HUNAHUNAA an pinakamakalilipay nga adlaw han imo kinabuhi. Ito ba an adlaw han imo kasal o han natawo an imo suhag nga anak? O ito an adlaw han imo bawtismo? Bangin ito an imo pinakaimportante ngan pinakamakalilipay nga adlaw. Sigurado nga nalipay gud an imo mga igkasi-tumuroo nga iginpakita mo ha publiko nga hinigugma mo an Dios ha bug-os mo nga kasingkasing, kalag, hunahuna, ngan kusog!​—Mar. 12:30.

Sigurado nga malipayon ka gud ha imo pag-alagad kan Jehova tikang han nagpabawtismo ka. Pero may mga magwarali nga nawad-an han kalipay nga ira inabat hadto. Kay ano nga nahitabo ini? Ano an aton mga rason nga padayon nga magmalipayon ha pag-alagad kan Jehova?

An mensahe han Ginhadian naghahatag ha aton hin daku nga kalipay. Kay ano? Tungod kay nagsasaad hi Jehova nga diri na mag-iiha wawad-on han Ginhadian han Dios inin maraot nga kalibotan ngan sasaliwnan han bag-o nga kalibotan. Dugang pa, an Sepania 1:14 nagpapasarig ha aton: “An daku nga adlaw ni Jehova hirani na, hirani na ngan nagdadagmit gud”! Pero an aton maiha nga paghinulat mahimo makagwara han kalipay nga aton inabat hadto ngan magpaluya han aton pag-alagad ha Dios.​—Prob. 13:12.

An aton makaparig-on nga pakig-upod ha katawohan han Dios nabulig ha aton nga padayon nga magin malipayon ha pag-alagad kan Jehova. Ngani, an maopay nga panggawi han mga surugoon ni Jehova bangin nakadani ha aton ha tinuod nga pagsingba ngan nakabulig ha aton nga magtikang ha malipayon nga pag-alagad ha Dios. (1 Ped. 2:12) Pero ano an posible mahitabo kon may madisiplina nga igkasi-Kristiano tungod kay napakyas hiya pagsunod ha mga suruklan han Dios? Mahimo ini magpaluya ha pipira nga nadani ha kamatuoran tungod han mag-opay nga panggawi han katawohan ni Jehova, ngan magwara han ira kalipay.

An materyalismo mahimo liwat makagwara han aton kalipay. Paonan-o? Ginkukombinse kita han kalibotan ni Satanas nga magkaada han mga butang nga diri man ginkikinahanglan. Salit maopay nga hinumdoman naton an ginsiring ni Jesus: “Waray makakagserbi ha duha nga agaron kay masisina hiya ha usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagpauripon ha Dios ngan ha Karikohan.” (Mat. 6:24) Diri kita makakag-alagad kan Jehova nga malipayon ngan ha pariho nga higayon ginbubuhat an ngatanan basi magkaada han mga butang hini nga kalibotan.

Diri mabug-at para ha mga nahigugma kan Jehova an pag-alagad ha iya. (1 Juan 5:3) Hinumdumi nga nagsiring hi Jesus: “Kadi kamo ha akon, kamo ngatanan nga kinakapoy ngan binubug-atan, kay papapahuwayon ko kamo. Pas-ana an akon yugo ngan mahibaro kamo tikang ha akon, kay ako malumo ngan mapainubsanon an kasingkasing, ngan makakapahuway an iyo mga kalag. Kay an akon yugo masayon pas-anon ngan an akon iginpapapas-an ha iyo magaan.” (Mat. 11:28-30) An pagin tinuod nga Kristiano makarepresko ngan makalilipay. Ngan may-ada gud kita damu nga hinungdan nga magin malipayon ha pag-alagad kan Jehova. Hisgotan naton an tulo nga importante nga rason nga magin malipayon ha pag-alagad kan Jehova.​—Hab. 3:18.

Nag-aalagad kita ha Humaratag-han-Kinabuhi, an malipayon nga Dios. (Buh. 17:28; 1 Tim. 1:11) Maaram kita nga utang naton ha aton Maglalarang an aton mismo kinabuhi. Salit padayon nga malipayon nga nag-aalagad kita ha iya, bisan kon damu na ka tuig an naglabay tikang han ginbawtismohan kita.

Tagda pananglitan, hi Héctor nga nag-alagad kan Jehova sugad nga nagbibiyahe nga paramangno ha sulod hin 40 ka tuig. ‘Bisan ha pagkatigurang,’ malipayon pa gihapon hiya ha pag-alagad kan Jehova. (Sal. 92:12-14) Han nagkasakit an iya asawa, limitado na la an iya nahihimo ha pag-alagad, pero waray ito makagwara han iya kalipay. Hiya nagsiring: “Bisan kon makasurubo nga makita nga hinay-hinay nga nagluluya an kahimsog han akon asawa ngan makuri an pag-ataman ha iya, waray ko tuguti nga makagwara ito han akon kalipay ha pag-alagad ha tinuod nga Dios. An paghibaro nga an akon kinabuhi utang ko kan Jehova, nga naglarang han tawo nga may katuyoan, igo na nga rason nga higugmaon gud hiya ngan bug-os-kasingkasing nga mag-alagad ha iya. Nangangalimbasog ako nga magin aktibo pirme ha pagsangyaw nga buruhaton, ngan hunahunaon pirme an paglaom ha Ginhadian basi diri mawara an akon kalipay.”

Hi Jehova nagtagana han halad-lukat, salit nagin posible nga magkaada kita malipayon nga kinabuhi. Oo, “hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Salit mahimo mapasaylo an aton mga sala ngan magkaada kinabuhi nga waray kataposan kon magpakita kita hin pagtoo ha mahigugmaon nga tagana han Dios nga halad-lukat ni Jesus. Diri ba maopay gud ito nga rason nga magin mapasalamaton? Ngan diri ba an aton pagin mapasalamaton hito nga lukat nagpapagios ha aton nga magmalipayon ha pag-alagad kan Jehova?

Hi Jesús nga taga-Mexico nagsiring: “Nagin uripon ako han akon trabaho, usahay nagtatrabaho ako hin lima nga sunod-sunod nga relyebo bisan kon diri ako obligado nga buhaton ito. Ginhimo ko ito para la magkaada damu nga kwarta. Katapos, hinbaroan ko an  mahitungod kan Jehova ngan kon paonan-o niya iginhatag an iya hinigugma nga Anak para ha katawohan. Karuyag ko gud mag-alagad ha iya. Salit igindedikar ko an akon kinabuhi kan Jehova, ngan katapos hin 28 ka tuig nga pagtrabaho ha kompanya, nagdesisyon ako nga mag-resign ngan sumulod ha bug-os-panahon nga pag-alagad.” Ito an tinikangan han iya makalilipay nga katuigan han pag-alagad kan Jehova.

An aton iginpapakita nga bunga nagriresulta hin daku nga kalipay, diri kasubo. Nahinunumdoman mo ba an imo kinabuhi hadto han waray mo pa makilala hi Jehova? Ginpahinumdoman ni apostol Pablo an mga Kristiano ha Roma nga ‘hadto mga uripon hira han sala’ pero ‘nagin mga uripon [na] han katadongan.’ Nagpakita hira han “bunga han pagkabaraan,” salit magkakaada hira kinabuhi nga waray kataposan. (Roma 6:17-22) Iginpapakita liwat naton an limpyo nga pagkinabuhi salit diri kita nag-aantos hin kasubo nga resulta han imoral ngan madarahog nga mga buhat. Daku gud ito nga rason nga magin malipayon!

Tagda an ehemplo ni Jaime nga usa nga boksingero ngan ateyista, ngan natoo liwat ha ebolusyon. Nagtikang hiya pagtambong ha Kristiano nga mga katirok, ngan binilib gud hiya ha pagin mahigugmaon han mga tawo didto. Basi mabayaan an iya daan nga pagkinabuhi, nangaro hiya hin bulig kan Jehova ngan tumoo ha Iya. “Hinay-hinay nga hinbaroan ko nga may-ada mahigugmaon nga Amay ngan maloloy-on nga Dios,” siring ni Jaime. “An pirme pagsunod ha matadong nga mga suruklan ni Jehova nagpanalipod ha akon. Kon waray ako magbag-o, bangin patay na ako yana, pariho ha akon kasangkayan nga mga boksingero. An pinakamakalilipay nga panahon ha akon kinabuhi amo an panahon han akon pag-alagad kan Jehova.”

Ano an sadang naton abaton samtang ginpapamulat naton an kataposan hinin maraot nga kalibotan? Tigamni nga “nagsasabwag [kita] uyon ha espiritu han Dios” ngan “mag-aani hin kinabuhi nga waray kataposan.” Salit “ayaw kita pag-undang ha pagbuhat han maopay, kay pag-abot han panahon mag-aani kita kon diri kita manluya.” (Gal. 6:8, 9) Pinaagi han bulig ni Jehova, hinaot magpailob kita, mangalimbasog pagkultibar han mga kalidad nga ginkikinahanglan basi matalwas ha “daku nga kasakitan,” ngan padayon nga magin malipayon ha pag-alagad kan Jehova bisan pa han mga pagsari.​—Pah. 7:9, 13, 14; San. 1:2-4.

Makakasarig kita nga babalosan an aton pagpailob, kay maaram gud an Dios han aton ginbubuhat ngan han aton gugma nga iginpapakita ha iya ngan ha iya ngaran. Kon padayon kita nga magigin malipayon ha pag-alagad kan Jehova, masisiring liwat naton an ginsiring han salmista: “Hi Jehova iginbutang ko . . . ha atubangan ko: Tungod kay aadi hiya ha akon too nga kamot, diri ako hitatalindas. Busa nagmamalipay an akon kasingkasing, ngan an akon himaya narayhak; Sugad man an akon unod magpupuyo ha kamurayawan.”​—Sal. 16:8, 9.