HAN 1935, an akon mga kag-anak nga hira James ngan Jessie Sinclair binalhin ngadto ha Bronx, New York City. Usa han ira bag-o nga nakilala amo hi Willie Sneddon, nga taga-Scotland pariho ha ira. Pipira pa la ka minutos han ira siyahan nga pag-iristorya, naghisgot na hira mahitungod han ira tagsa-tagsa nga pamilya. Nahitabo ito mga duha ka tuig antes ako matawo.

Ginsumatan ni Nanay hi Willie nga waray pag-iha katapos han Girra ha Kalibotan I, samtang nangingisda ha North Sea an iya tatay ngan bugto, nalunod hira kay nakasabod hin bomba an ira baluto. Hi Willie binaton, “Aadto ha impyerno hi imo tatay!” Saksi ni Jehova hi Willie, ngan ini an siyahan nga higayon nga hinbatian ni Nanay an kamatuoran mahitungod ha Biblia, ngan diri gud hiya makatoo han iya hinbatian.

Waray malipay hi Nanay ha ginsiring ni Willie kay maaram hiya nga buotan an iya tatay. Pero hi Willie dugang nga nagsiring, “Malilipay ka ba kon sumatan ko ikaw nga hi Jesus kinadto ha impyerno?” Nahinumdoman ni Nanay an kredo han singbahan, nga ha orihinal nga mga pulong nasiring nga hi Jesus linusad ngadto ha impyerno ngan ginbanhaw ha ikatulo ka adlaw. Salit nahunahuna ni Nanay, ‘Kon an impyerno usa nga naglalaga nga lugar diin ginpapasakitan an magraot, kay ano nga kinadto hi Jesus?’ Ini an tinikangan han pagin interesado ni Nanay ha kamatuoran. Nagtikang hiya tumambong ha mga katirok ha Bronx Congregation ngan nabawtismohan han 1940.

Hito nga panahon, waray pa espisipiko nga pagdasig ha mga kag-anak nga dumarahan hin pag-aram ha Biblia an ira mga anak. Han bata pa ako, hi Tatay an nag-aataman ha akon samtang natambong ha mga katirok ngan nagsasangyaw hi Nanay ha kada kataposan han semana. Paglabay hin pipira ka tuig, nagtikang kami ni Tatay pag-upod kan Nanay ha mga katirok. Madasigon gud hi Nanay ha pagsangyaw han maopay nga sumat ngan damu nga interesado an iya gindudumarahan hin pag-aram ha Biblia. Ngani, may higayon nga gin-urosa niya an pagdumara hin pag-aram han iya pipira nga estudyante kay magkahigrani la an ira mga urukyan. Naupod ako ha iya ha pagsangyaw kon bakasyon namon ha eskwelahan. Salit damu an akon hinbaroan mahitungod ha Biblia ngan kon paonan-o ito itututdo ha iba.

Makasurubo nga han bata pa ako, diri ako sugad kainteresado ha kamatuoran. Iginbalewaray  ko ito. Pero han mga 12 anyos ako, nagin magwarali ako han Ginhadian ngan regular na nga nakikigbahin ha pagsangyaw. Han 16 anyos ako, nagdedikar ako kan Jehova, ngan nagpabawtismo han Hulyo 24, 1954, ha kombensyon ha Toronto, Canada.

Pipira han amon mga kakongregasyon mga Bethelite o nagin mga Bethelite hadto. Maopay gud hira nga impluwensya ha akon. Nabilib ako ha ira kay maopay hira magpahayag ngan magsaysay han mga kamatuoran ha Biblia. Bisan kon gin-aaghat ako han akon mga titser nga magkolehiyo, tumong ko nga magin Bethelite. Salit nagpasa ako hin aplikasyon para ha pag-alagad ha Bethel durante hito nga kombensyon ha Toronto. Nag-aplay ako utro han 1955 ha kombensyon ha Yankee Stadium, New York City. Waray pag-iha, han 17 anyos ako, gin-imbitar ako nga mag-alagad ha Brooklyn Bethel han Septyembre 19, 1955. Ha akon ikaduha ka adlaw ha Bethel, nagtikang ako pagtrabaho ha Bindery ha 117 Adams Street. Waray pag-iha, nagtrabaho ako ha makinarya nga nagtitirok han tag-32 ka pahina nga mga bahin han mga libro para maiandam ito ha makina nga nagtatahi han mga libro.

Paglabay hin mga usa ka bulan ha Bindery, iginbalhin ako ha Magazine Department kay maaram ako mag-type. Hadto, iginta-type han kabugtoan ha mga stencil (gudtiay nga metal plate) an adres han bag-o nga mga subskrayber han An Barantayan ngan Pagpamata! Paglabay hin pipira ka bulan, nagtrabaho ako ha Shipping Department. Hi Klaus Jensen, an paramangno hito nga departamento, nagpakiana ha akon kon karuyag ko updan an drayber han trak nga nagdideliber han kinarton nga mga literatura ha mga pantalan para ipadara ha iba-iba nga nasud. May-ada liwat sinako nga magasin nga kinahanglan dad-on ha opisina han koreo basi ipadara ha mga kongregasyon ha bug-os nga Estados Unidos. Hi Bugto Jensen nagsiring nga ginhuhunahuna niya nga makakaopay ha akon an mabug-at nga trabaho. Magasa  ako hinduro ngan 57 ka kilo la ako. An akon pagbiyahe ngadto ha mga pantalan ngan ha opisina han koreo nagpakusog ha akon ha pisikal. Maaram gud hi Bugto Jensen han makakaopay ha akon!

An Magazine Department liwat an naglilista han mga order nga magasin han kongregasyon. Salit nahibaroan ko kon ha ano nga mga linggwahe gin-iimprinta an aton mga magasin ha Brooklyn ngan iginpapadara ha iba-iba nga nasud. Waray pa gud ako makabati han damu hito nga mga linggwahe kondi nalipay ako ha paghibaro nga yinukot nga magasin an iginpapadara ha higrayo gud nga mga lugar. Pero waray ko mahunahuna nga pag-abot han panahon makakapribilehiyo ako nga mabisita an damu hito nga mga lugar.

Han 1961, igintoka ako ha Treasurer’s Office diin hi Grant Suiter an paramangno hito. Paglabay hin mga duha ka tuig, gintawag ako ha opisina ni Bugto Nathan Knorr, an nangunguna hadto ha aton buruhaton ha bug-os nga kalibotan. Iya ginsaysay ha akon nga an usa nga bugto nga nagtatrabaho ha iya departamento maeskwela ha Kingdom Ministry School ha sulod hin usa ka bulan, ngan katapos magtatrabaho ha Service Department. Ako an iginsaliwan ha iya, ngan nakatrabaho ko hi Don Adams. Hinbaroan ko nga hi Don an kumarawat han akon aplikasyon para ha Bethel han kombensyon han 1955. Duha pa nga bugto an nagtatrabaho hito nga departamento, hira Robert Wallen ngan Charles Molohan. Nagin magkatrabaho kami nga upat ha sulod hin sobra 50 ka tuig. Makalilipay gud nga mag-alagad kaupod hinin magtinumanon ngan hamtong nga kalalakin-an!—Sal. 133:1.

Tikang han 1970, gintokahan ako nga magbiyahe hin pipira ka semana kada tuig o kada duha ka tuig basi bisitahon an pipira nga sanga nga opisina han Watch Tower Society. Gintatawag ini hadto nga pagbisita ha sona. Nag-uupod ini han pagbisita ha mga pamilya han Bethel ngan mga misyonero ha bug-os nga kalibotan, paghatag hin  espirituwal nga pagparig-on, ngan pag-usisa han mga rekord han sanga nga opisina. Makalilipay gud nga makilala an pipira nga naggradwar ha siyahan nga mga klase han Gilead nga matinumanon pa gihapon nga nag-aalagad ha ira toka ha iba nga nasud! Pribilehiyo ko ngan kalipay nga makabisita ha sobra 90 nga nasud tungod hini nga toka.

An ngatanan nga Bethelite igintoka ha iba-iba nga kongregasyon ha New York City. Igintoka ako ha Bronx. An siyahan nga kongregasyon hito nga lugar nagtikadaku salit gintunga ito. An orihinal nga kongregasyon gintawag nga Upper Bronx Congregation, ngan dida ako natambong.

Han 1965, usa nga pamilya nga Saksi nga nagyayakan hin Latvian, nga nahibaro han kamatuoran ha sur han Bronx, an binalhin ha teritoryo nga sakop han Upper Bronx Congregation. An suhag nga anak nga hi Livija nagpayunir dayon paggradwar niya han hayskul. Paglabay hin pipira ka bulan, binalhin hiya ha Massachusetts basi mag-alagad ha lugar nga mas daku an panginahanglan hin magwarali. Nagtikang ako pagsurat ha iya mahitungod han mga nahitatabo ha kongregasyon, ngan ginbabalosan niya ako mahitungod han mga kalamposan han iya pagministeryo ha Boston.

Paglabay hin pipira ka tuig, igintoka hi Livija nga magin espesyal payunir. Karuyag gud niya buhaton an iya bug-os nga mahihimo ha pag-alagad kan Jehova, salit nag-aplay hiya ha Bethel ngan gintawag hiya han 1971. Ginhunahuna ko nga bangin tigaman ini tikang kan Jehova! Han Oktubre 27, 1973, ginkasal kami ngan pribilehiyo namon nga hi Bugto Knorr an nagdumara han pahayag para han amon kasal. An Proberbios 18:22 nasiring: “Bisan hin-o nga makaagi hin [maopay nga] asawa nakakaagi han maopay nga butang; ngan nakakakuha han pagdapig ni Jehova.” Nakarawat namon ni Livija an “pagdapig” o pag-uyon ni Jehova ha sulod hin sobra 40 ka tuig nga magkaupod ha pag-alagad ha Bethel. Ngan padayon kami nga nasuporta ha usa nga kongregasyon ha Bronx.

Makalilipay gud an pag-alagad kaupod hi Bugto Knorr. Maduruto hiya ha mga buruhaton para ha kamatuoran ngan gin-aapresyar gud niya an mga misyonero ha bug-os nga kalibotan. Damu ha ira an siyahan nga mga Saksi ha mga nasud diin hira igintoka. Han 1976, makasurubo gud nga makita an pag-antos ni Bugto Knorr tungod han kanser. Makausa, han nakada na la hiya ha higdaan, ginhangyo niya ako nga basahon an pipira nga materyal nga igin-aandam para ha pag-imprinta. Ginsidngan niya ako nga tawagon hi Bugto Frederick Franz basi mabatian liwat niya an akon babasahon. Ha urhi, hinbaroan ko nga tungod kay maluya na an pagkita ni Bugto Franz, naggagahin hi Bugto Knorr hin daku nga panahon basi basahon ha iya an sugad nga mga materyal.

Namatay hi Bugto Knorr han 1977, pero naliaw adton iya mga kakilala ngan hinigugma kay natapos niya an iya kinabuhi ha tuna nga matinumanon. (Pah. 2:10) Katapos, hi Bugto Franz an sumaliwan ha pagpanguna ha aton buruhaton.

Hito nga panahon, nagtatrabaho ako sugad nga sekretaryo ni Bugto Milton Henschel, nga nagtrabaho  kaupod ni Bugto Knorr ha sulod hin mga dekada. Ginsidngan ako ni Bugto Henschel nga an akon nangunguna nga responsabilidad ha Bethel amo an pag-asikaso han anoman nga ginkikinahanglan ni Bugto Franz. Regular ko nga ginbabasa ha iya an mga materyal antes ito ig-imprinta. Maopay gud an memorya ni Bugto Franz ngan may talagsahon hiya nga abilidad nga bug-os nga makagpokus ha ginbabasa. Makalilipay gud nga makabulig ha iya ha sugad nga paagi tubtob han natapos an iya kinabuhi ha tuna han Disyembre 1992!

Madagmit la nga linabay an 61 ka tuig nga akon pag-alagad ha Bethel. An akon mga kag-anak namatay nga matinumanon kan Jehova, ngan ginpapamulat ko gud nga makita hira utro ha bag-o nga kalibotan. (Juan 5:28, 29) Waray bisan ano nga butang nga igintatanyag hini nga daan nga sistema nga makakapariho ha makalilipay nga pribilehiyo nga mag-alagad kaupod han matinumanon nga kabugtoan para ha katawohan han Dios ha bug-os nga kalibotan. Makakasiring gud kami ni Livija nga durante han mga tuig han amon bug-os-panahon nga pag-alagad, “an kalipay ni Jehova amo an [amon] kusug.”—Neh. 8:10.

An buruhaton han pagpasamwak han mga kamatuoran mahitungod han Ginhadian magpapadayon anoman an mahitabo, ngan diri ito nakadepende ha usa ka tawo ha organisasyon ni Jehova. Daku gud nga kalipay ngan pribilehiyo nga mag-alagad kaupod han damu nga marig-on ngan maunungon nga kabugtoan ha sulod hin mga katuigan. Kadam-an han dinihogan nga akon nakatrabaho waray na dinhi ha tuna. Pero mapasalamaton ako nga nakaupod ko ha pag-alagad kan Jehova an sugad nga matinumanon ngan hamtong nga kabugtoan.