Hi Mary ngan an iya bana nga hi John, a naukoy ha usa nga nasud diin damu nga Pilipino an nag-a-abroad basi magtrabaho ngan nalilipay hira Mary nga sangyawan hira. Ha panahon han COVID-19 nga pandemya, hi Mary nakagtikang hin mga Bible study diri la ha nasud diin hiya naukoy, kondi pati liwat ha iba nga bahin han kalibotan. Paonan-o niya ito nahimo?

Nagpapakiana hi Mary ha iya mga Bible study, “May kilala ka ba nga naruruyag magpa-Bible study?” Kon nasiring hira nga oo, naghahangyo hiya nga ipakilala hiya ha ira. Agsob nga may mag-opay nga resulta inin simple nga pakiana. Kay ano? Kay an mga tawo nga nag-aapresyar ha Pulong han Dios agsob nga naruruyag nga isumat an ira nahibaroan ha ira kapamilya ngan kasangkayan nga ira hinigugma. Salit ano an nagin resulta hito nga pagpakiana?

Iginpakilala hi Mary han iya Bible study nga hi Jasmin ha upat pa nga naruruyag magpa-study. An usa ha ira amo hi Kristine, ngan nag-enjoy gud ha ira pag-study salit ginhangyo niya hi Mary nga duha ka beses hira mag-study ha usa ka semana. Han nagpakiana hi Mary kon may kilala ba hiya nga naruruyag magpa-Bible study, siring ni Kristine, “Oo, ipapakilala ko ha imo an akon mga sangkay.” Ha sulod hin pipira ka semana, iginpakilala ni Kristine an iya upat nga sangkay nga naruruyag magpa-study. Ha urhi, iginpakilala ni Kristine hi Mary ha iba niya nga kasangkayan, ngan an pipira hito nga kasangkayan may iginpakilala liwat kan Mary.

Karuyag liwat ni Kristine nga an iya pamilya ha Pilipinas mahibaro mahitungod ha Biblia salit ginsumatan niya an iya anak nga hi Andrea. Ha siyahan, naghunahuna hi Andrea, ‘An mga Saksi usa nga kulto, diri hira natoo kan Jesus, ngan an Old Testament la an ira ginagamit.’ Pero katapos gud la han ira siyahan nga pag-study, nasabtan niya nga sayop an iya panhunahuna ha mga Saksi. Kon nag-aaram hira, pirme hiya nasiring ha daku nga tingog, “Basta aada ha Biblia, tinuod ito!”

Waray pag-iha, iginpakilala ni Andrea hi Mary ha duha nga sangkay ngan ha usa nga katrabaho nga nagpa-study liwat. Diri la ito, samtang nag-i-study hira Mary ngan Andrea, nagpipinamati ngay-an hi Angela, an iya auntie nga buta. Katapos, usa ka adlaw, ginsidngan ni Angela hi Andrea nga ipakilala hiya kan Mary ngan naghangyo hiya nga magpa-Bible study. Naruyagan gud ni Angela an iya mga nahibabaroan. Ha usa la ka bulan, namemorya niya an damu nga teksto ngan karuyag niya magpa-study hin upat ka  beses ha usa ka semana! Ha bulig ni Andrea, regular hiya nga naatender ha mga katirok pinaagi hin videoconference.

Han nakita ni Mary nga an bana ni Kristine nga hi Joshua naghihiniling ha kamera samtang nag-i-study hira, ginpakianhan hiya ni Mary kon karuyag ba niya umapi. Hi Joshua nagsiring, “Mamamati la ako, pero ayaw ako pakianhi; kon magpakiana ka, malakat ako.” Ha sulod la hin lima ka minuto, mas damu an iya iginpakiana kay kan Kristine ngan naruyag hiya nga magpa-study liwat.

An simple nga pakiana ni Mary nagresulta hin damu nga Bible study. Tungod kay damu na an iya Bible study, nagpabulig hiya ha kabugtoan nga hira an mag-study han iba. Ha kabug-osan, nakagtikang hi Mary hin 28 nga Bible study nga tikang ha upat nga nasud.

Han Abril 2021 nabawtismohan hi Jasmin, an siyahan nga Bible study nga gin-unabi hini nga eksperyensya. Hi Kristine naman nabawtismohan han Mayo 2022 ngan inuli ha Pilipinas basi makaupod an iya pamilya. Nabawtismohan liwat an duha nga iginpakilala ni Kristine kan Mary. Ngan hi Angela nabawtismohan liwat paglabay hin pipira ka bulan ngan yana regular payunir na hiya. Nag-uuswag liwat an bana ni Kristine nga hi Joshua ngan an ira anak nga hi Andrea, pati an iba pa nga mga Bible study.

Ha panahon ni Jesus ngan han mga apostol, madagmit nga nagsarang an maopay nga sumat kay an mga nakabati hito nagsumat ha ira mga kapamilya ngan kasangkayan. (Juan 1:​41, 42a; Buh. 10:​24, 27, 48; 16:​25-33) Salit puydi mo pakianhan an imo mga Bible study ngan an mga interesado, “May kilala ka ba nga naruruyag magpa-Bible study?” Diri kita maaram kon pira nga Bible study an imo matitikangan kon gagamiton mo ini nga simple nga pakiana.