“NABAWTISMOHAN ako han 15 anyos ako, ngan paglabay hin unom ka bulan nag-auxiliary payunir ako. Paglabay hin usa ka tuig, nagregular payunir ako. Paggradwar ko ha hayskul, nagsiring ako nga karuyag ko mag-alagad ha lugar nga mas daku an panginahanglan hin magwarali han Ginhadian. Karuyag ko bumaya ha amon lugar ngan ha akon lola nga kaupod ko ha balay nga diri Saksi ni Jehova. Nasubo gud ako han ginsidngan ako han paramangno han sirkito nga itutoka ako dida mismo ha amon lugar nga akon gindak-an! Pero waray ko ito ipaabat ha iya. Lumakat ako nga masurub-on ngan ginhinunahuna ko an iya ginsiring ha akon. Ginsidngan ko an akon padis ha pagsangyaw: ‘Inaabat ko nga pariho ako kan Jonas. Pero ha urhi, kumadto hi Jonas ha Ninibe. Salit, kinahanglan ko liwat mag-alagad ha lugar nga igintoka ha akon.’

“Yana, upat ka tuig na ako nga payunir ha amon lugar, ngan nakita ko nga maaramon gud an pagsunod han giya. An akon pagin negatibo amo an nagin problema. Yana, malipayon gud ako. Ha usa ka bulan, 24 an akon gindudumarahan hin pag-aram ha Biblia. Nagpapasalamat gud ako kan Jehova kay bisan an akon lola nga nakontra hadto, Bible study ko na yana.”

Usa nga estudyante ha Biblia ha Fiji an kinahanglan magdesisyon kon matambong hiya ha kombensyon han mga Saksi ni Jehova o maatender kaupod han iya bana ha birthday han ira paryente. Gintugotan hiya han iya bana nga umatender han kombensyon. Ginsidngan niya an iya bana nga maatender hiya ha birthday katapos na han kombensyon. Pero pag-uli niya, inabat niya nga diri maopay nga ibutang an iya kalugaringon ha peligroso nga sitwasyon nga makakadaot han iya espirituwalidad, salit nagdesisyon hiya nga diri kumadto.

Samtang nakadto ha birthday, ginsumatan han bana an iya mga paryente nga maabot an iya asawa katapos na han “katirok han mga Saksi,” kay ginsidngan niya adto nga lumanat ha iya. Pero nagsiring hira, “Diri adto makanhi; diri nagsiselebrar hin birthday an mga Saksi ni Jehova!” *

Sugad nga resulta, nalipay gud an iya bana nga nagin marig-on hiya ha iya mga gintotoohan ngan ginsunod niya an iya konsensya. Ha urhi, an iya pagin matinumanon naghatag ha iya hin higayon nga masangyawan an iya bana ngan an iba. Ano an nagin resulta? Nag-aaram na ha Biblia an iya bana ngan natambong na ha mga katirok upod niya.