John hin klaro nga diri uyon ha Biblia ito nga katutdoan. Ginlanat hiya han padi, nga naguliat: “Diri ka Kristiano; kanan Yawa ka. Layas dinhi!”

Han nakauli na hi John, nagsurat hiya ha padi, nga gin-iimbitar hiya nga depensahan an Trinidad ha publiko nga katitirok. Binalos an padi pinaagi ha pagpatawag kan John ha opisina han principal lecturer han pharmacy school, diin ginpakianhan hiya kon nagsurat gud ba hiya ha padi.

“Oo, Sir,” siring ni John.

Ginsugo han lecturer hi John nga magsurat ha padi basi mangaro hin pasaylo. Salit nagsurat hi John:

“Sir, ginsugo ako han akon instruktor nga magsurat basi mangaro hin pasaylo ha imo ngan andam ako magsurat basta aminon mo nga nagtututdo ka hin buwa nga mga doktrina.”

Nakalasan an lecturer ngan nagpakiana, “Blankson, ini ba an imo karuyag isurat?”

“Oo, Sir. Ito la an akon maisusurat.”

“Paiiwason ka dinhi. Diri ka makakapabilin ha eskwelahan kon nakontra ka ha padi han relihiyon nga ginsusuportaran han gobyerno.”

“Pero Sir, . . . kon nagtututdo ka ha amon ngan may mga punto nga diri namon nasasabtan, diri ba nagpapakiana kami ha imo?”

“Syempre puydi ka magpakiana.”

“Salit Sir, ito an nahitabo. Gintututdoan kami han lalaki mahitungod han Biblia ngan ginpakianhan ko hiya. Kon diri hiya makabaton ha pakiana, kay ano nga dapat ako magsurat ha iya basi mangaro hin pasaylo?”

Hi Blankson waray paiwasa, bisan kon waray hiya magsurat basi mangaro hin pasaylo.

Ha pagsumaryo han mga buruhaton hito nga tuig, an The Watch Tower nagsiring: “Pariho kan David makakasiring gud kita: ‘Imo ako tatagan hin kusog para ha pakiggirra.’ (Salmo 18:39) Ini nga tuig usa han pinakanakakadasig, kay nakita naton an kamot han Ginoo . . . An iya tinuod nga mga dedikado . . . nagin malipayon gud ha pagsangyaw han maopay nga sumat.”

Ha ikatarapos hito nga tuig, an mga brother nagplano ha paghimo hin iba pa nga estasyon han radyo nga para ha pagsangyaw. Ito nga estasyon han radyo ginhimo hirani ha Chicago. Ini nga bag-o nga estasyon may-ada angayan nga ngaran nga WORD. Gamit an 5,000 watts nga transmitter, iginta-transmit han WORD an mensahe han Ginhadian ha ginatos ka milya, bisan pa ngani tubtob ha norte han Canada.

Diri mag-iiha, ha tuig han 1925 magkakaada eksayting nga mga impormasyon mahitungod han espirituwal nga kalamrag nga magpapatin-aw han pagsabot han mga Estudyante han Biblia mahitungod han Pahayag kapitulo 12. Magigin hinungdan ito nga mahipakdol an iba. Pero damu an nalipay hini nga mas maopay nga pagsabot han mga panhitabo ha langit ngan ini nga pagsabot nagkaada daku nga epekto ha katawohan han Dios ha tuna.