Iginpapatin-aw han Biblia nga makakagtagna hi Jehova han tiarabot. (Isa. 45:21) Waray hito idetalye kon paonan-o o san-o niya ito ginbubuhat o bisan kon ano kadamu an iya karuyag mahibaroan. Salit diri kita sigurado han baton mahitungod hini. Pero may-ada pipira nga nasasabtan naton.

Mabubuhat ni Jehova an ngatanan nga iya karuyag labot la han ginpipili niya nga diri buhaton. Tungod han iya waray tubtoban nga kinaadman, mahimo hiya magtagna han bisan ano nga iya karuyag. (Roma 11:33) Pero tungod han iya perpekto nga pagpugong ha kalugaringon, mahimo liwat niya pilion nga diri mahibaro kon ano an mahitatabo.—Ikompara an Isaias 42:14.

Iginpapahinabo ni Jehova nga matuman an iya kaburut-on. Paonan-o ito mabulig ha aton nga masabtan an iya abilidad ha pagtagna han tiarabot? Iginsasaysay han Isaias 46:10: “Tikang ha tinikangan akon igintatagna an magigin resulta, ngan tikang ha kadaan nga panahon an mga butang nga waray pa buhata. Nasiring ako, ‘An akon desisyon magpapabilin, ngan akon bubuhaton an bisan ano nga karuyag ko.’”

Salit an usa nga rason kon kay ano nga makakagtagna hi Jehova han tiarabot kay may-ada hiya gahum basi pahinaboon ito. An paghibaro ni Jehova ha kon ano an mahitatabo ha tiarabot, diri pariho han aton pagkita hin salida nga usahay ginkikita naton an ending basi mahibaroan kon ano an mahitatabo. Lugod, mahimo magdesisyon hi Jehova nga mahitatabo an usa nga butang ha espisipiko nga panahon ngan pahinaboon ito kon umabot na ito nga takna.—Ex. 9:​5, 6; Mat. 24:36; Buh. 17:31.

Tungod hini, an Biblia naggamit han mga pulong sugad han “gin-andam,” ngan “ginporma” basi ihulagway kon ano an ginbubuhat ni Jehova mahitungod han mahitatabo ha tiarabot. (2 Hadi 19:25; ftn.) Ini nga mga termino iginhubad tikang ha orihinal nga pulong nga konektado ha pulong nga nangangahulogan hin “parahimo hin daba.” (Jer. 18:4) Sugad la nga mapuporma han eksperto nga parahimo hin daba an lapok ngadto ha mahusay nga plorera, mapuporma o mamamaniobra ni Jehova an mga butang, basi matuman an iya kaburut-on.—Efe. 1:11.

Ginrirespeto ni Jehova an regalo nga kagawasan ha pagbuot. Diri hiya naghihimo han kapalaran han tagsa nga tawo; ngan diri liwat niya ginpapahinabo nga an mag-opay nga tawo magbuhat hin maraot nga magriresulta han ira kabungkagan. Gintutugotan niya an ngatanan nga magpili kon ano an ira karuyag, ngan gin-aaghat niya hira nga pilion an maopay.

Tagda an duha nga ehemplo. An siyahan nga ehemplo amo an mga umurukoy ha Nineve. Igintagna ni Jehova nga bubungkagon an syudad tungod han karaotan hito. Pero han nagbasol an mga umurukoy hito, “ginhunahuna utro [ni Jehova] an kadaot nga iya ginsiring nga pahihinaboon niya ha ira, ngan waray niya ito igpahinabo.” (Jon. 3:​1-10) Ginbag-o ni Jehova an iya hunahuna mahitungod han iya igintagna kay gin-gamit han mga taga-Nineve an ira kagawasan ha pagbuot basi magbasol ha pahamangno ni Jehova.

An ikaduha nga ehemplo amo an tagna mahitungod han magsasakop nga hi Ciro, nga magpapagawas ha mga Judio tikang ha pagkabihag ngan magsusugo nga tukuron utro an templo ni Jehova. (Isa. 44:26–45:4) Gintuman ito nga tagna ni Hadi Ciro han Persia. (Ezra 1:​1-4) Pero hi Ciro waray magsingba ha tinuod nga Dios. Gin-gamit ni Jehova hi Ciro ha pagtuman han tagna pero gintugotan niya hi Ciro nga gamiton an iya kagawasan ha pagbuot kon hin-o an iya sisingbahon.—Prob. 21:1.

Syempre, pipira la ini nga butang nga ginkukonsiderar ni Jehova kon nagtatagna hiya han tiarabot. Ha pagkamatuod, waray tawo nga makakasabot han ngatanan nga ginhuhunahuna ngan ginbubuhat ni Jehova. (Isa. 55:​8, 9) Pero an aton hinbabaroan mahitungod kan Jehova nagpaparig-on han aton pagtoo nga pirme niya ginbubuhat an husto—pati na kon nagtatagna hiya mahitungod han tiarabot.