1, 2. Ano nga mga pagsari an kinahanglan atubangon han mga surugoon ni Jehova?

TIKANG ha siyahan nga matinumanon nga tawo nga hi Abel tubtob ha aton panahon, an ngatanan nga maunungon nga surugoon han Dios naatubang hin pakig-away. Hi apostol Pablo nagsiring ha Hebreo nga mga Kristiano nga ‘nagpailob hira ngan nag-antos hin makuri nga mga pagsari’ ha ira pakig-away basi makarawat an pag-uyon ngan bendisyon ni Jehova. (Heb. 10:32-34) Iginpariho ni Pablo an pakig-away han mga Kristiano ha pangalimbasog han mga atleta nga naapi ha Griego nga mga kompetisyon sugad han rumba, resling, ngan boksing. (Heb. 12:1, 4) Yana, kaapi kita ha rumba han kinabuhi, ngan karuyag han aton mga kakontra nga mawara an aton pokus, mahipakulob kita, mapirde, ngan mawara an aton kalipay ngan premyo ha tidaraon.

² Naatubang kita hin makuri nga pakig-away (o, ‘pakigdulong,’ ftn.) kontra kan Satanas ngan han iya maraot nga kalibotan. (Efe. 6:12) Importante nga atohan naton an kalibotanon nga impluwensya may kalabotan ha “mga butang nga nakagamot hin marig-on”  sugad han sayop nga mga doktrina ngan pilosopiya ngan nakakadaot nga mga buhat nga nag-uupod han imoralidad, pagsigarilyo, ngan pagin adik ha alkohol ngan droga. Kinahanglan liwat naton padayon nga atohan an panluya ngan an aton mga kaluyahan.​—2 Cor. 10:3-6; Col. 3:5-9.

3. Paonan-o kita ginbabansay han Dios basi mapirde naton an aton mga kaaway?

³ Posible gud ba nga mapirde naton inin gamhanan nga mga kaaway? Oo, pero kinahanglan gud an duro nga pangalimbasog. Iginpariho ni Pablo an iya kalugaringon ha usa nga boksingero. Hiya nagsiring: “An akon mga suntok diri kay pagsuntok ha hangin.” (1 Cor. 9:26) Sugad la nga kinahanglan atohan han boksingero an iya kakontra, kinahanglan liwat naton atohan an aton mga kaaway. Ginbabansay ngan ginbubuligan kita ni Jehova ha aton pakig-away. Pinaagi han iya Pulong, nagtatagana hiya ha aton hin mga instruksyon nga nagtatalwas hin kinabuhi. Ginbubuligan liwat kita niya pinaagi han basado ha Biblia nga mga publikasyon, Kristiano nga mga katirok, asembleya, ngan kombensyon. Gin-aaplikar mo ba an imo mga hinbabaroan? Kon diri, pariho ito ha “pagsuntok ha hangin,” karuyag sidngon, diri mo gin-aatohan an imo kaaway.

4. Paonan-o naton madadaog an maraot?

⁴ Mahimo kita atakehon han aton mga kaaway kon kampante o maluya kita, salit kinahanglan kita magin alerto pirme. An Biblia nagpapahamangno ha aton: “Ayaw padaog ha maraot, lugod daoga pirme an maraot pinaagi han maopay.” (Roma 12:21) An pagdasig nga “ayaw padaog ha maraot” nagpapakita nga mapipirde naton an maraot. Mahihimo naton ito kon padayon naton nga aatohan an kaaway. Pero kon maundang kita ha pakig-away ngan diri magigin alerto, madadaog kita ni Satanas, han iya maraot nga kalibotan, ngan han aton mga kaluyahan. Ayaw gud pagpapirde kan Satanas!​—1 Ped. 5:9.

5. (a) Ano an makakabulig ha aton basi makarawat an bendisyon ni Jehova? (b) Hin-o nga mga tawohan ha Biblia an aton hihisgotan?

⁵ Basi magdaog, kinahanglan hunahunaon pirme han nakikig-away kon kay ano nga ginbubuhat niya ito. Ngan basi makarawat an pag-uyon ngan bendisyon han Dios, kinahanglan hinumdoman niya an ginsisiring han Hebreo 11:6: “An nadaop ha iya kinahanglan tumoo nga buhi hiya ngan hiya an nagbabalos ha mga sinsero nga nag-aalagad ha iya.” An Griego nga pulong nga iginhubad nga “sinsero nga nag-aalagad” nagpapasabot hin duro nga pangalimbasog. (Buh. 15:17) Mababasa ha Kasuratan an mag-opay nga ehemplo han kalalakin-an ngan kababayin-an nga nangalimbasog gud nga makarawat an bendisyon ni Jehova. Hira Jacob, Raquel, Jose, ngan Pablo, inatubang hin mga kahimtang nga nagresulta hin pisikal ngan emosyonal nga panluya, pero nagin mapinadayunon hira salit hura nga ginbendisyonan hira. Paonan-o naton masusubad an pakig-away hinin upat nga indibiduwal?

6. Ano an nakabulig kan Jacob nga magin mapinadayunon, ngan paonan-o hiya ginbalosan? (Kitaa an retrato ha tinikangan hini nga artikulo.)

⁶ An patriarka nga hi Jacob nakig-away ngan nagin mapinadayunon tungod kay hinigugma niya hi Jehova, gin-aapresyar niya an espirituwal nga mga butang, ngan marig-on an iya pagtoo ha saad ni Jehova nga bibendisyonan an iya katulinan. (Gen. 28:3, 4) Salit han mga 100 anyos hi Jacob, ginbuhat niya an iya bug-os nga mahihimo basi makarawat an bendisyon han Dios; nakigdulong pa ngani hiya ha anghel nga nagpakatawo. (Basaha an Genesis 32:24-28.) May-ada ba hiya igo nga kusog basi magdaog ha makusog nga anghel? Waray gud! Pero determinado hiya nga diri umundang tubtob nga makarawat an bendisyon, ngan ginbalosan hiya tungod han iya  pagin mapinadayunon! Ngani, ginngaranan hiya nga Israel (nangangahulogan nga “Nakigdulong [Mapinadayunon] ha Dios” o “An Dios Nakikigdulong”). Nakarawat ni Jacob an daku nga balos nga karuyag liwat naton makarawat​—an pag-uyon ngan bendisyon ni Jehova.

7. (a) Ano nga makapaluya nga kahimtang an gin-atubang ni Raquel? (b) Ha ano nga paagi niya ito gin-atohan, ngan paonan-o hiya ginbendisyonan?

⁷ Ginpapamulat gud ni Raquel, an hinigugma nga asawa ni Jacob, kon paonan-o tutumanon ni Jehova an Iya saad ha iya bana. Pero may-ada hiya daku nga problema. Waray hiya anak. Ha ira panahon, daku gud ito nga kaarawdan. Paonan-o hi Raquel nagkaada karig-on ha emosyon ngan kusog ha pisikal basi padayon nga maatohan iton makapaluya nga kahimtang nga diri niya kontrolado? Waray gud hiya mawad-i hin paglaom. Lugod, gin-atohan niya ito pinaagi ha padayon nga pag-ampo. Ginpamatian ni Jehova an iya kinasingkasing nga mga pag-ampo, ngan ha urhi nagkaada hiya mga anak. Salit nakasiring hi Raquel: “Nakig-away ako hin makuri nga pakig-away . . . kundi nagdaog ako”!​—Gen. 30:8, 20-24; Maupay nga Sumat.

8. (a) Ano nga makuri nga pagsari an inatubang ni Jose, ngan mationan-o ito kaiha? (b) Kay ano nga maopay hiya nga susbaranan para ha aton?

⁸ An pagin matinumanon nira Jacob ngan Raquel sigurado nga nakaimpluwensya gud ha ira anak nga hi Jose. Nakabulig ito ha iya nga malamposan an mga pagsari ha iya pagtoo. Han 17 anyos hi Jose, nagbag-o gud an iya kinabuhi. Tungod han kaawa, iginbaligya hiya ha pagkauripon han iya kabugtoan. Ha urhi, nag-antos hiya hin damu ka tuig nga kapriso ha Ehipto bisan kon waray hiya sala. (Gen. 37:23-28; 39:7-9, 20-21) Pero waray hiya manluya; waray liwat hiya magdumot ngan mangalimbasog nga bumulos. Lugod, nagpokus hiya ha iya birilhon nga relasyon kan Jehova. (Leb. 19:18; Roma 12:17-21) Makakabulig ha aton an ehemplo ni Jose. Pananglitan, bisan kon makasurubo an aton eksperyensya han bata pa kita o baga hin waray paglaom an aton kahimtang yana, kinahanglan padayon kita nga makig-away ngan magin mapinadayunon. Ha pagbuhat hini, makakasarig kita nga bibendisyonan kita ni Jehova.​—Basaha an Genesis 39:21-23.

9. Basi masubad hira Jacob, Raquel, ngan Jose, ano nga pangalimbasog an sadang naton himoon para makarawat an bendisyon ni Jehova?

⁹ Yana, bangin naatubang ka liwat hin makuri nga mga pagsari. Bangin nag-aantos ka hin kawaray-hustisya, diskriminasyon, o pagtamay. O bangin gin-akusaran ka hin sayop tungod han kaawa. Imbes nga manluya ngan magpadaog, hinumdumi kon ano an nakabulig kanda Jacob, Raquel, ngan Jose nga padayon nga magin malipayon ha pag-alagad kan Jehova. Ginparig-on ngan ginbendisyonan hira han Dios tungod kay padayon nira nga ginpabilhan an espirituwal nga mga butang. Nangalimbasog gud hira ngan gumios uyon ha ira mga pag-ampo. Nagkikinabuhi na kita ha durho han kataposan nga mga adlaw hinin maraot nga sistema; salit may daku kita nga rason nga tipigan nga marig-on an aton paglaom ha tidaraon! Andam ka ba mangalimbasog, o makigdulong siring pa, basi makarawat an pag-uyon ni Jehova?

10, 11. (a) Ha ano nga mga kahimtang bangin kinahanglan naton makigdulong basi makarawat an bendisyon han Dios? (b) Ano an mabulig ha aton basi makahimo hin husto nga mga desisyon ngan madaog an panluya ngan mga ulang?

¹⁰ Ano an pipira nga kahimtang nga bangin kinahanglan naton makigdulong basi makarawat an bendisyon han Dios? Damu yana an nakikig-away ha sayop nga mga hingyap. An iba nangangalimbasog gud nga matipigan an positibo nga panhunahuna ha ministeryo. O ha imo kahimtang, bangin nagpapailob ka tungod han maluya nga kahimsog o pag-abat hin kamingaw. Diri  liwat naton sadang hingalimtan an pipira nga nakukurian pagpasaylo ha nakasala ha ira. Maiha na man kita nga nag-aalagad kan Jehova o bag-ohan pa la, kita ngatanan kinahanglan makig-away ha bisan ano nga mahimo makaulang ha aton pag-alagad ha Dios, an nagbabalos ha mga matinumanon.

¹¹ Oo, bangin makurian kita ha paghimo hin husto nga desisyon ngan ha pagkinabuhi sugad nga Kristiano, labi na kon ginbubutong kita han aton malimbungon nga kasingkasing ha iba nga direksyon. (Jer. 17:9) Kon ito an imo inaabat, pag-ampo kan Jehova para han iya baraan nga espiritu. An pag-ampo ngan an baraan nga espiritu maghahatag ha imo hin kusog nga buhaton an husto, nga tungod hito makakarawat mo an bendisyon ni Jehova. Gios uyon ha imo mga pag-ampo. Basaha an Biblia kada adlaw ngan paggahin hin panahon para ha personal nga pag-aram ngan pagsingba han pamilya.​—Basaha an Salmo 119:32.

12, 13. Paonan-o nabuligan an duha nga Kristiano nga makontrol an ira sayop nga mga hingyap?

¹² Damu nga ehemplo an nagpapakita kon paonan-o an Pulong han Dios, an baraan nga espiritu, ngan an aton mga publikasyon nakabulig ha mga Kristiano nga maatohan an sayop nga mga hingyap. Usa nga tin-edyer an nagbasa han artikulo nga “Paano Mo Mapaglalabanan ang Maling mga Pagnanasa?” ha Disyembre 8, 2003 nga gowa han Gumising! Ano an epekto hito ha iya? “Nakikig-away ako ha sayop nga mga panhunahuna. Han nabasa ko ha artikulo nga ‘damu an nakukurian gud ha pag-ato ha sayop nga mga hingyap,’ inabat ko nga diri ako nag-uusahan.” Nagpahimulos liwat hiya ha artikulo  nga “Mga Alternatibong Istilo ng Pamumuhay​—Sinasang-ayunan ba Ito ng Diyos?” han Oktubre 8, 2003 nga gowa han Gumising! Nagsiring hiya nga gin-unabi hito nga artikulo nga an pipira nakikig-away hin “tunok ha unod.” (2 Cor. 12:7) Pero bisan kon padayon hira nga nakikig-away basi matipigan an limpyo nga panggawi, naglalaom hira hin maopay nga tidaraon. “Tungod hito,” siring niya, “inabat ko nga makakapabilin ako nga matinumanon kada adlaw. Nagpapasalamat gud ako kan Jehova nga ginagamit niya an iya organisasyon basi buligan kita nga magdaog kada adlaw kontra hinin maraot nga sistema.”

¹³ Tagda liwat an eksperyensya han sister nga taga-Estados Unidos. Hiya nagsurat: “Karuyag ko kamo pasalamatan tungod han iyo pirme pagtagana han amon gud ginkikinahanglan ha husto nga panahon. Agsob ko abaton nga ini nga mga artikulo iginsurat para gud ha akon. Ha sulod hin mga tuig, gin-aatohan ko an usa nga makusog nga hingyap nga kinangangalasan ni Jehova. Usahay, karuyag ko na umundang ha pakig-away. Maaram ako nga maloloy-on ngan mapinasayloon hi Jehova, pero tungod kay nagpapabilin ha akon inin maraot nga hingyap ngan diri ko ito tinuod nga ginkakangalasan, inaabat ko nga diri niya ako bubuligan. Ini nga pakig-away nakaapekto gud han ngatanan nga bahin han akon kinabuhi. . . . Han nabasa ko an artikulo nga ‘May-ada Ka ba “Kasingkasing ha Pagkilala” kan Jehova?’ han Marso 15, 2013 nga gowa han An Barantayan, inabat ko nga karuyag gud ni Jehova nga buligan ako.”

14. (a) Ano an inabat ni Pablo ha sayop nga mga hingyap ngan mga kaluyahan nga iya gin-aatohan? (b) Paonan-o naton madadaog an aton mga kaluyahan?

¹⁴ Basaha an Roma 7:21-25. Maaram gud hi Pablo nga makuri an pakig-away ha sayop nga mga hingyap ngan mga kaluyahan. Pero bug-os nga nasarig hiya nga magdadaog hiya ha iya pakig-away kon mag-aampo hiya kan Jehova para han bulig ngan magpapakita hin pagtoo ha halad-lukat ni Jesus. Kumusta man kita? Kon padayon nga aatohan naton an aton mga kaluyahan, magdadaog kita. Paonan-o? Pinaagi ha pagsubad kan Pablo, pinaagi ha bug-os nga pagsarig kan Jehova, diri ha aton kalugaringon, ngan pinaagi ha pagtoo ha lukat.

15. Kay ano nga an pag-ampo makakabulig ha aton nga magpabilin nga matinumanon ngan makapailob ha mga pagsari?

¹⁵ May mga panahon nga gintutugotan han Dios nga ipakita naton kon mationan-o kaimportante ha aton an usa nga butang. Pananglitan, ano man kon nag-aantos kita (o an aton kapamilya) hin grabe nga sakit o nakakaeksperyensya kita hin kawaray-hustisya? Maipapakita naton an bug-os nga pagsarig kan Jehova pinaagi ha pangamuyo nga tagan kita niya hin kusog nga makapabilin nga matinumanon ngan padayon nga magin malipayon ngan timbang ha espirituwal. (Fil. 4:13) An eksperyensya han damu nga Kristiano, ha panahon ni Pablo ngan yana, nagpapamatuod nga an pag-ampo nagpapakusog ngan nagpaparig-on ha aton basi makapailob.

16, 17. Ano an imo determinasyon ha imo pakig-away?

¹⁶ Karuyag gud han Yawa nga manluya ka ngan umundang ha pakig-away. Salit magin determinado nga ‘buhaton pirme an maopay.’ (1 Tes. 5:21) Makakalaom ka nga madadaog mo hi Satanas, an iya maraot nga kalibotan, ngan an imo mga kaluyahan! Mahihimo mo ito pinaagi ha bug-os nga pagsarig nga mapapakusog ka han Dios.​—2 Cor. 4:7-9; Gal. 6:9.

¹⁷ Anoman an mahitabo, padayon nga makig-away. Padayon nga mangalimbasog. Padayon nga makigdulong. Magin mapinadayunon. Makakasarig ka gud nga ‘ibububo ha imo ni Jehova an bendisyon nga mawaray igo nga surudlan ha pagkarawat hini.’​—Mal. 3:10.