1. Iilustrar kon kay ano nga dapat naton sundon hi Jehova sugad nga aton Giya.

 IMADYINA nga nawawara ka ha kagurangan. May mga peligro ha imo palibot: ihalas nga mga hayop, mga insekto nga may dara nga sakit, makahirilo nga mga tanom, ngan batoon nga tuna. Mapasalamaton ka gud kon may kaupod ka nga maggigiya ha imo nga maaram gud han lugar. Maaram hiya kon hain an peligro ngan kon paonan-o ka makakalikay hito! Ini nga kalibotan pariho hito nga kagurangan. Puno ito hin peligro nga makakadaot gud ha aton espirituwalidad. Pero may-ada kita perpekto nga Giya—hi Jehova. Gin-gigiyahan kita niya pahirayo ha peligro ngan tipakadto ha aton destinasyon—ha kinabuhi nga waray kataposan ha bag-o nga kalibotan.

2. Paonan-o kita gin-gigiyahan ni Jehova?

² Paonan-o kita gin-gigiyahan ni Jehova? An nangunguna nga paagi amo an iya sinurat nga Pulong, an Biblia. Pero nagamit liwat hiya hin mga tawo ha paggiya ha aton. Pananglitan, gin-gagamit niya “an matinumanon ngan maaramon nga uripon” ha pagtagana hin espirituwal nga pagkaon nga nabulig ha aton nga makahimo hin maaramon nga mga desisyon. (Mat. 24:45) Gin-gagamit liwat ni Jehova an iba pa nga may kapas nga kalalakin-an ha paggiya ha aton. Pananglitan, an mga paramangno han sirkito ngan mga tigurang ha kongregasyon nagtatagana hin pagparig-on ngan instruksyon nga makakabulig ha aton nga makaya an magkuri nga sitwasyon. Mapasalamaton gud kita hinin masasarigan nga giya ha panahon han peligroso nga kataposan nga mga adlaw! Nabulig ito ha aton nga matipigan an pag-uyon ni Jehova ngan makapabilin ha dalan han kinabuhi.

3. Ano an aton hihisgotan hini nga artikulo?

³ Pero usahay, bangin makurian kita nga sundon an giya ni Jehova labi na kon an naghahatag hito diri perpekto nga kalalakin-an. Kay ano? An sagdon bangin diri uyon ha aton mga naruruyagan o diri naruruyagan. O bangin abaton naton nga diri maaramon an  giya nga aton nakarawat ngan magsiring nga an sagdon diri tikang kan Jehova. Ha sugad nga mga panahon, labi nga kinahanglan kita sumarig nga hi Jehova an nangunguna ha iya katawohan ngan an pagsunod ha iya giya nagriresulta hin mga bendisyon. Basi mabuligan kita nga maparig-on an aton pagsarig, hihisgotan hini nga artikulo (1) kon paonan-o gin-giyahan ni Jehova an iya katawohan ha panahon han Biblia, (2) kon paonan-o kita gin-gigiyahan niya yana, ngan (3) kon paonan-o kita makakapahimulos kon padayon naton nga susundon an iya giya.

KON PAONAN-O GIN-GIYAHAN NI JEHOVA AN NASUD HAN ISRAEL

4-5. Paonan-o iginpakita ni Jehova nga gin-gagamit niya hi Moises ha paggiya ha Israel? (Kitaa an piktyur ha kobre.)

⁴ Ginpili ni Jehova hi Moises nga manguna ha mga Israelita ha paggawas ha Ehipto. Ngan gintagan niya an mga Israelita hin nakikita nga ebidensya nga Hiya an naggigiya ha ira pinaagi kan Moises. Pananglitan, nagtagana Hiya hin harigi nga dampog ha adlaw ngan hin harigi nga kalayo ha gab-i. (Ex. 13:21) Ginsundan ni Moises an harigi, nga naggiya ha iya ngan ha mga Israelita ngadto ha Dagat nga Pula. Pero ginlanat han mga Ehiptohanon an mga Israelita. Salit an mga Israelita nahadlok gud kay kahuna nira nga papatayon na hira han mga Ehiptohanon. Nakasiring hira nga sayop hi Moises ha pagdara ha ira ha Dagat nga Pula. Pero waray hiya magsayop. Gintuyo ni Jehova nga giyahan an iya katawohan ngadto, pinaagi kan Moises. (Ex. 14:2) Ngan gintalwas hira han Dios ha pinakaurusahon nga paagi.—Ex. 14:​26-28.

⁵ Paglabay hin 40 ka tuig, padayon nga sinarig hi Moises ha harigi nga dampog ha paggiya ha katawohan han Dios ha kamingawan. a Ha sulod hin pipira ka panahon, ginbutang ni Jehova an harigi ha bawbaw han tolda ni Moises, diin nakikita ito han ngatanan nga Israelita. (Ex. 33:​7, 9, 10) Tikang hito nga harigi hi Jehova nakiistorya kan Moises, katapos iginsumat ni Moises ha katawohan ni Jehova an Iya mga instruksyon. (Sal. 99:7) Klaro nga nakita han mga Israelita nga gin-gagamit ni Jehova hi Moises ha paggiya ha ira.

6. Ano an nagin reaksyon han mga Israelita ha paggiya ni Jehova? (Numeros 14:​2, 10, 11)

⁶ Makasurubo, ginsalikway han kadam-an nga mga Israelita an klaro nga pamatuod nga ginagamit ni Jehova hi Moises sugad nga Iya representante. (Basaha an Numeros 14:​2, 10, 11.) Pauroutro nga nagdumiri hira nga kilalahon an papel ni Moises. Sugad nga resulta, ito nga henerasyon han mga Israelita waray pasudla ha Tuna nga Iginsaad.—Num. 14:30.

7. Paghatag hin mga ehemplo hadton sinunod han paggiya ni Jehova. (Numeros 14:24) (Kitaa liwat an piktyur.)

⁷ Pero may pipira nga Israelita nga sinunod ha paggiya ni Jehova. Pananglitan, hi Jehova nagsiring: “Hi Caleb . . . padayon nga nasunod ha akon hin bug-os-kasingkasing.” (Basaha an Numeros 14:24.) Ginbalosan han Dios hi Caleb, ngan ginpapili pa ngani hiya kon diin niya karuyag umukoy ha Tuna nga Iginsaad. (Jos. 14:​12-14) An sumunod nga henerasyon han mga Israelita nagpakita liwat hin maopay nga ehemplo ha pagsunod han paggiya ni Jehova. Han ginsaliwnan ni Josue hi Moises sugad nga pinili nga lider han mga Israelita, “nagkaada hira daku nga respeto ha iya ha ngatanan nga adlaw han iya kinabuhi.” (Jos. 4:14) Sugad nga resulta, ginbendisyonan hira ni Jehova pinaagi ha pagdara ha ira ngadto ha tuna nga iya iginsaad.—Jos. 21:​43, 44.

8. Isaysay kon paonan-o gin-giyahan ni Jehova an iya katawohan ha panahon han mga hadi. (Kitaa liwat an piktyur.)

⁸ Paglabay hin mga tuig, nagpili hi Jehova hin mga hukom basi giyahan an iya katawohan. Katapos, ha panahon han mga hadi, nagpili hi Jehova hin mga propeta basi giyahan an iya katawohan.  Ginsunod han matinumanon nga mga hadi an sagdon han mga propeta. Pananglitan, mapainubsanon nga ginkarawat ni Hadi David an pagtadong ni propeta Nathan. (2 Sam. 12:​7, 13; 1 Cron. 17:​3, 4) Sinarig hi Hadi Jehosafat kan propeta Jahaziel para hin giya ngan gin-aghat an katawohan han Juda nga ‘tumoo ha mga propeta’ han Dios. (2 Cron. 20:​14, 15, 20) Han naiistres hi Hadi Hezekias, nagpabulig hiya kan propeta Isaias. (Isa. 37:​1-6) Ha kada panahon nga ginsusunod han mga hadi an paggiya ni Jehova, ginbibendisyonan niya hira ngan ginpuprotektaran an iya katawohan. (2 Cron. 20:​29, 30; 32:22) Sigurado nga nakita gud han ngatanan nga gin-gagamit ni Jehova an iya mga propeta ha paggiya ha iya katawohan. Pero kadam-an han mga hadi ngan mga Israelita waray mamati ha mga propeta ni Jehova.—Jer. 35:​12-15.

KON PAONAN-O GIN-GIYAHAN NI JEHOVA AN SIYAHAN NGA MGA KRISTIANO

9. Hin-o an ginpili ni Jehova basi giyahan an mga Kristiano ha siyahan nga siglo? (Kitaa liwat an piktyur.)

⁹ Han siyahan nga siglo C.E., ginporma ni Jehova an Kristiano nga kongregasyon. Paonan-o niya gin-giyahan iton siyahan nga mga Kristiano? Ginpili Niya hi Jesus sugad nga ulo han kongregasyon. (Efe. 5:23) Pero waray personal nga makiistorya hi Jesus ha tagsa nga disipulo kon ano an ira dapat buhaton. Gin-gamit niya an mga apostol ngan an mga tigurang ha Jerusalem basi manguna. (Buh. 15:​1, 2) Ginpili liwat an mga tigurang basi giyahan an mga kongregasyon.—1 Tes. 5:12; Tito 1:5.

10. (a) Ano an nagin reaksyon han kadam-an han siyahan-siglo nga mga Kristiano ha giya nga ira nakarawat? (Buhat 15:​30, 31) (b) Kay ano nga waray kilalaha han pipira ha panahon han Biblia an mga representante ni Jehova? (Kitaa an kahon nga “ Kon Kay Ano nga Ginsalikway han Pipira an Klaro nga Ebidensya.”)

¹⁰ Ginkarawat ba han siyahan-siglo nga mga Kristiano an paggiya? Malipayon nga ginsunod han kadam-an an mga instruksyon nga ira nakarawat. Ngani, “nagkalipay hira tungod han pagdasig” nga iginhatag ha ira. (Basaha an Buhat 15:​30, 31.) Pero paonan-o gin-gigiyahan ni Jehova an iya katawohan ha aton panahon?

KON PAONAN-O KITA GIN-GIGIYAHAN NI JEHOVA YANA

11. Paghatag hin ehemplo nga nagpapakita kon paonan-o gin-giyahan ni Jehova adton nanguna hinin naglabay nga mga tuig.

¹¹ Padayon nga gin-gigiyahan ni Jehova an iya katawohan yana. Ginbubuhat niya ito pinaagi  han iya Pulong ngan han iya Anak, nga ulo han kongregasyon. May nakikita ba kita nga ebidensya nga an Dios padayon liwat nga nagamit hin mga tawo sugad nga representante? Oo. Pananglitan, hunahunaa kon ano an nahitabo katapos han 1870. Nasabtan ni Charles Taze Russell ngan han iya mga kaupod nga may importante nga mahitatabo ha tuig han 1914 may kalabotan ha kaestablisar han Ginhadian han Dios. (Dan. 4:​25, 26) Nakasiring hira hito kay sinarig hira ha mga tagna ha Biblia. Gin-giyahan ba ni Jehova an ira pagsaliksik ha Biblia? Sigurado gud. An mga panhitabo ha kalibotan han 1914 nagpamatuod nga an Ginhadian han Dios nagtikang na magmando. Nagtikang an Girra ha Kalibotan I, ngan nagkaada mga epidemya, linog, ngan kakulang hin mga pagkaon. (Luc. 21:​10, 11) Gin-gamit gud ni Jehova adton sinsero nga Kristiano nga kalalakin-an basi buligan an iya katawohan.

12-13. Ano nga mga kahikayan an ginhimo basi madugangan an pagsangyaw ngan pagtutdo nga buruhaton ha panahon han Girra ha Kalibotan II?

¹² Pansina liwat kon ano an nahitabo ha panahon han Girra ha Kalibotan II. Katapos adman an Pahayag 17:​8, nasabtan han mga brother nga nangunguna ha world headquarters nga an girra diri magtutugway ngadto ha Armagedon, kondi ha murayaw nga peryodo hin panahon nga mag-aabri hin mga oportunidad para ha dugang nga pagsangyaw nga buruhaton. Salit bisan kon hito nga panahon baga hin diri ito praktikal, gintikangan han organisasyon ni Jehova an Watchtower Bible College (School) of Gilead basi i-train an mga misyonero ha pagsangyaw ngan pagtutdo nga buruhaton ha damu nga katunaan ha bug-os nga kalibotan. Nagpadara pa ngani hin mga misyonero bisan ha panahon han girra. Dugang pa, an matinumanon nga uripon naghikay hin Kurso ha Teokratiko nga Ministeryo b basi i-train an ngatanan ha kongregasyon nga magin mas maopay nga mga parasangyaw ngan magturutdo. Hini nga mga paagi, an katawohan han Dios igin-aandam para ha buruhaton ha tiarabot.

¹³ Yana, klaro nga nakikita naton nga gin-gigiyahan ni Jehova an iya katawohan hiton makuri nga panahon. Tikang han Girra ha Kalibotan II, an katawohan ni Jehova nagkaada kagawasan ha pagsangyaw ha damu nga katunaan. Ngani, nag-uswag an buruhaton.

14. Kay ano nga makakasarig kita ha giya tikang ha organisasyon ni Jehova ngan ha pinili nga mga tigurang? (Pahayag 2:1) (Kitaa liwat an piktyur.)

 ¹⁴ Yana, an mga membro han Nagmamando nga Lawas padayon nga nasarig ha Kristo para hin giya. Karuyag nira nga an mga instruksyon nga ira iginhahatag ha mga kabugtoan nagpapakita han panhunahuna ni Jehova ngan ni Jesus ha mga butang. Ngan gin-gagamit nira an mga paramangno han sirkito ngan mga tigurang basi magtagana hin instruksyon ha mga kongregasyon. c An dinihogan nga mga tigurang aada ha “too nga kamot” han Kristo. (Basaha an Pahayag 2:1.) Syempre, ini nga mga tigurang diri perpekto ngan nakakasayop. May mga panahon nga hira Moises ngan Josue nakahimo hin mga sayop, pariho han mga apostol. (Num. 20:12; Jos. 9:​14, 15; Roma 3:23) Bisan pa hito, gin-gigiyahan gud han Kristo an matinumanon nga uripon ngan an pinili nga mga tigurang ngan padayon niya ito nga bubuhaton ha “ngatanan nga adlaw tubtob ha ikatarapos han sistema han mga butang.” (Mat. 28:20) Salit may-ada kita rason nga sumarig ha giya nga iya igintatagana pinaagi hadton iya ginpili nga manguna.

NAGPAPAHIMULOS KITA KON PADAYON NATON NGA GINSUSUNOD AN GIYA NI JEHOVA

15-16. Ano an imo nahibaroan ha mga eksperyensya hadton sinunod ha giya ni Jehova?

¹⁵ Kon padayon naton nga ginsusunod an giya ni Jehova, nakakakarawat kita hin mga bendisyon bisan yana. Pananglitan, gin-aplikar nira Andy ngan Robyn an sagdon nga pasimplihon an ira kinabuhi. (Kitaa an study note ha Mateo 6:22.) Sugad nga resulta, nakagboluntaryo hira ha teokratiko nga mga proyekto han pagpanukod. Hi Robyn nagsiring: “Inukoy kami ha gudtiay hinduro nga mga kwarto diin waray ngani lugar para makagluto. Ngan kinahanglan ko ibaligya an akon damu nga kamera ngan lens, bisan kon hilig ko gud an photography. Nakatangis ako han ginbaligya ko ito. Pero pariho han asawa ni Abraham nga hi Sarah, determinado ako nga kitaon an tiarabot, diri an naglabay.” (Heb. 11:15) Ano an napahimulosan hini nga mag-asawa ha ira eksperyensya? Hi Robyn nagsiring: “Malipayon gud kami kay maaram kami nga iginhahatag namon kan Jehova an ngatanan nga may-ada kami. Kon ginhihimo namon an amon teokratiko nga mga toka, nakikita namon kon ano an magigin kinabuhi ha bag-o nga kalibotan.” Hi Andy inuyon hito, ngan nagsiring: “Malipayon kami kay ginhahatag namon an amon panahon ngan kusog para ha Ginhadian.”

¹⁶ Paonan-o pa kita nagpapahimulos kon padayon  naton nga ginsusunod an giya ni Jehova? Katapos maggradwar ha hayskul, karuyag gud ni Marcia nga sundon an sagdon nga magkab-ot hin tumong ha pag-alagad kan Jehova. (Mat. 6:33; Roma 12:11) Hiya nagsiring: “May nag-offer ha akon hin upat ka tuig nga scholarship ha usa nga unibersidad. Pero karuyag ko magkab-ot hin espirituwal nga mga tumong. Salit ginpili ko nga mag-aram hin usa nga skill nga makakasuporta ha akon pagpayunir. Usa ito han pinakamaopay nga desisyon nga akon ginhimo. Yana, nag-i-enjoy ako ha pagregular payunir. Ngan tungod kay ako la an nagbubuot ha akon oras ha pagtrabaho, nakabulig ito ha akon nga makag-alagad ha Bethel sugad nga commuter ngan ma-enjoy an iba pa nga espesyal nga pribilehiyo.”

17. Ano pa an aton mapapahimulsan kon padayon naton nga susundon an giya ni Jehova? (Isaias 48:​17, 18)

¹⁷ Usahay, nakakakarawat kita hin sagdon nga nagpuprotektar ha aton ha mga butang sugad han materyalismo ngan mga buruhaton nga mahimo makaaghat ha aton nga talapason an mga balaud han Dios. May kalabotan hito, nagpapahimulos kita kon ginsusunod naton an igintatagana ni Jehova nga giya. Natitipigan naton an limpyo nga konsensya ngan nalilikyan naton an damu nga problema. (1 Tim. 6:​9, 10) Salit mahimo kita makagsingba kan Jehova hin bug-os-kasingkasing nga magriresulta hin duro nga kalipay, kamurayawan, ngan kakontento.—Basaha an Isaias 48:​17, 18.

18. Kay ano nga determinado ka nga padayon nga sundon an giya ni Jehova?

¹⁸ Sigurado, padayon nga gagamiton ni Jehova an mga tawo sugad nga iya representante ha pagtagana hin giya ha panahon han daku nga kasakitan ngan ngadto ha Usa ka Yukot ka Tuig nga Pagmando. (Sal. 45:16) Padayon ba naton nga susundon ito nga instruksyon bisan kon an pagbuhat hito nagkikinahanglan nga isakripisyo an aton mga karuyag? Nakadepende ito kon ano an aton reaksyon ha giya nga igintatagana ni Jehova yana. Salit pirme naton sundon an giya ni Jehova, pati na an giya tikang ha kalalakin-an nga ginpili basi magbantay ha aton. (Isa. 32:​1, 2; Heb. 13:17) Ngan samtang ginbubuhat naton ito, may-ada kita rason nga sumarig ha aton Giya, hi Jehova, nga naggigiya ha aton pahirayo ha espirituwal nga kadaot ngan tikadto ha aton destinasyon—ha kinabuhi nga waray kataposan ha bag-o nga kalibotan.