Subara an Pagin Mapinairon ni Jehova
“Hi Jehova, hi Jehova, usa ka Dios nga maloloy-on ngan mapinairon.”—EKS. 34:6.
1. Paonan-o iginpakilala ni Jehova an iya kalugaringon kan Moises, ngan kay ano nga makatirigamnan ito?
MAKAUSA, iginpakilala han Dios an iya kalugaringon kan Moises pinaagi ha pagpahibaro han Iya ngaran ngan mga kalidad. An siyahan han iya mga gin-unabi amo an kalooy ngan pagpaid. (Basaha an Eksodo 34:5-7.) Mahimo unta pabug-atan ni Jehova an iya gahum o an iya kinaadman. Pero tungod kay nagkikinahanglan hi Moises hin pasarig kon mabulig gud ba an Dios, ginpabug-atan ni Jehova an iya mga kalidad nga nagpapakita han iya pagin andam nga bumulig ha iya mga surugoon. (Eks. 33:13) Diri ka ba nababantad ha paghibaro nga siyahan nga gin-unabi han Dios ini nga mga kalidad kay han iba pa niya nga mag-opay nga kalidad? Hini nga artikulo, hihisgotan naton an kalidad nga pagpaid—an pag-abat hin kalooy ha pag-antos o kakurian han iba ngan an hingyap nga buligan hira.
2, 3. (a) Ano an nagpapakita nga natural ha mga tawo nga magin mapinairon? (b) Kay ano nga sadang ka magin interesado ha ginsisiring han Biblia mahitungod ha pagpaid?
2 An mga tawo ginhimo ha ladawan han Dios. Salit tungod kay mapinairon hi Jehova, natural ha mga tawo nga magin interesado ha kaopayan han iba. Bisan adton diri nakilala ha tinuod nga Dios kasagaran na Gen. 1:27) Damu nga tawohan ha Biblia an nagpakita hin pagpaid. Hunahunaa an asoy mahitungod han duha nga hostes nga babaye nga nag-aaway ha atubangan ni Solomon; pariho hira nag-aangkon nga nanay han usa nga bata. Han ginsarihan hira ni Solomon pinaagi ha pagsugo nga tungaon an bata, nalooy an tinuod nga nanay. Nagpagios ito ha tinuod nga nanay nga ihatag na la an bata ha usa nga babaye. (1 Hadi 3:23-27) Hunahunaa liwat an anak nga babaye han Paraon nga nagtalwas han minasus-an nga hi Moises. Bisan kon maaram hiya nga an minasus-an nga iya nakit-an anak han mga Hebreo ngan sadang patayon, “nalooy hiya ha iya” ngan nagdesisyon nga padakuon an bata sugad nga iya kalugaringon nga anak.—Eks. 2:5, 6.
nga nagpapakita hin pagpaid. (3 Kay ano nga sadang ka magin interesado ha paghisgot mahitungod ha pagpaid? Tungod kay gin-aaghat ka han Biblia nga subaron hi Jehova. (Efe. 5:1) Pero bisan kon an mga tawo ginlarang nga may abilidad nga magpakita hin pagpaid, an aton napanunod nga pagkadiri-hingpit tikang kan Adan nag-aaghat ha aton nga magin makikalugaringon. Usahay bangin nakukurian kita pagdesisyon kon bubuligan ba naton an iba o magpupokus kita ha aton kalugaringon. Para ha pipira, nagkikinahanglan ini hin padayon nga pangalimbasog, o pagin timbang. Ano an makakabulig ha imo nga makultibar an pagpakita hin interes ha iba ngan padayon nga buhaton ito? Siyahan, usisaha kon paonan-o iginpapakita ni Jehova an pagpaid ngan kon paonan-o liwat ito iginpapakita han iba. Ikaduha, tagda kon paonan-o mo masusubad an ehemplo han Dios ngan kon kay ano nga mapulsanon gud an pagbuhat hito.
HI JEHOVA AN PERPEKTO NGA SUSBARANAN HAN PAGPAID
4. (a) Kay ano nga nagsugo hi Jehova hin mga anghel ha Sodoma? (b) Ano an igintututdo ha aton han asoy mahitungod kan Lot ngan han iya mga anak?
4 Mababasa naton ha Biblia an damu nga asoy diin iginpakita ni Jehova an pagpaid. Hunahunaa an ginbuhat han Dios kan Lot. Inin matadong nga tawo “nabido gud” ha mangil-ad nga panggawi han mga umurukoy ha Sodoma ngan Gomorra. Ngani, nagdesisyon an Dios nga takos patayon inin magraot nga mga tawo. (2 Ped. 2:7, 8) An Dios nagsugo hin mga anghel basi talwason hi Lot. Ginsagda nira hiya ngan an iya pamilya nga pumalagiw tikang hito nga mga syudad nga hirani na gud bungkagon. “Kondi hiya naglangan; ngan pinangaptan [han mga anghel] an iya kamot . . . ngan an kamot han iya asawa, ngan an kamot han iya mga anak nga babaye, ha kalooy ni Jehova ha iya: ngan hiya ginkuha nira, ngan ibinutang hiya ha gawas han bungto.” (Gen. 19:16) Diri ba ito nga ehemplo nagpapakita nga maaram gud hi Jehova han magkuri nga kahimtang nga gin-aatubang han iya magtinumanon nga surugoon?—Isa. 63:7-9; San. 5:11; 2 Ped. 2:9.
5. Paonan-o an Pulong han Dios, sugad han 1 Juan 3:17, nabulig ha aton nga magpakita hin pagpaid?
5 Diri la kay iginpapakita ni Jehova an pagpaid, gintututdoan liwat niya an iya katawohan nga importante nga ipakita nira ini nga kalidad. Tagda an balaud nga iginhatag ha Israel may kalabotan ha pagkuha han bado han usa nga tawo sugad nga garantiya hin utang. (Basaha an Eksodo 22:26, 27.) An waray kalooy nga nagpapautang bangin maaghat nga kuhaon an bado han nangutang, nga tungod hito waray na hiya bado ha iya pagkaturog. Pero gintutdoan ni Jehova an iya katawohan nga likyan an sugad nga buhat nga nagpapakita hin kawaray-kalooy. An iya katawohan kinahanglan magin mapinairon. Diri ba kita napapagios nga magin mapinairon sugad han igintututdo ha aton han prinsipyo hini nga balaud? Maiilob ba naton nga pabay-an an aton kabugtoan nga mag-antos han katugnaw, siring pa, kon may mahihimo man kita basi buligan hira?—Col. 3:12; San. 2:15, 16; basaha an 1 Juan 3:17.
6. Ano an aton mahibabaroan ha padayon nga pagtadong ni Jehova ha makasasala nga mga Israelita?
6 Nagpakita hi Jehova hin pagpaid ha mga Israelita bisan kon nakasala hira. Aton mababasa: “Hi Jehova, an Dios han ira mga amay, nagpasogo 2 Kron. 36:15) Diri ba liwat kita sadang magpakita hin pagpaid ha mga tawo nga posible nga magbag-o ha ira makasasala nga pagkinabuhi ngan makakarawat han pag-uyon han Dios? Karuyag ni Jehova nga diri mabungkag an bisan hin-o ha tiarabot nga paghukom. (2 Ped. 3:9) Salit tubtob nga diri pa ginbubungkag han Dios an magraot, padayon naton nga ipasamwak an nagpapahamangno nga mensahe basi magpahimulos an mga tawo han iya pagpaid.
ngadto ha ira pinaagi han iya mga sinogo, nga binmangon ha sayo ngan nagsogo, tungud kay mayada niya pagbati [o, pagpaid] han iya katawohan, ngan han iya lugar nga puroyanan.” (7, 8. Kay ano nga kombinsido an usa nga pamilya nga iginpakita ha ira ni Jehova an iya pagpaid?
7 Damu nga eksperyensya an nagpapamatuod nga an Dios nagpapakita hin pagpaid. Tagda an nahitabo ha pamilya han 12 anyos nga bata nga aton tatawagon nga hi Milan. Temprano han dekada han 1990, nagkaada araway hin mga tribo ha Bosnia. Hi Milan, an iya bugto, an iya mga kag-anak, ngan an damu nga iba pa nga Saksi nagbiyahe sakay hin bus tikang ha Bosnia pakadto ha Serbia basi tumambong hin kombensyon, diin mababawtismohan an iya mga kag-anak. Pag-abot ha may giutan, ginpalusad han mga sundalo an pamilya ni Milan tungod kay iba an ira tribo pero gintugotan an iba nga kabugtoan nga magpadayon ha pagbiyahe. Katapos hin duha ka adlaw nga pagbihag ha pamilya, tumawag an opisyal han mga sundalo ha iya hepe. An opisyal natindog ha atubangan han pamilya, salit nabatian nira an baton han hepe, “Pamusila hira!”
8 Samtang nakikiistorya an opisyal ha iya mga sundalo, duha nga estranghero an dinaop ha pamilya ngan naghuring nga mga Saksi hira. Hinbaroan nira an nahitabo tikang ha iba nga kabugtoan nga sakay han bus. Ginsidngan nira hi Milan ngan an iya bugto nga sumakay ha ira awto basi makatabok ha giutan kay diri gin-uusisa an papeles han kabataan. Ginsidngan hinin duha nga Saksi an mga kag-anak ni Milan nga magbaktas ngadto ha may giutan ngan tatapoon nira hira ha luyo han giutan. Diri maaram hi Milan kon malilipay ba hiya o magtatangis tungod hini nga suhestyon. “Ha iyo hunahuna, basta na la ba kami nira nga palalakton?” nagpakiana an iya mga kag-anak. Pero samtang naglalakat hira pahirayo, baga hin ginkikinitaan la hira han mga sundalo. Nagkirigta utro an pamilya ha luyo han giutan. Nagpadayon hira pagbiyahe pakadto ha lugar han kombensyon, ngan kombinsido hira nga ginbaton ni Jehova an ira sinsero nga pag-ampo para hin bulig. Hinbaroan naton ha Biblia nga diri pirme direkta nga ginpapanalipdan ni Jehova an iya mga surugoon. (Buh. 7:58-60) Pero hi Milan nagpahayag han iya inabat hito nga higayon. Hiya nagsiring, “Baga hin ginbuta han mga anghel an mga sundalo ngan gintalwas kami ni Jehova.”—Sal. 97:10.
9. Ano an inabat ni Jesus han nakita niya an kahimtang han damu nga tawo nga nagsinunod ha iya? (Kitaa an retrato ha tinikangan hini nga artikulo.)
9 Mahibabaro kita hin leksyon tikang ha ehemplo ni Jesus. Nalooy hiya han nakita niya an damu nga tawo “kay sugad hira hin gin-anitan ngan ginpabay-an nga mga karnero nga waray paraataman.” Salit ano an iya ginbuhat tungod han ira makalolooy nga kahimtang? “Damu an iya igintutdo ha ira.” (Mat. 9:36; basaha an Marcos 6:34.) Daku gud an iya kaibahan ha mga Pariseo nga waray kalooy ngan waray hingyap nga buligan an ordinaryo nga mga tawo. (Mat. 12:9-14; 23:4; Juan 7:49) Pariho kan Jesus, hingyap mo gud ba liwat nga pakaunon an mga tawo nga nagugutom ha espirituwal?
10, 11. Angayan ba nga ipakita pirme an pagpaid? Isaysay.
10 Diri ini nagpapasabot nga kinahanglan naton ipakita an pagpaid ha ngatanan nga sitwasyon. Ha mga ehemplo ha Biblia nga gin-unabi pa la, iginpakita han Dios an angayan nga kalooy o pagpaid. Pero ha asoy mahitungod kan Hadi Saul, an ginbuhat ni Saul nga bangin iya ginhunahuna nga pagpakita hin kalooy gintagad han Dios nga pagin diri masinugtanon. Waray pataya ni Saul hi Agag, 1 Sam. 15:3, 9, 15) Syempre, hi Jehova an matadong nga Hukom. Nababasa niya an kasingkasing han tawo, ngan maaram hiya kon san-o diri angayan magpakita hin kalooy. (Pagta. 2:17; Esek. 5:11) Diri na mag-iiha, huhukman niya an ngatanan nga diri nasugot ha iya. (2 Tes. 1:6-10) Diri na ito an panahon nga malolooy hiya ha mga tawo nga iya na ginhukman nga maraot. Lugod, an pagpoo ha ira angayan nga kapahayagan han pagpaid han Dios ha mga magtadong nga iya tatalwason.
an kaaway han katawohan han Dios, ngan waray liwat niya pataya an gimaopayi han mga hayop. Tungod hini, iginsalikway ni Jehova hi Saul sugad nga hadi han Israel. (11 Matin-aw nga waray kita katungod ha paghukom kon hin-o an sadang bungkagon o talwason. Lugod, sadang naton buhaton an aton bug-os nga mahihimo yana basi buligan an mga tawo. Salit paonan-o naton maipapakita ha praktikal nga mga paagi an angayan nga pagpaid ha aton igkasi-tawo? Tagda an pipira nga suhestyon.
PAGKULTIBAR NGAN PAGPAKITA HIN ANGAYAN NGA PAGPAID
12. Paonan-o mo maipapakita an pagin mapinairon ha paagi han imo pagtratar ha iba?
12 Magin mabinuligon. An pagpakita hin pagpaid ha aton igkasi-tawo ngan ha aton igkasi-Kristiano importante gud para hadton nangangalimbasog pagsubad kan Jesus. (Juan 13:34, 35; 1 Ped. 3:8) Usa nga kahulogan han pagpaid amo an “pag-antos nga magkaupod.” An usa nga nagpapakita hin pagpaid napapagios nga buligan an mga nag-aantos. Pamiling hin higayon ha pagbuhat hito! Pananglitan, mahimo mo ba buligan an usa pinaagi ha pagbuhat han iya mga trabahoon ha balay o han iya gin-aalayon ha imo?—Mat. 7:12.
Ipakita an pagpaid pinaagi ha paghatag hin praktikal nga bulig ha iba (Kitaa an parapo 12)
13. Ano nga mga kalidad han katawohan han Dios an labi nga nakikita kon may mga kalamidad?
13 Pagboluntaryo kon may kalamidad. An mga pag-antos hadton mga naapektohan hin kalamidad nagpapagios ha damu nga magpakita hin pagpaid. An katawohan ni Jehova kilala nga andam bumulig ha sugad nga mga kahimtang. (1 Ped. 2:17) Pananglitan, usa nga sister ha Japan an naukoy ha lugar nga nadaot gud han linog ngan tsunami han 2011. Hiya nagsiring nga “nadasig ngan naliaw gud” hiya ha pangalimbasog han damu nga boluntaryo tikang ha iba-iba nga dapit han Japan ngan ha iba nga nasud nga binulig ha pag-ayad hin mga balay ngan Kingdom Hall. Hiya nagsurat: “Ini nga eksperyensya nakabulig ha akon nga masantop nga interesado gud hi Jehova ha akon kaopayan. Ngan an mga igkasi-Saksi nagtatagad ha kada tagsa. Damu nga kabugtoan ha bug-os nga kalibotan an nag-aampo para ha amon.”
14. Paonan-o mo mahimo mabuligan an mga may sakit ngan an mga edaran?
14 Buligi an mga may sakit ngan an mga edaran. Kon nakikita naton nga nag-aantos an iba tungod han epekto han sala nga aton napanunod kan Adan, napapagios gud kita nga magin mapinairon. Ginhihingyap gud naton an panahon nga waray na sakit ngan kalagas. Salit igin-aampo naton nga umabot na an Ginhadian han Dios. Samtang waray pa ito, ginbubuhat naton an ngatanan basi buligan adton mga nanginginahanglan. Tagda an iginsurat han usa nga awtor mahitungod han iya lagas na nga nanay, nga may sakit nga Alzheimer. Usa ka adlaw, nagkahugaw an bado han iya nanay. Samtang ginlilimpyohan han nanay an iya bado, may nag-doorbell. An iya mga bisita amo an duha nga Saksi nga regular nga nabisita ha iya. Ginpakianhan hiya han mga sister kon ano an ira maibubulig ha iya. “Makaarawod man pero sige, mapabulig ako,” binaton hiya. Ginbuligan hiya han mga sister nga makaglimpyo. Katapos, gintimplahan nira hiya hin semente ngan nag-uroistorya. Mapasalamaton gud an iya anak. “Bilib gud ako hini nga mga Saksi,” an anak nagsurat. “Ginbubuhat nira an ira igintututdo.” An imo ba pagpaid ha mga may sakit ngan mga edaran nagpapagios ha imo nga buhaton an ngatanan mo nga mahihimo basi buligan hira ha ira mga pag-antos?—Fil. 2:3, 4.
15. Ano an daku nga naibubulig ha iba han aton pagsangyaw nga buruhaton?
15 Buligi an mga tawo ha espirituwal. An mga problema ngan kabaraka han mga tawo nagpapagios ha aton nga buligan hira ha espirituwal. An pinakamaopay nga paagi nga mahihimo naton ito amo an pagtutdo ha ira mahitungod ha Dios ngan kon ano an bubuhaton han iya Ginhadian para ha katawohan. An usa pa nga paagi amo an pagbulig ha ira nga makita an kapulsanan han pagkinabuhi uyon ha mga suruklan han Dios. (Isa. 48:17, 18) Mahimo mo ba dugangan an imo panahon ha pagministeryo, usa nga buruhaton nga nagpapasidungog gud kan Jehova ngan nagpapakita han imo pagpaid ha iba?—1 Tim. 2:3, 4.
AN PAGPAID MAPULSANON LIWAT HA IMO!
16. Paonan-o kita nagpapahimulos kon mapinairon kita?
16 An mga eksperto may kalabotan ha kahimsog ha panhunahuna nagsiring nga an usa nga mapinairon nagkakaada mas maopay nga kahimsog ngan relasyon ha iba. Kon ginbubuligan mo an iba ha ira mga pag-antos, nagigin mas malipayon ka, mas positibo, diri sobra nga naabat hin kamingaw, ngan diri sobra nga naghihinunahuna hin negatibo. Oo, ikaw mismo magpapahimulos ha imo pagin mapinairon. (Efe. 4:31, 32) An mga Kristiano nga mahigugmaon nga nabulig ha iba nagkakaada maopay nga konsensya, kay maaram hira nga an ira ginbubuhat uyon ha mga prinsipyo han Dios. An pagkaada han sugad nga disposisyon mabulig ha aton nga magin mas mahigugmaon nga kag-anak, mas maopay nga asawa o bana, ngan mas maopay nga sangkay. An mga mapinairon kasagaran na nga nakakakarawat liwat hin bulig kon ginkikinahanglan nira ito.—Basaha an Mateo 5:7; Lucas 6:38.
17. Kay ano nga karuyag mo kultibaron ngan ipakita an pagpaid?
17 Bisan kon mapulsanon ha imo an pagin mapinairon, diri ito an sadang magin nangunguna nga rason ha pagkultibar hito. An imo sadang magin pinakaimportante nga rason amo an imo hingyap nga subaron ngan himayaon an Surok han gugma ngan pagpaid, hi Jehova nga Dios. (Prob. 14:31) Iginpapakita niya ha aton an iya perpekto nga susbaranan. Salit hinaot buhaton naton an ngatanan naton nga mahihimo ha pagsubad ha Dios pinaagi ha pagin mapinairon. Kon bubuhaton naton ito, magigin duok kita ha aton kabugtoan ngan magkakaada kita maopay nga relasyon ha aton igkasi-tawo.—Gal. 6:10; 1 Juan 4:16.