1. Kay ano nga kombinsido ka nga gamhanan an Pulong han Dios? (Kitaa an retrato hini nga pahina.)

SUGAD nga mga magsiringba ni Jehova, kombinsido gud kita nga an pulong han Dios, an iya mensahe ha katawohan, “buhi ngan gamhanan.” (Heb. 4:12) Damu ha aton an makakagpamatuod nga an Biblia may gahum nga makagbag-o hin kinabuhi. An pipira han aton kabugtoan mga kawatan hadto, adik ha droga, o imoral. An iba may malampuson nga kinabuhi hini nga sistema pero inabat nira nga may kulang ha ira. (Ekles. 2:3-11) Ha damu nga higayon, an mga indibiduwal nga baga hin waray na paglaom nagkaada katuyoan an ira kinabuhi tungod han nakakapabag-o nga gahum han Biblia. Bangin nabasa mo na an damu hini nga eksperyensya ha serye han An Barantayan nga “An Biblia Nakakagbag-o han Kinabuhi,” ngan sigurado nga naparig-on ka hini. Nakikita mo liwat nga bisan kon ginkarawat na han usa nga Kristiano an kamatuoran, padayon hiya nga nag-uuswag ha espirituwal ha bulig han Kasuratan.

2. Paonan-o an gahum han Pulong han Dios nakaapekto ha mga tawo han siyahan nga siglo?

² Sadang ba kita mahipausa nga damu yana an naghihimo hin dagku nga pagbag-o ha ira kinabuhi tungod han ira pag-aram han Pulong han Dios? Diri gud! An aton kabugtoan han siyahan nga siglo nga may  langitnon nga paglaom naghimo liwat hin sugad nga mga pagbag-o. (Basaha an 1 Corinto 6:9-11.) Katapos ni apostol Pablo mag-unabi han klase hin mga tawo nga diri makakapanunod han Ginhadian han Dios, hiya nagdugang: “Sugad hito an iba ha iyo hadto.” Pero nagbag-o hira ha bulig han Kasuratan ngan han baraan nga espiritu han Dios. Bisan han ginkarawat na nira an kamatuoran, an pipira ha ira kinahanglan padayon nga mangalimbasog nga atohan an seryoso nga mga problema ha espirituwal. Gin-uunabi han Biblia an usa nga dinihogan nga Kristiano han siyahan nga siglo nga kinahanglan paiwason ha kongregasyon; pero ha urhi, nakabalik hiya. (1 Cor. 5:1-5; 2 Cor. 2:5-8) Diri ba nakakaliaw gud hibaroan nga mationan-o man kadaku an problema han aton mga igkasi-tumuroo, nalamposan nira ito ha bulig han Pulong han Dios?

3. Ano an aton hihisgotan hini nga artikulo?

³ Tungod kay an Pulong han Dios usa nga gamhanan nga garamiton nga iginhatag ha aton, sigurado nga karuyag naton nga gamiton ito ha pinakamaopay nga paagi. (2 Tim. 2:15) Salit hini nga artikulo, hihisgotan naton kon paonan-o naton mas magagamit an gahum han Pulong han Dios (1) ha aton kinabuhi, (2) ha ministeryo, ngan (3) kon nagtututdo ha entablado. Ini nga mga pahinumdom mabulig ha aton nga ipakita an aton gugma ngan pagpasalamat ha aton mahigugmaon ngan langitnon nga Amay, nga nagtututdo ha aton basi kita magpahimulos.—Isa. 48:17.

4. (a) Ano an aton kinahanglan himoon kon karuyag naton nga makaimpluwensya ha aton an Pulong han Dios? (b) Paonan-o ka naggagahin hin panahon ha pagbasa han Biblia?

⁴ Kon karuyag naton nga makaimpluwensya ha aton kinabuhi an Pulong han Dios, kinahanglan nga regular naton ito nga basahon—kada adlaw kon posible. (Jos. 1:8) Oo, kadam-an ha aton sagipo hinduro. Bisan pa hito, diri naton sadang tugotan an bisan ano—bisan an importante nga mga obligasyon—nga makaulang han aton rutina ha pagbasa han Biblia. (Basaha an Efeso 5:15, 16.) Damu han katawohan ni Jehova an naghihimo hin mga paagi basi maggahin hin panahon ha pagbasa han Biblia kada adlaw, ha temprano ha aga o ha gab-i o ha anoman nga oras durante han adlaw. Ira inaabat an inabat han salmista, nga nagsurat: “O nahigugma gud ako ha imo balaud! Amo ito an akon pamalandong ha bug-os nga adlaw.”—Sal. 119:97.

5, 6. (a) Kay ano nga importante an pagpamalandong? (b) Paonan-o magigin epektibo an aton pagpamalandong? (c) Paonan-o ka personal nga nagpahimulos ha pagbasa ngan pagpamalandong ha Pulong han Dios?

⁵ Labot han pagbasa ha Biblia, importante nga pamalandungon naton an aton ginbabasa. (Sal. 1:1-3) Hito la nga paagi makikita naton an pinakamaopay nga aplikasyon han diri napapas nga kinaadman han Biblia. Ginbabasa man naton an nakaimprinta nga Pulong han Dios o an elektroniko nga pormat hito, sadang naton magin tumong nga maipasilsil ito ha aton kasingkasing.

⁶ Paonan-o magigin epektibo an aton pagpamalandong?  Damu an nakaobserbar nga nakakabulig an pag-undang katapos basahon an pipira nga bahin han Kasuratan ngan hunahunaon an sugad hini nga mga pakiana: ‘Ano an igintututdo hini ha akon mahitungod kan Jehova? Paonan-o ko igin-aaplikar ha akon kinabuhi an prinsipyo hini nga teksto? Ano pa an angay ko pauswagon?’ Kon namamalandong kita ngan nag-aampo mahitungod han aton ginbabasa, mapapagios kita nga mas iaplikar ito. Kon bubuhaton naton ini, mas magagamit naton an gahum han Pulong han Dios ha aton kinabuhi.—2 Cor. 10:4, 5.

7. Paonan-o naton magagamit hin maopay an Pulong han Dios ha aton ministeryo?

⁷ Ano an makakabulig ha aton nga magamit hin maopay an Pulong han Dios ha aton ministeryo? An siyahan amo an pirme paggamit hito kon nagsasangyaw ngan nagtututdo kita. Usa nga bugto an nagsiring may kalabotan hito, “Kon personal mo nga kaupod hi Jehova ha pagsangyaw, ikaw la ba pirme an mag-iinistorya o payayaknon mo hiya?” An iya punto amo ini: Kon ginbabasa naton an Pulong han Dios ha tagbalay, gintutugotan naton hi Jehova nga makiistorya hito nga indibiduwal. An pinili hin maopay nga teksto posible nga magkaada mas daku nga epekto kay ha bisan ano nga aton isisiring. (1 Tes. 2:13) Pakianhi an imo kalugaringon, ‘Namimiling ba ako hin higayon nga magbasa hin teksto ha akon nasasangyawan han maopay nga sumat?’

8. Kay ano nga diri igo an pagbasa la hin teksto kon nagsasangyaw kita?

⁸ Syempre, diri igo an pagbasa la hin teksto ha aton mga nakakaistorya. Kay ano? Tungod kay damu nga tawo an gutiay la o waray hinbabaroan ha Biblia. Ito an kahimtang han siyahan nga siglo, ngan ito liwat an kahimtang yana. (Roma 10:2) Salit diri naton sadang hunahunaon nga masasabtan han aton kaistorya an punto han usa nga teksto tungod kay ginbasa naton ito ha iya. Kinahanglan naton pabug-atan an mga pulong o ideya—basahon pa ngani utro an importante nga mga pulong—ngan isaysay an kahulogan  hito. An pagbuhat hito makakabulig nga maabot han mensahe han Pulong han Dios an hunahuna ngan kasingkasing han aton mamarati.—Basaha an Lucas 24:32.

9. Paonan-o naton ipipresenta an mga teksto ha paagi nga mag-aaghat ha tagbalay nga respetuhon an Biblia? Paghatag hin ehemplo.

⁹ Maopay gud nga ipresenta naton an mga teksto ha paagi nga mag-aaghat ha tagbalay nga respetuhon an Biblia. Pananglitan, mahimo kita sumiring, “Kitaon naton kon ano an ginsisiring han aton Maglalarang may kalabotan hini nga topiko.” Kon nakikiistorya ha usa nga diri Kristiano, mahimo kita sumiring, “Kitaon naton kon ano an ginsisiring han Baraan nga mga Sinurat.” O kon nagsasangyaw ha usa nga diri interesado ha relihiyon, mahimo kita magpakiana, “Nabatian mo na ba inin kadaan nga puplunganon?” Oo, iginpapahiuyon naton an aton pakiistorya ha kon ano an makapainteres ha tagsa nga indibiduwal.—1 Cor. 9:22, 23.

10. (a) Isaysay an eksperyensya han usa nga brother. (b) Paonan-o mo nakikita an gahum han Pulong han Dios ha imo ministeryo?

¹⁰ Naobserbaran han damu nga an paggamit han Pulong han Dios ha ministeryo may daku nga epekto ha ira mga ginsasangyawan. Tagda an usa nga eksperyensya. Ginbalik-bisita han usa nga brother an edaran nga lalaki nga maiha na nga nagbabasa han aton mga magasin. Imbes nga itanyag la an bag-o nga gowa han An Barantayan, nagdesisyon an brother nga magbasa hin teksto nga makikita hito nga gowa. Iya ginbasa an 2 Corinto 1:3, 4, nga nasiring: “An Amay han mahigugmaon nga kalooy ngan an Dios han ngatanan nga pagliaw . . . nagliliaw ha aton ha ngatanan nga kasakitan.” Nabantad gud hito an tagbalay salit ginhangyo niya an brother nga basahon ito utro. An tagbalay nagsiring nga nagkikinahanglan hiya ngan an iya asawa hin pagliaw, ngan yana interesado na an lalaki ha mensahe han Biblia. Diri ka ba mauyon nga daku gud an epekto han Pulong han Dios ha aton ministeryo?—Buh. 19:20.

11. Ano an responsabilidad han kabugtoan nga nagtututdo ha entablado?

¹¹ Nalilipay gud kita ngatanan ha pagtambong ha Kristiano nga mga katirok, asembleya, ngan kombensyon. An aton nangunguna nga rason ha pagtambong amo an pagsingba kan Jehova. Daku liwat an aton napapahimulosan tikang ha espirituwal nga instruksyon nga aton nakakarawat. An kabugtoan nga nagtututdo ha entablado ha sugad nga mga okasyon nalilipay hinin daku nga pribilehiyo. Pero sadang liwat nira hinumdoman nga may-ada hira mabug-at nga responsabilidad. (San. 3:1) Kinahanglan nira siguruhon pirme nga an ira igintututdo basado gud ha Pulong han Dios. Kon gintokahan ka nga magtutdo ha entablado, paonan-o mo magagamit an gahum han Biblia ha pagpresentar han imo bahin?

12. Paonan-o masisiguro han usa nga mamumulong nga nakapokus ha Kasuratan an iya pahayag?

¹² Siguroha nga nakapokus ha Kasuratan an imo pahayag. (Juan 7:16) Paonan-o mo ito mahihimo? Pag-ikmat nga an imo gagamiton nga eksperyensya, ilustrasyon, o bisan an paagi han imo pagpahayag diri makatabon o makagwara han pagkaimportante han teksto nga imo ginpapabug-atan. Hinumdumi liwat nga an basta la pagbasa hin mga teksto diri nagpapasabot nga nagtututdo ka na tikang ha Biblia. Ngani, an paggamit hin damu hinduro nga teksto bangin magresulta la lugod nga waray mahinumdoman an mamarati. Salit pilia hin maopay an mga teksto nga karuyag mo gamiton, ngan paggahin hin panahon ha pagbasa, pagsaysay, pag-ilustrar, ngan pag-aplikar hito. (Neh. 8:8) Kon an usa nga pahayag iginbasar ha outline nga igin-andam han organisasyon, pag-admi an outline ngan an mga teksto nga gin-gamit hito. Pangalimbasog nga masabtan an koneksyon han ginsiring ha outline ngan an gin-unabi nga mga teksto. Gamita an pipira nga pinili nga teksto ha pagtutdo han mga punto nga ginpapabug-atan han outline. (Makikita mo an praktikal nga mga suhestyon ha aradman 21 tubtob  23 ha libro nga Magpahimulos han Edukasyon Tikang ha Teokratiko nga Eskwelahan ha Ministeryo.) Labaw ha ngatanan, pag-ampo kan Jehova para hin bulig nga maipatin-aw mo an birilhon nga mga punto tikang ha iya Pulong.—Basaha an Esra 7:10; Proberbios 3:13, 14.

13. (a) Paonan-o napagios an usa nga sister tungod han paggamit hin mga teksto ha usa nga Kristiano nga katirok? (b) Paonan-o ka nagpahimulos ha mga teksto nga iginpresentar ha aton mga katirok?

¹³ Usa nga sister ha Australia an napagios gud han iya nabatian nga mga teksto nga gin-gamit ha Kristiano nga katirok. Bisan pa han makasurubo nga nahitabo ha iya hadto, ginkarawat niya an mensahe han Biblia ngan nagdedikar kan Jehova. Kondi, nakukurian la gihapon hiya pagkarawat nga hinigugma hiya ni Jehova. Pero ha urhi, nagin kombinsido hiya nga hinigugma hiya han Dios. Ano an nakakombinse ha iya? Nakabulig ha iya an pagpamalandong ha usa nga teksto nga gin-gamit ha katirok ngan ginhunahuna niya an koneksyon hito ha iba pa nga teksto ha Biblia. * Naeksperyensyahan mo na ba liwat nga napagios ka tungod han imo nabatian nga teksto nga gin-gamit durante han katirok, asembleya, o kombensyon?—Neh. 8:12.

14. Paonan-o naton maipapakita nga gin-aapresyar naton an Pulong ni Jehova?

¹⁴ Diri ba kita sadang magpasalamat kan Jehova nga igintagana niya ha aton an iya sinurat nga Pulong, an Biblia? Diri la kay mahigugmaon nga iginhatag niya ito para ha katawohan kondi gintutuman liwat niya an iya saad nga magpapadayon ito ha waray kataposan. (1 Ped. 1:24, 25) Salit maopay gud nga siguruhon naton nga regular nga mabasa an Pulong han Dios, iaplikar ito ha aton kinabuhi, ngan gamiton ito ha pagbulig ha iba. Ha pagbuhat hito, iginpapakita naton nga hinigugma ngan gin-aapresyar naton diri la inin birilhon nga bahandi kondi, labaw ha ngatanan, an Awtor hito, hi Jehova nga Dios.