1, 2. (a) Paonan-o kita nahibaro nga an mga tawo mahimo magin sangkay han Dios? (b) Ano an aton hihisgotan hini nga artikulo?

TIKANG ha katawo tubtob ha kamatayon, gugma an aton pinakaimportante nga panginahanglan. Ginkikinahanglan ngan ginhihingyap han mga tawo an gugma​—diri la an romantiko nga gugma. Karuyag gud naton magkaada kasangkayan ngan makig-upod ha iba. Pero may usa nga klase hin gugma nga mas ginkikinahanglan naton​—an gugma ni Jehova. Damu an diri natoo nga posible an pagkaada duok ngan maopay gud nga pakigsangkay ha Makagarahum-ha-ngatanan nga Dios, an usa nga diri nakikita nga Espiritu nga aadto ha langit. Sugad ba liwat hito an aton panhunahuna? Diri gud!

² Iginpapakita han Biblia nga nagin sangkay han Dios an diri hingpit nga mga tawo. An ira mga ehemplo angay gud naton pamalandungon tungod kay an pagkaada sugad nga pakigsangkay amo an pinakamapulsanon nga tumong nga mahimo naton kab-uton. Usa han pinakamaopay nga ehemplo nga nagkaada sugad nga pakigsangkay amo hi Abraham. (Basaha an Santiago 2:23.) Kay ano nga hi Abraham nagin duok  gud nga sangkay ni Jehova? Tungod han iya pagtoo. Ngani, gintawag han Biblia hi Abraham nga an ‘amay han ngatanan nga may pagtoo.’ (Roma 4:11) Salit aton hisgotan kon paonan-o an pagtoo ni Abraham nakabulig ha iya nga magin duok nga sangkay han Dios. Ngan maopay nga pakianhan naton an aton kalugaringon, ‘Paonan-o ko masusubad an pagtoo ni Abraham ngan mapaparig-on an akon pakigsangkay kan Jehova?’

3, 4. (a) Ihulagway an posible nga pinakamakuri nga pagsari ha pagtoo ni Abraham. (b) Kay ano nga andam hi Abraham nga ihalad hi Isaac?

³ Handurawa an usa nga lagas nga lalaki nga nasagka ha bukid. Ito an iya pinakamakuri nga paglakaton ha iya bug-os nga kinabuhi. Diri ito tungod kay lagas na hiya. Bisan kon mga 125 anyos na hi Abraham, makusog pa hiya. ^[1] Nasunod ha iya an iya anak nga hi Isaac, nga mga 25 anyos. May dara hi Isaac nga mga sungo. Hi Abraham may taklos nga kutsilyo ngan may dara nga garamiton ha pagharing. Ginsugo hiya ni Jehova nga ihalad an iya anak!​—Gen. 22:1-8.

⁴ Posible nga ito an pinakamakuri nga pagsari ha pagtoo ni Abraham. May mga nasiring nga madarahog an Dios tungod hito nga sugo, ngan an iba naghuhunahuna nga sinugot hi Abraham kay nabutahan hiya, ngan diri niya hinigugma an iya anak. Ginhuhunahuna nira ito kay waray hira pagtoo ngan diri hira maaram han nahihimo han pagtoo. (1 Cor. 2:14-16) Hi Abraham waray sumugot ha Dios tungod kay nabubutahan hiya. Lugod sinugot hiya tungod kay nakakakita hiya pinaagi han mata han pagtoo. Nakita niya nga an iya langitnon nga Amay, hi Jehova, diri gud magsusugo ha Iya mga surugoon hin bisan ano nga magdadaot ha ira ha kadayonan. Maaram hi Abraham nga kon sumugot hiya kan Jehova, bibendisyonan hiya han iya Dios pati na an iya hinigugma nga anak. Ha ano iginbasar an iya pagtoo? Ha kahibaro ngan eksperyensya.

5. Paonan-o posible nga nakilala ni Abraham hi Jehova, ngan ano an nagin epekto ha iya hito nga kahibaro?

⁵ Kahibaro. Bisan kon nagdaku hi Abraham ha Ur, usa nga syudad han mga Kaldeanhon diin kalyap an idolatriya, nakilala niya hi Jehova. Paonan-o ito nahitabo nga an iya mismo tatay nga hi Tera nagsisingba ha idolo? (Jos. 24:2) Waray magsiring an Biblia, pero iginpapakita hito nga nabuhi hi Abraham ha ikasiyam nga henerasyon tikang kan Sem, usa han mga anak ni Noe nga may daku nga pagtoo. Nabuhi hi Sem tubtob han mga 150 anyos hi Abraham. Diri kita sigurado kon nakilala ni Abraham hi Jehova pinaagi kan Sem. Pero baga hin makatadunganon hunahunaon nga iginsumat ni Sem ha iya pamilya an iya hinbabaroan mahitungod kan Jehova. Posible nga ito nga kahibaro nakaabot kan Abraham ngan nakabantad han iya kasingkasing. Salit ginhigugma niya an iya nakilala nga Dios, ngan ito nga kahibaro nakabulig ha iya nga magkaada pagtoo.

6, 7. Paonan-o an mga eksperyensya ni Abraham nagparig-on han iya pagtoo?

⁶ Eksperyensya. Paonan-o nagkaada eksperyensya hi Abraham nga nagparig-on han iya pagtoo kan Jehova? May mga nasiring nga an panhunahuna nakakaapekto ha pagbati ngan an pagbati nakakaapekto ha buhat. Tungod han kahibaro ni Abraham mahitungod ha Dios, inabat niya an hilarom nga pagtahod “kan Jehova, [an] Dios nga Gihitaasi, nga tag-iya han langit ngan han tuna.” (Gen. 14:22) Ito nga pag-abat gintatawag ha Biblia nga ‘kahadlok ha Dios,’ ngan importante ito ha pagkaada duok nga pakigsangkay ha iya. (Heb. 5:7; Sal. 25:14) An kahadlok ha Dios nagpagios kan Abraham nga sumugot.

⁷ Ginsugo han Dios an lagas nga hira Abraham ngan Sarah nga bumaya ha Ur ngan kumadto ha langyaw nga lugar. Maukoy hira ha mga tolda ha ira bug-os nga kinabuhi. Tungod han pagsugot ni Abraham, ginbendisyonan ngan ginpanalipdan hiya ni Jehova. Pananglitan, nahadlok hi Abraham nga patayon hiya ngan agawon an iya  mahusay nga asawa nga hi Sarah. May rason hi Abraham nga mahadlok, pero waray ito makaulang ha iya basi diri sugton hi Jehova. Pipira ka beses nga nanginlabot hi Jehova ngan ginpanalipdan niya hira Abraham ngan Sarah ha milagroso pa ngani nga paagi. (Gen. 12:10-20; 20:2-7, 10-12, 17, 18) Ito nga mga eksperyensya nagparig-on han pagtoo ni Abraham.

8. Paonan-o kita magkakaada kahibaro ngan eksperyensya nga magpaparig-on han aton pakigsangkay an Jehova?

⁸ Puydi ba kita magin duok nga sangkay ni Jehova? Oo! Yana, mababasa naton ha Biblia an kahibaro ngan eksperyensya nga aton ginkikinahanglan. Mas damu gud an aton hinbabaroan kon itanding kan Abraham. (Dan. 12:4; Roma 11:33) An Pulong han Dios puno hin mga bahandi nga mahimo magpahilarom han aton kahibaro mahitungod ha “tag-iya han langit ngan han tuna” ngan bumulig ha aton nga magkaada pagtahod ngan gugma ha iya. Samtang an sugad nga mga pagbati nagpapagios ha aton nga sugton an Dios, naieksperyensyahan naton an kapulsanan han pagsugot ha iya. Napapamatud-an naton nga an iya mga sagdon nagpapanalipod ha aton ngan iya kita ginbibendisyonan ngan ginpaparig-on. Hinbabaroan naton nga an bug-os-kasingkasing nga pag-alagad ha Dios naghahatag ha aton hin katagbaw, kamurayawan, ngan kalipay. (Sal. 34:8; Prob. 10:22) Samtang mas nakikilala naton hi Jehova ngan naieksperyensyahan an iya mga bendisyon, nagigin mas marig-on an aton pagtoo ngan pakigsangkay ha iya.

9, 10. (a) Ano an kinahanglan basi magin mas marig-on an pagkamagsangkay? (b) Ano an nagpapakita nga ginpabilhan ngan ginparig-on ni Abraham an iya pakigsangkay kan Jehova?

⁹ An pakigsangkay maipapariho ha presyoso nga bahandi. (Basaha an Proberbios 17:17.) Pero diri ito pariho ha waray kinabuhi nga butang nga puydi naton mapalit ngan katapos itatago la. Lugod, an pakigsangkay pariho ha buhi nga butang nga kinahanglan atamanon ngan mangnoan basi padayon nga mabuhi ngan magtubo. Ginpabilhan ngan gintipigan ni Abraham an iya pakigsangkay kan Jehova. Paonan-o niya ito ginhimo?

¹⁰ Waray gud maghunahuna hi Abraham nga igo na an iya iginpakita hadto nga kahadlok ha Dios ngan pagkamasinugtanon. Han nagbiyahe hiya pakadto ha Canaan upod an damu nga membro han iya panimalay, nagpagiya hiya kan Jehova ha paghimo hin mga desisyon, gudtiay man o dagku. Usa ka tuig antes matawo hi Isaac, han 99 anyos hi Abraham, nagsugo hi Jehova nga turion an ngatanan nga kalalakin-an ha panimalay ni Abraham. Ginkwestyon ba ito ni Abraham o nagpasangil basi diri sundon ito nga sugo? Waray, sinarig hiya ha Dios ngan sinugot “hadto [mismo] nga adlaw.”​—Gen. 17:10-14, 23.

11. Kay ano nga nabaraka hi Abraham mahitungod han Sodoma ngan Gomorra, ngan paonan-o hiya ginbuligan ni Jehova?

¹¹ Tungod kay hi Abraham pirme nasugot kan Jehova bisan ha baga hin gudtiay nga butang, natipigan  niya an duok ngan marig-on nga pakigsangkay ha Dios. Naisusumat niya kan Jehova an iya inaabat ngan naipapakiana an mga butang nga diri niya nasasabtan. Pananglitan, han hinbaroan niya nga bubungkagon han Dios an syudad han Sodoma ngan Gomorra, nabaraka hi Abraham nga bangin mabungkag an magtadong upod han magraot. Bangin nabaraka hi Abraham ha iya umangkon nga hi Lot ngan ha pamilya ni Lot nga naukoy ha Sodoma. Mapainubsanon gud nga nagpakiana hi Abraham ngan sinarig ha Dios, “an Maghuhukom han bug-os nga tuna.” Mapailubon nga gintutdoan ni Jehova hi Abraham kon mationan-o Hiya kamaloloy-on, nga Iya nababasa an kasingkasing han tagsa nga tawo ngan ginbibiling an magtinumanon basi matalwas, bisan ha panahon han paghukom.​—Gen. 18:22-33.

12, 13. (a) Paonan-o an kahibaro ngan eksperyensya ni Abraham nakabulig ha iya ha urhi? (b) Ano an nagpapakita nga nasarig hi Abraham kan Jehova?

¹² Matin-aw, an ngatanan nga kahibaro ngan eksperyensya ni Abraham nakabulig ha iya nga matipigan an duok nga pakigsangkay kan Jehova. Ha urhi, han inatubang hiya hin makuri nga pagsari​—han ginsugo hiya ni Jehova nga ighalad an iya anak nga hi Isaac—​napamalandong niya kon ano nga klase hin Persona an iya langitnon nga Sangkay. Salit hisgotan naton utro ito nga matinumanon nga lalaki nga nasagka ha bukid ha Moria. Naghunahuna ba hiya nga tigda nga nagbag-o hi Jehova ngan nagin madarahog ngan diri maloloy-on. Para kan Abraham, imposible gud ito! Paonan-o kita nahibaro?

¹³ Antes bayaan ni Abraham an mga surugoon nga kaupod nira, hiya nagsiring: “Pabilin kamo dinhi upod han asno, ngan hi ako ngan an bata makadto didto; ngan kami masingba, ngan mabalik nganhi ha iyo.” (Gen. 22:5) Ano an karuyag sidngon ni Abraham? Nagbubuwa ba hiya ha iya mga surugoon ha pagsiring nga mabalik hi Isaac nga maaram man hiya nga ighahalad niya an iya anak? Diri. An Biblia naghahatag ha aton hin ideya han ginhuhunahuna ni Abraham. (Basaha an Hebreo 11:19.) “Nangatadongan [hi Abraham] nga mababanhaw gud han Dios hi Isaac.” Oo, natoo hi Abraham han pagkabanhaw. Maaram hiya nga iginpahiuli ni Jehova an ira kapasidad ni Sarah nga magkaanak bisan kon lagas na hira. (Heb. 11:11, 12, 18) Nasabtan gud ni Abraham nga waray imposible kan Jehova. Salit nasarig hiya nga anoman an mahitabo hito nga adlaw, mahibabalik ha iya an iya hinigugma nga anak basi matuman an ngatanan nga saad ni Jehova. Diri urusahon nga gintawag hi Abraham nga an ‘amay han ngatanan nga may pagtoo’!

14. Ano nga mga pagsari an imo inaatubang ha pag-alagad kan Jehova, ngan paonan-o mahimo makabulig ha imo an ehemplo ni Abraham?

¹⁴ Kumusta man kita? Yana, diri kita ginsusugo ni Jehova hin sugad hito. Pero karuyag niya nga sugton naton hiya bisan kon may mga sugo hiya nga nakukurian kita pagbuhat o diri naton bug-os nga nasasabtan an hinungdan hito. May nahuhunahuna ka ba nga sugo han Dios nga nakukurian ka pagbuhat? Para ha iba, an pagsangyaw nga buruhaton. Bangin awdanon hira salit  nag-aalang hira pakiistorya ha mga estranghero mahitungod han maopay nga sumat. Para ha pipira, an kahadlok nga magin iba ha kadam-an, bangin ha eskwelahan o ha lugar han trabaho. (Eks. 23:2; 1 Tes. 2:2) Inaabat mo ba nga baga ka hi Abraham nga nasagka ha bukid ha Moria nga may makuri nga toka? Kon oo, mapaparig-on ka gud ha eksperyensya ngan pagtoo ni Abraham! An pagpamalandong ha mga ehemplo han magtinumanon nga kalalakin-an ngan kababayin-an magpapagios ha aton nga subaron hira ngan magin duok kan Jehova sugad nga aton Sangkay.​—Heb. 12:1, 2.

15. Kay ano nga makakasiguro kita nga waray gud magbasol hi Abraham han iya pagkamasinugtanon kan Jehova?

¹⁵ Ha imo hunahuna, nagbasol ba hi Abraham han iya pagkamasinugtanon kan Jehova? Tigamni an ginsisiring han Biblia mahitungod han urhi nga mga adlaw han kinabuhi ni Abraham: “Hi Abraham nabugtoan han iya gininhawa, ngan namatay ha pagkalagas na, lagas nga tawo, ngan puno hin mga katuigan [o, tagbaw].” (Gen. 25:8) Bisan kon 175 anyos na hi Abraham, ginhinumdom niya an iya hilawig nga kinabuhi nga may katagbaw. Kay ano? Tungod kay an iya pakigsangkay kan Jehova nga Dios amo an pinakaimportante ha iya kinabuhi. Pero diri karuyag sidngon nga tungod kay hi Abraham nagkaada hilawig ngan tagbaw nga kinabuhi, waray na hiya maghingyap nga mabuhi ha tidaraon.

16. Ano nga kalipay an maieksperyensyahan ni Abraham ha Paraiso?

¹⁶ An Biblia nasiring mahitungod kan Abraham: “Nagpipinamulat hiya han syudad nga may totoo nga mga pundasyon, nga an disenyador ngan magtirindog amo an Dios.” (Heb. 11:10) Natoo hi Abraham nga maabot an panahon nga makikita niya ito nga syudad, an Ginhadian han Dios, nga nagmamando ha bug-os nga tuna​—ngan sigurado gud nga mahitatabo ito! Nahahanduraw mo ba hi Abraham nga malipayon gud nga naukoy ha Paraiso nga tuna ngan padayon nga ginpaparig-on an iya pakigsangkay kan Jehova? Sigurado nga malilipay hiya nga mahibaroan nga an iya susbaranan han pagtoo nakabulig ha mga surugoon ni Jehova ha sulod hin yinukot ka mga tuig katapos niya mamatay! Mahibabaroan niya ha Paraiso nga an kahibalik ni Isaac ha iya ‘nagsisimbolo’ hin mas makatirigamnan nga panhitabo. (Heb. 11:19) Mahibabaroan liwat niya nga an kasakit nga iya inabat han igin-aandam niya hi Isaac basi ihalad nakabulig ha minilyon nga magtinumanon nga katawohan nga mahanduraw an kasakit nga inabat mismo ni Jehova han iginhatag niya an iya Anak, hi Jesu-Kristo, sugad nga lukat. (Juan 3:16) An ehemplo ni Abraham nabulig ha aton ngatanan nga mas pabilhan an lukat, an pinakadaku nga kapahayagan han gugma ha bug-os nga kasaysayan!

17. Ano an imo determinasyon, ngan ano an aton hihisgotan ha masunod nga artikulo?

¹⁷ Hinaot magin determinado an tagsa ha aton nga subaron an pagtoo ni Abraham. Samtang padayon nga mas nakikilala naton hi Jehova, nagkakaada kita rekord han pagkamatinumanon ha iya ngan mas naieksperyensyahan naton an mga bendisyon tungod han aton maunungon nga pag-alagad ha iya. (Basaha an Hebreo 6:10-12.) Hinaot magin Sangkay naton hi Jehova ha kadayonan! Ha masunod nga artikulo, hihisgotan naton an ehemplo han tulo pa nga magtinumanon nga surugoon nga nagin duok nga kasangkayan han Dios.