1. San-o mahingangadto ha langit an ngatanan nga dinihogan?

 MGA tuig na an naglabay, an katawohan ni Jehova naghunahuna, ‘San-o dadad-on ha langit an ultimo nga dinihogan nga mga Kristiano?’ Hadto naghunahuna kita nga posible an pipira han mga dinihogan bangin magpabilin ha Paraiso nga tuna hin pipira ka panahon katapos han girra han Armagedon. Pero ha Hulyo 15, 2013, nga isyu han An Barantayan, nahibaroan naton nga an ngatanan nga dinihogan nga aanhi pa ha tuna dadad-on ngadto ha langit antes magtikang an Armagedon.—Mat. 24:31.

2. Ano nga pakiana an bangin bumangon, ngan ano an aton hihisgotan hini nga artikulo?

² Pero may pakiana nga bangin bumangon: Ano an mahitatabo ha “iba nga mga karnero” han Kristo nga mag-aalagad kan Jehova nga matinumanon ha tuna ha panahon han “daku nga kasakitan”? (Juan 10:16; Mat. 24:21) An pipira yana bangin nababaraka nga waray mabulig o maggigiya ha ira kon an ira hinigugma nga dinihogan nga kabugtoan dad-on na ha langit. Hisgotan naton an duha nga rekord ha Biblia nga bangin tungod hito nakahunahuna hira hin sugad. Katapos, hihisgotan naton an mga rason kon kay ano nga diri kita kinahanglan mabaraka.

ANO AN DIRI MAHITATABO?

3-4. Ano an bangin ginhuhunahuna han iba, ngan kay ano?

³ An iba bangin naghuhunahuna nga an iba nga mga karnero mabulag ha kamatuoran kon diri na nira kaupod an dinihogan nga kabugtoan nga membro han Nagmamando nga Lawas basi maggiya ha ira. Bangin inabat hira hin sugad hini tungod han pipira nga rekord ha Biblia. Hisgotan naton an duha nga ehemplo.  An usa mahitungod han hitaas nga saserdote nga hi Jehoiada. Usa hiya nga matinumanon nga surugoon han Dios. Ginprotektahan niya ngan han iya asawa nga hi Jehosabat, an bata nga hi Jehoas ngan ginbuligan hiya nga magin maopay ngan matinumanon nga hadi. Samtang buhi pa an edaran nga hi Jehoiada, maopay an ginbuhat ni Jehoas. Pero kamatay ni Jehoiada, nagin maraot hi Jehoas. Namati hiya ha maraot gud nga mga prinsipe ngan binaya kan Jehova.—2 Cron. 24:​2, 15-19.

⁴ An sunod nga ehemplo amo an mga Kristiano ha ikaduha nga siglo. Hi apostol Juan, an ultimo nga nabubuhi nga apostol, maopay nga impluwensya ha damu nga Kristiano, kay ginbubuligan niya hira nga magpailob ha ira pag-alagad kan Jehova. (3 Juan 4) Hi Juan kaupod han iba pa nga matinumanon nga apostol ni Jesus, nakig-away gud ha pipira ka panahon han nagsasarang nga apostasya. (1 Juan 2:18; kitaa an mga study note ha 2 Tes. 2:7.) Pero kamatay ni Juan, an apostasya nagsarang sugad hin wildfire. Ha sulod hin pipira ka dekada, bug-os na nga nakasulod an apostasya ha Kristiano nga kongregasyon.

5. Ano an diri naton dapat hunahunaon hinin duha nga rekord?

⁵ Iginpapakita ba hito nga duha nga rekord ha Biblia nga may puropariho nga mahitatabo ha iba nga mga karnero han Kristo kon an mga dinihogan dad-on na ha langit? Hito nga panahon, babayaan ba han matinumanon nga mga Kristiano an igintutdo ha ira, sugad han ginbuhat ni Jehoas, o mag-aapostata, sugad han ginbuhat han damu nga Kristiano ha ikaduha nga siglo C.E.? An baton diri gud! Makakasiguro kita nga kon an mga dinihogan bumaya na ha tuna, an iba nga mga karnero aatamanon hin maopay ngan magpapadayon pagsingba kan Jehova ha tama nga paagi. Kay ano nga makakasiguro kita hito?

AN PUTLI NGA PAGSINGBA DIRI MAHUHUGAWAN

6. Ano an tulo nga peryodo nga aton hihisgotan hin madaliay?

⁶ Kay ano nga makakasiguro kita nga an putli nga pagsingba diri mahuhugawan bisan ha maabot nga makuri nga mga panahon? Tungod han aton nahibaroan tikang ha Biblia mahitungod han panahon diin kita nabubuhi. Ini nga peryodo naiiba gud ha panahon han kadaan nga Israel ngan ha panahon han mga Kristiano ha ikaduha nga siglo. Salit kitaon naton hin mas maopay ini nga tulo nga peryodo: (1) An panahon han kadaan nga Israel, (2) an panahon katapos mamatay an mga apostol, ngan (3) an aton mga panahon, an “mga panahon han pagpahiuli han ngatanan nga butang.”—Buh. 3:21.

7. Kay ano nga diri dapat mawad-an hin paglaom an matinumanon nga mga Israelita han an mga hadi ngan an iba nagbuhat hin maraot gud?

⁷ An panahon han kadaan nga Israel. Han hirani na mamatay hi Moises, ginsidngan niya an mga Israelita: “Maaram gud ako nga kon mamatay na ako sigurado nga magbubuhat kamo hin maraot ngan masimang tikang ha dalan nga iginsugo ko ha iyo.” (Deut. 31:29) Nagpahamangno liwat hi Moises nga kon an mga Israelita magrebelde, madidistyero hira. (Deut. 28:​35, 36) Natuman ba ito nga mga pulong? Oo. Ha sulod hin ginatos ka tuig, damu nga hadi an nagbuhat hin maraot ha atubangan ni Jehova ngan an katawohan nagsunod ha ira ha buwa nga pagsingba. Tungod hini ginsirotan ni Jehova an iya maraot nga katawohan ngan waray na Israelita nga hadi nga gintugotan nga magmando ha ira. (Ezek. 21:​25-27) Pero an matinumanon nga mga Israelita nagin maisugon han nakita nira nga natuman an ginsiring han Dios.—Isa. 55:​10, 11.

8. Dapat ba kita mahipausa nga an Kristiano nga kongregasyon ha ikaduha nga siglo nahugawan? Isaysay.

⁸ An panahon katapos mamatay an mga  apostol. Dapat ba kita mahipausa nga nahugawan an Kristiano nga kongregasyon ha ikaduha nga siglo? Diri gud. Igintagna ni Jesus nga mahitatabo an daku nga apostasya. (Mat. 7:​21-23; 13:​24-30, 36-43) Hira apostol Pablo, Pedro, ngan Juan nagkompirma nga an tagna ni Jesus nagtikang na matuman ha siyahan nga siglo C.E. (2 Tes. 2:​3, 7; 2 Ped. 2:1; 1 Juan 2:18) Ha ikaduha nga siglo C.E., an Kristiano nga kongregasyon nahugawan na. Binangon an apostata nga Kristianidad nga nagin prominente nga bahin han Babilonya nga Gamhanan, an imperyo han buwa nga relihiyon ha kalibotan. An igintagna ni Jesus natutuman na.

9. Paonan-o an peryodo diin nabubuhi kita naiiba ha panahon han kadaan nga Israel ngan ha panahon han Kristiano nga kongregasyon ha ikaduha nga siglo?

⁹ An “mga panahon han pagpahiuli han ngatanan nga butang.” An aton panahon naiiba ha panahon han kadaan nga Israel ngan ha panahon han daku nga apostasya nga nagtikang han ikaduha nga siglo C.E. Ano an tawag han aton peryodo? Bangin ha siyahan tawagon naton ito sugad nga an “kataposan nga mga adlaw” hini nga maraot gud nga sistema han mga butang. (2 Tim. 3:1) Pero iginpapakita han Biblia an usa nga mas daku ngan mas hilawig nga peryodo nga nagtikang ha pariho nga panahon. Magpapadayon ito tubtob nga maipahiuli han Mesianiko nga Ginhadian an mga tawo ha pagin perpekto ngan magin paraiso an tuna. Ini nga panahon gintatawag nga “mga panahon han pagpahiuli han ngatanan nga butang.” (Buh. 3:21) Ini nga peryodo nagtikang han 1914. Ano kon sugad an naipahiuli? An pagin Hadi ni Jesus ha langit. Salit hi Jehova nagkaada utro magmarando nga nagrirepresentar ha Iya, usa nga manurunod han matinumanon nga hi Hadi David. Pero diri la pagkahadi an iginpahiuli ni Jehova. Waray pag-iha katapos hito, an putli nga pagsingba nagtikang na maipahiuli! (Isa. 2:​2-4; Ezek. 11:​17-20) Mahuhugawan ba ito utro?

10. (a) Ano an igintagna han Biblia mahitungod han putli nga pagsingba ha aton panahon? (Isaias 54:17) (b) Kay ano nga nagpapasarig ito nga mga tagna?

¹⁰ Basaha an Isaias 54:17. Hunahunaa ito nga tagna: “Waray armas nga ginporma kontra ha imo an maglalampos”! Ito nga giniyahan nga mga pulong natutuman na yana. An masunod nga nakakaliaw nga mga pulong naaplikar liwat ha aton panahon: “An ngatanan mo nga anak tututdoan ni Jehova, ngan magigin hura an kamurayawan han imo mga anak. Ig-iestablisar ka hin marig-on ha katadongan. . . . Waray ka kahahadlokan ngan waray magigin rason para malisang ka, kay diri ito mahirani ha imo.” (Isa. 54:​13, 14) Bisan hi Satanas mismo, an “dios hini nga sistema  han mga butang,” waray gahum nga paundangon an buruhaton nga pagpanutdo nga ginbubuhat han katawohan ni Jehova. (2 Cor. 4:4) Naipahiuli na an putli nga pagsingba, ngan diri na gud ito mahuhugawan. Magpapabilin ito ha waray kataposan. Waray armas nga ginporma kontra ha aton an maglalampos!

ANO AN MAHITATABO?

11. Ano an nakakakombinse ha aton nga an daku nga grupo diri papabay-an kon kumadto na ha langit an mga dinihogan?

¹¹ Ano an mahitatabo kon an mga dinihogan dad-on na ha langit? Hinumdumi, hi Jesus an aton Paraataman. Hiya an ulo han Kristiano nga kongregasyon. Hi Jesus klaro nga nagsiring: “Usa la an iyo Lider, an Kristo.” (Mat. 23:10) An aton nagmamando nga Hadi diri gud mapapakyas ha pagtuman han iya responsabilidad. Tungod kay an Kristo an naggigiya, waray gud angay kahadlokan an iya mga sumurunod dinhi ha tuna. Syempre, diri kita maaram han tagsa nga detalye kon paonan-o papangunahan han Kristo an iya katawohan hito nga panahon. Salit hisgotan ta an pipira nga ehemplo ha Biblia nga mahimo magpasarig ha aton.

12. Paonan-o gin-ataman ni Jehova an iya katawohan (a) katapos mamatay hi Moises? (b) katapos ni Elias makakarawat hin iba nga toka? (Kitaa liwat an piktyur.)

¹² Antes makasulod an Israel ha Tuna nga Iginsaad, namatay hi Moises. Ano an nahitabo ha katawohan han Dios? Kamatay hito nga matinumanon nga tawo, ginpabay-an ba hira ni Jehova? Waray. Tubtob nga matinumanon hira, gintaganahan hira ni Jehova. Antes hi Moises mamatay, ginsidngan hiya ni Jehova nga tokahan hi Josue nga manguna ha katawohan. Ginbinansay na ni Moises hi Josue ha sulod hin mga dekada. (Ex. 33:11; Deut. 34:9) Labot pa, damu an may kapas nga kalalakin-an nga nangunguna—lider han kada 1,000, kada 100, kada 50, ngan bisan pa ngani han kada 10. (Deut. 1:15) An katawohan han Dios inataman gud hin maopay. Pariho ito han nahitabo kan Elias. Mga dekada na nga ginpangunahan niya an mga Israelita ha putli nga pagsingba. Pero inabot an panahon nga iginbalhin hiya ni Jehova ha lain nga toka, ha sur han Juda. (2 Hadi 2:1; 2 Cron. 21:12) Ginpabay-an ba an matinumanon nga katawohan han napulo nga tribo han ginhadian han Israel? Waray. Ginbinansay ni Elias hi Eliseo ha sulod hin mga tuig. May-ada liwat “mga anak han mga propeta,” nga sigurado nga nakakarawat hin pagbansay. (2 Hadi 2:7) Salit damu nga matinumanon nga kalalakin-an an makakabulig ha pagpanguna ha katawohan han Dios. Padayon nga gintuman ni Jehova an iya katuyoan, ngan gin-ataman an iya matinumanon nga mga magsiringba.

13. Ano nga pasarig an aton mababasa ha Hebreo 13:5b? (Kitaa liwat an piktyur.)

 ¹³ Tungod hito nga mga ehemplo, ano an imo nahuhunahuna nga mahitatabo kon an ultimo nga mga dinihogan dad-on na ha langit? Diri kita dapat mabaraka. Iginpapakita han Biblia an simple ngan nagpapasarig nga kamatuoran: Diri gud papabay-an ni Jehova an iya katawohan ha tuna. (Basaha an Hebreo 13:5b.) Pariho kanda Moises ngan Elias, an gutiay nga grupo han dinihogan nga mga Kristiano nga nangunguna yana maaram han pagkaimportante han pagbansay ha iba. Ha sulod na hin mga dekada an Nagmamando nga Lawas nagbabansay hin kalalakin-an tikang ha iba nga karnero basi manguna. Pananglitan, nag-organisar hira hin damu nga eskwelahan basi bansayon an mga tigurang, nagbibiyahe nga paramangno, membro han Branch Committee, paramangno ha Bethel, ngan iba pa. Personal nga ginbabansay han Nagmamando nga Lawas an mga kabulig han iba-iba nga komite han Nagmamando nga Lawas. Bisan yana an mga kabulig matinumanon nga nagdudumara hin magbug-at nga responsabilidad. Andam na gud hira hin maopay ha padayon nga pag-ataman han mga karnero han Kristo.

14. Ano an importante nga punto an aton ginhihisgotan?

¹⁴ Ini an importante nga punto han aton ginhihisgotan: Kon an ultimo han mga dinihogan dad-on na ha langit ha ikatarapos nga bahin han daku nga kasakitan, an putli nga pagsingba magpapadayon la gihapon dinhi ha tuna, tungod han pagpanguna ni Jesu-Kristo. Oo, hito nga panahon, aatakehon kita han Gog han Magog, an alyansa han mga nasud. (Ezek. 38:​18-20) Pero mapapakyas ito nga madaliay nga pag-atake; diri hito mapapaundang an katawohan ni Jehova ha pagsingba ha iya. Sigurado nga tatalwason Niya hira! Ha bisyon, nakita ni apostol Juan an “daku nga grupo” han iba nga karnero han Kristo. Ginsidngan hi Juan nga ini nga “daku nga grupo” “nakatalwas ha daku nga kasakitan.” (Pah. 7:​9, 14) Oo, matatalwas hira!

15-16. Sumala ha Pahayag 17:​14, ano an bubuhaton han mga dinihogan han Kristo ha girra han Armagedon, ngan kay ano nga nakakaparig-on ito?

¹⁵ Pero bangin an pipira magpakiana: ‘Ano an bubuhaton han mga dinihogan kon sumaka na  hira ha langit?’ Direkta nga ginbabaton han Biblia ito nga pakiana. Iginpapakita hito nga an politikal nga mga elemento hini nga kalibotan “makikig-away . . . ha Kordero.” Pero syempre, mapipirde hira. Ini an aton mababasa: “Dadaugon hira han Kordero.” Ngan hin-o an mabulig ha iya? Ginbabaton ito han bersikulo. Adton mga “tinawag,” “pinili,” ngan “matinumanon.” (Basaha an Pahayag 17:14.) Hin-o ini hira? An binanhaw nga mga dinihogan! Salit kon an ultimo han mga dinihogan ha tuna dad-on na ha langit ha ikatarapos nga bahin han daku nga kasakitan, an usa han siyahan nira nga toka amo an pakig-away. Kaopay gud hini nga toka! An iba han dinihogan nga mga Kristiano nakikig-away hadto antes hira magin mga Saksi ni Jehova. An iba nagin mga sundalo pa ngani. Pero ha urhi, nagin tinuod hira nga mga Kristiano ngan nahibaro han dalan han kamurayawan. (Gal. 5:22; 2 Tes. 3:16) Waray na hira makigbahin ha bisan ano nga klase hin pakig-away. Pero kon dad-on na hira ha langit, makikig-away hira kaupod han Kristo ngan han iya baraan nga mga anghel, ha kataposan nga girra kontra ha mga kaaway han Dios.

¹⁶ Hunahunaa ini! Han nakanhi pa ha tuna an pipira han dinihogan nga mga Kristiano, mga lagas na hira ngan maluya pa ngani. Pero kon banhawon na hira ngadto ha langit, magigin gamhanan hira ngan imortal nga mga espiritu, nga gintokahan ha pakig-away upod an ira Girriro nga Hadi, hi Jesu-Kristo. Katapos han girra han Armagedon, maupod hira kan Jesus ha pagbulig ha mga tawo nga magin perpekto. Sigurado, nga kon adto na hira ha langit mas mabubuligan nira an ira hinigugma nga kabugtoan ha tuna kay han ira mahihimo sugad nga diri perpekto nga mga tawo!

17. Kay ano nga makakasiring kita nga an ngatanan nga surugoon han Dios magigin talwas ha girra han Armagedon?

¹⁷ Kaapi ka ba han iba nga mga karnero? Kon oo, ano an kinahanglan mo buhaton kon magtikang na an importante gud nga girra han Armagedon? Simple la: Sarig kan Jehova, ngan sunda an iya instruksyon. Ano an bangin nahiuupod hito? Nakakaliaw an ginsiring han Biblia: “Sulod ha iyo gisusuluri nga mga kwarto, ngan sadhi an iyo mga purtahan pagsulod niyo. Tago hin madaliay tubtob nga lumabay an kapungot.” (Isa. 26:20) An ngatanan nga matinumanon nga surugoon han Dios, ha langit ngan ha tuna, magigin talwas hito nga panahon. Pariho kan apostol Pablo, kombinsido kita nga waray “mga gobyerno, bisan an mga butang nga aanhi yana, bisan an mga butang nga maabot . . . [nga] makakagbulag ha aton ha gugma han Dios.” (Roma 8:​38, 39) Pirme hinumdumi: Hinigugma ka ni Jehova, ngan diri gud niya ikaw papabay-an!