NATAWO ako han 1926 ha Crooksville, Ohio, ha Estados Unidos. Diri relihiyoso hira Tatay ngan Nanay pero ginpapasingba nira kami nga walo nga magburugto. Inatender ako ha singbahan han Metodista. Han 14 anyos ako, gintagan ako hin premyo han ministro kay usa ka tuig nga pirme ako natambong ha ira katirok kada Domingo.

Hito nga panahon, amyaw namon hi Margaret Walker, usa nga Saksi ni Jehova, nga pirme nabisita kan Nanay ngan nakikiistorya ha iya mahitungod ha Biblia. Usa ka adlaw, umapi ako ha ira. Naghunahuna hi Nanay nga magsisinamok ako ha ira salit ginsidngan niya ako nga gumawas ha balay. Pero nagpinamati ako han ira paghisgot. Katapos hin pipira nga pagbisita ni Margaret, ginpakianhan niya ako, “Maaram ka ba kon ano an ngaran han Dios?” Binaton ako, “Maaram hito an ngatanan​—Dios.” Ginsidngan niya ako, “Kuhaa an imo Biblia ngan basaha an Salmo 83:18.” Ginbuhat ko ito ngan hinbaroan ko nga Jehova an ngaran han Dios. Kinadto ako dayon ha akon kasangkayan ngan ginsidngan ko hira, “Pag-uli niyo niyan nga gab-i, kitaa niyo ha Biblia an Salmo 83:18 ngan basaha kon ano an ngaran han Dios.” Salit masisiring nga nagtikang dayon ako pagsangyaw.

 Nag-aram ako han Biblia, ngan nabawtismohan ako han 1941. Waray pag-iha, gintokahan ako nga magdumara hin pag-aram ha libro han kongregasyon. Gin-aghat ko hi Nanay ngan an akon kabugtoan nga tumambong, ngan nagtikang hira tumambong ha pag-aram ha libro nga akon gindudumara. Pero hi Tatay diri interesado.

Gintagan ako hin mas damu nga responsabilidad ha kongregasyon, ngan naghimo ako hin librarya han mga libro nga ginpublikar han mga Saksi ni Jehova. Usa ka adlaw, gintudlok ni Tatay an mga libro ngan nagsiring: “Nakikita mo ito? Igawas ito ngatanan, ngan layas dinhi.” Bumaya ako ha balay ngan umukoy ha kahirani nga syudad han Zanesville, Ohio, pero nag-uuli-uli ako basi parig-unon an amon pamilya.

Gindid-an ni Tatay hi Nanay pagtambong ha mga katirok. May mga higayon nga kon tilakat na hi Nanay, ginlalanat hiya ni Tatay ngan gindadanas tipabalik ha balay. Pero nadalagan la hi Nanay tipagawas ha luyo nga purtahan ngan natambong ha katirok. Ginsidngan ko hi Nanay: “Ayaw kabaraka. Kakapuyon gihapon hiya paglinanat ha imo.” Waray pag-iha, diri na hiya ginpupugngan ni Tatay, ngan diri na hira nag-aaway kon natambong hi Nanay ha mga katirok.

Han 1943, nagtikang an Teokratiko nga Eskwelahan ha Ministeryo ha amon kongregasyon, ngan nagkaada ako mga bahin. An mga sagdon nga akon nakarawat hito nga eskwelahan nakabulig ha akon nga mag-uswag sugad nga mamumulong.

Han 1944, durante han Girra ha Kalibotan II, gintawag ako basi magsundalo. Nagreport ako ha Fort Hayes ha Columbus, Ohio, nagpa-check up han akon kahimsog, ngan nagpirma hin mga dokumento. Nagsiring liwat ako ha mga opisyal nga diri ako magsusundalo. Ginpauli nira ako. Katapos hin pipira ka adlaw, may opisyal nga kumadto ha akon ngan nagsiring: “Corwin Robison, may-ada ka warrant of arrest.”

Paglabay hin duha ka semana, ha atubangan han korte, nagsiring an hukom: “Kon ako la, sisentensyahan ko ikaw hin bug-os-kinabuhi nga kaprisohan. May karuyag ka ba iyakan?” Nagsiring ako: “Your Honor, iginlista unta ako nga ministro. Plataporma ko an kada purtahan, ngan iginsasangyaw ko an maopay nga sumat han Ginhadian ha damu nga tawo.” An hukom nagsiring ha mga hurado: “Aanhi kamo, diri para magdesisyon kon ini nga batan-on ministro ba o diri, kondi kon nagreport ba hiya para sumulod ha militar o waray.” Waray pa mag-tunga hin oras, igindeklara han mga hurado nga salaan ako. Ginsentensyahan ako nga mapriso hin lima ka tuig ha Ashland, Kentucky.

Duha ka semana ako ha prisohan ha Columbus, Ohio, ngan ha siyahan nga adlaw magkulop ako ha akon selda. Nag-ampo ako kan Jehova: “Diri ko kaya magpabilin ha selda hin lima ka tuig. Diri ako maaram han akon bubuhaton.”

Kinabuwasan, ginpagawas ako han mga gwardya. Gindaop ko an usa nga priso nga hitaas ngan halapad an sugbong, ngan namintana kami. Ginpakianhan niya ako, “Unano, ano an imo kaso?” Bumaton ako, “Saksi ni Jehova ako.” Nagsiring hiya, “Ngay-an? Kay ano nga napriso ka?” Binaton ako,  “An mga Saksi ni Jehova diri naapi ha girra ngan diri kami napatay hin tawo.” Nagsiring hiya, “Ginpriso ka nira kay diri ka napatay hin tawo. An iba ginpipriso kay nakamatay hin tawo. Husto ba ito?” Binaton ako, “Diri.”

Katapos nagsiring hiya, “Ha sulod hin 15 ka tuig nakadto ako ha iba nga prisohan, ngan nabasa ko an pipira han iyo publikasyon.” Han hibatian ko ini, nag-ampo ako, “Jehova, unta magin kaugop ko ini nga tawo.” Paul an ngaran hito nga priso, ngan nagsiring hiya: “Kon may maglabot ha imo dinhi, guliat la. Ako an bahala ha ira.” Salit waray ako nagin problema ha sobra 50 nga priso didto.

Han iginbalhin ako ha Ashland, hinbaroan ko nga may mga hamtong nga kabugtoan nga priso liwat didto. An akon pakig-upod ha ira nakabulig ha akon nga magpabilin nga marig-on ha espirituwal. Gintokahan nira kami hin sinemana nga pagbasa ha Biblia, ngan nag-andam kami hin mga pakiana ngan baton para ha katirok nga gin-organisar han kabugtoan. May gintokahan liwat ha pagdumara han teritoryo. Naukoy kami ha daku nga dormitoryo nga may nakarumbay nga mga higdaan ha bungbong. An nagdudumara han teritoryo nagsiring ha akon: ‘Robison, ikaw an nakatoka hini nga higdaan ngan adto nga higdaan. Teritoryo mo an bisan hin-o nga nahigda hito. Siguroha nga masangyawan mo hiya antes bumaya.’ Hito nga paagi, organisado kami nga nakagsangyaw.

Han 1945, natapos an Girra ha Kalibotan II, pero nagpabilin ako ha prisohan hin pipira ka panahon. Nabaraka ako ha akon pamilya kay siring ni Tatay, “Kon napaiwas ko ikaw, kaya ko na hira.” Han nakagawas ako, nasurprisa ako kay bisan pa han pagkontra ni Tatay, pito han akon kapamilya an natambong ha mga katirok ngan nabawtismohan an usa han akon bugto nga babaye.

Han nagtikang an Girra ha Korea han 1950, gintawag ako ha ikaduha nga higayon basi magsundalo ngan ginpareport ha Fort Hayes. Katapos han eksaminasyon para ha pagsundalo, an opisyal nagsiring ha akon, “Usa ka han may pinakahitaas nga iskor ha iyo grupo.” Binaton ako, “Okey la, pero diri ako magsusundalo.” Ginkotar ko an 2 Timoteo 2:3 ngan nagsiring, “Sundalo na ako ni Kristo.” Maiha nga waray hiya magyakan, katapos hiya nagsiring, “Puydi ka na umuli.”

Waray pag-iha katapos hito, umatender ako ha miting para hadton naruruyag mag-alagad ha Bethel ha usa nga kombensyon ha Cincinnati,  Ohio. Ginsidngan kami ni Brother Milton Henschel nga kon may naruruyag nga magbuhat hin dugang pa para ha Ginhadian, mahimo hiya magboluntaryo ha Bethel. Nag-aplay ako ha Bethel, nakarawat ako, ngan nagreport ha Brooklyn Bethel han Agosto 1954. Tikang hadto, nag-alagad ako ha Bethel.

Waray gud ako maubusi hin trabaho ha Bethel. Ha sulod hin pipira ka tuig, nanginano ako ha mga boiler ha printery ngan ha mga opisina, nagtrabaho ha mga makina, ngan nag-ayad hin mga kandado. Nagtrabaho liwat ako ha mga Assembly Hall ha New York City.

Naruyagan ko an espirituwal nga mga rutina ha Bethel, kaupod hini an pagtambong ha morning worship ngan an panpamilya nga Pag-aram ha Barantayan sugad man an pakigbahin ha ministeryo kaupod han kongregasyon. Kon huhunahunaon, ini nga mga rutina kinahanglan regular nga buhaton han ngatanan nga pamilya han mga Saksi ni Jehova. Kon urosa nga ginhihisgotan han pamilya an inadlaw nga teksto, may regular nga Pagsingba han Pamilya, ngan bug-os nga nakikigbahin ha mga buruhaton ha kongregasyon ngan ha pagsangyaw han maopay nga sumat, an ngatanan ha pamilya magigin mahimsog ha espirituwal.

Damu an akon kasangkayan ha Bethel ngan ha kongregasyon. An iba mga dinihogan ngan nakakarawat na han ira balos ha langit. An iba naman diri dinihogan. Pero an ngatanan nga surugoon ni Jehova diri perpekto, pati na an mga Bethelite. Kon nagkakaproblema ako ha usa nga bugto, pirme ako nangangalimbasog nga makigmurayaw. Ginhuhunahuna ko an Mateo 5:23, 24 ngan kon paonan-o susulbaron an amon diri pagkasinabtanay. Diri masayon an pangaro hin pasaylo, pero kasagaran nga diri nagdadaku an problema kon ginbubuhat ko ito.

Tungod han akon edad, nakukurian na ako pagsangyaw ha balay-balay, pero diri ako naundang. Nag-aram ako hin gutiay nga Mandarin Chinese ngan nalilipay ako pakiistorya ha mga Chinese ha kalsada. May mga aga nga nakakapahamutang ako hin 30 o 40 nga magasin ha mga interesado.

 Nakagbalik-bisita pa ngani ako ha Tsina! Usa ka adlaw, may daragita nga humiyom ha akon samtang nanhahatag hiya hin flyer para ha usa nga tindahan hin prutas. Humiyom ako ngan gintagan ko hiya hin Barantayan ngan Pagpamata! ha Chinese nga linggwahe. Ginkarawat niya ito ngan nagsiring nga Katie an iya ngaran. Katapos hito, kon nakikita ako ni Katie, nakikiistorya hiya ha akon. Gintutdoan ko hiya han ngaran han mga prutas ngan utan ha Ingles, ngan gin-uutro niya ito ha akon. Iginsaysay ko liwat ha iya an pipira nga teksto ha Biblia, ngan ginkarawat niya an libro nga Igintututdo han Biblia. Pero paglabay hin pipira ka semana, waray ko na hiya makita.

Paglabay hin pipira ka bulan, may iba nga daragita nga nanhahatag hin flyer, nga kumarawat han mga magasin nga akon igintanyag. Han sunod nga semana, iginduhol niya ha akon an iya celfon ngan nagsiring, “Kaistoryaha hi Tsina.” Nagsiring ako, “Waray ako kakilala ha Tsina.” Pero nagpirit hiya, salit ginkuha ko an celfon ngan nagsiring, “Hello, hi Robison ini.” An tingog ha luyo nga linya nagsiring, “Robby, hi Katie ini. Aadi na ako ha Tsina.” Siring ko, “Tsina?” Hi Katie binaton, “Oo. Robby, bugto ko an daragita nga nagduhol ha imo han celfon. Gintutdoan mo ako hin damu nga mag-opay nga butang. Alayon, tutdui hiya pariho han imo pagtutdo ha akon.” Binaton ako, “Pangangalimbasogan ko Katie. Salamat nga ginsumatan mo ako kon hain ka.” Katapos, nakiistorya ako ha bugto ni Katie ha ultimo nga higayon. Kon hain man hira yana, hinaot mahibaro hira hin dugang pa mahitungod kan Jehova.

Setenta y tres ka tuig na ako nga nag-aalagad kan Jehova. Mapasalamaton ako nga ginbuligan niya ako nga magpabilin nga neutral ngan magmatinumanon ha prisohan. Nagsiring liwat an akon kabugtoan nga naparig-on hira nga waray ako umundang pag-alagad bisan pa han pagkontra ni Tatay. Inabot an panahon, nabawtismohan hi Nanay ngan an unom han akon kabugtoan. Nagbag-o liwat hi Tatay, ngan nakatambong pa ngani hin mga katirok antes hiya mamatay.

Kon kaburut-on han Dios, mababanhaw an akon mga kapamilya ngan kasangkayan ha bag-o nga kalibotan. Handurawa an daku nga kalipay nga magsingba kan Jehova ha kadayonan kaupod han aton mga hinigugma! *