1-2. (a) Ano an pipira nga pagruhaduha nga bangin abaton han mga surugoon ni Jehova? (b) Ano an aton hihisgotan hini nga artikulo?

 AN MGA tawo anoman an edad, usahay may mga pagruhaduha. a Pananglitan, imadyina an usa nga batan-on nga Saksi nga naghuhunahuna kon interesado gud ba hi Jehova ha iya. Bangin nagruruhaduha hiya ha pagpabawtismo. O hunahunaa an usa nga brother nga nagdesisyon han batan-on pa hiya nga unahon an mga buruhaton han Ginhadian imbes nga an karera hini nga kalibotan. Yana nga an iya kita igo-igo la para ha iya pamilya, bangin may mga pagruhaduha hiya kon tama ba an iya nagin desisyon. Imadyina an lagas nga sister nga limitado na an kusog. Bangin nanluluya hiya kay diri na niya nahihimo an iya nahihimo hadto. Naipakiana mo na ba ini ha imo kalugaringon: ‘Napapansin gud ba ako ni Jehova? Sulit ba an akon mga iginsakripisyo para kan Jehova? May pulos pa ba gihapon ako kan Jehova?’

² Kon papabay-an la naton nga diri nababaton ini nga mga pakiana, makakaapekto gud ini ha aton pagsingba. Hini nga artikulo, hihisgotan naton kon paonan-o an pagpokus ha mga prinsipyo ha Biblia makakabulig ha aton kon may pagruhaduha kita (1) nga interesado hi Jehova ha aton, (2) nga tama an aton naglabay nga mga desisyon, o (3) nga may pulos la gihapon kita kan Jehova.

KON PAONAN-O MAWAWARA AN IMO MGA PAGRUHADUHA

3. Ano an usa nga paagi nga mahimo naton mawara an aton mga pagruhaduha?

³ An usa nga paagi nga mahimo naton mawara an aton mga  pagruhaduha amo an pamiling ha Pulong han Dios han mga baton ha aton mga pakiana. Kon bubuhaton naton ito, mapapakusog kita, mag-uuswag ha espirituwal, ngan magigin mas ‘marig-on ha pagtoo.’—1 Cor. 16:13.

4. Paonan-o naton ‘masisiguro an ngatanan nga butang’? (1 Tesalonica 5:21)

⁴ Basaha an 1 Tesalonica 5:21. Tigamni nga gin-aaghat kita han Biblia nga ‘siguruhon an ngatanan nga butang.’ Paonan-o ta ini mahihimo? Masisiguro naton nga tinuod an aton gintotoohan pinaagi ha pagkompara hito ha kon ano an ginsisiring han Biblia. Pananglitan, pansina an sitwasyon han batan-on nga naghuhunahuna kon importante gud ba hiya ha Dios. Kakarawaton na la ba niya dayon nga tama ito? Diri, dapat niya ‘siguruhon an ngatanan nga butang’ pinaagi ha paghibaro han mga panhunahuna ni Jehova mahitungod hito.

5. Paonan-o naton “nababatian” an mga baton ni Jehova ha aton mga pakiana?

⁵ Samtang ginbabasa naton an Pulong han Dios, aton “nababatian” an pakiistorya ni Jehova ha aton. Pero dapat diri la naton basta basahon an Biblia kon karuyag naton mahibaroan an iya mga baton ha aton mga pakiana. Dapat ipokus naton an aton pagbasa ha Biblia ha topiko nga naghihisgot hito. Mahimo kita mag-research mahitungod hito nga topiko gamit an damu nga garamiton ha pag-aram nga igintatagana han organisasyon ni Jehova. (Prob. 2:​3-6) Mahimo kita mag-ampo nga giyahan kita ni Jehova ha pag-research ngan buligan kita nga mabilngan an iya baton ha aton pakiana. Katapos, mahimo kita mamiling hin mga prinsipyo ha Biblia ngan praktikal nga impormasyon nga aplikado ha aton sitwasyon. Maopay liwat an pagbasa ha mga rekord ha Biblia hadton puropariho ha aton an sitwasyon.

6. Ano an papel han mga katirok ha pagbulig ha aton nga mawara an aton mga pagruhaduha?

⁶ Aton liwat “nababatian” ha mga katirok an pakiistorya ni Jehova ha aton. Kon regular kita nga naatender ha mga katirok, posible nga may mabatian kita ha pahayag o ha komento tikang ha mamarati nga amo gud an aton kinahanglan basi mawara an aton mga pagruhaduha. (Prob. 27:17) Hisgotan naton yana kon paonan-o mababaton an pipira nga pagruhaduha.

KON NAGRURUHADUHA KA NGA HI JEHOVA INTERESADO HA IMO

7. Ano an bangin igpakiana han pipira?

⁷ Naipakiana mo na ba ini, ‘Napapansin gud ba ako ni Jehova?’ Kon inaabat mo nga diri ka importante, an paghunahuna mahitungod han pakigsangkay ha Maglalarang han uniberso baga gud hin imposible. Posible nga nahunahuna liwat ito ni Hadi David. Naimpres hiya nga napapansin ni Jehova an mga tawo ngan nagpakiana hiya: “O Jehova, ano ba an tawo nga sadang mo hiya tagdon, an anak han mortal nga tawo nga sadang mo hiya hatagan hin atensyon?” (Sal. 144:3) Diin mo mabibilngan an baton hini nga pakiana?

8. Sumala ha 1 Samuel 16:​6, 7, 10-12, ano an napapansin ni Jehova ha mga tawo?

⁸ Nahibaroan naton ha Biblia nga napapansin ni Jehova adton baga hin diri importante ha iba. Pananglitan, ginsugo ni Jehova hi Samuel nga kumadto ha balay ni Jesse basi dihogan sugad nga tiarabot nga hadi han Israel an usa han iya mga anak nga lalaki. Gintawag ni Jesse an pito han iya walo nga anak nga lalaki basi makilala hi Samuel pero waray niya ig-upod hi David, an puto. b Pero hi David an  ginpili ni Jehova. (Basaha an 1 Samuel 16:​6, 7, 10-12.) Nakita ni Jehova kon hin-o gud hi David—usa nga batan-on nga nahigugma gud ha espirituwal nga mga butang.

9. Kay ano nga makakasiguro ka nga interesado hi Jehova ha imo? (Kitaa liwat an piktyur.)

⁹ Hunahunaa kon paonan-o iginpakita na ni Jehova nga napapansin ka niya. Naghahatag hiya ha imo hin sagdon nga eksakto gud ha imo mga panginahanglan. (Sal. 32:8) Paonan-o niya ito mahihimo kon diri ka niya kilala hin maopay? (Sal. 139:1) Kon igin-aaplikar mo an sagdon ni Jehova ngan ginkikita kon paonan-o ito nabulig ha imo, magigin kombinsido ka nga interesado hi Jehova ha imo. (1 Cron. 28:9; Buh. 17:​26, 27) Napapansin ni Jehova an imo mga paningkamot. Nakikita niya an imo mag-opay nga kalidad ngan karuyag niya nga magin sangkay ka niya. (Jer. 17:10) Karuyag niya nga karawaton mo an iya imbitasyon nga magin imo Sangkay.​—1 Juan 4:19.

KON NAGRURUHADUHA KA NGA TAMA AN IMO NAGIN DESISYON HA NAGLABAY

10. Kon ginhuhunahuna naton an mahitungod ha aton naglabay nga mga desisyon, ano an bangin naton igpakiana ha aton kalugaringon?

¹⁰ Usahay, an iba mahimo maghunahuna han ira mga desisyon hadto ngan magruhaduha kon tama ba an ira nagin desisyon. Posible nga may ginbayaan hira nga maopay nga trabaho o mainuswagon nga negosyo basi damu an mahimo ha pag-alagad kan Jehova. Yana linabay an panahon, bangin pa ngani mga dekada. Posible nga makita nira an ira mga kakilala nga nagpokus ha sekular nga mga trabaho ngan yana daku na an kità ngan komportable na an kinabuhi. Sugad nga resulta, bangin magpakiana hira: ‘Sulit ba an akon ginhimo nga mga sakripisyo para kan Jehova? O tungod hito may mga oportunidad lugod nga waray ko makarawat?’

11. Ano an nakapabaraka ha nagsurat han Salmo 73?

 ¹¹ Kon nakapakiana ka hin sugad, pansina kon ano an gin-abat han nagsurat han Salmo 73. Nakita niya nga an iba nag-i-enjoy ha baga hin mahimsog, mainuswagon, ngan waray istres nga kinabuhi. (Sal. 73:​3-5, 12) Samtang iya gin-oobserbaran hira ngan an ira pagin baga hin malampuson, inabat niya nga an iya mga paningkamot ha pag-alagad kan Jehova waray pulos. “Nabaraka [hiya] ha bug-os nga adlaw” tungod hinin negatibo nga panhunahuna. (Sal. 73:​13, 14) Paonan-o niya nalamposan an iya negatibo nga mga inaabat?

12. Sumala ha Salmo 73:​16-18, paonan-o nalamposan han parasurat an iya negatibo nga mga inaabat?

¹² Basaha an Salmo 73:​16-18. An salmista kinadto ha santuaryo ni Jehova. Didto, nakapanhunahuna hiya hin klaro. Nasabtan niya nga bisan kon an iba baga hin may komportable nga kinabuhi, waray hira paglaom ha tiarabot. Tungod hini nga hilarom nga pagsabot, nagkaada hiya murayaw nga hunahuna ha paghibaro nga an pagkab-ot hin espirituwal nga mga butang amo an pinakamaopay nga desisyon. Sugad nga resulta, nagin determinado hiya nga padayon nga mag-alagad kan Jehova.​—Sal. 73:​23-28.

13. Paonan-o mahimo magin murayaw an imo hunahuna kon nagruruhaduha ka mahitungod ha imo naglabay nga mga desisyon? (Kitaa liwat an piktyur.)

¹³ Magkakaada ka liwat sugad nga kamurayawan ha hunahuna ha bulig han Pulong han Dios. Paonan-o? Hunahunaa an mag-opay nga butang nga may-ada ka—upod na an mga bahandi ha langit—ngan ikompara ini hadton an balos amo an kon ano la an maihahatag hini nga kalibotan. Bangin bug-os hira nga sumarig ha ira mga kalamposan hini nga kinabuhi kay waray hira ginpapamulat ha tiarabot. Pero nagsasaad hi Jehova ha imo hin mga  bendisyon labaw pa kay ha imo maiimadyin. (Sal. 145:16) Hunahunaa liwat ini: Mahibabaroan gud ba naton kon ano an aton nagin kinabuhi kon iba an aton nagin desisyon? Usa la an sigurado: Adton nagdesisyon basado ha ira gugma ha Dios ngan gugma ha igkasi-tawo magkakaada pirme mga butang ha kinabuhi nga maghihimo ha ira nga magin malipayon gud.

KON NAGRURUHADUHA KA NGA MAY PULOS KA KAN JEHOVA

14. Kay ano nga an iba waray kompyansa, ngan ano an bangin nira igpakiana ha ira kalugaringon?

¹⁴ An pipira han mga surugoon ni Jehova nakakaeksperyensya han mga epekto han kalagas, problema ha kahimsog, o depekto ha panlawas. Tungod hito bangin magruhaduha hira kon importante ba hira kan Jehova. Bangin hira magpakiana, ‘May pulos pa ba gihapon ako kan Jehova?’

15. Ha ano kombinsido an nagsurat han Salmo 71?

¹⁵ An nagsurat han Salmo 71 nagpahayag hin pariho nga inaabat. Hiya nag-ampo: “Ayaw ako pagpabay-i kon maluya na ako.” (Sal. 71:​9, 18) Bisan pa hito, nagpabilin nga kombinsido an salmista nga kon maunungon nga mag-alagad hiya kan Jehova, gigiyahan ngan susuportaran hiya. Sugad han nahibaroan han salmista, nalilipay hi Jehova hadton nagbubuhat han ira pinakamaopay ha pag-alagad ha iya bisan pa han ira mga limitasyon.​—Sal. 37:​23-25.

16. Ha ano nga mga paagi may pulos kan Jehova an mga lagas? (Salmo 92:​12-15)

¹⁶ Mga lagas, hunahunaa kon paonan-o kamo ginkikita ni Jehova. Makakabulig hiya ha iyo nga mag-alagad kamo hin matinumanon bisan pa kon may mga limitasyon kamo ha pisikal. (Basaha an Salmo 92:​12-15.) Imbes nga magpokus ha diri mo na kaya mahimo, pagpokus ha puydi mo mahimo. Pananglitan,  puydi mo parig-unon an iba pinaagi han imo matinumanon nga ehemplo ngan pagpakita hin personal nga interes. Puydi mo ig-istorya an pagbulig ni Jehova ha imo ha sulod hin mga katuigan ngan isumat an imo marig-on nga paglaom ha katumanan han iya mga saad. Ayaw liwat kalimti nga makakabulig gud an imo mga pag-ampo ha iba. (1 Ped. 3:12) Anoman an aton mga kahimtang, kita ngatanan may maihahatag kan Jehova ngan ha iba.

17. Kay ano nga dapat diri naton ikompara an aton kalugaringon ha iba?

¹⁷ Kon nasusubo ka gud kay diri na damu an imo nahihimo ha pag-alagad kan Jehova, sarig nga gin-aapresyar gud niya anoman an imo makakaya. Bangin ikompara mo an imo nahihimo ha nahihimo han iba. Pero ayaw ito buhata! Kay ano? Kay hi Jehova diri nagkukompara. (Gal. 6:4) Pananglitan, gintagan ni Maria hi Jesus hin regalo nga marahalon nga mahamot nga lana. (Juan 12:​3-5) Ha kabaliktaran, an nagkukuri nga balo nga babaye nagdonar ha templo hin duha nga gudtiay nga sinselyo nga gutiay gud an kantidad. (Luc. 21:​1-4) Pero nakita ni Jesus iton duha nga regalo nga pariho kapahayagan han pagtoo. Gin-aapresyar gud han iya Amay, hi Jehova, an bisan ano nga imo mahihimo nga napagios pinaagi han imo debosyon ngan gugma ha iya, bisan kon baga hin gutiay la ito para ha imo.

18. Ano an mabulig ha aton nga mawara an aton mga pagruhaduha? (Kitaa liwat an kahon nga “ An Pulong ni Jehova Makakabulig ha Imo nga Mawara an mga Pagruhaduha.”)

¹⁸ Usahay kita ngatanan may mga pagruhaduha. Pero sugad han aton nahibaroan, an masasarigan nga Pulong han Dios han kamatuoran, an Biblia, makakabulig ha aton nga maatohan ito. Salit himoa an imo pinakamaopay ha pagbiling han mga baton han imo mga pakiana, ngan magigin kombinsido ka imbes nga manluya. Sigurado nga napapansin ka ni Jehova sugad nga indibiduwal. Gin-aapresyar niya an imo mga sakripisyo ngan tutumanon niya an iya saad nga babalosan ka niya. Sarig nga ginkikita ni Jehova an ngatanan niya nga maunungon nga surugoon sugad nga angayan han iya gugma ngan atensyon.