1-2. Ano an nahitabo samtang nagbabaktas an duha han mga disipulo ni Jesus tipakadto ha Emaus?

 NISAN 16, 33 C.E. adto nga adlaw. An mga disipulo ni Jesus nasusubo ngan waray nahihimo tungod han kahadlok. An duha ha ira binaya ha Jerusalem ngan kinadto ha Emaus, usa nga baryo nga mga 11 ka kilometro tikang ha Jerusalem. Ini nga kalalakin-an nasusubo gud kay hi Jesus, nga pirme nira kaupod-upod, ginpatay pa la. An Mesias nga ira ginlalaoman nga may bubuhaton para ha ira, baga hin waray matuman. Pero may-ada magigin surprisa hito nga kalalakin-an.

² Usa nga estranghero an dinaop ngan inupod ha ira ha pagbaktas. Igin-istorya han mga disipulo an ira kasubo ha nahitabo kan Jesus. Ito nga estranghero nagtikang pakiistorya ha ira ha mga butang nga diri gud nira makakalimtan. “Tikang kan Moises ngan ha ngatanan nga sinurat han mga Propeta,” ginsaysay niya kon kay ano nga an Mesias kinahanglan mag-antos ngan mamatay. Han an tulo nga kalalakin-an inabot ha Emaus, nagsumat an estranghero kon hin-o hiya—an ginbanhaw nga hi Jesus. Aton gud maiimadyin an kalipay han mga disipulo han nahibaroan nira nga buhi an Mesias!—Luc. 24:​13-35.

3-4. Ano an nahitabo ha mga disipulo ni Jesus, ngan ano an aton mahibabaroan hini nga artikulo? (Buhat 1:3)

³ Nagpakita hi Jesus ha iya mga disipulo hin damu ka beses ha sulod han iya ultimo nga 40 ka adlaw ha tuna. (Basaha an Buhat 1:3.) Hito nga panahon, an mga sumurunod ni Jesus nga nasusubo ngan nahahadlok nagin malipayon, may kompyansa, ngan maisugon  nga parasangyaw ngan magturutdo han Ginhadian. a

⁴ Makakapahimulos kita tikang ha pag-aram hini nga eksayting nga peryodo han kinabuhi ni Jesus. Hini nga artikulo makikita naton kon paonan-o gin-gamit ni Jesus ini nga panahon (1) ha pagdasig ha iya mga disipulo, (2) ha pagpahilarom han ira pagsabot ha Kasuratan, ngan (3) ha pag-train ha ira nga magdumara hin mas daku nga mga responsabilidad. Ha tagsa hini, makikita naton kon paonan-o naton masusubad an ehemplo ni Jesus.

DASIGA AN IBA

5. Kay ano nga an mga disipulo ni Jesus nagkinahanglan hin pagdasig?

⁵ An mga disipulo ni Jesus nagkinahanglan hin pagdasig. Kay ano? Kay an iba may ginbayaan nga balay, pamilya, negosyo basi umupod kan Jesus. (Mat. 19:27) An iba gintratar hin maraot tungod kay nagin mga disipulo niya hira. (Juan 9:22) Ginhimo nira ini nga mga sakripisyo kay natoo hira nga hi Jesus an iginsaad nga Mesias. (Mat. 16:16) Pero han ginpatay hi Jesus, nanluya hira tungod kay an ira ginlalaoman waray matuman.

6. Ano an ginbuhat ni Jesus katapos hiya banhawon?

⁶ Waray ruhaduha, nakita ni Jesus nga an kasubo han iya mga disipulo diri sugad nga kaluyahan ha espirituwal kondi sugad nga normal nga reaksyon kon namamatayan. Salit hito mismo nga adlaw han ginbanhaw hiya, nagtikang hiya pagdasig ha iya kasangkayan. Pananglitan, nagpakita hiya kan Maria Magdalena samtang nagtitinangis hiya ha lubnganan ni Jesus. (Juan 20:​11, 16) Nagpakita liwat hiya ha duha nga disipulo nga gin-unabi ha tinikangan hini nga artikulo. Ngan nagpakita hiya kan apostol Pedro. (Luc. 24:34) Ano an aton mahibabaroan ha ehemplo ni Jesus? Pansina kon ano an nahitabo ha iya siyahan nga pagpakita.

7. Sugad han nakarekord ha Juan 20:​11-16, ano an naobserbaran ni Jesus nga ginbubuhat ni Maria temprano ha aga han Nisan 16, ngan ano an ginbuhat niya para kan Maria? (Kitaa liwat an piktyur.)

⁷ Basaha an Juan 20:​11-16. Temprano ha aga han Nisan 16, damu nga matinumanon nga kababayin-an an nagpakadto ha lugar kon diin iginbutang an patay nga lawas ni Jesus. (Luc. 24:​1, 10)  Magpokus kita ha eksperyensya ha usa han kababayin-an, hi Maria Magdalena. Han inabot hi Maria ha lubnganan, waray ito sulod. Dinalagan hiya basi sumatan hira Pedro ngan Juan. Ini nga kalalakin-an nandadlagan ngadto ha lubnganan ngan sinunod ha ira hi Maria. Katapos makompirma nga waray didto an lawas ni Jesus, inuli hira. Pero hi Maria waray umuli. Nagpabilin hiya didto ngan nagtitinangis. Diri hiya maaram nga ginkikita hiya ni Jesus. Naobserbaran niya an pagtinangis hinin matinumanon nga babaye ngan nalooy gud hiya ha iya. Salit nagpakita hi Jesus ha iya ngan may-ada hiya ginbuhat nga simple nga nakadasig gud kan Maria. Nakiistorya hi Jesus ha iya ngan gintagan hiya hin importante nga toka—ibalita ha iya kabugtoan an pagkabanhaw ni Jesus.​—Juan 20:​17, 18.

8. Paonan-o naton masusubad hi Jesus?

⁸ Paonan-o naton masusubad hi Jesus? Daku an aton mahihimo ha pagdasig ha aton kabugtoan nga padayon nga mag-alagad kan Jehova kon pariho kan Jesus maaram kita han ira problema, ngan kon makikiistorya kita ha ira nga may empatiya. Pansina an eksperyensya han usa nga sister nga hi Jocelyn, nga may bugto nga babaye nga namatay ha aksidente. “Ha sulod hin damu ka bulan, masurub-on gud ako,” siring niya. Pero an brother ngan an iya asawa nag-imbitar ha iya ngadto ha ira balay, namati ha iya nga may empatiya, ngan ginpasarig hiya nga presyoso hiya kan Jehova. Nagsiring hi Jocelyn: “Inabat ko nga baga hin gin-gamit hira ni Jehova nga kuhaon ako tikang ha ginbabagyo nga dagat ha kagab-ihon, ngan iginsakay ako ha lifeboat. Ginbuligan nira ako nga maibalik an akon hingyap nga padayon nga mag-alagad kan Jehova.” Kita liwat makakadasig ha iba pinaagi ha pagpamati hin maopay samtang iginsusumat nira an ira mga inaabat ngan pinaagi ha pakiistorya ha ira nga may empatiya, nga may tumong nga maparig-on an ira pag-alagad kan Jehova.​—Roma 12:15.

MANGATADONGAN UYON HA KASURATAN

9. Ano nga problema an gin-atubang han mga disipulo ni Jesus, ngan paonan-o hira ginbuligan ni Jesus?

⁹ Ginkarawat han mga disipulo ni Jesus an Pulong han Dios ngan naningkamot gud ha pag-aplikar hito ha ira kinabuhi. (Juan 17:6) Pero diri nira masabtan kon kay ano nga ginpatay hi Jesus sugad nga kriminal. Maaram hi Jesus nga an ira pagruhaduha diri tungod kay maraot an ira kasingkasing, kondi tungod ha kakulang hin pagsabot. (Luc. 9:​44, 45; Juan 20:9) Salit gintutdoan niya hira nga mangatadongan uyon ha Kasuratan. Pansina kon ano an iya ginbuhat han nagpakita hiya ha duha nga disipulo ha dalan tipakadto ha Emaus.

10. Paonan-o ginbuligan ni Jesus an iya mga disipulo nga masabtan nga hiya gud an Mesias? (Lucas 24:​18-27)

¹⁰ Basaha an Lucas 24:​18-27. Pansina nga waray dayon ni Jesus sumati an kalalakin-an kon hin-o hiya. Lugod, nagpakiana hiya. Kay ano? Bangin karuyag niya nga ipahayag nira an aada ha ira hunahuna ngan kasingkasing. Ngan ito an ira ginbuhat. Nagsumat hira ha iya nga naglaom hira nga tatalwason ni Jesus an Israel tikang ha pagtalumpigos han mga Romano. Pagkatapos nira maisumat hin klaro an ira mga ginkakabarak-an, gin-gamit ni Jesus an Kasuratan basi buligan an kalalakin-an nga masabtan nga damu an natuman nga mga tagna. b Hito nga gab-i, naggahin hi Jesus hin panahon nga isaysay ha iba nga mga disipulo ini nga mga kamatuoran. (Luc. 24:​33-48) Ano an aton mahibabaroan tikang hini nga rekord?

11-12. (a) Ano nga leksyon an aton mahibabaroan ha paagi han pagtutdo ni Jesus han mga kamatuoran ha Biblia? (Kitaa liwat an mga piktyur.) (b) Paonan-o ginbuligan hi Nortey han nagba-Bible study ha iya?

¹¹ Paonan-o naton masusubad hi Jesus? Siyahan, kon nagtututdo ha mga Bible study, pagbangon hin mataktika nga mga pakiana nga mabulig  ha ira nga maipahayag an aada ha ira hunahuna ngan kasingkasing. (Prob. 20:5) Kon masabtan mo na an ira mga inaabat, ipakita ha ira kon paonan-o mabibilngan an espisipiko nga mga teksto nga naaplikar ha ira mga kahimtang. Ayaw isumat ha ira kon ano an hihimoon. Lugod, buligi hira nga mangatadongan uyon ha Kasuratan ngan masabtan kon paonan-o nira maiaaplikar an mga prinsipyo ha Biblia ha ira kinabuhi. Pansina an eksperyensya han brother ha Ghana nga hi Nortey.

¹² Han 16 anyos hi Nortey, nagtikang hiya pag-aram ha Biblia. Pero waray pag-iha, ginkontra hiya han iya pamilya. Ano an nakabulig ha iya nga magpabilin nga marig-on? Gin-gamit han nagba-Bible study ha iya an Mateo kapitulo 10 basi isaysay nga pagtitimarauton an tinuod nga mga Kristiano. “Salit han nagtikang an pagtimaraot,” siring ni Nortey, “Kombinsido ako nga nabilngan ko na an kamatuoran.” Iginpakita liwat han nagba-Bible study ha iya an Mateo 10:16 basi hiya magin maikmat ngan matinalahuron kon nagsasaysay ha iya mga kapamilya mahitungod han iya mga gintotoohan. Katapos han bawtismo ni Nortey, karuyag niya magpayunir, pero naglalaom an iya tatay nga maeskwela hiya ha unibersidad. Imbes nga sidngan hiya kon ano an bubuhaton, an nagba-Bible study ha iya nagbangon hin mga pakiana ngan ginbuligan hiya nga mangatadongan uyon ha mga prinsipyo ha Biblia. Ano an resulta? Nagdesisyon hi Nortey nga sumulod ha bug-os-panahon nga pag-alagad. Ginpalayas hiya han iya tatay. Ano an gin-abat ni Nortey hini nga mga nahitabo ha iya? “Kombinsido ako nga tama an akon desisyon,” hiya nagsiring. Kon naggagahin liwat kita hin panahon nga buligan an iba nga mangatadongan uyon ha Kasuratan, makakabulig kita ha ira nga magin marig-on nga mga Kristiano.​—Efe. 3:​16-19.

BULIGI AN MGA BROTHER NGA MAGIN KWALIPIKADO NGA “MGA REGALO NGA MGA LALAKI”

13. Ano an ginbuhat ni Jesus basi masiguro nga an buruhaton han iya Amay padayon nga mapapanginano? (Efeso 4:8)

¹³ Han nakanhi hi Jesus ha tuna, ginpanginano gud niya hin maopay an buruhaton han iya Amay nga iginhatag ha iya. (Juan 17:4) Pero hi Jesus waray hini nga disposisyon, ‘Kon karuyag mo nga tama an pagkahimo han usa nga butang, dapat ikaw mismo an magbuhat hito.’ Ha iya tulo ngan tunga ka tuig nga pagministeryo, gin-train niya an iba basi tumanon an buruhaton. Antes bumalik hi Jesus ha langit, gintaporan niya an  iya mga disipulo hin responsabilidad nga atamanon an presyoso nga mga karnero ni Jehova ngan manguna ha pagsangyaw ngan pagtutdo nga buruhaton, posible an pipira ha ira mga 20 anyos. (Basaha an Efeso 4:8.) Paonan-o gin-gamit ni Jesus an iya ultimo nga 40 ka adlaw basi buligan ini nga dedikado, maunungon, ngan maduruto nga kalalakin-an basi magin kwalipikado nga magin “mga regalo nga mga lalaki”?​—Kitaa an study note ha Efeso 4:8.

14. Paonan-o ginbuligan ni Jesus nga magtubo ha espirituwal an iya mga disipulo ha iya ultimo nga 40 ka adlaw ha tuna? (Kitaa liwat an piktyur.)

¹⁴ Prangka nga ginsagdonan ni Jesus an iya mga disipulo pero ha mahigugmaon nga paagi. Pananglitan, napansin niya nga an pipira ha ira may tendensya nga magruhaduha, salit ginsagdonan niya hira. (Luc. 24:​25-27; Juan 20:27) Ginpabug-atan niya ha ira nga kinahanglan magin mas importante ha ira an pag-ataman ha panon kay ha ira sekular nga mga trabaho. (Juan 21:15) Ginpahinumdoman niya hira nga diri sobra nga mabaraka mahitungod ha mga pribilehiyo nga bangin makarawat han iba ha pag-alagad kan Jehova. (Juan 21:​20-22) Ngan gintadong niya an pipira nira nga sayop nga ideya mahitungod han Ginhadian ngan ginbuligan hira nga magpokus ha pagsangyaw han maopay nga sumat. (Buh. 1:​6-8) Ano an mahibabaroan han mga tigurang kan Jesus?

15-16. (a) Ha ano nga mga paagi masusubad han mga tigurang hi Jesus? Isaysay. (b) Paonan-o hi Patrick nakabenepisyo ha sagdon?

¹⁵ Paonan-o masusubad han mga tigurang hi Jesus? Kinahanglan nira i-train ngan buligan an mga brother, posible upod hito an mga batan-on, para magin kwalipikado ha mas daku nga responsabilidad. c Diri naglalaom an mga tigurang nga magigin perpekto an ira ginti-train. Dapat hira mahigugmaon nga maghatag hin sagdon basi ini nga batan-on nga mga brother magkaada eksperyensya ngan makasabot nga kinahanglan magin mapainubsanon, matinumanon, ngan andam bumulig ha iba.​—1 Tim. 3:1; 2 Tim. 2:2; 1 Ped. 5:5.

¹⁶ Pansina kon paonan-o an brother nga hi Patrick nakabenepisyo ha sagdon. Sugad nga batan-on, kasagaran na nga masakit hiya magyakan ngan nagbubuhat hin diri maopay ha iba, bisan  ha mga sister. Napansin han hamtong nga tigurang an mga kaluyahan ni Patrick ngan buotan nga ginsagdonan hiya pero ha prangka nga paagi. “Nalipay ako han iya ginhimo,” siring ni Patrick. “Hadto nanluluya ako kon nakakakita ako nga an iba nga brother nakakakarawat hin mga pribilehiyo ha pag-alagad nga karuyag ko. Pero an sagdon han tigurang nakabulig ha akon nga masabtan nga kinahanglan magpokus ha mapainubsanon nga pagbulig ha kabugtoan imbes ha pagkarawat han pipira nga posisyon o pribilehiyo ha kongregasyon.” Sugad nga resulta, ginpili nga magin tigurang hi Patrick han sobra 20 anyos hiya.​—Prob. 27:9.

17. Paonan-o iginpakita ni Jesus nga natapod hiya ha iya mga disipulo?

¹⁷ Gintagan ni Jesus an iya mga disipulo han responsabilidad diri la ha pagsangyaw kondi pati liwat ha pagtutdo. (Kitaa an “itinuturo sa kanila” nga study note ha Tagalog ha Mateo 28:20.) Bangin inabat han mga disipulo nga diri hira kwalipikado para hito nga toka. Pero waray magruhaduha hi Jesus nga kaya nira an buruhaton, ngan iginsumat niya ito ha ira. Tungod kay bug-os nga nasarig hi Jesus ha ira, hiya nagsiring: “Sugad la nga ginsugo ako han Amay, ginsusugo ko liwat kamo.”​—Juan 20:21.

18. Paonan-o masusubad han mga tigurang hi Jesus?

¹⁸ Paonan-o masusubad han mga tigurang hi Jesus? Ginti-train han eksperyensyado nga mga tigurang an iba pinaagi ha paghatag hin mga responsabilidad. (Fil. 2:​19-22) Pananglitan, ginpapabulig han mga tigurang an mga batan-on ha paglimpyo ngan pagmintinar han Kingdom Hall. Mahimo tagan han mga tigurang an mga brother hin toka, ig-train hira kon paonan-o ito bubuhaton, ngan taporan hira ha pagbuhat hito. An bag-o nga tigurang nga hi Matthew nagsiring nga gin-aapresyar gud niya an eksperyensyado nga mga tigurang nga nag-train ha iya hin maopay basi mahimo an usa nga toka ngan gintaporan hiya nga tapuson ito. Hiya nagsiring, “Han nakahimo ako hin mga sayop ginbuligan nira ako nga masabtan kon paonan-o ako mahibabaro tikang ha akon mga sayop ngan mag-uuswag.” d

19. Ano an dapat naton magin determinasyon?

¹⁹ Gin-gamit ni Jesus an iya ultimo nga 40 ka adlaw ha tuna ha pagdasig, pagtutdo, ngan pag-train ha iba. Hinaot magin determinado kita nga sundon hin maopay an iya ehemplo. (1 Ped. 2:21) Bubuligan kita niya nga mahimo ito. Kay ngani, nagsaad hiya: “Kaupod niyo ako ha ngatanan nga adlaw tubtob ha ikatarapos han sistema han mga butang.”​—Mat. 28:20.