1-2. Sumala ha Mateo 5:11, ano an dapat magin panhunahuna naton ha mga pagsari?

NAGSAAD hi Jesus ha iya mga sumurunod nga magigin tinuod hira nga malipayon. Nagpahamangno liwat hiya nga adton mga nahigugma ha iya maatubang hin mga pagsari. (Mat. 10:22, 23; Luc. 6:20-23) Nalilipay kita ha pagin disipulo han Kristo. Pero ano an aton inaabat kon nahuhunahuna naton nga bangin kontrahon kita han aton mga kapamilya, han gobyerno, o kon presyuron kita han aton mga katrabaho o kaeskwela nga magbuhat hin sayop? Normal la nga bangin mabaraka kita.

² Ginhuhunahuna han kadam-an nga tawo nga diri malilipay an usa kon gintitimaraot hiya. Pero ito gud an igin-aaghat ha aton han Pulong han Dios. Pananglitan, an disipulo nga hi Santiago nagsurat nga imbes nga magpadaog ha mga pagsari, dapat malipay kita. (San. 1:2, 12) Ngan hi Jesus nagsiring nga dapat malipay kita bisan kon gintitimaraot kita. (Basaha an Mateo 5:11.) Paonan-o kita makakapabilin nga malipayon bisan pa ha mga pagsari? Damu an aton mahibabaroan pinaagi ha paghisgot han pipira nga bahin han surat ni Santiago ha mga Kristiano ha siyahan nga siglo. Siyahan, hisgotan naton an mga pagsari nga ira naeksperyensyahan.

3. Ano an nahitabo waray pag-iha tikang han nagin disipulo ni Jesus hi Santiago?

³ Waray pag-iha tikang han nagin disipulo hi Santiago nga bugto ha nanay ni Jesus, ginkontra an mga Kristiano ha Jerusalem. (Buh. 1:14; 5:17, 18) Ngan han ginpatay an disipulo nga hi Esteban, damu nga Kristiano an binaya ha syudad ngan “nagpatlaag ngadto ha ngatanan  nga rehiyon han Judea ngan Samaria,” ngan ha urhi, nakaabot tubtob ha Ciprus ngan Antiokia. (Buh. 7:58–8:1; 11:19) Maiimadyin naton an mga kakurian nga kinahanglan ilubon han mga disipulo. Bisan pa hito, madasigon nga iginsangyaw nira an maopay nga sumat diin man hira kumadto, salit naestablisar an mga kongregasyon ha bug-os nga Imperyo han Roma. (1 Ped. 1:1) Pero damu pa nga pagsari an ira maieksperyensyahan.

4. Ano pa nga mga pagsari an naeksperyensyahan han siyahan-siglo nga mga Kristiano?

⁴ An siyahan-siglo nga mga Kristiano nakaeksperyensya hin iba-iba nga pagsari. Pananglitan, han mga 50 C.E., ginpabaya ha Roma han Romano nga emperador nga hi Claudio an ngatanan nga Judio. Salit adton mga Judio nga nagin mga Kristiano napiritan nga bayaan an ira mga balay ngan mag-ukoy ha iba nga lugar. (Buh. 18:1-3) Han mga 61 C.E., hi apostol Pablo nagsurat nga an iya mga igkasi-Kristiano ginpakaalohan ha publiko, ginpriso, ngan ginpanguhaan han mga panag-iya. (Heb. 10:32-34) Ngan pariho ha iba nga tawo, may mga Kristiano nga nag-antos tungod han kapobrehan ngan sakit.​—Roma 15:26; Fil. 2:25-27.

5. Ano nga mga pakiana an aton babatunon?

⁵ Han ginhimo ni Santiago an iya surat antes han 62 C.E., maaram gud hiya han mga pagsari nga naieksperyensyahan han iya kabugtoan. Gin-giyahan hiya ni Jehova nga magsurat hito nga mga Kristiano basi maghatag hin praktikal nga sagdon nga mabulig ha ira nga magpabilin nga malipayon bisan pa ha mga pagsari. Usisahon naton an surat ni Santiago ngan batunon ta ini nga mga pakiana: Ano nga klase hin kalipay an gin-unabi ni Santiago ha iya surat? Ano an mahimo makagwara han kalipay han usa nga Kristiano? Ngan paonan-o an kinaadman, pagtoo, ngan kaisog mabulig ha aton nga magpabilin nga malipayon anoman nga pagsari an aton naieksperyensyahan?

6. Sumala ha Lucas 6:22, 23, kay ano nga mahimo magin malipayon an usa nga Kristiano bisan kon nakakaeksperyensya hiya hin mga pagsari?

⁶ An mga tawo bangin maghunahuna nga magigin malipayon la hira kon waray hira sakit, damu an ira kwarta, ngan malipayon an ira pamilya. Pero an klase hin kalipay nga gin-unabi ni Santiago amo an usa nga bahin han bunga han espiritu han Dios, ngan diri ito nakadepende ha kahimtang han usa nga tawo. (Gal. 5:22) An usa nga Kristiano nagkakaada tinuod nga kalipay kon maaram hiya nga napapalipay niya hi Jehova ngan ginsusubad niya an ehemplo ni Jesus. (Basaha an Lucas 6:22, 23; Col. 1:10, 11) Pariho hin naglalaga nga kalayo ha sulod han usa nga lampara, ini nga klase hin kalipay daw sugad hin naglalaga ha sulod han kasingkasing han usa nga Kristiano. Diri ito mawawara bisan kon magkasakit kita o magkuri ha pinansyal. Diri liwat ito mawawara bisan kon tamayon o kontrahon kita han aton mga kapamilya o han iba. Imbes nga mawara an aton kalipay, nadudugangan lugod ito ha kada panahon nga nangangalimbasog an aton mga parakontra ha pagwara hito. An aton gin-aatubang nga mga pagsari tungod han aton pagtoo, nagpapamatuod nga tinuod kita nga mga disipulo han Kristo. (Mat. 10:22; 24:9; Juan 15:20) Salit hi Santiago nagsurat: “Mga kabugtoan ko, malipay gud kamo kon nakakaeksperyensya kamo hin magkalain-lain nga mga pagsari.”​—San. 1:2.

7-8. Kay ano nga nagigin mas marig-on an aton pagtoo kon nakakaeksperyensya kita hin mga pagsari?

⁷ Nag-unabi hi Santiago hin dugang pa nga rason kon kay ano nga andam atubangon han mga Kristiano bisan an makuri gud nga mga pagsari. Hiya nagsiring: “Ini nga nasarihan nga kalidad han iyo pagtoo nagbubunga hin pagpailob.” (San. 1:3) An mga pagsari maipapariho ha kalayo nga ginagamit ha paghimo hin espada nga puthaw. Kon an espada ginbabangga ngan ginpapatugnaw, nagigin mas matig-a an puthaw. Sugad man, kon nagpapailob kita ha mga pagsari, nagigin marig-on an aton pagtoo. Salit hi Santiago nagsurat: “Tuguti nga tapuson han pagpailob an buruhaton hito, basi magin bug-os kamo ngan mahimsog ha ngatanan nga bahin.” (San. 1:4) Kon nakikita naton nga nagigin mas marig-on an aton pagtoo tungod ha mga pagsari nga aton gin-aatubang, maiilob naton ito nga may kalipay.

⁸ Ha surat ni Santiago, iya liwat gin-unabi an pipira nga problema nga mahimo makawara han aton kalipay. Ano ito nga mga problema, ngan paonan-o naton ito malalamposan?

9. Kay ano nga kinahanglan naton an kinaadman?

⁹ An problema: Diri kita maaram han aton bubuhaton. Kon nakakaeksperyensya kita hin mga pagsari, karuyag naton magpabulig kan Jehova basi makahimo kita hin desisyon nga makakapalipay  ha iya, magpapahimulos an kabugtoan, ngan mabulig ha aton nga makapabilin nga matinumanon. (Jer. 10:23) Kinahanglan naton an kinaadman basi mahibaro kita kon ano an aton bubuhaton ngan kon ano an aton isisiring ha mga nakontra ha aton. Kon diri kita maaram han aton bubuhaton, bangin manluya kita ngan mawara dayon an aton kalipay.

10. Basi magkaada kinaadman, ano an ginsisiring han Santiago 1:5 nga kinahanglan naton buhaton?

¹⁰ An solusyon: Pangaro kan Jehova hin kinaadman. Basi mailob naton an mga pagsari nga may kalipay, kinahanglan mangaro anay kita hin kinaadman kan Jehova pinaagi ha pag-ampo basi makahimo kita hin mag-opay nga desisyon. (Basaha an Santiago 1:5.) Ano an angay naton buhaton kon baga hin diri dayon ginbabaton ni Jehova an aton pag-ampo? Hi Santiago nagsiring nga kinahanglan “padayon nga mangaro” kita ha Dios. Diri naaaringit hi Jehova kon padayon kita nga nangangaro ha iya hin kinaadman. Diri hiya masisina ha aton. An aton langitnon nga Amay “hura nga nahatag” kon nag-aampo kita para hin kinaadman basi makapailob ha mga pagsari. (Sal. 25:12, 13) Nakikita niya an aton gin-aatubang nga mga pagsari, napaid hiya, ngan karuyag gud niya bumulig ha aton. Oo, usa ito nga hinungdan han aton kalipay! Pero paonan-o nahatag ha aton hi Jehova hin kinaadman?

11. Ano pa an kinahanglan naton buhaton basi magkaada kinaadman?

¹¹ Hi Jehova nahatag hin kinaadman pinaagi han iya Pulong. (Prob. 2:6) Basi magkaada hito nga kinaadman, kinahanglan pag-adman naton an Pulong han Dios ngan an mga publikasyon nga basado ha Biblia. Pero labaw pa kay ha pag-aram la an kinahanglan naton buhaton. Kinahanglan iaplikar naton an kinaadman han Dios pinaagi ha pagsunod han iya mga sagdon. Hi Santiago nagsurat: “Magin magburuhat kamo han pulong ngan diri parapamati la.” (San. 1:22) Kon igin-aaplikar naton an sagdon han Dios, nagigin mas mamurayawon kita, makatadunganon, ngan maloloy-on. (San. 3:17) Ito nga mga kalidad mabulig  ha aton nga maatubang an bisan ano nga pagsari nga diri nawawara an aton kalipay.

12. Kay ano nga importante nga magin pamilyar gud kita ha Biblia?

¹² An Pulong han Dios pariho hin espiho nga nabulig ha aton nga makita an kinahanglan naton bag-uhon ngan kon paonan-o naton ito mahihimo. (San. 1:23-25) Pananglitan, katapos naton pag-adman an Pulong han Dios bangin masantop naton nga kinahanglan naton kontrolon an aton pagin masisinahon. Ha bulig ni Jehova, nahibabaro kita nga magin malumo kon may mga tawo o mga problema nga nakakapasina ha aton. Tungod kay malumo kita, naaatubang naton hin mas maopay an aton mga problema. Nakakapanhunahuna kita hin mas maopay ngan nakakahimo hin mas maopay nga mga desisyon. (San. 3:13) Importante nga magin pamilyar gud kita ha Biblia!

13. Kay ano nga kinahanglan pag-adman naton an mga ehemplo han mga karakter ha Biblia?

¹³ Usahay, nahibabaro kita kon ano an diri naton angay buhaton kon nakasala na kita. Pero makuri ito nga paagi ha paghibaro. An usa nga mas maopay nga paagi ha pagkaada kinaadman amo an paghibaro tikang ha mag-opay nga ginhimo han iba ngan ha ira mga sayop. Salit gin-aaghat kita ni Santiago nga kitaon an mga ehemplo han mga karakter ha Biblia sugad kanda Abraham, Rahab, Job, ngan Elias. (San. 2:21-26; 5:10, 11, 17, 18) Nailob hinin maunungon nga mga surugoon ni Jehova an mga pagsari nga mahimo unta makawara han ira kalipay. An ira susbaranan ha pagin mapailubon nagpapakita nga ha bulig ni Jehova maiilob liwat naton an mga pagsari.

14-15. Kay ano nga diri naton angay igbalewaray an aton mga pagruhaduha?

¹⁴ An problema: Kon may-ada kita mga pagruhaduha ha aton mga gintotoohan. Usahay, bangin nakukurian kita pagsabot ha aton nababasa ha Pulong han Dios. O bangin diri ginbabaton ni Jehova an aton mga pag-ampo uyon ha aton ginlalaoman. Mahimo ini magin hinungdan nga magruhaduha kita. Kon igbabalewaray naton ito, magpapaluya ito han aton pagtoo ngan makakadaot han aton relasyon kan Jehova. (San. 1:7, 8) Ngan puydi pa ngani ito makawara han aton paglaom ha tiarabot.

¹⁵ An aton paglaom ha tiarabot iginpariho ni apostol Pablo ha usa nga angkla. (Heb. 6:19) Tungod ha angkla, nakakapundo an usa nga barko ha panahon han bagyo ngan diri ito igin-aanod ngadto ha mga bato. Pero makakabulig la an angkla kon an kadena hito nga nakahigot ha barko diri mauutod. Sugad la nga an taoy nakakapatapok ha kadena han angkla, an mga pagruhaduha nakakapaluya liwat han aton pagtoo. Kon naatubang hin pagkontra, an usa nga nagruruhaduha mahimo mawara an iya pagtoo nga tutumanon ni Jehova an iya mga saad. Kon mawara an aton pagtoo, mawawara an aton paglaom. Sugad han ginsiring ni Santiago, an mga nagruruhaduha “pariho hin balud ha dagat nga gindadara-dara han hangin ngan ginpapalid-palid.” (San. 1:6) An sugad nga tawo posible nga diri gud magigin malipayon!

16. Ano an angay naton buhaton kon may mga pagruhaduha kita?

¹⁶ An solusyon: Wad-a an imo mga pagruhaduha; parig-ona an imo pagtoo. Gios dayon. Ha panahon ni propeta Elias, an katawohan ni Jehova nagruhaduha ha ira mga gintotoohan. Ginsidngan hira ni Elias: “Tubtob san-o kamo magkikimpang-kimpang ha duha nga magkaiba nga opinyon? Kon hi Jehova an tinuod nga Dios, sunod kamo ha iya; pero kon hi Baal, sunod kamo ha iya!” (1 Hadi 18:21) Yana, kinahanglan liwat naton gumios dayon. Kinahanglan naton magsaliksik basi magin kombinsido kita nga hi Jehova an Dios, an Biblia Pulong niya, ngan an mga Saksi ni Jehova amo an iya katawohan. (1 Tes. 5:21) Kon bubuhaton naton ito, mawawara an aton mga pagruhaduha ngan magririg-on an aton pagtoo. Kon kinahanglan naton hin bulig basi mawara an aton mga pagruhaduha, puydi kita magpabulig ha mga tigurang. Kinahanglan gumios dayon  kita basi padayon kita nga magin malipayon ha pag-alagad kan Jehova!

17. Ano an mahitatabo kon mawara an aton kaisog?

¹⁷ An problema: Panluya. An Pulong han Dios nasiring: “Kon manluya ka ha adlaw han kasakitan, magigin gutiay gud an imo kusog.” (Prob. 24:10) An Hebreo nga pulong nga ginhubad nga “manluya” mahimo magpasabot hin “mawad-an hin kaisog.” Kon mawara an imo kaisog, mawawara dayon an imo kalipay.

18. Ano an iginpapasabot han pagpailob?

¹⁸ An solusyon: Sarig kan Jehova nga tatagan ka niya hin kaisog nga makapailob. Kinahanglan naton an kaisog basi mailob an mga pagsari. (San. 5:11) An pulong nga gin-gamit ni Santiago nga iginhubad nga “pagpailob” naghahatag hin ideya mahitungod ha usa nga tawo nga nagpapabilin nga natindog ha iya pwesto. Bangin mahunahuna naton an usa nga maisugon nga sundalo nga natindog ha iya pwesto samtang gin-aatubang an kaaway, ngan diri gud naatras bisan kon mapintas gud an naatake ha iya.

19. Ano an aton mahibabaroan tikang ha susbaranan nga iginpakita ni apostol Pablo?

¹⁹ Hi apostol Pablo nagpakita hin maopay gud nga susbaranan ha pagin maisugon ngan mapailubon. May mga panahon nga nanluya hiya. Pero nakapailob hiya kay sinarig hiya nga tatagan hiya ni Jehova hin kusog nga iya ginkikinahanglan. (2 Cor. 12:8-10; Fil. 4:13) Mahimo kita magkaada hin sugad nga kusog ngan kaisog kon mapainubsanon nga kakarawaton naton nga kinahanglan naton an bulig ni Jehova.​—San. 4:10.

20-21. Ha ano kita makakasiguro?

²⁰ Makakasiguro kita nga an mga pagsari nga aton naieksperyensyahan diri sirot ha aton ni Jehova. Hi Santiago nagpapasarig ha aton: “Kon nakakaeksperyensya hin pagsari, waray bisan hin-o nga masiring: ‘Ginsasarihan ako han Dios.’ Kay an Dios diri masasarihan hin magraot nga mga butang ngan diri liwat niya ginsasarihan an bisan hin-o.” (San. 1:13) Kon kombinsido kita hito, magigin mas duok kita ha aton mahigugmaon nga Amay ha langit.​—San. 4:8.

²¹ Hi Jehova “diri nag-iiba o nagbabag-o.” (San. 1:17) Ginbuligan niya an siyahan-siglo nga mga Kristiano nga makapailob ha mga pagsari, ngan bubuligan liwat kita niya yana. Sinsero nga pangaro kan Jehova hin kinaadman, pagtoo, ngan kaisog. Babatunon niya an imo mga pag-ampo. Pinaagi hito, makakasiguro ka nga bubuligan ka niya nga makapabilin nga malipayon bisan pa ha mga pagsari!