1. Ano an pipira nga regalo an aton nakarawat tikang kan Jesus?

 WARAY pa gud tawo nga nagin pariho kamahinatagon kay ha kan Jesus. Han nakanhi hiya ha tuna, agsob hiya bumulig ha mga tawo pinaagi ha paghimo hin mga milagro. (Luc. 9:​12-17) Iya iginhatag an pinakadaku nga regalo ha ngatanan pinaagi ha paghatag han iya kinabuhi ha aton. (Juan 15:13) Tikang ha nabanhaw hi Jesus, padayon hiya nga nagin mahinatagon. Sugad la han iya iginsaad, naghangyo hiya kan Jehova nga ibubo an baraan nga espiritu basi tutdoan kita ngan liawon. (Juan 14:​16, 17, ftn.; 16:13) Ngan pinaagi han aton mga katirok ha kongregasyon, padayon kita nga gintatagan ni Jesus han aton kinahanglan basi makahimo hin mga disipulo ha bug-os nga tuna.​—Mat. 28:​18-20.

2. Hin-o an kaapi han “mga regalo nga mga lalaki” nga gin-unabi han Efeso 4:​7, 8?

² Pansina an usa pa han mga regalo ni Jesus. Nagsurat hi apostol Pablo nga katapos ni Jesus sumaka ha langit, “naghatag hiya hin mga regalo nga mga lalaki.” (Basaha an Efeso 4:​7, 8.) Iginsaysay ni Pablo nga iginhatag ni Jesus ini nga mga regalo basi suportaran an kongregasyon ha iba-iba nga paagi. (Efe. 1:​22, 23; 4:​11-13) Yana, an kaapi hini nga “mga regalo nga mga lalaki” amo an mga ministeryal nga surugoon, tigurang ha kongregasyon, ngan paramangno han sirkito. a Syempre, ini nga kalalakin-an diri perpekto salit nagsasayop hira. (San. 3:2) Pero ginagamit hira han aton Ginoo nga hi Jesu-Kristo basi buligan kita; mga regalo niya hira ha aton.

3. Iilustrar kon paonan-o kita ngatanan makakasuporta ha buruhaton han “mga regalo nga mga lalaki.”

³ Gintokahan ni Jesus ini nga “mga regalo nga mga lalaki” basi  parig-unon an kongregasyon. (Efe. 4:12) Pero kita ngatanan makakabulig ha ira nga matuman inin importante nga responsabilidad. Ha pag-ilustrar: An pipira ha aton direkta nga nakikigbahin ha konstruksyon ha usa nga Kingdom Hall. An iba nasuporta ha buruhaton pinaagi ha pagtagana hin pagkaon, nabulig para ha transportasyon, ngan ha iba pa nga paagi. Sugad man, kita ngatanan makakasuporta han paningkamot han mga ministeryal nga surugoon, tigurang ha kongregasyon, ngan paramangno han sirkito pinaagi han aton ginyayakan ngan ginbubuhat. Hisgotan naton kon paonan-o kita magpapahimulos ha ira pagin maduruto ngan kon paonan-o naton maipapakita nga gin-aapresyar ta hira ngan hi Jesus, an naghatag hini nga “mga regalo nga mga lalaki.”

AN MGA MINISTERYAL NGA SURUGOON ‘NABULIG HA IBA’

4. Ano an pipira nga “pagbulig” an ginhimo han mga ministeryal nga surugoon ha siyahan nga siglo?

⁴ Ha siyahan nga siglo, ginpili an pipira nga brother nga magin mga ministeryal nga surugoon. (1 Tim. 3:8) Baga hin hira an gin-unabi ni Pablo ha iya surat nga ‘binulig ha iba.’ (1 Cor. 12:28) Salit masisiring naton nga an mga ministeryal nga surugoon nag-aasikaso han importante nga mga butang basi an mga tigurang makapokus ha pagtutdo ngan pag-shepherding. Pananglitan, an mga ministeryal nga surugoon bangin binulig ha pagkopya han Kasuratan o ha pagpalit han mga materyales nga kinahanglan ha pagkopya.

5. Ano an pipira nga pagbulig an ginbubuhat yana han mga ministeryal nga surugoon?

⁵ Pansina an pipira nga pagbulig nga ginbubuhat han mga ministeryal nga surugoon ha iyo kongregasyon. (1 Ped. 4:10) Bangin ig-asayn hira ha panginano han account o mga teritoryo han kongregasyon, ha pag-order hin literatura basi magkaada hito an mga magwarali, ha pag-operate han audio ngan video equipment, ha pagin attendant, o ha pagbulig ha pagmintinar han Kingdom Hall. Ito ngatanan importante para magin mahapsay an buruhaton han kongregasyon. (1 Cor. 14:40) Dugang pa, an pipira nga ministeryal nga surugoon nagdudumara hin mga bahin ha Pagkinabuhi Ngan Ministeryo nga Katirok ngan nagdudumara hin mga pahayag publiko. An usa nga ministeryal nga surugoon bangin liwat pilion nga bumulig ha paramangno han grupo. May mga panahon, nga an kwalipikado nga mga ministeryal nga surugoon igin-uupod han mga tigurang ha pag-shepherding.

6. Ano an pipira nga rason kon kay ano nga gin-aapresyar naton an aton maduruto nga mga ministeryal nga surugoon?

⁶ Paonan-o an kongregasyon nagpapahimulos han buruhaton han mga ministeryal nga surugoon? “Salamat ha aton mga ministeryal nga surugoon kay nai-enjoy ko gud an mga katirok,” siring ni Beberly, b usa nga sister ha Bolivia. “Tungod han ira buruhaton, nakakakanta ako, nakakakomento, nakakapamati ha mga pahayag, ngan nahibabaro tikang ha mga video ngan artwork. Ginpapanginano nira an seguridad ngan adton nakakonektar ha videoconference. Katapos han katirok, nangunguna hira ha paglimpyo, nabulig ha account, ngan ginsisiguro nga may-ada kita literatura nga aton kinahanglan. Mapasalamaton gud ako ha ira!” Hi Leslie nga taga-Colombia nga tigurang an bana, nagsiring: “An akon bana nakadepende ha mga ministeryal nga surugoon ha pagpanginano ha iba-iba nga toka. Kon waray hira, magigin mas busy gud unta hiya, salit mapasalamaton ako han ira kadasig ngan pagin andam ha pagbulig.” Sigurado nga ito liwat an imo inaabat.​—1 Tim. 3:13.

7. Paonan-o naton maipapakita an apresasyon ha mga ministeryal nga surugoon? (Kitaa liwat an piktyur.)

⁷ Bisan kon bangin inaabat naton nga mapasalamaton kita ha mga ministeryal nga surugoon, an Biblia nagdadasig ha aton: “Ipakita an iyo  pagkamapasalamaton.” (Col. 3:15) Iginpakita ni Krzysztof, usa nga tigurang ha Finland, an iya pagin mapasalamaton hini nga paagi, “Nagpapadara ako hin kard o nagti-text nga may-ada teksto ngan gin-uunabi ko an espisipiko nga ginbuhat han ministeryal nga surugoon nga nakadasig ha akon o kon kay ano nga gin-aapresyar ko an iya mga buruhaton.” Hira Pascal ngan Jael nga naukoy ha New Caledonia, espisipiko nga nag-aampo para ha mga ministeryal nga surugoon. Hi Pascal nagsiring, “Hinin bag-o la, an amon mga paghangyo, pangamuyo, ngan pag-ampo han pagpasalamat mahitungod ha ginpili nga mga brother ha amon kongregasyon.” Namamati hi Jehova ha sugad nga mga pag-ampo, ngan nagpapahimulos an bug-os nga kongregasyon.​—2 Cor. 1:11.

MGA TIGURANG HA KONGREGASYON NGA ‘MADURUTO NGA NAGBUBUHAT KAUPOD NIYO’

8. Kay ano nga nakasiring hi Pablo ha iya surat nga an mga tigurang ha siyahan nga siglo “maduruto nga nagbubuhat”? (1 Tesalonica 5:​12, 13)

⁸ An mga tigurang ha siyahan nga siglo maduruto ha kongregasyon. (Basaha an 1 Tesalonica 5:​12, 13; 1 Tim. 5:17) “Nangunguna” hira ha kongregasyon—nagdudumara hin mga katirok ngan naghihimo hin mga desisyon sugad nga lawas han mga tigurang. “Nagsasagdon” hira ha kabugtoan—naghahatag hin espisipiko nga sagdon pero mahigugmaon basi protektaran an kongregasyon. (1 Tes. 2:​11, 12; 2 Tim. 4:2) Syempre ini nga kalalakin-an maduruto liwat ha pagtagana ha ira mga pamilya ngan ha pagtipig nga marig-on an ira espirituwalidad.​—1 Tim. 3:​2, 4; Tito 1:​6-9.

9. Ano an pipira nga responsabilidad an ginpapanginano yana han mga tigurang?

⁹ An mga tigurang busy yana. Mga ebanghelisador hira. (2 Tim. 4:5) Madasigon hira nga nangunguna ha ministeryo, ha pag-organisar han pagsangyaw nga buruhaton ha ira teritoryo, ngan ha pag-train ha aton basi magin epektibo kita ha pagsangyaw ngan pagtutdo. Mga hukom liwat hira nga maloloy-on ngan waray ginpapaurog. Kon an usa nga Kristiano nakahimo hin seryoso nga sala, an mga tigurang naniningkamot ha pagbulig ha iya nga maibalik an iya pakigsangkay kan Jehova. Sugad man, gintitipigan nira hin maopay nga limpyo an kongregasyon. (1 Cor. 5:​12, 13; Gal. 6:1) Labaw ha ngatanan, an mga tigurang kilala sugad nga mga paraataman. (1 Ped. 5:​1-3) Nagdudumara hira hin inandam hin maopay nga mga pahayag nga basado ha Biblia, naniningkamot nga makilala an ngatanan ha kongregasyon, ngan nagsi-shepherding. Labot pa hito nga mga toka, an pipira nga tigurang nabulig liwat ha konstruksyon ngan pagmintinar han Kingdom Hall, pag-organisar han kombensyon, ngan ha buruhaton han mga Hospital Liaison Committee ngan Patient Visitation Group. Maduruto gud an mga tigurang ha pagbulig ha aton!

10. Ano an pipira nga rason kon kay ano nga gin-aapresyar ta an aton maduruto nga mga tigurang?

¹⁰ Igintagna ni Jehova nga an mga paraataman mag-aataman ha aton hin maopay ngan “diri na [kita] mahahadlok o malilisang.” (Jer. 23:4) Naeksperyensyahan ni Johanna, usa nga sister ha Finland, nga tinuod ito nga mga pulong han an iya nanay nagkasakit hin grabe. Hiya nagsiring: “Bisan kon nakukurian ako nga isumat ha iba an akon mga inaabat, usa nga tigurang nga diri ko gud kilala hin maopay an nagin pasensyoso ha akon, nag-ampo kaupod ko, ngan ginpasarig niya ako nga hinigugma ako ni Jehova. Diri ko nahinunumdoman kon ano gud an iya ginsiring, pero nahinunumdoman ko nga inabat ako nga safe ako. Kombinsido ako nga ginpadara hiya ni Jehova basi buligan ako ha eksakto gud nga panahon.” Ano na an naibulig ha imo han mga tigurang ha iyo kongregasyon?

11. Paonan-o naton maipapakita an aton apresasyon ha mga tigurang? (Kitaa liwat an piktyur.)

¹¹ Karuyag ni Jehova nga ipakita naton an aton kinasingkasing nga apresasyon ha mga tigurang “tungod han ira buruhaton.” (1 Tes. 5:​12, 13) Hi Henrietta nga taga-Finland liwat, nagsiring: “An mga tigurang andam ha pagbulig ha iba, pero diri  ito nagpapasabot nga mas daku an ira panahon ngan kusog o waray hira mga problema. Danay nasiring ako ha ira: ‘Maaram ka ba? Maopay ka gud nga tigurang. Unta maaram ka hito.’” Usa nga sister ha Türkiye c nga hi Sera, nagsiring: “Kinahanglan han mga tigurang hin ‘gasolina’ basi makapadayon, siring pa. Salit puydi kita maghatag ha ira hin kard, imbitaron hira ha pangaon, o umupod ha ira pagministeryo.” May tigurang ba nga gin-aapresyar mo gud an iya mga paningkamot? Ipakita ha iya nga mapasalamaton ka han iya ginbubuhat.​—1 Cor. 16:18.

GINPAPARIG-ON KITA HAN MGA PARAMANGNO HAN SIRKITO

12. Ano nga kahikayan an ginhimo basi parig-unon an mga kongregasyon ha siyahan nga siglo? (1 Tesalonica 2:​7, 8)

¹² Naghatag hi Kristo Jesus ha kongregasyon hin “mga regalo nga mga lalaki” nga nag-alagad ha iba pa nga paagi. Gin-gamit niya an mga tigurang ha Jerusalem basi ipadara hira Pablo, Bernabe, ngan iba pa sugad nga nagbibiyahe nga mga paramangno. (Buh. 11:22) Kay ano? Ha pariho nga rason kon kay ano nga ginpili an mga ministeryal nga surugoon ngan mga tigurang: basi parig-unon an mga kongregasyon. (Buh. 15:​40, 41) Nagsakripisyo ini nga mga kalalakin-an ngan iginbutang pa ngani nira an ira mga kinabuhi ha peligro basi tutdoan ngan dasigon an iba.​—Basaha an 1 Tesalonica 2:​7, 8.

13. Ano an pipira nga responsabilidad han mga paramangno han sirkito?

¹³ Agsob magbiyahe an mga paramangno han sirkito. An iba nagbibiyahe hin ginatos ka kilometro basi bisitahon an mga kongregasyon. Kada semana, an usa nga paramangno han sirkito nagpapahayag, nagsi-shepherding, ngan nagdudumara hin miting para ha mga payunir, miting para ha mga tigurang, ngan mga katirok para ha pagsangyaw. Nag-aandam hiya hin mga  pahayag ngan nag-oorganisar hin sirkito nga mga asembleya ngan kombensyon. Nagtututdo hiya ha mga eskwelahan han payunir, naghihikay hin espesyal nga miting kaupod an mga payunir han sirkito, ngan nagdudumara hin iba pa nga importante—danay apurado nga mga toka—nga igin-asayn ha iya han branch office.

14. Ano an pipira nga rason nga gin-aapresyar naton an aton maduruto nga mga paramangno han sirkito?

¹⁴ Paonan-o an mga kongregasyon nagpapahimulos han regalo nga mga paramangno han sirkito? Mahitungod ha mga pagbisita han mga nagbibiyahe nga paramangno, usa nga brother ha Türkiye an nagkomento: “Ha kada nira pagbibisita nadadasig ako nga dugangan an akon panahon ha pagbulig ha kabugtoan. Damu na an akon nakilala nga paramangno han sirkito; pero waray bisan usa an nagpaabat nga baga hin makuri hiya daupon o busy gud.” Hi Johanna nga gin-unabi na nga nakapartner han paramangno han sirkito ha pagsangyaw, pero waray hira nakaistorya bisan usa. “Kondi,” nagsiring hiya, “Pirme ko hihinumdumon ito nga adlaw. An akon duha nga bugto nga babaye binalhin pa la, ngan namimingaw gud ako ha ira. Mahigugmaon nga gindasig ako han paramangno han sirkito ngan ginbuligan nga masabtan nga ha pag-alagad kan Jehova temporaryo la an pagburublag pero ha bag-o nga kalibotan pirme na kita may-ada mga higayon nga magkaurupod.” Damu ha aton an may pariho nga makalilipay nga hinumdóman kaupod an mga paramangno han sirkito.​—Buh. 20:37–21:1.

15. (a) Basado ha 3 Juan 5-8, paonan-o naton maipapakita an aton apresasyon ha mga paramangno han sirkito? (Kitaa liwat an piktyur.) (b) Kay ano nga dapat naton ipakita an konsiderasyon ha mga asawa han pinili nga kalalakin-an, ngan paonan-o ta ito mahihimo? (Kitaa an kahon nga “ Hinumdumi an Ira mga Asawa.”)

¹⁵ Gindasig ni apostol Juan hi Gayo nga ipakita an pagin maabiabihon ha nabisita nga kabugtoan ngan ‘updan hira hin pipira ka distansya ha ira pagbiyahe ha paagi nga takos ha Dios.’ (Basaha  an 3 Juan 5-8.) An usa nga paagi nga mabubuhat ta ito amo an pag-imbitar ha paramangno han sirkito ha pangaon. An usa pa nga paagi amo an pagsuporta ha mga kahikayan han pagsangyaw ha panahon han iya pagbisita. Hi Leslie, nga gin-unabi na, nagpakita han iya pagpasalamat ha iba liwat nga paagi. “Nag-ampo ako kan Jehova nga ihatag an ira mga panginahanglan,” siring niya. “Nagsurat liwat kami han akon bana ha ira, nga nagsusumat nga daku gud an naibulig han ira mga pagbisita ha amon.” Hinumdumi nga an mga paramangno han sirkito pariho ha aton may mga problema ngan kinakapoy. May mga panahon nga nagkakasakit hira, nababaraka, ngan nanluluya pa ngani. Bangin an imo maopay nga mga pulong o simple nga regalo amo an baton ha pag-ampo han iyo paramangno han sirkito!—Prob. 12:25.

KINAHANGLAN NATON AN “MGA REGALO NGA MGA LALAKI”

16. Uyon ha Proberbios 3:​27, ano an bangin igpakiana han mga brother ha ira kalugaringon?

¹⁶ Ha bug-os nga kalibotan, kinahanglan naton hin mas damu pa nga brother nga mag-aalagad sugad nga “mga regalo nga mga lalaki.” Kon bawtismado ka nga brother, ‘kaya mo ba bumulig’? (Basaha an Proberbios 3:27.) Karuyag mo ba magin kwalipikado ha pagin ministeryal nga surugoon? Kon ministeryal nga surugoon ka na, puydi mo ba magin goal an pagin tigurang? d Kaya mo ba maghimo hin mga pagbag-o basi makag-aplay ha School for Kingdom Evangelizers? Ito nga eskwelahan magti-train ha imo ngan mabulig basi mas magamit ka pa gud hin bug-os ni Jesus. Kon inaabat mo nga diri ka kwalipikado, pag-ampo kan Jehova. Hangyoa hiya nga buligan ka pinaagi han iya baraan nga espiritu nga matuman mo hin malampuson an bisan ano nga asaynment nga iginhatag ha imo.​—Luc. 11:13; Buh. 20:28.

17. Ano an ginpapamatud-an han “mga regalo nga mga lalaki” mahitungod han aton Hadi, hi Kristo Jesus?

¹⁷ An mga brother nga ginpili ni Jesus nga “mga regalo nga mga lalaki” ebidensya nga iya kita ginpapangunahan hinin kataposan nga mga adlaw. (Mat. 28:20) Diri ka ba mapasalamaton nga may-ada kita Hadi nga mahigugmaon, mahinatagon, ngan atentibo ngan naghahatag hin kwalipikado nga mga brother ha pag-ataman ha aton mga panginahanglan? Salit pamiling hin mga oportunidad basi ipakita an imo apresasyon hinin maduruto nga kalalakin-an. Ayaw gud hingalimti an pagpasalamat kan Jehova, nga amo an gintitikangan gud han ‘tagsa nga maopay nga regalo ngan han tagsa nga perpekto nga hatag.’—San. 1:17.