1. Ano nga importante nga topiko an ginhisgotan ni Jesus ha iya ultimo nga gab-i kaupod an iya mga disipulo?

HA ULTIMO nga gab-i ni Jesus kaupod an iya mga disipulo, gin-unabi niya an gugma hin haros 30 ka beses. Espisipiko nga ginsiring niya nga an iya mga disipulo sadang “maghigugmaay.” (Juan 15:12, 17) An ira gugma ha usa kag usa magigin talagsahon gud, salit klaro nga makikita han mga tawo nga hira an iya tinuod nga mga sumurunod. (Juan 13:34, 35) Ini nga gugma diri kay pag-abat o emosyon la. An gin-uunabi ni Jesus amo an usa nga maopay gud nga kalidad​—an gugma nga andam magsakripisyo. Hiya nagsiring: “Waray na malabaw ha gugma han usa nga naghahatag han iya kalag para ha iya kasangkayan. Kasangkayan ko kamo kon ginbubuhat niyo an iginsusugo ko ha iyo.”​—Juan 15:13, 14.

2. (a) Ha ano kilala an mga surugoon han Dios yana? (b) Ano nga mga pakiana an aton hihisgotan hini nga artikulo?

² An mga surugoon ni Jehova yana kilala tungod han ira tinuod ngan nagsasakripisyo nga gugma ngan marig-on nga pagkaurosa. (1 Juan 3:10, 11) Mapasalamaton gud kita nga an sugad-Kristo nga gugma klaro nga nakikita ha mga surugoon ni Jehova anoman an ira nasyonalidad, tribo, linggwahe, o kultura! Pero bangin makagpakiana  kita: ‘Kay ano nga importante gud yana an gugma? Paonan-o kita ginpaparig-on ni Jehova ngan ni Jesus pinaagi han gugma? Paonan-o naton maipapakita an sugad-Kristo nga gugma nga “nagpaparig-on”?’​—1 Cor. 8:1.

3. Paonan-o inin “peligroso gud nga mga panahon” nakakaapekto ha mga tawo?

³ Tungod kay ‘puno hin kasamok, ngan kagul-anan’ an pagkinabuhi durante hinin “peligroso gud nga mga panahon,” damu nga tawo an nag-aantos hin kasubo ha iba-iba nga sukol. (Sal. 90:10, Maupay nga Sumat; 2 Tim. 3:1-5) Damu nga tawo an nawawarayan na gana nga mabuhi. Ginbabanabana nga kada tuig, sobra 800,000 an namamatay tungod ha pag-unay​—usa ha kada 40 ka segundo. Makasurubo, bisan an pipira nga Kristiano nadaog han sugad nga mga pagbati ngan nag-unay.

4. Hin-o nga mga tawohan ha Biblia an naghingyap nga mamatay na la?

⁴ Ha panahon han Biblia, may matinumanon nga mga surugoon han Dios nga umabat nga diri na gud nira kaya an ira kahimtang salit naghingyap hira nga mamatay na la. Pananglitan, tungod han duro nga kasakit ni Job, hiya nagsiring: “Diri na ako makakaantos. Ginugul-an na ako hini nga kinabuhi.” (Job 7:16; 14:13; Maupay nga Sumat) Sugad man, nanluya gud hi Jonas kay waray mahitabo an iya ginlalaoman may kalabotan ha iya toka, salit hiya nagsiring: “Busa yana, O Jehova, ako nangangamaya ha imo, kuhaa an akon kinabuhi tikang ha akon, kay maoroopay para ha akon an kamatayon kay han kabuhi.” (Jon. 4:3) Makausa, inabat liwat an matinumanon nga propeta nga hi Elias nga waray na paglaom nga magbag-o an iya sitwasyon, nga tungod hito naghangyo hiya nga mamatay na la. Hiya nagsiring: “Igo na; yana, O Jehova, kuhaa an akon kinabuhi.” (1 Hadi 19:4) Pero hinigugma gud ni Jehova inin maunungon niya nga mga surugoon ngan karuyag niya nga padayon hira nga mabuhi. Imbes nga masina ha ira tungod han ira inabat, ginbuligan lugod niya hira nga mawara an ira hingyap nga mamatay ngan ginparig-on hira pinaagi han gugma basi padayon hira nga makag-alagad ha iya nga matinumanon.

5. Kay ano nga kinahanglan gud yana han kabugtoan an aton gugma?

⁵ Bisan kon bangin diri inaabat han kabugtoan nga diri na nira kaya an ira sitwasyon, damu an naatubang yana hin magkuri nga problema ngan kinahanglan parig-unon pinaagi han gugma. An pipira gintitimaraot ngan gintatamay. An iba ginpapakaraot o ginlilibak ha ira gintatrabahoan. O ginkakapoy gud hira tungod ha pag-inobertaym ha trabaho o tungod ha paglinanat han ira mga deadline. Samtang an iba naatubang hin nakakapanluya nga mga problema ha pamilya, bangin ginkukontra hira han ira diri Saksi nga padis. Tungod hini ngan han iba pa nga mga problema, damu ha kongregasyon an nanluluya ha pisikal ngan ha emosyonal. Hin-o an makakabulig ha ira?

6. Paonan-o ginpaparig-on ni Jehova an iya mga surugoon pinaagi han iya gugma?

⁶ Ginpaparig-on ni Jehova an iya mga magsiringba pinaagi ha pagpasarig ha ira han iya diri napapas nga gugma. Sigurado nga naparig-on gud an matinumanon nga mga Israelita han ginsidngan hira ni Jehova: “Ikaw nabirilhon ha akon paniplatan, ngan nadungganan, ngan ako nahagugma ha imo; . . . Ayaw kahadluk; kay ako upud ha imo”! (Isa. 43:4, 5) Sugad nga surugoon ni Jehova, makakasiguro ka nga hinigugma ka gud niya. * An Pulong han Dios nagpapasarig ha mga nasuporta ha putli nga pagsingba nga hi Jehova ‘usa nga kusgan nga magluluwas; hiya magmamasadya dida ha ira ha kahimongaya.’​—Sep. 3:16, 17.

7. Ha ano nga paagi an gugma ni Jehova pariho ha usa nga nanay nga may minasus-an? (Kitaa an retrato ha tinikangan hini nga artikulo.)

 ⁷ Anoman nga problema an atubangon han katawohan ni Jehova, nagsasaad hiya nga papakusgon ngan liliawon niya hira. “Masusugad kamo hin minasus-an nga ginpapasuso han iroy niya, nga iya kinukugos ngan gin-uugayan hin gugma. Pagliliawon ko kamo . . . sugad hin usa nga iroy nga nagliliaw han iya anak.” (Isa. 66:12, 13, Maupay nga Sumat) Makaparig-on gud ini nga paghulagway​—usa nga mahigugmaon nga nanay nga nagkukugos o nag-uugay han iya minasus-an! Pinaagi hini, iginpapakita ni Jehova nga hinigugma gud niya an iya mga magsiringba ngan karuyag niya nga abaton nira nga talwas hira. Sarig nga presyoso ka gud kan Jehova ngan hinigugma ka niya.​—Jer. 31:3.

8, 9. Paonan-o an gugma ni Jesus makakaparig-on ha aton?

⁸ Ini an usa pa nga rason nga nagpapamatuod han gugma han Dios ha aton: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Daku liwat nga gugma an iginpakita ni Jesus han iginhatag niya an iya kinabuhi para ha aton! Ngan ito nga gugma nagpaparig-on gud ha aton! An Pulong han Dios nagsasaad nga bisan an kakurian o kasakitan diri “makakagbulag ha aton tikang ha gugma han Kristo.”​—Roma 8:35, 38, 39.

⁹ Kon naatubang kita hin mga problema nga nakakapaluya ha aton ha pisikal, emosyonal, o espirituwal, an daku nga gugma han Kristo makakahatag ha aton hin kusog nga makapailob. (Basaha an 2 Corinto 5:14, 15.) An gugma ni Jesus may gahum ha pagparig-on ha aton ngan pag-aghat ha aton nga diri umundang bisan pa han mga pagsari sugad han mga kalamidad, pagtimaraot, kapakyasan, o mga kabaraka.

10, 11. Hin-o an may responsabilidad ha pagparig-on ha kabugtoan nga nanluluya? Isaysay.

¹⁰ Ginagamit liwat ni Jehova an Kristiano nga kongregasyon basi parig-unon kita pinaagi han iya gugma. Mahimo subaron han tagsa ha aton an iya gugma pinaagi ha paghigugma ngan pagparig-on ha aton mga igkasi-tumuroo, diri la ha espirituwal kondi pati ha emosyonal. (1 Juan 4:19-21) Gin-aghat ni apostol Pablo an mga Kristiano: “Padayon nga magdinasigay ngan magparig-onay kamo sugad han ginbubuhat na niyo.” (1 Tes. 5:11) Oo, an ngatanan ha kongregasyon ​—diri la mga tigurang—​mahimo magsubad kan Jehova ngan kan Jesus ha pagliaw ngan pagparig-on ha kabugtoan.​—Basaha an Roma 15:1, 2.

¹¹ An pipira nga kabugtoan nga nag-aantos hin depresyon bangin kinahanglan magpakonsulta ha doktor ngan magpatambal. (Luc. 5:31) Maaram an mga tigurang ngan an iba pa nga kabugtoan ha kongregasyon nga diri hira mga doktor. Pero may-ada hira importante gud nga papel​—an ‘pagliaw ha mga nasusubo, pagbulig ha mga maluya, ngan pagpasensya ha ngatanan.’ (1 Tes. 5:14) An ngatanan nga Kristiano kinahanglan magpakita hin empatiya ngan magin mapailubon ha mga nanluluya pinaagi ha pagyakan hin nakakaliaw nga mga pulong basi maparig-on hira. Nangangalimbasog ka ba nga liawon ngan parig-unon an iba? Magigin mas epektibo ka ha pagbuhat hito kon maaram ka kon paonan-o ihahatag an sugad nga bulig.

12. Pag-unabi hin ehemplo kon paonan-o an usa nga bugto naparig-on han gugma han kabugtoan ha ira kongregasyon.

¹² Paonan-o an aton gugma magpaparig-on ha mga nag-aantos hin duro nga kasubo? “Usahay, nahuhunahuna ko nga mag-unay,” siring han usa nga sister nga taga-Europa. “Pero damu an andam bumulig ha akon. Gintalwas ako han kabugtoan ha amon kongregasyon. Mahigugmaon ngan makaparig-on gud hira. Bisan kon pipira la an maaram nga may depresyon ako, an kongregasyon andam pirme bumulig ha akon. Usa nga mag-asawa an nagin mga kag-anak ko ha espirituwal. Gin-ataman gud nira ako, ngan pirme hira aada para ha akon 24 ka oras kada adlaw.” Syempre, diri ngatanan makakabulig ha parapriho nga paagi. Pero an aton sinsero nga bulig mahimo magkaada daku nga epekto ha mga nag-aantos hin duro nga kasubo. *

13. Ano an kinahanglan naton buhaton kon karuyag naton maparig-on an iba?

¹³ Magin maopay nga parapamati. (San. 1:19) An pagpamati nga may empatiya kapahayagan han gugma. Mahimo ka magbangon hin mga pakiana ha mataktika ngan buotan nga paagi nga mabulig ha imo nga masabtan an inaabat han usa nga nag-aantos. Hito nga paagi, maipapakita mo an empatiya ngan mapaparig-on mo an imo igkasi-tumuroo. Ipakita an imo sinsero nga pagpaid ngan gugma pinaagi ha ekspresyon han imo nawong. Kon karuyag niya isaysay hin mas detalyado an iya inaabat, magin mapailubon ngan ayaw pagsagbang. Kon mamamati ka hin mapailubon, posible nga mas masabtan mo an iya inaabat. Makakabulig ito nga magkaada pagtapod ha imo an nag-aantos nga bugto ngan mas maaaghat hiya nga pamatian an imo ginsisiring samtang nangangalimbasog ka nga parig-unon hiya. Kon iginpapakita mo nga tinuod ka nga napaid, makakaliaw gud ito ha iya.

14. Kay ano nga karuyag naton likyan an pagin kritiko?

¹⁴ Likyi an pagin kritiko. Kon inaabat han usa nga nadidepres nga nakapokus kita ha iya mga sayop, makakadugang la ito han iya kasubo ngan magigin diri epektibo an aton pangalimbasog nga parig-unon hiya. “Mayada hadton nagyayakan hin waray pangalam-agam nga sugad hin nadulot nga kampilan; kondi an dila han makinaadmanon amo an kaopayan ha lawas.” (Prob. 12:18) Syempre, diri naton gintutuyo nga magyakan hin nakakasakit ha usa nga nadidepres. Pero bisan kon an usa nga indibiduwal diri tinuyo nga nayaknan hin nakakasakit, mahimo ito makapasubo gud ha iya. Basi maparig-on an iba pinaagi han gugma, kinahanglan naton ipakita an empatiya​—ibutang an aton kalugaringon ha iya sitwasyon basi masabtan an iya inaabat.​—Mat. 7:12.

15. Ano an usa nga mapulsanon nga garamiton nga magagamit naton ha pagparig-on ha iba?

 ¹⁵ Liawa an iba gamit an Pulong han Dios. (Basaha an Roma 15:4, 5.) An Biblia usa gud nga surok han pagliaw. Tikang ito ha “Dios nga nagliliaw ngan nabulig ha aton basi makailob.” Labot la ha nakakaliaw nga mga teksto, damu liwat an aton garamiton ha pag-aram ha Biblia. Mahimo naton gamiton an Watch Tower Publications Index ngan an Giya ha Pagsaliksik Para ha Mga Saksi ni Jehova. Mabulig ini ha aton nga makabiling hin makaparig-on nga mga teksto ngan mga publikasyon nga makakabulig nga malamposan an iba-iba nga problema. Ini nga mga garamiton makakabulig ha aton nga magin mas epektibo ha pagliaw ngan pagparig-on ha iba.

16. Ano nga mga kalidad an aton ginkikinahanglan kon ginpaparig-on naton an usa nga Kristiano nga nasusubo gud?

¹⁶ Magin mapinairon ngan malumo. Presyoso ini nga mga bahin han diri makikalugaringon nga gugma nga aton iginpapakita kon ginpaparig-on naton an iba. Hi Jehova “an Amay han mahigugmaon nga kalooy ngan an Dios han ngatanan nga pagliaw,” ngan may-ada hiya “mahigugmaon nga kalooy” ha iya mga surugoon. (Basaha an 2 Corinto 1:3-6; Luc. 1:78; Roma 15:13) Hi Pablo nagpakita hin maopay nga susbaranan may kalabotan hini, hiya nagsurat: “Gintratar namon kamo ha malumo nga paagi, sugad hin nagpapasuso nga iroy nga mahigugmaon nga nagmamangno ha iya mga anak. Salit tungod kay pinalangga namon kamo, nalipay kami nga ipaangbit ha iyo diri la an maopay nga sumat han Dios kondi pati an amon mga kalag, kay hinigugma gud namon kamo.” (1 Tes. 2:7, 8) Kon iginpapakita naton an pagin mapinairon ngan pagin malumo pariho kan Jehova, mahimo kita magin baton ha mga pag-ampo han usa nga nasusubo gud.

17. Ano nga reyalistiko nga panhunahuna an mabulig ha aton basi maparig-on naton an kabugtoan?

¹⁷ Ayaw hunahunaa nga perpekto an imo kabugtoan. Magin makatadunganon ha imo mga ginlalaoman ha ira. An paghunahuna nga diri magsasayop an kabugtoan diri reyalistiko ngan makakapasubo la ha imo. (Ekles. 7:21, 22) Tigamni nga makatadunganon hi Jehova ha iya mga ginlalaoman ha iya mga surugoon. Kon susubaron naton hiya, magigin mapailubon kita ha mga kaluyahan han iba. (Efe. 4:2, 32) Imbes nga ipakita ha ira nga baga hin kulang pa an ira nahihimo, pangalimbasog nga kumendasyonan hira ha ira mag-opay nga ginbubuhat. Mahimo ito magparig-on ha ira. An sinsero nga kumendasyon mahimo magparig-on ha iba ngan makabulig ha ira nga magkaada “hinungdan nga malipay” ha ira sagrado nga pag-alagad. Mas maopay gud kon ito an aton bubuhaton imbes nga ikompara naton hira ha iba.​—Gal. 6:4.

18. Kay ano nga karuyag naton parig-unon an iba pinaagi han gugma?

¹⁸ An tagsa nga surugoon ni Jehova presyoso gud ha iya ngan kan Jesus, nga naghatag han iya kalugaringon sugad nga lukat. (Gal. 2:20) Hinigugma gud naton an kabugtoan. Ngan karuyag naton nga trataron hira ha mapinairon ngan mahigugmaon nga paagi. Basi magin nakakarepresko ha ira, kinahanglan “pangalimbasogan naton an mga butang nga nag-aaghat hin kamurayawan ngan nagpaparig-on ha kada tagsa.” (Roma 14:19) Ginpapamulat gud naton an panahon, ha tiarabot nga Paraiso, diin waray na gud kita hinungdan nga masubo! Mawawara na an sakit, girra, kamatayon, pagtimaraot, problema ha pamilya, ngan kasub-anan. Katapos han Milenyo, perpekto na an mga tawo. Adton magpapabilin nga matinumanon ha ultimo nga pagsari aampunon sugad nga tunan-on nga mga anak ni Jehova nga Dios ngan magkakaada “han mahimayaon nga kagawasan han iya mga anak.” (Roma 8:21) Hinaot padayon naton nga ipakita an gugma nga nagpaparig-on ngan buligan an usa kag usa nga magkaada hiton makalilipay ngan makapatagbaw nga balos.