Debotado nga Katoliko hira Tatay ngan Nanay. Pero han nahibaroan nira ha Biblia nga Jehova an ngaran han Dios, nagin madasigon hira nga mga Saksi ni Jehova. Inundang hi Tatay ha pag-ukit hin mga imahen ni Jesus. Gin-gamit lugod niya an iya skill nga pagpanday basi himoon nga Kingdom Hall an siyahan nga andana han amon balay. Ito an siyahan nga Kingdom Hall ha San Juan del Monte, nga aada ha ligid han Manila, an kapital han Pilipinas.

Natawo ako han 1952, tikang ha akon kabata gintutdoan ako han akon mga kag-anak mahitungod kan Jehova pariho han ira pagtutdo ha akon upat nga kuya ngan tulo nga ate. Samtang nagtutubo ako, gindasig ako ni Tatay nga magbasa hin usa ka kapitulo han Biblia kada adlaw, ngan gin-adman namon an damu naton nga publikasyon. May mga panahon nga gin-iimbitar han akon mga kag-anak an nagbibiyahe nga mga paramangno ngan mga representante han branch office nga mag-accomodate ha amon balay. Tungod hito, nalipay ngan nadasig an amon pamilya ha mga eksperyensya nga iginsusumat hini nga kabugtoan, nga nagpagios ha amon ngatanan nga iprayoridad ha amon kinabuhi an ministeryo.

Damu gud an akon nahibaroan ha maopay nga ehemplo han akon mga kag-anak, nga matinumanon gud kan Jehova. Katapos mamatay ni Nanay tungod ha sakit, nagpayunir kami ni Tatay han 1971. Pero han 1973 han 20 anyos ako, hi Tatay naman an namatay. Nasubo gud ako tungod han kamatay han akon mga kag-anak ngan inabat ko nga nag-uusahan na la ako. Pero an “sigurado ngan marig-on” nga paglaom nga aada ha Biblia nakabulig ha akon nga magpabilin nga marig-on nga sugad hin nakaangkla, ngan magin marig-on ha emosyon ngan ha espirituwal. (Heb. 6:19) Waray pag-iha katapos mamatay han akon tatay, nakakarawat ako hin asaynment nga magin espesyal payunir ha hirayo nga isla han Coron, ha probinsya han Palawan.

Han kinadto ako ha Coron, 21 anyos pa la ako. Tungod kay nagdaku ako ha syudad, nasurprisa ako  han nahibaroan ko nga ito nga isla kulang hin kuryente, gutiay la an tubig, ngan diri damu an sarakyan para ha transportasyon. Bisan kon may pipira nga kabugtoan didto, waray ako partner ha pagpayunir ngan danay usa la ako nga nagsasangyaw. Ha siyahan nga bulan, namingaw gud ako ha akon pamilya ngan kasangkayan. Ha gab-i, nagkikita ako ha mga bitoon ngan nagtitinangis. Inabat ko nga karuyag ko na umundang ha akon asaynment ngan umuli.

Hito nga panahon nga nag-uusahan ako, iginsusumat ko kan Jehova an ngatanan ko nga inaabat. Ginhihinumdom ko an makapadasig nga mga punto nga akon nabasa ha Biblia ngan ha aton mga publikasyon. An Salmo 19:14 an agsob ko mahinumdoman. Na-realize ko nga hi Jehova magigin “akon Bato ngan akon Paratubos” kon akon papamalandungon an mga nakakapalipay ha iya, sugad han iya mga ginbubuhat ngan mga kalidad. Daku gud nga bulig ha akon an artikulo han The Watchtower nga “You Are Never Alone.” a Pauroutro ko ito nga ginbabasa. Kon nag-uusahan ako, gin-aabat ko nga baga hin kaupod ko hi Jehova, ngan tungod hito nagkaada ako mag-opay nga higayon ha pag-ampo, pag-aram, ngan pagpamalandong.

Waray pag-iha tikang han pag-abot ko ha Coron, nagin tigurang ako. Sugad nga usa la nga tigurang, nagdudumara ako ha sinemana nga Teokratiko nga Eskwelahan ha Ministeryo, Katirok ha Pag-alagad, Pag-aram ha Libro han Kongregasyon, ngan Pag-aram ha Barantayan. Nagpapahayag publiko liwat ako kada semana, salit waray na gud ako panahon para mingawon!

May mag-opay nga resulta an akon ministeryo ha Coron—an pipira han akon Bible study nabawtismohan. Pero may magkuri liwat nga sitwasyon. Danay kinahanglan ko magbaktas hin tunga ka adlaw basi makaabot ha teritoryo nga diri ngani ako maaram kon diin ako makaturog kon aadto na ako. An teritoryo han kongregasyon may-ada liwat damu nga gudtiay nga isla. Para makadto ito, agsob ako magbiyahe pinaagi hin de-motor nga sakayan ha mabalud nga kadagatan, bisan kon diri ako maaram lumangoy! Hiton magkuri nga sitwasyon, ginproteksyonan ngan ginbuligan ako ni Jehova. Ha urhi, na-realize ko nga gin-aandam ako ni Jehova para ha mas magkuri nga kahimtang ha sunod ko nga asaynment.

Han 1978, naasayn ako ha Papua New Guinea, nga aada ha igbaw han Australia. An Papua New Guinea bukiron nga nasud ngan an kadaku hito haros pariho ha Spain. Naimpres gud ako han nahibaroan ko nga an tulo ka milyon nga populasyon hito nga nasud may-ada sobra 800 nga linggwahe. Maopay na la nga an kadam-an nga tawo didto nagyayakan hin Melanesian Pidgin, nga mas kilala nga Tok Pisin.

Temporaryo nga naasayn ako ha Ingles nga kongregasyon ha kapital han Port Moresby. Pero katapos, binalhin ako ha Tok Pisin nga kongregasyon ngan nag-eskwela ako basi mahibaro hito nga linggwahe. Gin-gamit ko ha pagsangyaw an akon mga nahibabaroan ha klase. Ngan nakabulig ito ha akon nga mas madagmit nga mahibaro ha linggwahe. Waray pag-iha, kaya ko na magpahayag publiko ha Tok Pisin. Nasurprisa gud ako kay bisan kon waray pa ako mag-usa ka tuig tikang han inabot ako ha Papua New Guinea, naasayn ako sugad nga paramangno han sirkito ha Tok Pisin nga mga kongregasyon ha pipira nga dagku nga probinsya.

 Tungod kay higrayo an distansya han mga kongregasyon, kinahanglan ko mag-organisar hin damu nga sirkito nga asembleya ngan pirme bumiyahe. Ha siyahan, inabat ko nga nag-uusahan gud la ako ha diri pamilyar nga mga lugar—bag-o nga nasud, bag-o nga linggwahe, ngan bag-o nga kultura. Diri ako puydi mag-land trip pakadto ha mga kongregasyon kay bukiron ngan malubak an dalan. Salit haros kada semana kinahanglan ko mag-eruplano. Danay, ako la an pasahero han gutiay ngan daan na nga eruplano. Ito nga mga pagbiyahe makaharadlok gud pariho ha pagbiyahe ha de-motor nga sakayan!

Gutiay la an may mga telepono didto, salit nakikigkomunikar ako ha mga kongregasyon pinaagi hin surat. Agsob nga nahiuuna pa ngani ako pag-abot kay ha akon mga surat salit kinahanglan ko magpakiana ha mga taga-didto kon hain an balay han mga Saksi. Pero ha kada panahon nga nabibilngan ko an kabugtoan, mahigugmaon nga ginwi-welcome nira ako ngan nagpapahinumdom ito ha akon kon kay ano nga ginhihimo ko ini ngatanan. Naeksperyensyahan ko an bulig ni Jehova ha damu nga paagi, ngan nagin mas duok ako ha iya.

Ha siyahan ko nga katirok ha isla han Bougainville, may dinaop ha akon nga mag-asawa nga mahiyom-hiyom nga nagpakiana, “Nahinunumdom ka ha amon?” Nahinumdoman ko nga nasangyawan ko ini nga mag-asawa ha siyahan ko nga pag-abot ha Port Moresby. Natikangan ko hira pag-Bible study antes ko hira ipasa ha usa nga brother nga taga-didto. Ngan yana bawtismado na hira! Usa ini han damu nga bendisyon nga akon nakarawat ha akon tulo ka tuig ha Papua New Guinea.

Antes ako bumaya ha Coron han 1978, nakilala ko hi Adel, usa nga sister nga mahusay ngan andam magsakripisyo. Regular payunir hiya samtang gin-aataman an iya duha nga anak nga hira Samuel ngan Shirley. Ngan iya liwat gin-aataman an iya lagas na nga nanay. Han Mayo 1981, binalik ako ha Pilipinas basi pakasalan hi Adel. Katapos han amon kasal, nagregular payunir kami ngan gin-ataman namon an amon pamilya.

Bisan pa kon may pamilya na ako, han 1983 nagin espesyal payunir ako utro ngan igin-asayn ha isla han Linapacan ha probinsya han Palawan. An amon pamilya binalhin hito nga hirayo nga lugar nga waray mga Saksi. Paglabay hin mga usa ka tuig namatay an nanay ni Adel. Pero nagpabilin kami nga busy ha ministeryo ngan nakabulig ito ha amon nga makaya an kasubo. Nagkaada kami damu gud nga nag-uuswag nga Bible study ha Linapacan ngan waray pag-iha nagkinahanglan kami hin gutiay nga Kingdom Hall, salit nagtukod kami. Tulo ka tuig la tikang han amon pag-abot, nalipay gud kami kay 110 ka tawo an inatender ha Memoryal ngan damu ha ira an nagpabawtismo antes kami bumaya.

Han 1986 igin-asayn ako ha isla han Culion, nga may komunidad han mga may liprosi. Katapos hito, nagin espesyal payunir liwat hi Adel. Ha siyahan, nabaraka kami pagsangyaw ha mga tawo nga may liprosi. Pero ginpasarig kami han kabugtoan hito nga lugar nga gintatambal na an mga may liprosi ngan gutiay na la an posibilidad nga makatapon hira. Ngani, an pipira ha ira naatender na ha mga katirok ha balay han usa nga sister. Waray pag-iha waray na kami mag-alang pagsangyaw hini nga mga tawo nga inabat nga ginsalikway hira han Dios ngan han iba, ngan makalilipay gud nga isumat ha  ira an aton paglaom. Makalilipay liwat makita nga ini nga mga tawo nga may grabe nga sakit nalipay han nahibaroan nira nga maabot an panahon nga diri na gud hira magkakasakit.​—Luc. 5:​12, 13.

Paonan-o naka-adjust ha Culion an amon mga anak? Nag-imbitar kami ni Adel hin duha nga batan-on nga sister nga taga-Coron nga umupod ha amon basi an amon mga anak magkaada mag-opay nga sangkay. Na-enjoy nira Samuel, Shirley, ngan hinin duha nga batan-on nga sister an ira ministeryo, nagba-Bible study hira ha damu nga kabataan ngan kami naman ni Adel an nagba-Bible study ha ira mga kag-anak. Ngani, umabot hin 11 nga pamilya an amon Bible study. Waray pag-iha, nagdamu gud an amon nag-uuswag nga Bible study salit nakagporma kami hin bag-o nga kongregasyon!

Ha tinikangan, ako la an tigurang hito nga lugar. Salit ginhangyo ako han branch office nga magdumara hin sinemana nga mga katirok para ha walo nga magwarali ha Culion ngan ito liwat an akon ginbubuhat ha siyam nga magwarali ha baryo han Marily, nga tulo ka oras an pagbiyahe pinaagi hin de-motor nga sakayan. Katapos han mga katirok didto, nagbabaktas kami nga pamilya ha kabukiran hin damu ka oras basi mag-Bible study ha baryo han Halsey.

Waray pag-iha nakita namon an damu gud nga aranihon ha Marily ngan ha Halsey, salit nagtukod kami hin mga Kingdom Hall hito nga mga lugar. Ngan an kabugtoan naman ha Linapacan, pati liwat an mga interesado, naghatag han kadam-an nga materyales ngan binulig ha pagtukod. Puydi umeksakto ha Kingdom Hall ha Marily an 200 ka tawo ngan napapahaluag ito, salit nagagamit namon ito ha mga asembleya.

Han 1993 han daku na an amon mga anak, nag-alagad kami ni Adel ha sirkito nga buruhaton ha Pilipinas. Ngan han 2000, ineskwela ako ha Ministerial Training School basi ma-train sugad nga instruktor hito nga eskwelahan. Inabat ko nga diri ako kwalipikado hito nga asaynment, pero pirme ako gindadasig ni Adel. Iya ako ginpahinumdoman nga tatagan ako ni Jehova hin kusog basi matuman inin bag-o nga asaynment. (Fil. 4:13) Ginpamatud-an ito ni Adel pinaagi han iya eksperyensya kay bisan kon may-ada hiya mga sakit naglalampos hiya ha iya asaynment.

 Han 2006 han instruktor ako, nadayagnos hi Adel nga may-ada Parkinson’s disease. Nakalasan gud kami! Han nagsuhestyon ako nga maundang kami ha amon asaynment basi maataman hiya, nagsiring hiya, “Alayon pamiling hin doktor nga makakabulig ha akon sakit, ngan maaram ako nga hi Jehova mabulig ha aton nga makapadayon ha aton asaynment.” Katapos, ha sulod hin unom ka tuig, nakapadayon hi Adel ha iya pag-alagad kan Jehova nga diri nagrireklamo. Han diri na hiya nakakalakat, nagsasangyaw la gihap hiya samtang naka-wheelchair. Han nakukurian na hiya pagyakan, nagkukomento la gihap hiya ha mga katirok hin usa o duha nga pulong. Pirme nakakakarawat hi Adel hin mga mensahe han pag-apresyar han iya maopay nga ehemplo han pagpailob tubtob han namatay hiya han 2013. Ha sulod hin sobra 30 ka tuig nakaupod ko hi Adel, nga usa nga matinumanon ngan mahigugmaon nga sister, salit han namatay hiya inabat ko na liwat an duro nga kasubo ngan kamingaw.

Karuyag ni Adel nga magpadayon ako ha akon asaynment, salit ito an akon ginbuhat. Nagpabilin ako nga busy, ngan nakabulig ito ha akon nga makaya an kamingaw. Tikang han 2014 tubtob 2017, igin-asayn ako nga bumisita ha Tagalog nga mga kongregasyon ha mga nasud diin an aton buruhaton may restriksyon hadto. Katapos hito, binisita ako ha Tagalog nga mga kongregasyon ha Taiwan, United States, ngan Canada. Ngan han 2019, nagin instruktor ako ha Ingles nga klase han School for Kingdom Evangelizers ha India ngan ha Thailand. Tungod hini ngatanan nga asaynment, nalipay gud ako. Kon nakapokus gud ako ha pag-alagad kan Jehova inaabat ko nga ako an pinakamalipayon.

Ha kada ko bag-o nga asaynment, nagigin duok ako ha kabugtoan, salit diri gud pirme masayon an pagbaya ha ira. Hito nga mga panahon, nahibaro ako nga bug-os nga sumarig kan Jehova. Pirme ko naieksperyensyahan an iya bulig, ngan nakabulig ito ha akon nga karawaton hin bug-os an bisan ano nga mga pagbag-o ha akon kinabuhi. Yana, espesyal payunir ako ha Pilipinas. Naka-adjust na ako ha akon bag-o nga kongregasyon, nga nasuporta ngan nag-aataman ha akon sugad nga akon kapamilya. Nalilipay liwat ako nga makita hira Samuel ngan Shirley nga ginsusubad an pagtoo han ira nanay.​—3 Juan 4.

Oo, nakaeksperyensya ako hin damu nga problema ha akon kinabuhi, upod na hito an makita an akon hinigugma nga asawa nga nag-aantos ngan namatay tungod han grabe nga sakit. Ginkinahanglan ko liwat mag-adjust ha damu nga bag-o nga kahimtang. Pero bisan pa hito, nakita ko nga hi Jehova “diri . . . hirayo ha tagsa ha aton.” (Buh. 17:27) An mga kamot ni Jehova “diri halipot” ha pagbulig ngan ha pagparig-on ha iya mga surugoon bisan ha higrayo nga lugar. (Isa. 59:1) Hi Jehova an akon Bato, pirme ko hiya kaupod ha bug-os ko nga kinabuhi, ngan mapasalamaton gud ako ha iya. Waray gud ako mag-usahan.