NORMAL ha tawo nga maghingyap nga magin malipayon. Pero hinin kataposan nga mga adlaw, an ngatanan nga tawo naatubang hin magkuri nga problema. (2 Tim. 3:1) An pipira bangin hinay-hinay nga mawad-an hin kalipay tungod han kawaray-hustisya, maluya nga kahimsog, kawaray-trabaho, kabido, o iba pa nga mga hinungdan han kabaraka ngan kasubo. Bisan an mga surugoon han Dios bangin manluya ngan hinay-hinay nga mawad-an han kalipay. Kon ini an imo kahimtang, paonan-o ka magigin malipayon utro?

Basi mabaton ito nga pakiana, kinahanglan anay naton masabtan kon ano an tinuod nga kalipay ngan kon paonan-o natipigan han iba an ira kalipay bisan pa han ira mga problema. Katapos, hihisgotan naton kon ano an mahimo naton buhaton basi matipigan an aton kalipay ngan madugangan pa ngani ito.

May kaibahan an pagin malipayon ha pagin matawa-tawa. Ha pag-ilustrar: Katapos hin damu ka tagay, an usa nga parahubog bangin magin matawa-tawa na gud. Pero kon mahimawmawan na hiya, diri na hiya natawa, ngan bangin magin masurub-on ngan problemado na liwat hiya. An iya temporaryo nga pagrayhak diri tinuod nga kalipay.—Prob. 14:13.

Ha kabaliktaran, an kalipay usa nga kalidad nga nakagamot ha kasingkasing. Gintagan ito hin kahulogan sugad nga “an pag-abat tungod han pagkaada usa nga maopay nga butang o paglaom hito nga butang.” An kalipay usa nga nagpapadayon nga pag-abat, maopay man o maraot an kahimtang. (1 Tes. 1:6) Ngani, mahimo magin malipayon an usa bisan kon may mga ginkakabarak-an hiya. Pananglitan, an mga apostol ginkastigo tungod han ira pagyakan mahitungod han Kristo. Pero “malipayon nga binaya hira ha Sanhedrin, kay nagkaada hira pribilehiyo nga mag-antos hin kaalohan tungod han iya ngaran.” (Buh. 5:41) Syempre, waray hira malipay han pagkastigoha ha ira. Pero sugad nga mga surugoon han Dios, inabat nira an tinuod nga kalipay tungod kay natipigan nira an ira integridad ha Dios.

Waray kita matawo nga may-ada na hito nga kalidad, ngan diri kita awtomatiko nga nagkakaada hito. Kay ano? Kay an tinuod nga kalipay bahin han bunga han baraan nga espiritu han Dios. An espiritu han Dios nabulig ha aton nga magkaada han “bag-o nga personalidad,” nga nag-uupod han kalipay. (Efe. 4:24; Gal. 5:22) Ngan kon may-ada na kita kalipay, mas masayon naton malamposan an mga problema ha kinabuhi.

Katuyoan ni Jehova nga an mag-opay nga butang an mahitabo ha tuna, diri an magraot nga butang nga amo an kasagaran nga nakikita naton yana. Pero an magraot nga ginbubuhat han iba diri nagwawara han kalipay ni Jehova. An Pulong han Dios nasiring: “An kusug ngan an kahimungaya [o, kalipay] aada ha iya lugar.” (1 Kron. 16:27) Dugang pa, an mag-opay nga butang nga ginhihimo han iya mga surugoon ‘nagpapalipay han kasingkasing ni Jehova.’—Prob. 27:11.

Masusubad naton hi Jehova pinaagi ha diri sobra nga pagpinamroblema kon diri nahitatabo an aton ginlalaoman. Imbes nga mawad-an hin kalipay, mahimo kita magpokus ha mag-opay nga butang nga  may-ada kita yana ngan mapailubon nga maghulat ha mas mag-opay nga butang ha tidaraon. *

Mababasa liwat naton ha Biblia an damu nga ehemplo mahitungod han mga tawo nga nakagtipig han kalipay bisan kon inatubang hira hin magkuri nga kahimtang. Usa hi Abraham hadton nakapailob ha peligroso nga mga kahimtang ngan magkuri nga problema nga resulta han ginbuhat ha iya han iba. (Gen. 12:10-20; 14:8-16; 16:4, 5; 20:1-18; 21:8, 9) Bisan pa hito nga mga kakurian, gintipigan ni Abraham an iya kalipay. Paonan-o? Gintipigan niya nga matin-aw ha iya hunahuna an iya paglaom nga mabuhi ha bag-o nga kalibotan ilarom han pagmando han Mesias. (Gen. 22:15-18; Heb. 11:10) Hi Jesus nagsiring: “An iyo amay nga hi Abraham nalipay gud ha paglaom nga makita an akon adlaw.” (Juan 8:56) Masusubad naton hi Abraham pinaagi ha pagpamalandong han kalipay nga aton maieksperyensyahan ha tidaraon.—Roma 8:21.

Pariho kan Abraham, nagpokus hi apostol Pablo ngan an iya kaupod nga hi Silas ha mga saad han Dios. May-ada hira marig-on nga pagtoo, ngan gintipigan nira an ira kalipay bisan pa han magraot nga kahimtang nga ira naeksperyensyahan. Pananglitan, katapos hira pagkinastiguhon ngan ipapriso, “han katutnga na han gab-i, nag-inampo hira Pablo ngan Silas ngan nagdayaw ha Dios pinaagi hin kanta.” (Buh. 16:23-25) Labot la han ira paglaom nga nakabulig ha ira nga makapailob, malipayon hira kay nag-antos hira tungod han ngaran han Kristo. Masusubad naton hira Pablo ngan Silas pinaagi ha paghinumdom han mag-opay nga resulta han pagin matinumanon ha pag-alagad ha Dios.—Fil. 1:12-14.

Yana, damu han aton kabugtoan an may mag-opay nga ehemplo may kalabotan ha pagtipig han kalipay bisan pa han magkuri nga problema. Pananglitan, han Nobyembre 2013, ginhampak han Super Typhoon Yolanda (Haiyan) an sentro nga bahin han Pilipinas, ngan gin-guba hito an sobra 1,000 nga balay han mga Saksi. Hi George, nga taga-Tacloban nga naguba an balay durante han bagyo, nagsiring: “Bisan pa han nahitabo, malipayon la gihapon an kabugtoan. Diri ko maisaysay an kalipay nga amon inaabat.” Ha kada panahon nga naatubang kita hin magkuri nga problema, makakagpabilin kita nga malipayon kon papamalandungon naton an mga ginbubuhat ni Jehova para ha aton ngan magigin mapasalamaton ha iya. Ano an iba pa nga igintatagana ni Jehova nga naghahatag ha aton hin rason nga malipay?

May-ada pa ba mas maopay nga rason nga malipay kay han pagkaada duok nga relasyon ha Dios? Hunahunaa ini: Kilala naton an Soberano ha Uniberso. Hiya an aton Amay, Dios, ngan Sangkay!—Sal. 71:17, 18.

Ginpapabilhan liwat naton an presyoso nga regalo nga kinabuhi ngan an aton abilidad nga gamiton ito basi magin malipayon. (Ekles. 3:12, 13) Sugad nga intelihente nga mga linarang nga iginpahirani ni Jehova ha iya, nasasabtan naton an kaburut-on han Dios para ha aton. (Col. 1:9, 10) Salit maaram kita han tinuod nga katuyoan han aton kinabuhi. Ha kabaliktaran, kadam-an han mga tawo diri maaram han katuyoan han kinabuhi. Ginpabug-atan ni Pablo ini nga kaibahan han hiya nagsurat: “‘An mga butang nga gin-andam han Dios para ha mga nahigugma ha iya waray makita han mata, waray mabatii han talinga, ngan waray matugkad han kasingkasing han tawo.’ Kay iginpahayag ito ha aton han Dios pinaagi han iya espiritu.” (1 Cor. 2:9, 10) Diri ba kita nalilipay nga nasasabtan naton an kaburut-on ngan katuyoan ni Jehova?

Tagda an iba pa nga ginbubuhat ni Jehova para ha iya katawohan. Diri ba kita nalilipay nga napapasaylo an aton mga sala? (1 Juan 2:12) Tungod han kalooy han Dios, may-ada kita masasarigan nga paglaom nga diri na mag-iiha, magkikinabuhi kita ha bag-o nga kalibotan. (Roma 12:12) Bisan yana, hi Jehova nagtatagana ha aton hin damu nga mag-opay nga kasangkayan nga aton mga igkasi-magsiringba. (Sal. 133:1) An Pulong han Dios nagpapasarig liwat ha aton nga hi Jehova nagpapanalipod ha iya katawohan kontra kan Satanas ngan han iya mga demonyo. (Sal. 91:11) Kon papamalandungon naton ini ngatanan nga bendisyon han Dios, magigin mas malipayon kita.—Fil. 4:4.

An usa ba nga malipayon na nga Kristiano mahimo pa magin mas malipayon? Hi Jesus nagsiring: “Ginsisiring ko ini ha iyo basi bug-os nga abaton niyo an kalipay nga akon inaabat.” (Juan 15:11) Iginpapakita hini nga mahimo pa madugangan an aton kalipay. An imo pangalimbasog nga magin mas malipayon maipapariho ha pagbutang hin sungo ha kalayo. Basi madugangan an kapaso han kalayo, kinahanglan mo ito sung-an. Sugad man, basi madugangan an imo kalipay, kinahanglan mo sung-an an imo espirituwalidad, siring pa. Tigamni nga an espiritu han Dios nabulig ha aton nga magin malipayon. Salit magkakaada ka mas daku nga kalipay pinaagi ha regular nga pangaro han bulig han espiritu ni Jehova ngan mainampoon nga pagpamalandong han iya Pulong nga giniyahan han iya espiritu.—Sal. 1:1, 2; Luc. 11:13.

Magigin mas malipayon ka liwat pinaagi ha pagin madasigon ha mga buruhaton nga nakakapalipay kan Jehova. (Sal. 35:27; 112:1) Kay ano? Kay ginlarang kita basi ‘kahadlokan an Dios ngan bantayan an iya mga sugo, kay amo ini an bug-os nga turumanon han tawo.’ (Ekles. 12:13) Karuyag sidngon, gindisenyo kita basi magbuhat han kaburut-on han Dios. Salit kon nag-aalagad kita kan Jehova, naieksperyensyahan naton an pinakamakalilipay nga klase han kinabuhi. *

Samtang ginpapatubo naton an diosnon nga kalidad nga kalipay, diri la an pag-abat hin kalipay an aton nakakarawat nga kapulsanan. Pananglitan, magigin mas makaruruyag kita ha pagkita han aton langitnon nga Amay samtang malipayon nga nag-aalagad kita ha iya anoman nga problema an bangin atubangon naton. (Deut. 16:15; 1 Tes. 5:16-18) Dugang pa, tungod kay tinuod kita nga malipayon, isasalikway naton an materyalistiko nga pagkinabuhi, ngan mangangalimbasog kita nga maghimo hin mas dagku nga pagsakripisyo para ha Ginhadian han Dios. (Mat. 13:44) Kon nakikita naton an mag-opay nga resulta hini nga mga pagsakripisyo, nagigin mas malipayon kita, mas inaabat naton nga may katuyoan an aton kinabuhi, ngan nakakabulig kita nga magin mas malipayon an iba.—Buh. 20:35; Fil. 1:3-5.

“Kon malipayon ngan kontento ka ha imo kinabuhi yana, posible gud nga magin mas mahimsog ka ha tidaraon.” Ito an iginsurat han usa nga parasaliksik ha University of Nebraska ha Estados Unidos katapos niya repasuhon an pipira nga pag-aram may kalabotan ha kahimsog. Uyon ini ha ginsisiring han Biblia: “An malipayon nga kasingkasing maopay nga tambal.” (Prob. 17:22) Oo, samtang nangangalimbasog ka nga magin mas malipayon, posible nga magin mas mahimsog ka.

Salit bisan kon damu an aton problema yana, mahimo kita magkaada tinuod ngan nagpapadayon nga kalipay samtang nakakarawat naton an baraan nga espiritu pinaagi han pag-ampo, pag-aram, ngan pagpamalandong ha Pulong ni Jehova. Nagigin mas malipayon liwat kita samtang ginpapamalandong naton an mga bendisyon nga aton nakakarawat, ginsusubad an pagtoo han iba, ngan nangangalimbasog nga buhaton an kaburut-on han Dios. Sugad nga resulta, aabaton naton nga tinuod gud an ginsisiring han Salmos 64:10: “An mga magtadung magmamalipay kan Jehova [ngan] maayup dida ha iya.”