1-2. Ha ano nga paagi an kahimtang han katawohan iginpariho ha batan-on nga lalaki nga gin-unabi ha parapo 1?

 IMADYINA an usa nga batan-on nga lalaki nga riko an mga kag-anak. Usa ka adlaw nagkaada trahedya; an iya mga kag-anak namatay ha aksidente. Nasubo gud hiya hito nga balita. Pero may usa pa nga maraot gud nga balita. Nahibaroan niya nga ginwaldas han iya mga kag-anak an ngatanan nga panag-iya han ira pamilya ngan nagkaada hira dagku gud nga utang. Salit imbes mapanunod an ira karikohan, napanunod niya an ira mga utang, ngan ginsusuktan hiya han mga gin-utangan. Diri gud niya kaya bayaran ito ngatanan nga utang.

² Ha pipira nga paagi, an aton kahimtang pariho hito nga batan-on nga lalaki. An aton siyahan nga mga kag-anak, hira Adan ngan Eva, perpekto ngan nag-ukoy ha usa nga mahusay nga paraiso. (Gen. 1:27; 2:​7-9) May paglaom hira nga ma-enjoy an makalilipay nga kinabuhi nga waray kataposan. Pero nagbag-o an ngatanan. Nawara nira an ira urukyan nga Paraiso pati liwat an ira paglaom nga mabuhi ha waray kataposan. Ano an mapapanunod han ira magigin mga anak? An Biblia nagsusumat ha aton: “Pinaagi han usa nga tawo [hi Adan] an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo kay hira ngatanan nakasala.” (Roma 5:12) Sala an aton napanunod kan Adan, nga nagriresulta hin kamatayon. Ini nga napanunod nga sala pariho ha usa nga daku gud nga utang, nga waray bisan usa ha aton an makakabayad.​—Sal. 49:8.

 3. Kay ano nga an aton mga sala maipapariho ha “mga utang”?

³ Iginpariho ni Jesus an mga sala ha “mga utang.” (Mat. 6:12;  Luc. 11:4) Kon nakakasala kita, sugad hin nagkakaada kita utang kan Jehova. Dapat kita magbayad han penalty han sala. Kon waray hi Jehova ginbuhat nga paagi basi mapasaylo an aton mga sala, mababaydan la unta naton ito kon mamatay kita.​—Roma 6:​7, 23.

 4. (a) Kon waray bulig, ano an mahitatabo ha ngatanan nga makasasala? (Salmo 49:​7-9) (b) Ano an iginpapasabot han Biblia ha pulong nga “sala”? (Kitaa an kahon nga “ Sala.”)

⁴ Posible ba nga maibalik ha aton an ngatanan nga nawara nira Adan ngan Eva? Oo, pero imposible kon kita la. (Basaha an Salmo 49:​7-9.) Kon waray bulig, waray unta kita paglaom nga kinabuhi ha tiarabot o ha pagkabanhaw. Ngani, an aton kamatayon magigin pariho la ha mga hayop.​—Ecles. 3:19; 2 Ped. 2:12.

 5. Paonan-o an aton mahigugmaon nga Amay binulig ha aton basi mabaydan an aton napanunod nga utang nga sala? (Kitaa an piktyur.)

⁵ May kalabotan ha batan-on nga lalaki nga gin-unabi ha tinikangan, ano an iya aabaton kon may riko nga tawo nga nag-offer nga baydan an ngatanan niya nga utang? Sigurado nga ini nga batan-on nga lalaki magigin mapasalamaton gud ngan kakarawaton niya ini nga regalo. Ha pariho nga paagi, an aton mahigugmaon nga Amay, hi Jehova, naghatag ha aton hin regalo nga makakabayad han utang nga sala nga napanunod naton kan Adan. Iginsaysay ito ni Jesus hini nga paagi: “Hinigugma gud han Dios an kalibotan salit iginhatag niya an iya bugtong nga Anak, basi an bisan hin-o nga nagpapakita hin pagtoo ha iya diri mabungkag kondi magkaada kinabuhi nga waray kataposan.” (Juan 3:16) Ini nga regalo naghatag liwat han posibilidad para ha aton nga magkaada maopay nga relasyon kan Jehova.

 6. Ano nga mga termino ha Biblia an aton hihisgotan hini nga artikulo, ngan kay ano?

⁶ Ano an aton mapapahimulsan hinin makaruruyag gud nga regalo nga tungod hito an aton mga sala, o “mga utang,” mapapasaylo? An baton hito nga pakiana makikita ha gin-gamit han Biblia nga mga pulong sugad han pagpahiuli, pagpara han sala, lukat, pagtubos, ngan iginpahayag nga matadong. Hini nga artikulo, hihisgotan ta an kahulogan han tagsa hito. Samtang aton ginpapamalandong an ginbuhat ni Jehova basi mapasaylo kita, mas magigin mapasalamaton kita ha iya.

AN KATUYOAN: PAGPAHIULI

 7. (a) Ano pa an nawara nira Adan ngan Eva? (b) Sugad nga mga tulin nira Adan ngan Eva, ano gud an aton ginkikinahanglan? (Roma 5:​10, 11)

⁷ Labot pa han paglaom nga kinabuhi nga waray kataposan nga nawara nira Adan ngan Eva, nawara liwat nira an ira presyoso nga relasyon ha ira Amay, hi Jehova. Antes makasala hira Adan ngan Eva, kaapi hira ha pamilya  han Dios. (Luc. 3:38) Pero han waray hira sumugot kan Jehova, ginpaiwas hira ha iya pamilya antes pa hira magkaada mga anak. (Gen. 3:​23, 24; 4:1) Salit sugad nga ira mga tulin, dapat kita igpahiuli kan Jehova. (Basaha an Roma 5:​10, 11.) Ha iba pa nga pagkayakan, dapat kita magkaada maopay nga relasyon ha iya. Sumala ha usa nga reperensya, an Griego nga pulong nga gin-gamit dinhi para ha “pagpahiuli” mahimo mangahulogan hin “pakigsangkay ha usa nga kaaway.” Nakakaimpres kay hi Jehova an nag-una basi magin posible ini. Paonan-o?

AN KAHIKAYAN: PAGPARA HAN SALA

 8. Ano an pagpara han sala?

⁸ An pagpara han sala amo an kahikayan nga gin-gamit ni Jehova para maipahiuli an maopay nga relasyon niya ngan han makasasala nga mga tawo. Naghikay hiya hin paagi basi maibalik an nawara ni Adan pinaagi ha pagtagana hin butang nga pariho an kantidad. An Griego nga Kasuratan liwat nagtutudlok ha ginhimo ni Jehova nga paagi basi magin posible para ha usa nga indibiduwal nga magkaada mamurayawon nga relasyon ha iya.​—Roma 3:25.

 9. Ano an temporaryo nga kahikayan an ginhimo ni Jehova basi an mga sala han mga Israelita mapasaylo?

⁹ Basi an mga Israelita magkaada maopay nga relasyon kan Jehova, naghimo hiya hin temporaryo nga kahikayan para mapasaylo an ira mga sala. An Adlaw han Pagpara han Sala ginbubuhat han mga Israelita makausa kada tuig. Hito nga adlaw, an hitaas nga saserdote naghahalad hin mga hayop para ha katawohan. Syempre, an hayop nga mga halad diri bug-os nga makakapara han mga sala han bisan hin-o kay an mga hayop mas minos ha mga tawo. Pero tubtob nga an mabinasulon nga mga Israelita naghahatag hin mga halad nga iginsusugo ni Jehova, andam hiya nga pasayloon an ira mga sala. (Heb. 10:​1-4) Dugang pa, ito nga kahikayan ngan an ira regular nga mga halad tungod han sala nabulig ha mga Israelita nga diri mahingalimtan an pagkaseryoso han ira pagkamakasasala ngan an ira daku nga panginahanglan para hin permanente nga solusyon.

10. Ano an permanente nga kahikayan nga ginhimo ni Jehova para mapasaylo an mga sala?

¹⁰ May ginhunahuna na hi Jehova hadto pa nga permanente nga kahikayan para mapasaylo an mga sala. Ginhikay niya nga an iya hinigugma nga Anak ‘ighalad hin makausa gud la basi pas-anon an mga sala han damu.’ (Heb. 9:28) Iginhatag ni Jesus an “iya kinabuhi sugad nga lukat para ha damu.” (Mat. 20:28) Ano an lukat?

AN PRESYO: AN LUKAT

11. (a) Sumala ha Biblia, ano an lukat? (b) Hin-o la an makakabayad han lukat?

¹¹ Sumala ha Biblia, an lukat amo an presyo nga iginbabayad ha pagpara han sala ngan pagpahiuli. a Ha panhunahuna ni Jehova, naghahatag ito han basihan basi ibalik kon ano an nawara. Ha ano nga paagi? Hinumdumi, nawara nira Adan ngan Eva an ira perpekto nga kinabuhi pati na an paglaom nga mabuhi ha waray kataposan. Salit an presyo han lukat dapat kapariho han kantidad han nawara. (1 Tim. 2:6) Mababayaran la ito han usa nga adulto nga tawo nga (1) perpekto; (2) may potensyal nga mabuhi ha waray kataposan ha tuna; ngan (3) andam nga ihatag, o isakripisyo, an iya kinabuhi para ha aton. An kinabuhi hito nga tawo makakabayad para ha kinabuhi nga nawara.

12. Kay ano nga kaya ni Jesus nga ihatag an ginkikinahanglan nga presyo han lukat?

¹² Pansina an tulo nga rason kon kay ano nga  kaya ni Jesus bayaran an presyo han lukat. (1) Perpekto hiya—“waray hiya nabuhat nga sala.” (1 Ped. 2:22) (2) Tungod hito, may potensyal hiya nga mabuhi hin waray kataposan ha tuna. (3) Andam hiya mamatay ngan ihatag an iya kinabuhi para ha aton. (Heb. 10:​9, 10) Sugad nga perpekto nga tawo, hi Jesus an katugbang han siyahan nga tawo, hi Adan, han waray pa hiya makasala. (1 Cor. 15:45) Salit pinaagi han kamatayon ni Jesus, makakapara hiya han sala ni Adan, karuyag sidngon, basi saliwnan an nawara ni Adan. (Roma 5:19) Tungod hito, hi Jesus nagin “an kataposan nga Adan.” Diri na kinahanglan hin usa pa nga perpekto nga tawo nga kumadi ngan magbayad ha kon ano an nawara ni Adan. Hi Jesus namatay hin “makausa gud la.”​—Heb. 7:27; 10:12.

13. Ano an kaibahan han kahikayan han pagpara han sala ngan han lukat?

¹³ Kon sugad, ano an kaibahan han kahikayan han pagpara han sala ngan han lukat? An kahikayan han pagpara han sala amo an ginbubuhat han Dios basi maipahiuli an maopay nga relasyon niya ngan han mga tawo. An lukat amo an presyo nga iginbayad basi magin posible an pagpara han sala han makasasala nga mga tawo. Ini nga presyo nagrirepresentar han presyoso nga dugo ni Jesus nga iginpaagay para ha aton.​—Efe. 1:7; Heb. 9:14.

AN MGA RESULTA: NATUBOS NGAN IGINPAHAYAG NGA MATADONG

14. Ano an aton hihisgotan yana, ngan kay ano?

¹⁴ Ano an mga resulta han kahikayan han pagpara han sala? Ginagamit han Biblia an pipira nga mga pulong basi pabug-atan an mga kapulsanan. Bisan kon an mga kahulogan hini nga mga pulong may ginkakaparihoan, an tagsa nga pulong may ginpapabug-atan nga espisipiko nga aspekto han kahikayan han pagpara han sala nga naghahatag hin higayon nga mapasaylo kita ni Jehova. Samtang aton gin-aanalisar ini nga mga pulong, hihisgotan liwat naton kon paonan-o ito nakakaapekto mismo ha aton.

15-16. (a) Ha Biblia, ano an iginpapasabot han pulong nga ‘pagtubos’? (b) Paonan-o ito nakakaapekto ha aton?

¹⁵ Ha Biblia, an pagtubos nagtutudlok ha paghatag hin kagawasan, o pag-abswelto, nga resulta tungod ha bayad nga lukat. Iginsaysay ito ni apostol Pedro hini nga paagi: “Maaram kamo nga diri pinaagi han nadudunot nga mga butang, pinaagi han silber o bulawan, nga gintagan kamo hin kagawasan [lit., “ginlukat kamo; gintubos kamo”] tikang ha iyo waray pulos nga pagkinabuhi nga iginpasa ha iyo pinaagi han iyo mga kaapoy-apoyan. Lugod pinaagi ito han presyoso nga dugo han Kristo, nga pariho han dugo han kordero nga waray depekto ngan putli.”​—1 Ped. 1:​18, 19; ftn.

¹⁶ Tungod han halad-lukat, magkakaada kita kagawasan tikang ha sala ngan kamatayon nga nagriresulta hin duro nga pag-antos. (Roma 5:21) Sigurado, may-ada kita maopay nga rason nga umabat hin daku nga utang nga kaburut-on kan Jehova ngan kan Jesus tungod han pagtubos nga tikang ha presyoso nga dugo, o kinabuhi, ni Jesus.​—1 Cor. 15:22.

17-18. (a) Ano an iginpapasabot han iginpahayag nga matadong? (b) Paonan-o ini nakakaapekto ha aton?

¹⁷ Ginsisiring han Biblia nga an mga surugoon ni Jehova iginpahayag nga matadong. Nagpapasabot ini nga diri na kita niya gin-oobligar nga magbayad tungod ha sala nga aton nabuhat. Ha pagbuhat hini, ginsusunod la gihapon ni Jehova an iya kalugaringon nga mga suruklan han hustisya. Iginpapahayag kita niya nga matadong diri tungod kay takos kita hito; o diri tungod kay ginkukonsinter niya an aton mga sala. Kondi tungod han aton pagtoo ha kahikayan han pagpara han sala ngan han presyo han lukat nga iginbayad, may basihan  hi Jehova nga kanselahon an aton mga utang.​—Roma 3:24; Gal. 2:16.

¹⁸ Ano an karuyag sidngon hini para ha kada tagsa ha aton? Adton ginpili nga magmando kaupod ni Jesus ha langit iginpahayag na nga matadong sugad nga mga anak han Dios. (Tito 3:7; 1 Juan 3:1) Ginpasaylo na an ira mga sala. Waray na hira rekord hin pagbuhat hin krimen, siring pa, ngan tungod hito kwalipikado na hira nga magin bahin han Ginhadian. (Roma 8:​1, 2, 30) Adton may paglaom nga mabuhi hin waray kataposan ha tuna iginpahayag na nga matadong sugad nga mga sangkay han Dios, ngan an ira mga sala ginpasaylo. (San. 2:​21-23) An daku nga grupo nga makakatalwas ha Armagedon, may paglaom nga diri na gud mamamatay. (Juan 11:26) An “mga magtadong” ngan “mga diri magtadong” nga nangangaturog ha kamatayon babanhawon. (Buh. 24:15; Juan 5:​28, 29) Ha urhi, an ngatanan nga masinugtanon nga mga surugoon ni Jehova ha tuna ‘magkakaada han mahimayaon nga kagawasan han mga anak han Dios.’ (Roma 8:21) Pagkamaopay gud nga bendisyon tungod han kahikayan han pagpara han sala—bug-os nga kahiuli ha aton Amay, hi Jehova!

19. Paonan-o nagigin mas maopay an aton sitwasyon? (Kitaa liwat an kahon nga “ Kon Ano an Kahulogan Hito Para ha Aton.”)

¹⁹ Oo, an aton sitwasyon pariho hadto ha batan-on nga lalaki nga gin-unabi na nga nawad-an han ngatanan ngan nakapanunod hin daku gud nga utang nga diri gud niya mababaydan. Pero ginbuligan kita ni Jehova. An aton kahimtang nagbag-o tungod han kahikayan han pagpara han sala ngan han iginbayad nga lukat. Tungod han aton pagtoo kan Jesu-Kristo natubos kita, o nagkaada kagawasan, tikang ha sala ngan kamatayon. An aton liwat mga sala mahimo kanselahon, ngan paraon an aton mga rekord ha pagbuhat hin krimen, siring pa. Pero labaw ha ngatanan, mahimo na kita yana magkaada maopay nga relasyon ha aton langitnon nga Amay, hi Jehova.

20. Ano an aton hihisgotan ha sunod nga artikulo?

²⁰ Mapasalamaton gud kita kan Jehova ngan kan Jesus kon aton ginpapamalandong an ngatanan nira nga ginbuhat para ha aton. (2 Cor. 5:15) Kon waray an ira bulig, waray gud unta kita paglaom! Pero ano gud an kahulogan para ha kada tagsa ha aton han pagpasaylo ni Jehova? Ito an aton hihisgotan ha sunod nga artikulo.