1. Ano an inaabat ni Jehova ha iya mga surugoon?

 ANO an ginkikita ni Jehova kon naghahatag hiya hin atensyon ha iya mga surugoon ha tuna? Maaram hiya han aton mga kalipay ngan han aton mga kasubo. (Sal. 37:18) Nalilipay gud hiya kon nakikita kita niya nga nag-aalagad ha iya ha aton bug-os nga mahihimo bisan pa kon may mga kasakit kita ha emosyon! Labot pa hito, karuyag gud niya nga buligan kita ngan liawon.

2. Ano an ginhihimo ni Jehova ha mga ruba an kasingkasing, ngan paonan-o kita makakapahimulos han iya pag-ataman?

² An Salmo 147:3 nasiring nga ‘ginbubutok ni Jehova an mga samad’ han mga ruba an kasingkasing. Iginpapakita hito nga hi Jehova mahigugmaon nga nag-aataman hadton may mga samad ha emosyon. Ano an dapat naton buhaton basi magpahimulos han pag-ataman ni Jehova? Pansina ini nga ilustrasyon. Daku an maibubulig han maopay nga doktor basi matambal an usa nga may injury. Pero basi makapahimulos an may injury, dapat sundon niya hin maopay an mga instruksyon han doktor. Hini nga artikulo, hihisgotan naton kon ano an ginsiring ni Jehova ha iya Pulong para hadton nag-aantos ha emosyon ngan aton hihisgotan kon paonan-o iaaplikar an iya mahigugmaon nga sagdon.

GINPAPASARIG KITA NI JEHOVA NGA PRESYOSO GUD KITA

3. Kay ano nga inaabat han iba nga waray gud hira pulos?

³ Nabubuhi kita ha kalibotan nga an gugma nagtutugnaw, ngan makasurubo, tungod han diri maopay nga pagtratar han damu nga tawo ha iba inaabat nira nga diri hira importante. An sister nga hi Helen a nagsiring: “Nagdaku ako ha pamilya nga diri mahigugmaon. An akon daddy bayolente ngan pirme kami ginsisidngan kada adlaw nga waray kami pulos.” Posible nga pariho kan Helen, ginmaltrato ka, agsob pakarauton, o ginpaabat  nga diri ka hinigugma. Kay kon sugad, bangin makurian ka tumoo nga may nahigugma gud ha imo.

4. Sumala ha Salmo 34:​18, ano an iginpapasarig ni Jehova ha aton?

⁴ Bisan kon trataron ka hin diri maopay han iba, makakasarig ka nga hinigugma ngan presyoso ka kan Jehova. “Hirani [hiya] ha mga ruba an kasingkasing.” (Basaha an Salmo 34:18.) Kon naabat ka nga “rumok an [imo] espiritu,” hinumdumi nga may nakikita hi Jehova ha imo nga mag-opay nga butang ngan iginpapahirani ka niya ha iya. (Juan 6:44) Pirme hiya andam nga buligan ka kay presyoso ka ha iya.

5. Ano an aton mahibabaroan tikang ha paagi han pagtratar ni Jesus ha mga ginmiminos han iba?

⁵ May mahibabaroan kita han mga inaabat ni Jehova pinaagi ha paghisgot han ehemplo ni Jesus. Ha panahon han ministeryo ni Jesus ha tuna, nakita niya an mga ginmiminos han iba, ngan gintratar niya hira nga may pagpaid. (Mat. 9:​9-12) Han an usa nga babaye nga naglalaom nga matatambal ha iya grabe nga sakit kinapot ha bado ni Jesus, ginliaw ngan ginkumendasyonan niya hiya tungod han iya pagtoo. (Mar. 5:​25-34) Perpekto nga iginpakita ni Jesus an personalidad han iya Amay. (Juan 14:9) Salit makakasiguro ka nga presyoso ka kan Jehova ngan napapansin niya an imo mag-opay nga kalidad, pati na an imo pagtoo ngan gugma ha iya.

6. Paonan-o malalamposan han usa nga tawo an iya pag-abat hin kawaray-pulos?

⁶ Ano an imo puydi buhaton kon an imo pag-abat hin kawaray-pulos nagbabalik-balik? Pagbasa hin mga bersikulo ha Biblia nga nagpapasarig ha imo han imo pagin presyoso kan Jehova ngan pamalandonga ito. b (Sal. 94:19) Kon waray mo makab-ot an imo goal  o nanluluya ka kay diri mo nabubuhat an nabubuhat han iba, ayaw ikompara an imo kalugaringon. Hi Jehova makatadunganon ha iya mga ginlalaoman. (Sal. 103:​13, 14) Kon gin-abuso ka hadto, diri mo ito sala. Hinumdumi nga an may baratunon kan Jehova diri an mga biktima kondi an mga nagbuhat hin sala. (1 Ped. 3:12) Hi Sandra, nga ginmaltrato han bata pa hiya, nagsiring, “Pirme ako nangangaro kan Jehova hin bulig nga makita ko ha akon kalugaringon an mag-opay nga kalidad, pariho han pagkita niya ha akon.”

7. Paonan-o an aton naglabay nga mga eksperyensya magigin mapulsanon ha pag-alagad kan Jehova?

⁷ Ayaw gud pagruhaduha nga puydi ka gamiton ni Jehova nga buligan an iba. Gintagan ka niya hin kadungganan ha pagin igkasi-magburuhat niya ha Kristiano nga ministeryo. (1 Cor. 3:9) An imo mga eksperyensya ha kinabuhi posible gud nga nakabulig ha imo nga magkaada empatiya ha iba ngan pagsabot kon ano an bangin nira inaabat. Damu an puydi mo mahimo ha pagbulig ha ira. Hi Helen, nga gin-unabi na, nakakarawat hin bulig ngan mas nakakabulig na hiya yana ha iba. Hiya nagsiring: “Han una inaabat ko an kawaray-pulos. Pero iginpaabat ni Jehova ha akon nga hinigugma niya ako ngan gin-gagamit niya ako ha pagbulig ha iba.” Malipayon hi Helen ha pag-alagad sugad nga regular payunir.

KARUYAG NI JEHOVA NGA KARAWATON NATON AN IYA PAGPASAYLO

8. Ano nga pasarig an aton mababasa ha Isaias 1:18?

⁸ An pipira han mga surugoon ni Jehova naiistres la gihapon mahitungod ha mga sala nga ira nabuhat ha naglabay, antes o katapos pa ngani han ira bawtismo. Pero maopay nga hinumdoman naton nga igintagana ni Jehova an lukat tungod han iya hilarom nga gugma ha aton. Sigurado nga karuyag niya nga karawaton naton an iya regalo. Ginpapasarig kita ni Jehova nga katapos naton “tadungon . . . an mga butang” c ha iya atubangan, diri na niya ginhihinumdom an aton mga sala kontra ha aton. (Basaha an Isaias 1:18.) Mahigugmaon gud hi Jehova kay diri na niya ginhihinumdom an aton naglabay nga mga sala! Diri liwat niya ginkakalimtan an aton mag-opay nga nabuhat.​—Sal. 103:​9, 12; Heb. 6:10.

9. Kay ano nga dapat naton himoon an pinakamaopay nga magpokus ha presente ngan ha tiarabot imbes nga ha naglabay?

⁹ Kon naiistres ka tungod han imo nabuhat ha naglabay, buhata an pinakamaopay nga magpokus ha presente ngan ha tiarabot imbes nga ha naglabay. Pansina an ehemplo ni apostol Pablo. Nagbasol hiya kay hadto mabangis nga gintimaraot niya an mga Kristiano, pero maaram hiya nga ginpasaylo na hiya ni Jehova. (1 Tim. 1:​12-15) Padayon ba niya nga ginhinunahuna an iya mga sala ha naglabay? Sigurado nga waray na niya ito buhata, sugad la nga waray na niya hunahunaa an iya naglabay nga mga kalamposan sugad nga parasuporta ha Judaismo. (Fil. 3:​4-8, 13-15) Lugod, may kadasig nga ginbuhat ni Pablo an iya ministeryo ngan ginpamulat an tiarabot. Pariho kan Pablo, diri mo mababag-o an naglabay. Pero mahimo mo pasidunggan hi Jehova ha imo presente nga kahimtang ngan pamulaton an makaruruyag nga tiarabot nga iya iginsaad ha imo.

10. Ano an mahimo naton buhaton kon an aton naglabay nga mga buhat nakasakit ha iba?

¹⁰ Mahimo ka maistres tungod han imo mga nabuhat ha naglabay nga nakasakit ha iba. Ano an makakabulig? Buhata an imo mahihimo nga maibalik an maopay nga relasyon, upod na an sinsero nga pangaro hin pasaylo. (2 Cor. 7:11)  Paghangyo kan Jehova nga buligan an mga naapektohan han imo mga nabuhat. Mabubuligan ka niya ngan adton imo napasakitan nga magpailob ngan maibalik an kamurayawan.

11. Ano an aton mahibabaroan tikang ha ehemplo ni propeta Jonas? (Kitaa liwat an piktyur.)

¹¹ Mahibaro tikang ha naglabay nga mga sayop, ngan magin andam ha pagpagamit kan Jehova ha anoman nga paagi nga karuyag niya. Pansina an ehemplo ni propeta Jonas. Imbes nga magbiyahe ngadto ha Nineve sugad han iginsugo han Dios, pinalagiw hi Jonas ngadto ha iba nga direksyon. Gindisiplina ni Jehova hi Jonas, ngan nahibaro hiya tikang ha iya sayop. (Jon. 1:​1-4, 15-17; 2:​7-10) Waray hi Jehova umundang ha paggamit kan Jonas sugad nga propeta. Gintagan hiya han Dios hin usa pa nga higayon nga kumadto ha Nineve, ngan hini nga panahon sinugot dayon hiya. Waray niya tuguti nga an iya kasubo ha iya naglabay nga sayop makaulang ha iya ha pagkarawat hini nga toka tikang kan Jehova.​—Jon. 3:​1-3.

GINLILIAW KITA NI JEHOVA PINAAGI HAN BARAAN NGA ESPIRITU

12. Paonan-o kita gintatagan ni Jehova hin kamurayawan kon may-ada kita truma o kon namatyan? (Filipos 4:​6, 7)

¹² Pinaagi han baraan nga espiritu ni Jehova, ginliliaw kita niya kon may truma kita o kon namatyan. Pansina an eksperyensya nira Ron ngan Carol. Kamakasurubo nga an ira anak nga lalaki nagpakamatay. Hira nagsiring: “Inatubang na kami hin magkuri nga problema hadto, pero ini an pinakamakuri. Nag-iinampo kami ha damu nga gab-i nga diri kami nahingangaturog, ngan inabat gud namon an kamurayawan nga ginsiring ha Filipos 4:​6, 7.” (Basaha.) Kon naatubang ka hin makuri gud nga problema, mahimo mo isumat an ngatanan kan Jehova ha imo pag-ampo nga mas agsob ngan ha kaihaon nga karuyag mo. (Sal. 86:3; 88:1) Pauroutro nga pangaroa kan Jehova an iya baraan nga espiritu. Diri gud niya igbabalewaray an imo mga hangyo.​—Luc. 11:​9-13.

13. Ha ano nga paagi an baraan nga espiritu makakabulig ha aton nga padayon nga magsingba hin matinumanon kan Jehova? (Efeso 3:16)

¹³ Nakakaeksperyensya ka ba hin makuri nga problema ngan yana naabat ka nga gutiay na gud la an imo kusog? An baraan nga espiritu makakapakusog ha imo nga padayon nga magsingba nga matinumanon kan Jehova. (Basaha an Efeso 3:16.) Pansina an eksperyensya han sister nga hi Flora. Hiya ngan an iya asawa nag-aalagad sugad nga mga misyonero han an iya asawa waray magin maunungon ha iya, ngan nagdiborsyo hira. Hiya nagsiring: “An kasubo nga akon inabat tungod han iya pagin diri maunungon ha akon nakaubos gud han akon kusog. Nag-ampo ako kan Jehova para han iya baraan nga espiritu basi makailob. Ginhatag ni Jehova ha akon an pagliaw nga akon kinahanglan ngan nakaya ko an problema nga ha tinikangan baga hin imposible malamposan.” Inaabat ni Flora nga ginbuligan hiya han Dios nga madugangan an iya pagsarig ngan sigurado hiya nga bubuligan niya hiya ha ngatanan niya nga problema. Nagsiring liwat hiya: “An mga pulong ha Salmo 119:32 aplikado ha akon: ‘Magsusulsog gud ako ha dalan han imo mga sugo kay imo ito gintagan hin lugar ha akon kasingkasing.’”

14. Ano an puydi naton buhaton basi an espiritu han Dios gumios ha aton?

¹⁴ Ano an mahimo mo buhaton basi an imo mga hangyo magin uyon ha baraan nga espiritu? Buhata an mga butang nga mabulig ha imo nga makakarawat hin dugang han espiritu han Dios. Upod hini an pag-atender ha mga katirok ngan pagsangyaw. Basaha kada adlaw an Pulong ni Jehova. Mabulig ini ha imo nga mapamalandong an iya mga panhunahuna. (Fil. 4:​8, 9) Samtang nagbabasa ka, tigamni an  mga karakter ha Biblia nga nakaeksperyensya hin mga kakurian ngan pamalandonga kon paonan-o hira ginbuligan ni Jehova nga makailob. Hi Sandra, nga gin-unabi na, nag-antos hin sunod-sunod nga magkuri nga problema. Hiya nagsiring: “An rekord mahitungod kan Jose nakadasig gud ha akon. Waray niya tuguti nga an mga problema ngan kawaray-hustisya nga iya gin-antos magpaluya ha iya relasyon kan Jehova.”​—Gen. 39:​21-23.

GINLILIAW KITA NI JEHOVA PINAAGI HAN MGA IGKASI-TUMUROO

15. Kan kanay kita makakakarawat hin pagliaw, ngan paonan-o hira makakabulig ha aton? (Kitaa liwat an piktyur.)

¹⁵ Kon nag-aantos kita, an aton mga igkasi-tumuroo mahimo ‘maghatag hin daku nga pagliaw.’ (Col. 4:11) An aton kabugtoan usa gud nga buhi nga ebidensya nga hinigugma kita ni Jehova. An aton mga igkasi-tumuroo mahimo makaliaw ha aton pinaagi ha pagpamati nga may empatiya, o bangin suportaran kita nira pinaagi han ira presensya. Mahimo kita nira dasigon pinaagi hin teksto ha Biblia o mag-ampo kaupod naton. d (Roma 15:4) Usahay, bangin pahinumdoman kita han usa nga bugto mahitungod han panhunahuna ni Jehova, salit mabubuligan kita nga matipigan an aton pagin timbang. An mga igkasi-Kristiano mahimo liwat makahatag ha aton hin praktikal nga bulig, sugad han paghatag hin pagkaon kon nasusubo kita.

16. Ano an bangin kinahanglan naton buhaton basi makarawat an bulig han iba?

 ¹⁶ Basi makarawat an bulig han iba, bangin kinahanglan maghangyo kita hito. Hinigugma kita han aton kabugtoan ngan karuyag nira kita buligan. (Prob. 17:17) Pero bangin diri hira maaram kon ano an aton inaabat o ginkikinahanglan. (Prob. 14:10) Kon naiistres ka, magin andam nga isumat an imo mga inaabat ha hamtong nga kasangkayan. Ipahibaro ha ira kon ano an makakabulig ha imo. Mahimo ka magpili hin usa o duha nga tigurang nga komportable ka nga sumatan. Napansin han pipira nga sister nga nakakaliaw an pakiistorya ha iba nga hamtong nga sister.

17. Ano an pipira nga problema nga makakaulang ha aton ha pagkarawat han pagdasig, ngan paonan-o naton ito malalamposan?

¹⁷ Likayi nga ibulag an imo kalugaringon. Tungod han kasakit ha emosyon, bangin diri ka maruyag nga makig-upod-upod ha iba. Usahay bangin diri ka masabtan han kabugtoan o bangin makayakan hira hin nakakasakit ha imo. (San. 3:2) Ayaw pabay-i nga an sugad nga mga problema makaulang ha imo ha pagkarawat han pagdasig nga imo kinahanglan. An tigurang nga hi Gavin, nga nag-aantos hin depresyon, nagsiring: “Agsob nga gusto ko nga diri makig-upod-upod ha akon kasangkayan.” Bisan pa hito, hi Gavin waray magpadara hito nga iya mga inaabat, ngan nagpahimulos hiya ha iya pakig-upod ha iba. An sister nga hi Amy nagsiring: “Tungod han akon naglabay nga mga eksperyensya, nakukurian ako pagtapod ha mga tawo. Pero nag-aaram ako nga higugmaon ngan tumapod ha akon kabugtoan pariho han pagtapod ha ira ni Jehova. Maaram ako nga nakakapalipay ini kan Jehova, ngan nakakapalipay liwat ito ha akon.”

MALIAW HAN MGA SAAD NI JEHOVA HA PAGTAMBAL

18. Ano an puydi naton pamulaton ha tiarabot, ngan ano an puydi naton himoon yana?

¹⁸ Ginpapamulat gud naton an tiarabot, kay maaram kita nga diri na mag-iiha bug-os nga tatambalon ni Jehova an ngatanan nga kasakit ha pisikal ngan emosyon. (Pah. 21:​3, 4) Hito nga panahon, an masakit nga mga butang nga aton naeksperyensyahan diri na “masulod ha kasingkasing.” (Isa. 65:17) Sugad han aton nakikita, bisan yana hi Jehova ‘nagpuputos han aton mga samad.’ Bug-os nga pahimulusi an mahigugmaon nga mga tagana ni Jehova ha pagliaw ngan pagbulig ha imo. Ayaw gud pagruhaduha bisan madaliay nga “interesado hiya ha iyo kaopayan.”​—1 Ped. 5:7.