1, 2. Ano nga pagsari an posible nga inaatubang han mga batan-on yana, ngan ano an puydi nira buhaton basi malamposan ito?

“WARAY baltok nga natuod ha Dios,” siring han kaeskwela han batan-on nga sister nga taga-Britanya. Usa nga brother ha Alemanya an nagsurat: “Ginhuhunahuna han akon mga titser nga an asoy han Biblia mahitungod ha paglarang susmatanon la. . . . Salit an mga estudyante natoo ha ebolusyon.” Usa nga batan-on ha Fransia an nagsiring: “Nahipapausa an mga titser ha amon eskwelahan nga may mga estudyante nga natoo pa gihapon ha Biblia.”

² Sugad nga batan-on nga magsiringba ni Jehova o usa nga nag-aaram mahitungod ha Iya, napipiritan ka ba nga karawaton na la an gintoohan han kadam-an, sugad han ebolusyon, imbes nga tumoo ha Maglalarang? Kon oo, may mga paagi nga mabulig ha imo basi padayon nga maparig-on an imo pagtoo. An usa hito amo an paggamit han iginhatag ha imo han Dios nga abilidad ha paghunahuna, nga “magbabantay ha imo.” Magpapanalipod ini ha imo tikang ha mga pilosopiya nga igintututdo ha eskwelahan nga mahimo makagwara han imo pagtoo.​—Basaha an Proberbios 2:10-12.

3. Ano an aton hihisgotan hini nga artikulo?

³ An tinuod nga pagtoo iginbasar ha husto nga kahibaro mahitungod  ha Dios. (1 Tim. 2:4) Salit imbes nga pahapyaw la nga pag-adman an Pulong han Dios ngan an aton mga publikasyon, admi ito hin maopay. Gamita an imo abilidad ha paghunahuna basi ‘masabtan an kahulogan’ han imo ginbabasa. (Mat. 13:23) Hisgotan naton kon paonan-o an pagbuhat hito makakabulig nga maparig-on an imo pagtoo ha Dios sugad nga Maglalarang ngan ha Biblia​—mga topiko nga may damu nga makakombinse nga “ebidensya.”​—Heb. 11:1.

4. Ginkakarawat man han usa nga tinuod an ebolusyon o may-ada Dios, kay ano nga nag-uupod ito hin pagtoo, ngan ano an kinahanglan naton buhaton?

⁴ May nagsiring na ba ha imo nga tinuod an ebolusyon kay basado ito ha syensya ngan diri tinuod nga may Dios kay basado la ito ha pagtoo? Damu an may sugad hito nga panhunahuna. Pero sadang naton hinumdoman ini: Ginkakarawat man han usa nga tinuod an ebolusyon o may-ada Dios, nag-uupod ito hin pagtoo. Ha ano nga paagi? Waray bisan usa ha aton nga nakakita ha Dios o nakakita han ginlarang an usa nga butang. (Juan 1:18) Sugad man, waray syentista o bisan hin-o nga tawo nga nakakita nga an usa nga klase han kinabuhi nahimo nga iba nga klase han kinabuhi. Pananglitan, nakakita ka na ba hin halas nga nahimo nga leon? (Job 38:1, 4) Salit kita ngatanan kinahanglan mag-usisa han ebidensya ngan gamiton an aton abilidad ha paghunahuna basi makahimo hin husto nga konklusyon. May kalabotan ha mga linarang, hi apostol Pablo nagsurat: “An [kanan Dios] diri-nakikita nga mga kalidad, nga amo an iya waray kataposan nga gahum ngan pagka-Dios, klaro nga nakikita tikang pa ha paghimoa han kalibotan, kay nasasabtan ito pinaagi han mga butang nga ginhimo, salit diri hira makakagnigar.”​—Roma 1:20.

5. Sugad nga katawohan han Dios, paonan-o kita ginbubuligan nga gamiton an aton abilidad ha pagsabot?

⁵ An “pagsabot” nag-uupod ha pagkilala ha butang nga bangin diri dayon nakikita o nahibabaroan. (Heb. 11:3) Salit an mga tawo nga masinabuton nagamit han ira hunahuna, diri la han ira mga mata ngan talinga. An organisasyon ni Jehova nagtatagana ha aton hin damu nga garamiton nga ginsaliksik hin maopay basi buligan kita. Salit mahimo naton ‘makita’ an aton Maglalarang pinaagi han aton mata han pagtoo. (Heb. 11:27) Kaupod hini nga mga garamiton amo an video nga The Wonders of Creation Reveal God’s Glory, an  brosyur nga Ginlarang ba an Kinabuhi? ngan The Origin of Life​—Five Questions Worth Asking, ngan an libro nga Is There a Creator Who Cares About You? Nakakakarawat liwat kita hin mag-opay nga impormasyon ha aton mga magasin nga nag-aaghat ha aton nga maghunahuna. Pananglitan, mababasa ha Pagpamata! an pipira nga interbyu ha mga syentista ngan ha iba pa nga nagsasaysay kon kay ano nga natoo na hira yana ha Dios. An mga serye han artikulo nga “May-ada ba Nagdisenyo Hito?” nagpapabug-at hin mga ehemplo han urusahon nga pagkadisenyo ha mga linarang. Kasagaran na nga ginsusubad han mga syentista iton makaruruyag gud nga mga disenyo.

6. Ano an mga kapulsanan ha paggamit han mga garamiton nga igintatagana ha aton, ngan paonan-o ka nagpapahimulos hito?

⁶ May kalabotan ha duha nga brosyur nga gin-unabi pa la, an 19 anyos nga brother ha Estados Unidos nagsiring: “Daku gud an bulig hini ha akon. Gin-adman ko ini nga mga brosyur hin damu ka beses.” Usa nga sister ha Fransia an nagsurat: “Bilib gud ako han mga artikulo nga ‘May-ada ba Nagdisenyo Hito?’ Iginpapakita hito nga mahimo makopya han eksperto nga mga inhinyero an komplikado nga mga disenyo ha aton palibot, pero diri nira ito bug-os nga makukopya.” An mga kag-anak han usa nga batan-on ha Sur Aprika nagsiring: “Kasagaran na nga an siyahan nga ginbabasa han amon anak ha Pagpamata! amo an artikulo nga ‘Interbyu.’” Ginpapahimulosan mo ba liwat hin bug-os ini nga mga tagana? Makakabulig ini nga magin marig-on an imo pagtoo pariho hin kahoy nga nakagamot hin hilarom. Tungod hito, magigin marig-on ka bisan pa han sugad-bagyo nga buwa nga mga katutdoan.​—Jer. 17:5-8.

7. Kay ano nga karuyag han Dios nga gamiton mo an imo abilidad ha paghunahuna?

⁷ Sayop ba an pagbangon hin sinsero nga mga pakiana mahitungod ha Biblia? Diri gud! Karuyag ni Jehova nga gamiton mo an imo “abilidad ha paghunahuna” basi mapamatud-an mo ha imo kalugaringon an kamatuoran. Diri niya karuyag nga tumoo ka ha usa nga butang tungod la kay natoo hito an iba. Salit gamita an imo abilidad ha pagsabot basi magkaada husto nga kahibaro. Ito nga kahibaro makakabulig nga magkaada ka marig-on nga pundasyon han tinuod nga pagtoo. (Basaha an Roma 12:1, 2; 1 Timoteo 2:4.) Usa nga paagi basi magkaada hito nga kahibaro amo an pag-aram hin espisipiko nga mga topiko nga karuyag mo gud mahibaroan.

8, 9. (a) Ano nga mga topiko an bangin karuyag pag-adman han pipira? (b) Paonan-o nagpapahimulos an pipira ha pagpamalandong han ira gin-aadman?

⁸ Ginpili han pipira nga pag-adman an mga tagna ha Biblia o an pagin husto hito may kalabotan ha kasaysayan, arkeolohiya, ngan syensya. Usa nga makapainteres nga tagna nga maopay pag-adman amo an Genesis 3:15. Ito nga teksto nagsusumat han nangunguna nga tema han Biblia, an pagbindikar han pagkasoberano han Dios ngan pagbaraan han iya ngaran pinaagi han Ginhadian. Pinaagi hin simboliko nga mga pulong, iginpakita ni Jehova hito nga teksto kon paonan-o niya wawad-on an ngatanan nga pag-antos han tawo tungod han nahitabo ha Eden. Paonan-o mo mahimo pag-adman an Genesis 3:15? Puydi ka maghimo hin time line nga may nakalista nga mga teksto nga nagpapakita kon paonan-o hinay-hinay nga iginpahayag ni Jehova an mga indibiduwal ngan an kahikayan nga konektado ha Genesis 3:15, ngan kon paonan-o ito nga mga teksto nagpapamatuod han katumanan han tagna. Samtang nakikita mo kon paonan-o nagkakauruyon an mga teksto, makukombinse ka gud nga an mga parasurat han Biblia ngan an mga propeta ‘ginigiyahan han baraan nga espiritu.’​—2 Ped. 1:21.

⁹ Usa nga brother ha Alemanya an nakasantop kon paonan-o an tagsa nga libro han Biblia naghahatag hin mga detalye mahitungod han Ginhadian. Hiya nagsiring: “Nagkakauruyon gud ito  bisan kon mga 40 nga kalalakin-an an nagsurat han Biblia. Ngan damu ha ira an nabuhi ha magkaiba-iba nga panahon ngan diri personal nga magkiriglala.” Usa nga sister ha Australia an naparig-on han aradman nga artikulo han Disyembre 15, 2013 nga gowa han An Barantayan nga naghihisgot han kahulogan han Paskua. Ito nga espesyal nga okasyon konektado gud ha Genesis 3:15 ngan ha pag-abot han Mesias. Hiya nagsurat: “Nasabtan ko gud hito nga pag-aram kon mationan-o kaopay hi Jehova. Binilib gud ako ha nagplano hini nga kahikayan para ha mga Israelita ngan kon paonan-o ini natuman kan Jesus. Kinahanglan ko gud umundang anay ngan pamalandungon an pagkaurusahon hiton matagnaon nga panihapon ha Paskua!” Kay ano nga sugad hito an inabat han sister? Ginpamalandong gud niya an iya ginbasa ngan ‘ginsabot an kahulogan hito.’ Nakabulig ini nga magin marig-on an iya pagtoo ngan magin duok kan Jehova.​—Mat. 13:23.

10. Paonan-o an pagin tangkod han mga parasurat han Biblia nagpaparig-on han aton pagtoo ha Biblia?

¹⁰ Mapaparig-on liwat an imo pagtoo ha Biblia kon uusisahon mo an iginpakita nga kaisog ngan katangkod han kalalakin-an nga nagsurat hito. Ha kadaan nga panahon, damu nga parasurat an nagsusurat hin diri tinuod basi la lipayon an ira mga lider ngan himayaon an ira ginhadian. Pero an mga propeta ni Jehova pirme nagsusumat han kamatuoran. Andam hira nga isumat an mga kaluyahan han ira mga kahimungto pati na han ira mga hadi. (2 Kron. 16:9, 10; 24:18-22) Ngan diri nira igintatago an ira mismo mga sayop ngan han iba nga surugoon han Dios. (2 Sam. 12:1-14; Mar. 14:50) “Talagsahon gud an sugad nga pagin tangkod,” siring han batan-on nga brother ha Britanya. “Nakakadugang ini ha aton pagsarig nga an Biblia tikang gud kan Jehova.”

11. Paonan-o mas mapapabilhan han mga batan-on an pagkaimportante han mga prinsipyo han Biblia?

¹¹ Tungod han maopay nga epekto han pagsunod ha mga prinsipyo han Biblia, damu an nakukombinse nga giniyahan ito han Dios. (Basaha an Salmo 19:7-11.) Usa nga sister ha Japan an nagsurat: “Kon igin-aaplikar han amon pamilya an mga katutdoan han Biblia, malipayon gud kami. Inaabat namon an kamurayawan, pagkaurosa, ngan gugma.” An mga prinsipyo han Biblia nagpapanalipod ha aton tikang ha sayop nga pagsingba ngan mga patootoo nga nag-uuripon ha damu nga tawo. (Sal. 115:3-8) Ha luyo nga bahin, ano an epekto han pilosopiya nga waray Dios ha mga tawo nga natoo hito? Adton natoo ha ebolusyon, kasagaran na nga ginhihimo nira an mga butang ha palibot nga sugad hin dios. Adton mga nasiring nga waray Dios naghuhunahuna nga bug-os nga nakadepende ha mga tawo an pagkaada maopay nga kabubuwason. Pero ha pagkamatuod, diri ito maihahatag han mga tawo.​—Sal. 146:3, 4.

12, 13. Ano an epektibo nga paagi ha paghisgot mahitungod ha paglarang o ha Biblia ha mga kaeskwela, titser, o iba pa?

¹² Paonan-o ka magigin epektibo ha imo pangatadongan ha iba mahitungod ha paglarang ngan ha Biblia? Siyahan, ayaw dayon hunahunaa nga maaram ka na han ira gintotoohan. May mga tawo nga natoo ha ebolusyon, pero natoo liwat nga may Dios. Naghuhunahuna hira nga gin-gamit han Dios an ebolusyon basi larangon an iba-iba nga klase han kinabuhi. An iba liwat natoo ha ebolusyon kay naghuhunahuna hira nga diri ito itututdo ha eskwelahan kon diri ito tinuod. Ngan an pipira diri na natoo ha Dios tungod kay diskontento hira ha relihiyon. Salit kon ginhihisgotan mo ha usa an gintikangan han kinabuhi, kasagaran na nga mas maopay nga magpakiana anay. Hibaroi kon ano gud an iya gintotoohan. Kon makatadunganon ka ngan andam mamati, bangin mamati liwat hiya ha imo.​—Tito 3:2.

¹³ Kon may nagtatamay ha imo kay natoo ka ha paglarang, mahimo ka magin mataktika pinaagi ha pagpakiana ha iya kon paonan-o nagkaada kinabuhi kon waray Maglalarang. Basi padayon nga  umeksister an usa nga klase han kinabuhi, kinahanglan may abilidad ito nga magdamu ngan makopya an iya kalugaringon. Usa nga propesor ha chemistry an nagsiring nga nagkikinahanglan ito hin (1) panit basi magin proteksyon hito, (2) abilidad nga makakuha hin enerhiya ngan gamiton ini, (3) impormasyon ha genes (DNA), ngan (4) abilidad nga makopya ini nga impormasyon. Hiya dugang nga nagsiring: “Bisan hin-o nahipapausa gud han pagin komplikado bisan han pinakasimple nga klase han kinabuhi.”

14. Ano an puydi mo himoon kon diri ka andam makighisgot mahitungod ha ebolusyon o paglarang?

¹⁴ Kon diri ka andam makighisgot mahitungod ha ebolusyon o ha paglarang, mahimo mo gamiton inin simple nga pangatadongan ni Pablo. Hiya nagsurat: “An tagsa nga balay may nagtukod, pero an naghimo han ngatanan nga butang amo an Dios.” (Heb. 3:4) Masayon masabtan ngan epektibo gud ito nga pangatadongan! Oo, an komplikado nga mga disenyo han mga butang nagpapamatuod gud nga may intelihente nga persona nga naghimo hito. Puydi mo liwat gamiton an angayan nga publikasyon. Usa nga sister an nagtanyag han gin-unabi kanina nga duha nga brosyur ha usa nga batan-on nga natoo ha ebolusyon ngan diri natoo nga may Dios. Paglabay hin mga usa ka semana, an batan-on nagsiring, “Natoo na ako nga may Dios.” Tungod hito, nag-aram hiya ha Biblia, ngan ha urhi nagin Saksi ni Jehova.

15, 16. Paonan-o mo mahimo ipahiuyon an paghisgot mahitungod ha Biblia, ngan ano an imo tumong?

¹⁵ Ito liwat an puydi mo buhaton kon may makaistorya ka nga diri natoo ha Biblia. Hibaroi kon ano gud an iya gintotoohan ngan ano nga topiko an makapainteres ha iya. (Prob. 18:13) Kon interesado hiya ha syensya, pag-unabi hin mga punto nga nagpapakita nga an Biblia husto may kalabotan ha syensya. An iba bangin magin interesado kon ipapakita naton ha ira nga masasarigan gud an mga tagna ngan kasaysayan nga gin-uunabi ha Biblia. O mahimo mo hisgotan an mga prinsipyo han Biblia nga makakabulig ha ira pagkinabuhi sugad han mababasa ha Sermon ha Bukid.

¹⁶ Hinumdumi an imo tumong​—maabot an kasingkasing, diri makigdebate. Salit pamati hin maopay. Pagbangon hin sinsero nga mga pakiana. Magin buotan ngan matinalahuron, labi na kon nakikiistorya ha mga edaran. Hini nga paagi, posible nga pamatian nira an imo opinyon. Makikita nira nga nasasabtan mo gud an imo gintotoohan, diri pariho ha damu nga batan-on yana. Syempre, diri mo kinahanglan batunon adton karuyag la makigdebate o tamayon an imo gintotoohan.​—Prob. 26:4.

17, 18. (a) Ano an makakabulig ha imo nga higugmaon an kamatuoran? (b) Ano nga pakiana an aton hihisgotan ha sunod nga artikulo?

¹⁷ Basi magin marig-on an pagtoo, labaw pa ha pagkaada kahibaro ha nangunguna nga katutdoan ha Biblia an ginkikinahanglan. Kinahanglan mo magsaliksik hin maopay ha Pulong han Dios, pariho ha pamiling hin nakatago nga mga bahandi. (Prob. 2:3-6) Pahimulusi an mga garamiton sugad han Watchtower Library ha DVD, Watchtower ONLINE LIBRARY, pati na an Watch Tower Publications Index o Giya ha Pagsaliksik Para ha Mga Saksi ni Jehova. Himoa liwat nga tumong nga basahon an bug-os nga Biblia. Puydi mo ito matapos pagbasa ha sulod hin 12 ka bulan. An pagbasa ha Biblia usa han pinakamaopay nga paagi ha pagparig-on han imo pagtoo. Ha paghinumdom han iya pagkabatan-on, usa nga paramangno han sirkito an nagsiring: “An pagbasa han bug-os nga Biblia usa han nakabulig ha akon nga mapamatud-an nga Pulong gud ito han Dios. An akon hinbaroan nga mga istorya ha Biblia han bata pa ako mas nagin matin-aw ha akon. Nakabulig gud ini nga mag-uswag ako ha espirituwal.”

¹⁸ Mga kag-anak, daku an iyo maibubulig basi mag-uswag ha espirituwal an iyo mga anak. Paonan-o niyo hira mabubuligan nga magkaada marig-on nga pagtoo? Ito an hihisgotan ha sunod nga artikulo.