TEMPRANO han dekada han 1930, mahinay an pag-uswag ha buruhaton han Ginhadian ha Brazil. Kondi han 1935, an mga payunir nga hira Nathaniel ngan Maud Yuille nagsurat kan Joseph F. Rutherford, an nangunguna ha pagsangyaw nga buruhaton hito nga panahon. Karuyag nira magboluntaryo ngan nagsiring nga “andam hira kumadto bisan diin.”

Hi Nathaniel, nga 62 anyos hito nga panahon ngan retirado nga civil engineer, amo an direktor han pag-alagad ha kongregasyon han mga Saksi ni Jehova ha San Francisco, California, E.U.A. Gin-organisar niya an pagsangyaw nga buruhaton ngan naggamit hiya hin sound system ha pagpasamwak han maopay nga sumat. An iya eksperyensya ngan pagin disidido nakabulig gud nga magin epektibo hiya ha iya bag-o nga toka sugad nga branch servant ha haluag nga teritoryo han Brazil nga may iba-iba nga linggwahe.

Han 1936, inabot ha Brazil hira Nathaniel ngan Maud kaupod han payunir ngan interpreter nga hi Antonio P. Andrade. May dara hira nga birilhon nga garamiton​—35 nga ponograpo ngan usa nga sound car. An Brazil nga amo an ikalima han pinakadaku nga nasud ha kalibotan, may-ada la mga 60 nga magwarali han Ginhadian hito nga panahon! Pero ini nga bag-o nga mga garamiton mabulig ha ira nga masangyawan an minilyon nga tawo ha sulod hin pipira la ka tuig.

Usa ka bulan katapos umabot hira Nathaniel ngan Maud, an sanga nga opisina ha Brazil naghikay han siyahan nga service convention ha syudad han São Paulo. Posible nga hi Maud an nagmaneho han sound car ngan gin-gamit ito ha pagpahibaro han pahayag publiko, nga may 110 nga tinambong! An programa ha kombensyon nakabulig nga madugangan an kompyansa han mga magwarali, ngan nagpagios ha ira nga makigbahin pa gud ha pagsangyaw. Nahibaro hira pagsangyaw gamit an mga literatura ngan testimony card, pati an mga rekording ha ponograpo ha Ingles, Aleman, Hungarian, Polako, Espanyol ngan ha urhi, ha Portuguese nga linggwahe.

 Han 1937, an tulo nga service convention ha São Paulo, Rio de Janeiro, ngan Curitiba, nagdasig gud ha kabugtoan nga makigbahin ha pagsangyaw nga buruhaton. Gin-gamit han mga natambong ha kombensyon an sound car ha ira pagbalay-balay. Hi José Maglovsky, nga batan-on hito nga panahon, ha urhi nagsurat: “Iginbubutang namon an basado ha Biblia nga mga publikasyon ha stand, ngan samtang ginpapatokar han sound car an mga nakarekord nga mensahe, ginkakaistorya namon an mga tawo nga nagawas ha ira balay basi mag-usyuso han nahitatabo.”

An pagbawtismo ginhihimo ha mga salog, samtang may nangangarigo ngan nagpapasirak hirani hito. Daku gud ito nga higayon nga maisangyaw an maopay nga sumat gamit an sound car! An pahayag ha bawtismo ni Bugto Rutherford klaro nga mababatian tikang ha mga amplifier, salit an nag-uusyoso nga mga tawo dumaop ha sound car ngan namati samtang gin-iinterpretar an pahayag ha Portuguese. Katapos, an mga kandidato ha bawtismo ginbabawtismohan samtang ginpapatokar an nakarekord nga mga kanta han Ginhadian ha Polako. An mga kabugtoan naduyog pagkanta ha iba-iba nga linggwahe. An 1938 Yearbook nagsiring nga nagpapahinumdom ito may kalabotan ha nahitabo han Pentekostes diin an kada tagsa nakabati ngan nakasabot han iya kalugaringon nga linggwahe.

Kahuman han mga kombensyon, kada Domingo, nauran man o nasirak, an nakarekord nga mga pahayag nga basado ha Biblia iginpapatokar ha mga parke, residensyal nga mga lugar, ngan mga factory ha sentro han São Paulo ngan ha kahigrani nga mga bungto. Kada bulan, an sound car may ginpapatokar nga programa para ha 3,000 nga residente ha usa nga komunidad han mga may leprosi nga 97 ka kilometro ha norte-weste han São Paulo. Ha urhi, nagkaada kongregasyon didto. Bisan pa han grabe nga sakit han mga magwarali han Ginhadian didto, gintugotan hira nga bumisita ha usa pa nga komunidad han mga may liprosi basi isangyaw an nakakaliaw nga mensahe han Biblia.

Ha urhi nga bahin han 1938, inabot an rekording han mga pahayag may kalabotan han Ginhadian ha Portuguese nga linggwahe. Durante han Piyesta han mga Patay, iginmamaneho an sound car pakadto ha mga sementeryo ngan ginpapatokar an nakarekord nga pahayag nga “Where Are the Dead?,” “Jehovah,” ngan “Riches,” salit nababatian ito han sobra 40,000 nga nagtataguminatay!

An nasisina nga mga klero nakontra gud han maisugon nga pagpasamwak ha publiko han mga kabugtoan may kalabotan ha mga kamatuoran ha Biblia, ngan kasagaran nga ginpipirit nira an lokal nga mga awtoridad nga paundangon an pagpatokar han sound car. Nahinunumdoman ni Sister Yuille an higayon nga may padi nga nagsulsol ha grupo hin mga tawo basi samukon an pagpatokar han sound car. Pero inabot an meyor ngan an mga opisyal han pulis ngan namati ha bug-os nga programa. Binaya an meyor nga may dara nga basado ha Biblia nga literatura. Waray rayot nga nahitabo. Bisan pa hito nga pagkontra, an report han 1940 Yearbook mahitungod ha Brazil nagsiring nga an tuig han 1939 amo “an pinakamaopay gud nga panahon ha pag-alagad ha Daku nga Teokrata ngan pagpasamwak han iya ngaran.”

An pag-abot han “Watch Tower sound car” ha Brazil nagkaada daku gud nga pagbag-o ha pagsangyaw nga buruhaton didto. Daku gud an naibulig hito basi masangyawan an minilyon han mensahe han Ginhadian. Bisan kon inin kilala nga sound car iginbaligya han 1941, yinukot nga mga Saksi ni Jehova an padayon nga nagpapasamwak han maopay nga sumat ha mga tangkod an kasingkasing ha haluag nga teritoryo han Brazil.​—Tikang ha Aton Daan nga mga Koleksyon ha Brazil.