1, 2. (a) Ano nga mga problema an naieksperyensyahan han damu yana, ngan ano an resulta hito? (b) Ano an iginpapasarig ha aton han Isaias 41:10, 13?

USA nga sister nga regular payunir ngan asawa hin tigurang an nagsiring: “Bisan kon may-ada ako maopay nga espirituwal nga rutina, nangalimbasog ako nga atohan an mga kabaraka ha sulod hin damu ka tuig. Diri ako nahingangaturog, apektado na an akon kahimsog pati an akon pagtratar ha iba, ngan usahay diri ko na karuyag magpadayon.”

² Nasasabtan mo ba an inaabat hito nga sister? Makasurubo nga tungod han maraot nga kalibotan ni Satanas, naieksperyensyahan naton an mabug-at nga mga problema nga nakakapabaraka ngan nakakapaluya ha aton. Maipapariho ini ha angkla nga nagpupugong ha barko nga diri makahirayo. (Prob. 12:25) Kay ano nga bangin umabat ka hin sugad hito? Bangin tungod kay namatyan ka hin hinigugma, nag-aantos hin grabe nga sakit, nakukurian ha pagtagana han panginahanglan han imo pamilya, o ginkukontra. An kasakit ha emosyon nga resulta hito bangin magpaluya ha imo. Mahimo pa ngani ito makagwara han imo kalipay. Pero makakasiguro ka nga andam an Dios nga iunat an iya kamot basi buligan ka.​—Basaha an Isaias 41:10, 13.

3, 4. (a) Paonan-o ginagamit han Biblia an pulong nga “kamot”? (b) Ano an mahimo magin hinungdan nga manluyloy an aton mga kamot?

³ Agsob nga ginagamit han Biblia an mga parti han lawas han tawo  basi ihulagway an iba-iba nga kalidad o buhat. Pananglitan, an kamot gin-uunabi ha Biblia hin ginatos ka beses. An pagparig-on han kamot mahimo magpasabot hin pagdasig, pagpakusog, ngan pag-aghat nga gumios. (1 Sam. 23:16; Esra 1:6.) Mahimo liwat ito magpasabot hin pagin positibo ngan pagkaada paglaom ha tidaraon.

⁴ An simboliko nga panluyloy han kamot usahay ginagamit ha paghulagway hin panluya, kahulop, o kawaray-paglaom. (2 Kron. 15:7; Heb. 12:12) Adton nakakaeksperyensya hini kasagaran nga diri na naruruyag magpadayon. Kon may mga problema ka nga nakakaistres o nakakapaluya ha imo ha pisikal, ha emosyonal, o ha espirituwal pa ngani, paonan-o ka magkakaada kusog? Paonan-o ka madadasig ngan mapaparig-on nga magpadayon ngan magkakaada kalipay?

5. (a) Kon nabangon an mga problema, ano an bangin himoon naton, pero ano an sadang naton hinumdoman? (b) Ano an aton hihisgotan?

⁵ Basaha an Sepania 3:16, 17. Imbes nga mahadlok ngan manluya, o manluyloy an aton mga kamot, siring pa, gin-aaghat kita han aton mahigugmaon nga Amay nga hi Jehova nga ‘ipasa ha iya an ngatanan naton nga kabaraka.’ (1 Ped. 5:7) Sadang naton hinumdoman an ginsiring han Dios ha mga Israelita, nga an ‘kamot ni Jehova diri halipot nga ini diri makaluwas’ ha iya maunungon nga mga surugoon. (Isa. 59:1) Hihisgotan naton an tulo nga makatirigamnan nga asoy ha Biblia nga nagpapakita nga karuyag gud ni Jehova ngan may kapas hiya nga parig-unon an iya katawohan ha pagbuhat han iya kaburut-on bisan ha baga hin magkuri gud nga kahimtang. Hibaroi kon paonan-o ka mapaparig-on hini nga mga ehemplo.

6, 7. Ano nga importante nga mga leksyon an aton mahibabaroan ha kadaogan han mga Israelita ha mga Amalekanhon?

⁶ Waray pag-iha katapos makagawas an mga Israelita tikang ha pagkauripon ha Ehipto, ginsulong hira han mga Amalekanhon. Ginsidngan ni Moises an maisugon nga hi Josue nga pangunahan an mga Israelita ha pakig-away. Katapos, igin-upod ni Moises hira Aaron ngan Hur ha kahirani nga bungtod diin makikita nira an araway. Napalagiw ba hira tungod han kahadlok? Diri gud!

⁷ Naghimo hi Moises hin estratihiya nga nagin hinungdan han ira kadaogan. Gin-alsa ni Moises an tungkod han tinuod nga Dios. Samtang ginbubuhat niya ito, ginpapakusog ni Jehova an mga Israelita basi magdaog ha mga Amalekanhon. Pero kon ginkakapoy na an mga kamot ni Moises ngan nanluluyloy na, nagdadaog an mga Amalekanhon. Ginios dayon hira Aaron ngan Hur. “Kinuha hira hin bato, ngan ibinutang ini ha tungod niya ngan liningkod hiya dida; ngan gin-agang-agang nira Aaron ngan hi Hur an iya mga kamot, an usa ha usa nga kamot, ngan an usa ha luyo nga kamot; ngan an iya mga kamot nagmarig-on tubtob han katunod han adlaw.” Oo, an makusog nga kamot han Dios an nagpahinabo nga magdaog an mga Israelita.​—Eks. 17:8-13.

8. (a) Paonan-o ginios hi Asa han ginsulong han mga Etiopiahanon an Juda? (b) Paonan-o naton masusubad an pagsarig ni Asa ha Dios?

⁸ Ha panahon ni Hadi Asa, ginpamatud-an liwat ni Jehova nga diri halipot an iya kamot. Damu nga girra an gin-uunabi ha Biblia. Pero an may pinakadamu nga kasundalohan nga nakiggirra amo hi Sera nga Etiopiahanon. May-ada hiya 1,000,000 nga eksperyensyado nga kasundalohan. Haros katunga gud la hito an mga sundalo ni Asa. Nabaraka ngan nahadlok ba hi Asa ngan naghunahuna nga sumurender na la? Waray. Imbes nga mahulop, nangaro dayon hiya hin bulig kan Jehova. Para ha usa nga sundalo, baga hin imposible nga mapirde an mga Etiopiahanon, pero “ha Dios an ngatanan posible.” (Mat. 19:26) Iginpakita ni Jehova an iya daku nga gahum ngan iya ‘hinampak an mga Etiopiahanon  ha atubangan ni Asa,’ nga ‘an kasingkasing hingpit kan Jehova ha ngatanan niya nga mga adlaw.’​—2 Kron. 14:8-13; 1 Hadi 15:14.

9. (a) Ano an waray makapugong kan Nehemia ha pagtukod utro han pader han Jerusalem? (b) Paonan-o ginbaton ni Jehova an pag-ampo ni Nehemia?

⁹ Hunahunaa la kon ano an inabat ni Nehemia han kinadto hiya ha Jerusalem. Haros waray depensa an syudad, ngan an iya mga igkasi-Judio nahuhulop gud. An panarhog han mga kaaway tikang ha iba nga mga nasud nagin hinungdan nga manluyloy an mga kamot han mga Judio; inundang hira pagtukod han pader han Jerusalem. Nahulop ba liwat hi Nehemia tungod hito? Waray! Pariho kanda Moises, Asa, ngan iba pa nga magtinumanon nga surugoon ni Jehova, iginpapakita pirme ni Nehemia nga nasarig hiya kan Jehova pinaagi ha pag-ampo. Ngan ginbuhat niya ito hini nga higayon. Bisan kon baga hin makuri gud para ha mga Judio an ira kahimtang, ginbaton ni Jehova an sinsero nga pag-ampo ni Nehemia para hin bulig. Gin-gamit han Dios an iya “daku nga gahum” ngan “makusog nga kamot” basi parig-unon an nanluluyloy nga mga kamot han mga Judio. (Basaha an Nehemia 1:10; 2:17-20; 6:9.) Kombinsido ka ba nga ginagamit ni Jehova an iya “daku nga gahum” ngan “makusog nga kamot” basi parig-unon an iya mga surugoon yana?

10, 11. (a) Ano an ginhihimo ni Satanas basi paundangon kita ha aton Kristiano nga mga buruhaton? (b) Ano an ginagamit ni Jehova basi parig-unon ngan pakusgon kita? (c) Paonan-o ka nagpapahimulos han pagtutdo ngan pagbansay ha aton han Dios?

¹⁰ Maaram gud kita nga padayon nga nangangalimbasog hi Satanas nga mapaundang an aton Kristiano nga mga buruhaton. Ginagamit niya an buwa nga mga impormasyon ngan panarhog han mga gobyerno, mga lider han relihiyon, ngan mga apostata. Ano an iya tumong? Paundangon kita ha pagsangyaw han maopay nga sumat han Ginhadian. Pero mapaparig-on kita ni Jehova pinaagi han iya baraan nga espiritu ngan karuyag gud niya nga buhaton ito. (1 Kron. 29:12) Importante nga mangaro kita han espiritu han Dios basi malamposan an mga pagsari nga ginpapahinabo ni Satanas ngan han iya maraot nga sistema. (Sal. 18:39; 1 Cor. 10:13) Mapasalamaton liwat kita ha bulig han Pulong han Dios, nga iginsurat ha paggiya han baraan nga espiritu. Hunahunaa liwat an espirituwal nga pagkaon nga basado ha Biblia nga aton nakakarawat kada bulan. An mga pulong ha Sakarias 8:9, 13 (basaha) iginyakan samtang gintutukod utro an templo han Jerusalem, ngan ito nga mga pulong makakabulig ha aton yana.

¹¹ Napaparig-on liwat kita han pagtutdo ha aton han Dios pinaagi han mga katirok, asembleya, kombensyon, ngan teokratiko nga mga eskwelahan. Ito nga pagbansay makakabulig ha aton nga magkaada husto nga motibo, maghimo hin espirituwal nga tumong, ngan matuman an aton damu nga toka sugad nga Kristiano. (Sal. 119:32) Nangangalimbasog ka ba nga maparig-on hito nga klase hin pagtutdo?

12. Ano an kinahanglan naton buhaton basi makapabilin nga marig-on ha espirituwal?

¹² Ginbuligan ni Jehova an mga Israelita nga magdaog ha mga Amalekanhon ngan mga Etiopiahanon, ngan gintagan niya hin kusog hi Nehemia ngan an iya mga kaupod basi matapos an pagtukod utro han pader han Jerusalem. Tatagan liwat kita ni Jehova hin kusog nga malamposan an mga pagkontra, kawaray-interes, ngan kabaraka basi makapadayon kita ha pagsangyaw nga buruhaton. (1 Ped. 5:10) Diri kita naglalaom nga maghihimo hi Jehova hin milagro basi mawara an aton mga problema. Lugod, kinahanglan buhaton naton an aton bahin. Nag-uupod ito han pagbasa ha Biblia kada adlaw, pag-andam ngan pagtambong ha mga katirok kada semana, pagkaada regular nga personal nga pag-aram ngan pagsingba han pamilya,  ngan pirme pagsarig kan Jehova pinaagi ha pag-ampo. Diri naton sadang tugotan an anoman nga buruhaton nga makaulang ha aton ha pagpahimulos han mga tagana ni Jehova ha pagparig-on ngan pagdasig ha aton. Kon inaabat mo nga diri mo bug-os nga nahihimo an pipira hini, pangaro hin bulig ha Dios. Ngan hibaroi kon paonan-o an iya espiritu ‘nagpapakusog han imo hingyap ngan naghahatag ha imo hin gahum ha pagbuhat han ngatanan nga iya karuyag.’ (Fil. 2:13) Pero ano an puydi mo buhaton basi maparig-on an kamot han iba?

13, 14. (a) Paonan-o naparig-on an usa nga brother katapos mamatay an iya asawa? (b) Paonan-o naton mahimo maparig-on an iba?

¹³ Hi Jehova nagtatagana ha aton hin mahigugmaon nga kabugtoan ha bug-os nga kalibotan nga makakabulig ha pagparig-on ha aton. Hinumdumi nga hi apostol Pablo nagsurat: “Parig-ona an mga kamot nga naluyloy ngan an mga tuhod nga maluya, ngan padayon nga tadonga an mga dalan para ha imo mga tiil.” (Heb. 12:12, 13) Ha siyahan nga siglo, damu nga Kristiano an naparig-on han ira kabugtoan. Sugad liwat hito an nahitatabo yana. Katapos mamatay an asawa han usa nga brother ngan umatubang hin iba pa nga makasurubo nga kahimtang, hiya nagsiring: “Hinbaroan ko nga diri kita puydi pumili hin pagsari, kon san-o ito mahitatabo ngan kon mationan-o kaagsob. An pag-ampo ngan personal nga pag-aram nagin pariho hin life jacket nga nakabulig ha akon nga diri malumos. Ngan an suporta han akon espirituwal nga kabugtoan nakaliaw gud ha akon. Nasantop ko nga importante gud an pagkaada duok nga relasyon kan Jehova antes umabot an magkuri nga kahimtang.”

¹⁴ Literal nga gin-alsa nira Aaron ngan Hur an kamot ni Moises durante han usa nga girra. Sugad man, mahimo kita mamiling hin paagi ha paghatag hin praktikal nga bulig ha iba. Hin-o an aton bubuligan? Adton mga nag-aantos tungod han epekto han kalagas, nagtitikaluya nga kahimsog, pagkontra han pamilya, kamingaw, o kamatyi hin hinigugma. Mahimo liwat naton maparig-on an mga batan-on nga naatubang hin mga pagsulay nga magbuhat hin sayop o magin “malampuson” hini nga sistema pinaagi man ito ha duro nga pagpabili ha sekular nga edukasyon, pinansyal nga seguridad, o propesyon. (1 Tes. 3:1-3; 5:11, 14) Pamiling hin paagi ha pagpakita hin sinsero nga interes ha iba ha Kingdom Hall, ha ministeryo, samtang nangangaon, o nakikiistorya ha telepono.

15. Ano an mahimo magin epekto ha kabugtoan han imo positibo nga mga pulong?

¹⁵ Katapos han urusahon gud nga kadaogan ni Asa, ginparig-on ni propeta Asaria hi Asa ngan an iya katawohan: “Magmakusganon kamo, ngan ayaw pahumoka an iyo mga kamot; kay an iyo buhat pagbabaslan.” (2 Kron. 15:7) Nagpagios ini kan Asa nga maghimo hin damu nga pagbag-o basi maipahiuli an putli nga pagsingba. Sugad man, an imo positibo nga mga pulong mahimo makaapekto gud ha iba. Mahimo mo hira mabuligan nga bug-os gud nga mag-alagad kan Jehova. (Prob. 15:23) Ngan durante han mga katirok, ayaw gud igbalewaray an daku nga epekto ha iba han pag-alsa han imo kamot ngan paghatag hin makaparig-on nga komento.

16. Pariho kan Nehemia, paonan-o mapaparig-on han mga tigurang an mga kamot han kabugtoan ha kongregasyon? Pag-unabi hin eksperyensya kon paonan-o ka nabuligan han kabugtoan.

¹⁶ Tungod han bulig ni Jehova, naparig-on an kamot ni Nehemia ngan han iya mga kaupod para ha buruhaton. Salit natapos nira an pagtukod han pader han Jerusalem ha sulod la hin 52 ka adlaw! (Neh. 2:18; 6:15, 16) Hi Nehemia waray la manginano ha buruhaton, nakigbahin mismo hiya ha pagtukod utro han pader han Jerusalem. (Neh. 5:16) Sugad man, damu nga mahigugmaon nga tigurang an nagsusubad kan Nehemia  pinaagi ha pagbulig ha teokratiko nga mga proyekto han pagpanukod o ha paglimpyo ngan pagmintinar han ira Kingdom Hall. Kon gin-uupdan nira an mga magwarali ha ministeryo ngan kon nagsi-shepherding hira, napaparig-on liwat nira an maluya nga mga kamot hadton mga “mahadlukon an kasingkasing.”​—Basaha an Isaias 35:3, 4.

17, 18. Kon may mga problema kita o nababaraka, ha ano kita makakasarig?

¹⁷ An aton burublig nga pag-alagad nagpaparig-on han aton pagkaurosa. Nagpaparig-on liwat ito han aton pagkamagsarangkay ngan pagsarig ha tiarabot nga mga bendisyon nga papahinaboon han Ginhadian han Dios. Kon ginpaparig-on naton an kamot han iba, ginbubuligan naton hira nga malamposan an makasurubo nga mga kahimtang ngan padayon nga magin positibo ngan maglaom ha tidaraon. An pagbuhat hito nabulig ha aton nga magpokus ha espirituwal ngan magkaada marig-on nga pagtoo ha mga saad han Dios ha aton. Oo, ginpaparig-on liwat hito an aton mga kamot.

¹⁸ An paghibaro kon paonan-o ginbuligan ngan ginpanalipdan ni Jehova ha iba-iba nga kahimtang an iya magtinumanon nga surugoon hadto sadang magparig-on han aton pagtoo ngan pagsarig ha iya yana. Salit kon nakakaeksperyensya ka hin mga pagsari ngan problema, ayaw tuguti nga manluyloy an imo kamot! Lugod, pag-ampo kan Jehova para hin bulig, ngan tuguti an iya makusog nga kamot nga magparig-on ngan maggiya ha imo basi makarawat mo an mga bendisyon han Ginhadian.​—Sal. 73:23, 24.