Iginpapakita han konteksto nga an ginhihisgotan ni apostol Pablo amo an mensahe, o kapahayagan han Dios may kalabotan han Iya katuyoan, nga mababasa ha Biblia.

An Hebreo 4:12 kasagaran na nga ginagamit ha aton mga publikasyon basi pamatud-an nga an Biblia may gahum nga makagbag-o hin kinabuhi, ngan husto ito nga aplikasyon. Pero mas mapulsanon kon tatagdon naton an kabug-osan nga konteksto han Hebreo 4:12. Gin-aghat ni Pablo an Hebreo nga mga Kristiano nga magkinabuhi uyon ha mga katuyoan han Dios. Mababasa an damu hito ha baraan nga mga sinurat. Gin-gamit ni Pablo sugad nga ehemplo an mga Israelita nga gintalwas tikang ha Ehipto. May paglaom hira nga makasulod ha tuna nga iginsaad nga ‘nag-aagay hin gatas ngan dugos,’ diin mapapahimulosan nira an tinuod nga pagpahuway.​—Eks. 3:8; Deut. 12:9, 10.

Ito an iginpahayag nga katuyoan han Dios para ha mga Israelita. Pero ha urhi, waray hira magin masinugtanon ngan magpakita hin pagtoo, salit kadam-an ha ira an waray makasulod hito nga pagpahuway. (Num. 14:30; Jos. 14:6-10) Kondi hi Pablo dugang nga nagsiring nga “nagpapadayon pa an saad ha pagsulod ha [kanan Dios] pagpahuway.” (Heb. 3:16-19; 4:1) Ini nga “saad,” matin-aw nga bahin han iginpahayag nga katuyoan han Dios. Pariho han Hebreo nga mga Kristiano, mababasa naton ito nga katuyoan ngan makakagkinabuhi kita uyon hito. Basi pabug-atan nga ini nga saad iginbasar ha Kasuratan, hi Pablo nagkotar hin mga bahin han Genesis 2:2 ngan Salmo 95:11.

Makalilipay gud hunahunaon nga “nagpapadayon pa an saad ha pagsulod ha [kanan Dios] pagpahuway.” Sugad han iginpapasarig ha aton han Biblia, posible gud makasulod ha pagpahuway han Dios, ngan ginhihimo na naton an mga pitad basi makasulod dida hito. Pero diri kita makakasulod dida hito pinaagi la ha pagsunod ha Mosaiko nga Balaud o paghimo hin iba pa nga mag-opay nga buhat basi uyonan ni Jehova. Lugod, pinaagi han pagtoo, malipayon kita nga nagkikinabuhi uyon ha iginpahayag nga katuyoan han Dios. Ngan sugad han nahisgotan na, yinukot nga katawohan ha bug-os nga kalibotan an nag-aaram ha Biblia ngan nahibabaro han iginpahayag nga katuyoan han Dios. Damu ha ira an napagios nga bag-uhon an ira pagkinabuhi, magpakita hin pagtoo, ngan magpabawtismo. Iton daku nga pagbag-o ha kinabuhi hini nga mga tawo pamatuod gud nga “an pulong han Dios buhi ngan gamhanan.” An iginpahayag nga katuyoan han Dios nga mababasa ha Biblia nakagbag-o na han aton kinabuhi, ngan padayon ito nga makakagbag-o han aton kinabuhi.