HAN Mierkoles, Enero 18, 2023, usa nga espesyal nga pahibaro an gumawas ha jw.org, nga nagsusumat nga hira Brother Gage Fleegle ngan Jeffrey Winder ginpili nga mag-alagad sugad nga mga membro han Nagmamando nga Lawas han mga Saksi ni Jehova. Inin duha nga brother nag-alagad kan Jehova nga matinumanon ha sulod hin maiha na nga panahon.

Hi Brother Fleegle nagdaku ha western Pennsylvania, U.S.A., ha iya mga kag-anak nga may kahadlok ha Dios. Han tin-edyer hiya, an iya pamilya binalhin ha usa nga gutiay nga bungto diin may mas daku nga panginahanglan. Waray pag-iha, nabawtismohan hiya han Nobyembre 20, 1988.

Pirme gin-aaghat hi Brother Fleegle han iya mga kag-anak nga sumulod ha bug-os-panahon nga pag-alagad. Agsob hira mag-imbitar hin mga paramangno han sirkito ngan mga Bethelite ha ira balay, ngan nakita ni Brother Fleegle kon ano kamalipayon ini nga kabugtoan. Waray pag-iha katapos han iya bawtismo, nagregular payunir hiya—han Septyembre 1, 1989. Paglabay hin duha ka tuig, gintuman niya an iya tumong nga iya ginhimo han 12 anyos hiya—mag-alagad ha Bethel. Nag-alagad hiya ha Brooklyn Bethel han Oktubre 1991.

Ha Bethel, nagtrabaho hi Brother Fleegle ha Bindery ha sulod hin walo ka tuig, katapos, gin-asayn hiya ha Service Department. Hito nga panahon, nag-alagad hiya hin pipira ka tuig ha usa nga kongregasyon nga Russian an yinaknan. Han 2006 nagpakasal hira ni Nadia, nga inupod ha iya ha pag-alagad ha Bethel. Magkaupod hira nga nag-alagad ha teritoryo nga nagyayakan hin Portuguese ngan ha sulod hin sobra napulo ka tuig ha teritoryo nga nagyayakan hin Spanish. Katapos hin damu ka tuig ha Service Department, gin-asayn hi Brother Fleegle nga magtrabaho ha Teaching Committee Office ngan ha urhi ha Service Committee Office. Han Marso 2022 ginpili hiya sugad nga kabulig ha Service Committee han Nagmamando nga Lawas.

 Nagdaku hi Brother Winder ha Murrieta, California, U.S.A. Ginpadaku hiya ha kamatuoran han iya mga kag-anak, ngan nabawtismohan hiya han Marso 29, 1986. Han sumunod gud nga bulan, nagdesisyon hiya nga mag-auxiliary payunir. Na-enjoy gud ito niya salit karuyag niya nga magpadayon. Katapos hin pipira ka bulan nga pag-auxiliary payunir, nagregular payunir hiya han Oktubre 1, 1986.

Sugad nga tin-edyer, ginbisita ni Brother Winder an iya duha nga kuya nga nag-aalagad ha Bethel hito nga panahon. Tungod hito nga pagbisita, naruyag hiya nga mag-aplay para mag-alagad ha Bethel kon mas daku na hiya. Ngan han Mayo 1990, gin-imbitar hiya nga mag-alagad ha Bethel ha Wallkill.

Ha Bethel, nagtrabaho hi Brother Winder ha iba-iba nga departamento, upod na an Cleaning Department, Farm Department, ngan Bethel Office. Nagpakasal hira ni Angela han 1997, ngan magkaupod hira nga nag-aalagad ha Bethel tikang hito. Han 2014 binalhin hira ha Warwick, diin binulig hi Brother Winder ha pagtukod han pasilidad han world headquarters. Han 2016 binalhin hira ha Watchtower Educational Center ha Patterson, diin nagtrabaho hi Brother Winder ha Audio/Video Services. Paglabay hin upat ka tuig, binalik hira ha Warwick, ngan gin-asayn hi Brother Winder nga magtrabaho ha Personnel Committee Office. Han Marso 2022 ginpili hiya sugad nga kabulig ha Personnel Committee han Nagmamando nga Lawas.

Igin-aampo naton nga hura nga bendisyonan ni Jehova inin “mga regalo nga mga lalaki” samtang padayon hira nga naniningkamot para ha mga buruhaton han Ginhadian.—Efe. 4:8.