DUHA nga batan-on nga babaye an naglalakat ha lugar han negosyo ha Baguio City, ha Pilipinas. Napansin nira an usa nga cart para ha pagsangyaw ha publiko, pero waray hira dumaop hito. Hi Helen, an sister nga natindog sapit ha cart, makisangkayon nga hiniyom ha ira. Nagdiretso la an mga babaye, pero naimpres hira han hiyom ni Helen.

Han tipauli na an mga babaye sakay ha bus, may nakita hira nga daku nga jw.org nga sign ha usa nga Kingdom Hall. Nahinumdoman nira nga ito nga sign pariho han ira nakita ha cart. Hinaw-as hira ha bus ngan ginkita an eskedyol han mga katirok han iba-iba nga kongregasyon nga nakapaskin ha gate han Kingdom Hall.

An duha nga babaye inatender ha sunod nga katirok. Ngan maaram ka ba kon hin-o an ira nakita pagsulod nira ha Kingdom Hall? Hi Helen! Nakilala nira dayon an babaye nga may makisangkayon nga hiyom. “Samtang nadaop hira ha akon,” siring ni Helen, “ginkulba ako. Nahunahuna ko nga bangin may nabuhat ako nga sayop.” Pero igin-istorya han mga babaye kan Helen kon ano an nahitabo.

An duha nga babaye nag-enjoy ha katirok ngan ha pakig-upod ha kabugtoan; nagin komportable dayon hira. Han may nakita hira nga naglilimpyo ha Kingdom Hall katapos han katirok, nagpakiana hira kon puydi hira bumulig. An usa nga babaye adto na ha iba nga nasud, pero an usa naatender na ha mga katirok ngan nagpapa-Bible study na​—tungod la han usa nga hiyom!