1. Ano an ginsiring ni Jesus ha iya mga disipulo may kalabotan ha kon san-o maabot an kataposan, ngan ano an iginpahamangno niya ha ira?

 PIPIRA ka adlaw antes mamatay hi Jesus, upat han iya mga disipulo an nagpakiana ha iya: “Ano an magigin tigaman . . . han ikatarapos han sistema han mga butang?” (Mat. 24:3) Posible nga naghuhunahuna hira kon paonan-o nira mahibabaroan kon san-o matatapos an Judio nga sistema han mga butang. Ha baton ni Jesus, diri la an kataposan han Judio nga sistema an iya ginhisgotan kondi pati liwat an “ikatarapos han sistema han mga butang” ha aton panahon. May kalabotan ha kon san-o maabot an kataposan, hi Jesus nagsiring: “Mahitungod hito nga adlaw o oras waray bisan hin-o nga maaram, bisan an mga anghel ha langit o an Anak, kondi an Amay.” Katapos, ginpahamangnoan niya an ngatanan niya nga disipulo nga “padayon nga magmata” ngan “padayon nga magbantay.”—Mar. 13:32-37.

2. Kay ano nga importante nga padayon nga magbantay adton nabubuhi ha panahon han Judio nga sistema?

² An Judio nga mga Kristiano ha siyahan nga siglo kinahanglan magpabilin nga mabinantayon; nakadepende hito an ira kinabuhi. Ginsumatan ni Jesus an iya mga sumurunod kon ano an ira babantayan basi mahibaroan kon san-o matatapos an Judio nga sistema. Hiya nagsiring: “Kon makita na niyo nga an Jerusalem ginpapalibotan han nagkakampo nga mga kasundalohan, hibaroi nga hirani na an iya kabungkagan.” Hito nga takna, kinahanglan sundon nira an pahamangno ni Jesus ngan “magtikang na pagpalagiw ngadto ha kabukiran.” (Luc. 21:20, 21) Adton naghatag hin atensyon hini nga pahamangno nakatalwas han ginbungkag han mga Romano an Jerusalem.

3. Ano an aton hihisgotan hini nga artikulo?

 ³ Yana nabubuhi na kita ha panahon han kataposan hinin maraot nga sistema. Salit kinahanglan ta liwat tipigan an aton maopay nga panhunahuna ngan padayon nga magbantay. Hini nga artikulo, hihisgotan ta kon paonan-o magigin balanse samtang nagbabantay kita hin maopay ha mga panhitabo ha kalibotan, kon paonan-o makakahatag hin atensyon ha aton kalugaringon, ngan kon paonan-o magagamit ha pinakamaopay nga paagi an nabibilin nga panahon.

4. Kay ano nga dapat kita magin interesado nga makita kon paonan-o an mga panhitabo yana ha kalibotan katumanan han mga tagna ha Biblia?

⁴ May mag-opay nga rason kon kay ano nga interesado kita nga makita kon paonan-o an mga panhitabo yana ha kalibotan katumanan han mga tagna ha Biblia. Pananglitan, nagsumat hi Jesus hin espisipiko nga mga panhitabo nga mabulig ha aton nga mahibaroan kon san-o nagtitikahirani na an kataposan han sistema ni Satanas. (Mat. 24:3-14) Gin-aghat kita ni apostol Pedro nga tagan hin atensyon an katumanan han mga tagna basi magpabilin nga marig-on an aton pagtoo. (2 Ped. 1:19-21) An ultimo nga libro han Biblia nagtitikang pinaagi hini nga mga pulong: “Usa nga pahayag ni Jesu-Kristo, nga iginhatag ha iya han Dios, basi ipakita ha iya mga uripon an mga butang nga kinahanglan mahitabo ha diri na maiha.” (Pah. 1:1) Salit interesado gud kita ha mga panhitabo yana ha kalibotan ngan ha paghibaro kon paonan-o posible nga matutuman hito an mga tagna ha Biblia. Ngan bangin karuyag ta gud ito ipakiistorya ha kabugtoan.

5. Ano an dapat naton likyan, pero ano an dapat naton buhaton? (Kitaa liwat an mga piktyur.)

⁵ Pero kon nag-iiristorya parte ha mga tagna ha Biblia, dapat likyan ta an paghimo hin espekulasyon. Kay ano? Kay diri ta karuyag nga may mayakan kita nga makakagwara han pagkaurosa han kongregasyon. Pananglitan, bangin mabatian ta an mga lider ha kalibotan nga nag-iiristorya kon paonan-o nira masusolusyonan an usa nga samok ngan magpapahinabo hin kamurayawan ngan kasigurohan. Imbes nga maghunahuna nga posible nga katumanan na ito han tagna ha 1 Tesalonica 5:3, dapat ta hibaroan an pinakabag-o nga iginpublikar nga impormasyon. Kon an aton ginyayakan iginbabase ta ha mga iginpublikar han organisasyon ni Jehova, ginbubuligan ta an kongregasyon nga magpabilin nga urosa ha “pariho nga opinyon.”—1 Cor. 1:10; 4:6.

6. Ano nga mga leksyon an aton mahibabaroan ha 2 Pedro 3:11-13?

⁶ Basaha an 2 Pedro 3:11-13. Hi apostol Pedro nabulig ha aton nga tipigan an balanse nga panhunahuna kon gin-uusisa an mga tagna ha Biblia. Gin-aghat kita niya nga ‘hunahunaon pirme an presensya han adlaw ni Jehova.’ Kay ano? Diri tungod kay karuyag ta mahibaroan an “adlaw ngan oras” nga ipapadapat na ni Jehova an Armagedon, kondi tungod kay karuyag ta gamiton an nabibilin nga panahon basi magpakita hin ‘baraan nga panggawi ngan mga buhat han debosyon ha Dios.’ (Mat. 24:36; Luc. 12:40) Ha iba nga pagkayakan, karuyag ta tipigan an matadong nga panggawi ngan siguruhon nga an aton mga paningkamot ha pag-alagad kan Jehova nagpapakita han aton hilarom nga gugma ha iya. Basi magpabilin nga nakapokus, kinahanglan tagan ta hin atensyon an aton kalugaringon.

7. Paonan-o ta iginpapakita nga naghahatag kita hin atensyon ha aton kalugaringon? (Lucas 21:34)

⁷ Hi Jesus nagsiring ha iya mga disipulo nga tagan hin atensyon diri la an mga panhitabo ha kalibotan kondi pati liwat an ira kalugaringon.  Ginklaro ito ha pahamangno nga mababasa ha Lucas 21:34. (Basaha.) Pansina an ginsiring ni Jesus: “Tagi hin atensyon an iyo kalugaringon.” An tawo nga naghahatag hin atensyon ha iya kalugaringon alerto ha bisan ano nga peligro nga makakadaot han iya relasyon kan Jehova, ngan naniningkamot hiya nga likyan ito. Hini nga paagi, nagpapabilin hiya ha gugma han Dios.—Prob. 22:3; Jud. 20, 21.

8. Ano an iginsagdon ni apostol Pablo ha mga Kristiano?

⁸ Ginsagdonan ni apostol Pablo an mga Kristiano nga tagan hin atensyon an ira kalugaringon. Pananglitan, ginsidngan niya an mga Kristiano ha Efeso: “Padayon nga magbantay hin maopay nga an iyo paglakat diri magin pariho han diri maaramon kondi pariho han maaramon nga mga tawo.” (Efe. 5:15, 16) Pirme namimeligro an aton espirituwalidad, salit an Biblia nagsasagdon ha aton nga ‘padayon nga sabuton kon ano an kaburut-on ni Jehova’ basi maprotektaran ta an aton kalugaringon ha bisan ano nga klase hin peligro.—Efe. 5:17.

9. Paonan-o ta masasabtan an kaburut-on ni Jehova para ha aton?

⁹ Diri gin-uusa-usa han Biblia an mga peligro nga makakadaot han aton pakigsangkay kan Jehova. Agsob nga kinahanglan ta magdesisyon may kalabotan ha mga butang nga diri direkta nga ginhihisgotan ha Kasuratan. Basi makahimo hin maaramon nga mga desisyon, kinahanglan sabuton ta “an kaburut-on ni Jehova.” Mahihimo ta ini pinaagi han regular nga pag-aram ha Pulong han Dios ngan pagpamalandong hito. Kon mas nasasabtan naton an kaburut-on ni Jehova ngan ginkukultibar an “panhunahuna han Kristo,” mas daku an posibilidad nga an aton paglakat magigin “pariho han maaramon nga mga tawo,” bisan ha mga panahon nga waray espisipiko nga mga surundon nga maggigiya ha aton panggawi. (1 Cor. 2:14-16) An pipira nga peligro madali la mahibaroan, pero an iba diri abat.

10. Ano an pipira nga peligro nga kinahanglan ta likyan?

¹⁰ An pipira nga peligro nga kinahanglan ta likyan amo an pagpikat, sobra nga pag-ininom, sobra nga pagkinaon, pagyakan hin nakakasakit nga mga pulong, sugad man an pagkita hin madarahog nga mga salida, pornograpiya, ngan puropariho nga mga butang. (Sal. 101:3) An aton kaaway, an Yawa, pirme namimiling hin mga oportunidad basi madaot an aton pakigsangkay kan Jehova. (1 Ped. 5:8) Kon diri kita mabinantayon, puydi magtanom hi Satanas ha aton hunahuna ngan kasingkasing hin mga liso han kaawa, pagkadiri-tangkod, kahakog, kapungot, pagpahitaas, ngan pagdumot. (Gal. 5:19-21) Ha tinikangan, bangin diri sugad kakusog ini nga mga inklinasyon. Pero kon diri ta bubuhaton dayon an ngatanan basi magabot ito, padayon ito nga magtutubo sugad hin makahirilo nga tanom ngan maghahatag hin problema.—San. 1:14, 15.

11. Ano an usa nga diri abat nga peligro nga kinahanglan ta likyan, ngan kay ano?

¹¹ Usa nga diri abat nga peligro amo an maraot nga kaupod. Hunahunaa ini nga sitwasyon. Nagtatrabaho ka kaupod an usa nga diri mo igkasi-tumuroo. Karuyag mo nga magkaada hiya maopay nga impresyon ha mga Saksi ni Jehova, salit buotan ngan mabinuligon ka. Usahay bangin naniniudto ka pa ngani kaupod niya. Waray pag-iha, regular mo na ito nga ginbubuhat. May mga panahon nga nag-iistorya hiya parte ha imoral nga mga butang, ngan ha siyahan nalainan ka hito. Pero ha urhi nahiara ka na gud hito nga pag-istorya, salit diri ka na nalalainan hito. Katapos, usa ka adlaw an imo katrabaho nag-imbitar ha imo nga uminom kahuman han trabaho, ngan sumige ka. Ha kamaihaan, agsob ka na umuyon ha iya panhunahuna. Ano pa kaiha antes mo masubad an iya panggios? Syempre, buotan kita ngan matinalahuron ha ngatanan, pero kinahanglan ta hinumdoman nga maiimpluwensyahan gud kita  hadton ginpipili naton nga makaupod. (1 Cor. 15:33) Kon naghahatag kita hin atensyon ha aton kalugaringon, sugad han igin-aaghat ni Jesus, lilikyan ta an diri kinahanglan nga pakig-upod ha mga tawo nga diri nagkikinabuhi uyon ha mga suruklan ni Jehova. (2 Cor. 6:15) Makikita naton an peligro ngan lilikyan ito.

12. Ano an kinahanglan buhaton han mga disipulo ni Jesus samtang ginhuhulat nira an ikatarapos han sistema han mga butang?

¹² Karuyag ni Jesus nga magin busy an iya mga disipulo samtang ginhuhulat nira an ikatarapos han sistema han mga butang. Gintagan niya hira hin buruhaton. Ginsugo niya hira nga isangyaw an maopay nga sumat “ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.” (Buh. 1:6-8) Daku gud nga toka an nakarawat han mga sumurunod ni Jesus! Pinaagi ha pagbuhat han ngatanan nira nga mahihimo hito nga toka, gin-gamit nira ha pinakamaopay nga paagi an ira panahon.

13. Kay ano nga kinahanglan ta gamiton ha pinakamaopay nga paagi an aton panahon? (Colosas 4:5)

¹³ Basaha an Colosas 4:5. Basi mahatagan hin atensyon an aton kalugaringon, kinahanglan hunahunaon naton hin maopay kon paonan-o ta ginagamit an aton panahon. An “diri ginlalaoman nga mga hitabo” puydi makaapekto ha bisan hin-o ha aton. (Ecles. 9:11) May posibilidad nga tigda la kita nga mamatay.

14-15. Paonan-o ta magagamit ha pinakamaopay nga paagi an aton panahon? (Hebreo 6:11, 12) (Kitaa liwat an piktyur.)

 ¹⁴ Magagamit ta ha pinakamaopay nga paagi an aton panahon pinaagi ha pagbuhat han kaburut-on ni Jehova ngan pagparig-on han aton pakigsangkay ha iya. (Juan 14:21) Kinahanglan “magmarig-on [kita], diri nababantad, nga pirme damu an ginbubuhat ha buruhaton han Ginoo.” (1 Cor. 15:58) Kon bubuhaton ta ito, pag-abot han kataposan—kataposan man han aton kinabuhi o kataposan hinin maraot nga sistema—waray kita pagbabasolan.—Mat. 24:13; Roma 14:8.

¹⁵ Yana, padayon nga gin-gigiyahan ni Jesus an iya mga disipulo samtang ira iginsasangyaw an Ginhadian han Dios ha bug-os nga tuna. Ginbubuhat niya an iya bahin. Pinaagi han organisasyon ni Jehova, ginti-train kita ni Jesus kon paonan-o magsasangyaw ngan nagtatagana hiya ha aton hin mga garamiton nga aton ginkikinahanglan basi maipasamwak an maopay nga sumat. (Mat. 28:18-20) Ginbubuhat ta an aton bahin pinaagi ha pagin maduruto ha pagsangyaw ngan pagtutdo ngan pinaagi ha pagin mabinantayon samtang ginhuhulat ta nga tapuson ni Jehova ini nga sistema han mga butang. Pinaagi ha pag-aplikar han sagdon nga mababasa ha Hebreo 6:11, 12, makakaptan ta hin marig-on an aton paglaom “tubtob ha kataposan.”—Basaha.

16. Ano an aton determinasyon?

¹⁶ Hi Jehova may itinanda nga adlaw ngan oras ha pagtapos han sistema ni Satanas. Pag-abot hito nga adlaw, tutumanon ni Jehova an ngatanan nga tagna nga iya iginparekord ha iya Pulong. Ha pagkayana, bangin may mga panahon nga abaton ta nga nalalangan an kataposan hini nga sistema. Pero an adlaw ni Jehova ‘diri maaatrasado!’ (Hab. 2:3) Salit hinaot magin determinado kita nga ‘padayon nga magbantay kan Jehova’ ngan ‘mapailubon nga maghulat ha Dios nga nagtatalwas ha aton.’—Mic. 7:7.