SAMTANG nagtitikahirani an barko ha Belfast Lough, nakikita han gutiay nga grupo hin mga pasahero nga naninindog ha kubyerta an berde nga kabungtoran nga nasisirakan han pamanagbanag han adlaw. Nahitabo ini han Mayo 1910. Kaupod hito nga grupo hi Charles T. Russell; ini an iya ikalima nga pagbiyahe ngadto ha Ireland. Hirayo pa, nakikita na ni Bugto Russell an duha nga dagku nga barko nga ginhihimo, an nalunod nga Titanic ngan an puropariho hito nga barko, an Olympic. * Hirani ha may hirimoan hin barko, may 12 nga Estudyante han Biblia nga naninindog ha may pantalan ngan naghuhulat han iya pag-abot.

Mga 20 ka tuig antes hito, nagdesisyon hi Bugto Russell nga maghimo hin sunod-sunod nga pagbiyahe ha gawas han Amerika basi maipasamwak gud an maopay nga sumat ha bug-os nga kalibotan. Ha iya siyahan nga pagbiyahe han Hulyo 1891, gin-una niya an Ireland. Sakay han barko nga City of Chicago, nakikita niya an pagtunod han adlaw samtang nagtitikahirani an barko ha may baybayon han Queenstown, ngan posible gud nga nahinunumdoman niya an paghulagway han iya mga kag-anak han ira lugar hadto. Samtang ginlalabyan nira Bugto Russell ngan han iya mga kaupod an maglimpyo nga bungto ngan mag-opay nga baryo, nahunahuna nira nga usa ini nga uma nga “andam na ngan naghuhulat na ha pag-ani.”

Ha kabug-osan, pito ka beses nga ginbisita ni Bugto Russell an Ireland. Tungod kay nainteres ha iya pahayag han iya siyahan nga pagbisita, ginatos ngan usahay, yinukot pa ngani an napagios nga mamati han iya pahayag han iya sumunod nga mga pagbisita. Durante han iya ikaduha nga pagbisita han Mayo 1903, an mga pahayag publiko ha Belfast ngan Dublin iginpapahibaro pinaagi han lokal nga mga pahayagan. Hi Russell nagsiring nga an “mga mamarati atentibo gud ha pagpamati” ha topiko nga “The Oath-Bound Promise.” Mahitungod ito han pagtoo ni Abraham ngan han mga bendisyon nga makakarawat han katawohan ha tidaraon.

Tungod kay damu an interesado ha Ireland, ginbisita utro ni Russell ito nga nasud ha iya ikatulo nga pagbiyahe ha Europa. Lima nga kabugtoan an tinapo ha iya pag-abot gud niya ha pantalan han Belfast ha aga han Abril 1908. Pagkagab-i, mga 300 an tinambong ha iginpahibaro nga pahayag publiko nga may ulohan nga “The Overthrow of Satan’s Empire.” Usa nga parakontra nga namati hito nga pahayag an waray naiyakan tungod han makakombinse nga paggamit ni Bugto Russell han Kasuratan. Ha Dublin, may usa nga nakontra gud ha mga Estudyante han Biblia—hi Mr. O’Connor, nga sekretaryo han YMCA. Nangalimbasog hiya nga kombinsihon an sobra 1,000 nga mamarati nga sayop an mga Estudyante han Biblia. Ano an nahitabo?

Handurawon naton an posible nga maopay nga nahitabo hito nga takna. Usa nga lalaki nga interesado nga mahibaro han kamatuoran ha Biblia an nagdesisyon nga tumambong hin pahayag publiko nga iginpahibaro ha The Irish Times. Nangalimbasog hiya nga makabiling hin lingkoran ha awditoryum nga puno hin tawo. Namati hiya hin maopay ha mamumulong nga busag na an buhok, barangason, ngan nakasul-ot hin itom nga amerikana. Samtang ginhihisgotan han  mamumulong an iya topiko, naglalakat-lakat hiya ha plataporma ngan nagkukompas. Igin-iesplikar niya hin maopay an usa nga teksto ngan an koneksyon hito ha iba nga teksto, ngan sugad hin gin-aabrihan niya an talinga han lalaki basi masabtan an mga kamatuoran ha Biblia. Bisan kon waray sound system, nababatian an tingog han mamumulong ha bug-os nga awditoryum salit nakuha niya an atensyon han mga mamarati ha sulod hin usa ngan tunga ka oras. Katapos, durante han pakiana ngan baton nga sesyon, gin-ayat ni O’Connor ngan han iya mga kaupod hi Russell, pero may kaabtik nga gindepensahan ni Russell an mensahe gamit an Biblia. Nagpakpak an mga mamarati sugad nga pagpakita han ira pag-uyon kan Russell. Han kalmado na an sitwasyon, an interesado nga lalaki dinaop ha kabugtoan basi mahibaro hin dugang pa. Sumala ha istorya han mga nakatambong han sugad hini nga mga hitabo, damu an nahibaro han kamatuoran hini nga paagi.

Han binaya hi Bugto Russell ha New York han Mayo 1909 sakay han Mauretania para ha iya ikaupat nga pagbisita, nag-upod hiya hin usa nga stenographer, hi Bugto Huntsinger, basi samtang nagbibiyahe ha kadagatan, maidikta niya ha iya an mga artikulo han Watch Tower. An pahayag publiko ni Bugto Russell ha Belfast gintambongan hin 450 nga tuminungnong hito nga lugar ngan mga 100 ha ira an nanukdaw na la kay waray na espasyo.

Ha ikalima nga pagbiyahe nga gin-unabi ha tinikangan hini nga artikulo, nagkaada pariho gihapon nga hitabo. Katapos han pahayag publiko ha Dublin, ginbaton ni Bugto Russell an mga pakiana han usa nga kilala nga teologo nga kaupod ni O’Connor, ngan nalipay gud an mga mamarati. Kinabuwasan, sinakay hira Bugto Russell hin barko tipakadto ha Liverpool, ngan didto sinakay liwat hira han sikat nga barko nga Lusitania tikadto ha New York. *

An iginpahibaro nga mga pahayag publiko bahin liwat han ikaunom ngan ikapito nga pagbiyahe ni Bugto Russell han 1911. Han katsaringsing, 20 nga Estudyante han Biblia an nag-abiabi han 2,000 nga namati han pahayag nga “Hereafter.” Kinadto na liwat ha Dublin hi O’Connor nga may upod nga ministro nga nagpinakiana, pero nagpakpak an mga mamarati han Kasuratanhon nga mga baton ni Russell. Han katrakdag hito nga tuig, ginbisita ni Russell an iba pa nga mga bungto, ngan damu an umatender. Makausa pa, nagsari hi O’Connor ngan an iya 100 nga kaupod basi samukon an katirok ha Dublin, pero madasigon nga sinuporta ha mamumulong an mga mamarati.

Bisan kon hi Bugto Russell an kasagaran nga nagdudumara han mga pahayag publiko hito nga panahon, maaram hiya nga “diri nakadepende ha usa ka tawo an buruhaton,” tungod kay “diri ini kanan tawo buruhaton, kondi kanan Dios.” An iginpahibaro nga mga pahayag publiko nagin maopay gud nga higayon ha pagpresenta han Kasuratanhon nga mga kamatuoran. Ano an resulta? An mga pahayag publiko nakabulig ha pagpasarang han maopay nga sumat, ngan nagkaada mga kongregasyon ha damu nga syudad ha bug-os nga Ireland.​—Tikang ha aton daan nga mga koleksyon ha Britanya.