HA BUG-OS nga kalibotan, ginpapabilhan han mga tigurang an ira mga pribilehiyo ha pag-alagad para ha katawohan han Dios. Bendisyon gud hira ha aton ngatanan! Pero diri pa la maiha, may pagbag-o nga ginhimo. An lagas na nga mga tigurang ginhangyo nga ipasa an pipira han ira magbug-at nga responsabilidad ha burobata nga mga tigurang. Paonan-o?

Hinin bag-o nga kahikayan, an mga paramangno han sirkito ngan mga instruktor ha teokratiko nga mga eskwelahan maundang hito nga mga pribilehiyo kon 70 anyos na hira. Sugad man, ipapasa han mga tigurang nga 80 anyos na an pipira han ira mga toka ha burobata nga mga tigurang, sugad han pagin koordinetor han Komite han Sanga o han lawas han mga tigurang ha lokal nga kongregasyon. Ano an reaksyon han hinigugma nga lagas nga mga tigurang hini nga pagbag-o? Iginpapakita nira an pagin maunungon kan Jehova ngan ha iya organisasyon!

“Nauyon gud ako hito nga desisyon,” siring ni Ken, nga nag-alagad sugad nga koordinetor han usa nga Komite han Sanga hin haros 49 ka tuig. “Ngani, han aga nga hinbaroan ko ito, nag-ampo ako kan Jehova, iginsumat ko ha iya nga kinahanglan hin burobata nga brother nga mag-aalagad sugad nga koordinetor.”  Ito liwat an inabat han iba pa nga matinumanon nga lagas nga kabugtoan ha bug-os nga kalibotan. Syempre, nasubo hira ha tinikangan kay karuyag gud nira nga magserbi ha ira kabugtoan.

“Medyo nasubo ako hito,” siring ni Esperandio, nga koordinetor han lawas han mga tigurang ha ira kongregasyon. Pero hiya nagsiring, “Kinahanglan ko hin mas daku nga panahon ha pag-ataman han akon nagtitikaluya nga kahimsog.” Sugad han aton ginlalaoman, hi Esperandio padayon nga nag-aalagad nga matinumanon kan Jehova ngan bendisyon hiya ha ira kongregasyon.

Kumusta man an mag-iha na nga nagbibiyahe nga mga paramangno nga nagkaada iba nga pribilehiyo ha pag-alagad? Hi Allan, nga nag-alagad sugad nga nagbibiyahe nga paramangno ha sulod hin 38 ka tuig, nagsiring, “Han hinbaroan ko an mahitungod hito, diri ako makatoo.” Bisan pa hito, nasantop niya an mga kapulsanan han pagbansay ha burobata nga kalalakin-an para ha buruhaton ni Jehova, ngan padayon hiya nga nag-aalagad nga matinumanon.

Hi Russell, nga nag-alagad sugad nga nagbibiyahe nga paramangno ngan instruktor ha teokratiko nga mga eskwelahan ha sulod hin 40 ka tuig, nagsiring nga ha tinikangan nasubo hiya ngan an iya asawa. “Ginpapabilhan gud namon an amon pribilehiyo ngan inabat namon nga kaya pa namon magpadayon ha amon toka.” Yana, ginagamit ni Russell ngan han iya asawa an ira mga hinbaroan ngan eksperyensya ha lokal nga kongregasyon, ngan nalilipay gud an mga magwarali nga kaupod nira ha pag-alagad.

Bisan kon waray mo pa maeksperyensyahi an gin-abat han mga indibiduwal nga gin-unabi na, an asoy ha 2 Samuel mahimo makabulig ha imo nga masabtan an inaabat hadton nakakaeksperyensya hito.

Hunahunaa an panahon nga nagrebelde an anak ni Hadi David nga hi Absalom. Pinalagiw hi David tikang ha Jerusalem ngadto ha Mahanaim, ha este han Salog Jordan. Didto, hi David ngan an iya mga kaupod nagkinahanglan hin pagkaon ngan iba pa nga ira panginahanglan. Nahinunumdoman mo ba kon ano an nahitabo?

Tulo nga lalaki an naghatag ha ira hin mga higdaan, iba-iba nga klase hin pagkaon, ngan mga garamiton. Usa ha ira hi Barsilyay. (2 Sam. 17:27-29) Han natapos an pagrebelde ni Absalom, puydi na makabalik hi David ha Jerusalem, ngan gin-updan hiya ni Barsilyay ngadto ha Jordan. Gin-aghat hiya ni David nga umupod ngadto ha Jerusalem. Ginsidngan hiya ni David nga susuplayan hiya hin pagkaon sugad nga balos ha iya bisan kon “daku [o, riko] nga pagkatawo” hi Barsilyay ngan diri na nagkikinahanglan han pagkaon nga igintatanyag ha iya. (2 Sam. 19:31-33) Pero posible gud nga naruyagan ni David an mag-opay nga kalidad ni Barsilyay ngan karuyag niya magpahimulos han mag-opay nga sagdon nga maihahatag ni Barsilyay. Daku gud unta nga pribilehiyo nga umukoy ngan magtrabaho ha palasyo han hadi!

Tungod kay makatadunganon ngan mapainubsanon hi Barsilyay, hiya nagsiring nga 80 anyos na hiya. Katapos hiya dugang nga nagsiring: “Makakagsumat pa ba ako han kalainan han maopay ngan han maraot?” Ano an iya karuyag sidngon? Sigurado nga nagkaada hiya kinaadman durante han iya hilawig nga  kinabuhi. Ngan makakaghatag pa hiya hin maopay nga sagdon, pariho han ginbuhat han “mga tigurang” kan Hadi Rehoboam. (1 Hadi 12:6, 7; Sal. 92:12-14; Prob. 16:31) Salit an ginsiring ni Barsilyay mahitungod ha paghibaro han kalainan han maopay ngan han maraot posible nga nagtutudlok han iya pisikal nga mga limitasyon kay lagas na hiya. Hiya nagsiring nga apektado na an iya panrasa ngan pagpamati tungod han kalagas. (Ekles. 12:4, 5) Salit kinaburut-on nga gin-aghat niya hi David nga an burobata nga lalaki nga hi Kimaam, nga posible anak ni Barsilyay, an iupod ha Jerusalem.​—2 Sam. 19:35-40.

An bag-o nga kahikayan nga gin-unabi ha tinikangan nagpapakita han disposisyon nga pariho han iginpakita ni Barsilyay. Yana, makatadunganon la nga ikonsiderar naton diri la an kahimtang ngan abilidad han usa, pariho han kahimtang ni Barsilyay. Kinahanglan ikonsiderar naton kon ano an makakaopay ha matinumanon nga mga tigurang ha bug-os nga kalibotan.

Nasasabtan hinin mapainubsanon nga lagas nga mga Kristiano nga mapaparig-on an nag-uuswag nga organisasyon ni Jehova kon an maiha na nira nga mga toka aasikasuhon han burobata nga mga brother. Kasagaran na, an lagas nga mga brother an nagbabansay ha burobata nga mga brother, sugad han posible nga ginbuhat ni Barsilyay ha iya anak ngan ni apostol Pablo kan Timoteo. (1 Cor. 4:17; Fil. 2:20-22) Ginpapamatud-an hinin burobata nga mga brother nga “regalo nga kalalakin-an” na hira yana ngan makakabulig hira ha ‘pagparig-on han lawas han Kristo.’​—Efe. 4:8-12; itanding an Numeros 11:16, 17, 29.

Ha bug-os nga kalibotan, damu nga lagas nga brother nga nagpasa han ira pipira nga responsabilidad ha burobata nga mga brother an nagpapahimulos han bag-o o iba-iba nga oportunidad ha pagsuporta ha buruhaton ni Jehova.

“Tungod han akon bag-o nga kahimtang, nagkaada na ako higayon nga mabuligan an diri Saksi nga bana han mga sister ha amon kongregasyon,” siring ni Marco, nga 19 ka tuig nga nag-alagad sugad nga nagbibiyahe nga paramangno.

“An amon bag-o nga mga tumong nag-uupod han pagbulig ha mga diri-aktibo ngan pagdumara hin mas damu nga Bible study,” siring ni Geraldo, nga nagin nagbibiyahe nga paramangno ha sulod hin 28 ka tuig. Hiya nagsiring nga ha pagkayana hira nga mag-asawa may-ada 15 nga gindudumarahan hin pag-aram ha Biblia ngan damu nga diri-aktibo nga kabugtoan an natambong na yana ha mga katirok.

Hi Allan, nga gin-unabi kanina, nagsiring: “Mas daku na nga panahon an amon nagagamit yana ha pagsuporta ha iba pa nga klase han pagsangyaw nga buruhaton. Nalilipay kami ha pagsangyaw ha publiko, ha mga lugar han negosyo, ngan ha amon mga amyaw, diin duha ha ira an natambong na ha Kingdom Hall.”

Kon usa ka nga maunungon ngan may kapas nga lagas nga brother ngan nagkaada ka bag-o nga pribilehiyo ha pag-alagad, may iba pa nga espesyal nga paagi nga mahimo ka makabulig. Mahimo mo suportaran an buruhaton ni Jehova pinaagi ha pagtutdo ha burobata nga mga brother ha kongregasyon han imo birilhon nga mga eksperyensya. “Ginagamit ni Jehova an hamtong ha espirituwal ngan may kapas nga burobata nga mga brother,” siring ni Russell, nga gin-unabi kanina. “An kabugtoan nagpapahimulos ha ira madasigon nga pagtutdo ngan pag-shepherding!”​—Kitaa an kahon nga “ Buligi an Burobata nga Kalalakin-an nga Magamit hin Bug-os an Ira Abilidad.”

Kon bag-o ka la nga nakakarawat hin iba nga pribilehiyo ha pag-alagad, magpabilin nga positibo. Damu na an imo nabuligan tungod han imo kinasingkasing nga pagtuman han imo toka, ngan puydi mo ipadayon an pagbuhat hito. Damu an nahigugma ha imo, ngan sigurado nga padayon ka nira nga hihigugmaon.

Mas importante pa gud, napapalipay mo an kasingkasing ni Jehova. Diri niya ‘kakalimtan an imo mga buhat ngan an gugma nga imo iginpakita para ha iya ngaran, kay nagserbi ka ngan padayon nga nagsiserbi ha mga baraan.’ (Heb. 6:10) Ini nga teksto nagpapasarig ha ngatanan nga ginpapabilhan ni Jehova  bisan an mga nahimo naton hadto. Presyoso ka gud ha iya ngan diri gud niya hingangalimtan an imo mga ginbuhat ngan an imo padayon nga mga pangalimbasog nga lipayon hiya!

Ano man kon waray mabag-o an imo toka sugad han ginhisgotan na? May mahibabaroan ka la gihapon nga leksyon tikang hini. Ano ito?

Kon may kaupod ka yana nga matinumanon nga lagas nga brother nga nagkaada bag-o nga toka, damu an imo mahimo mahibaroan tungod han iya pagin hamtong ngan hilawig nga eksperyensya. Pangaro hin sagdon ngan suhestyon. Ngan obserbari kon paonan-o niya igin-aaplikar an iya eksperyensya ha iya toka yana.

Usa ka man nga lagas nga may bag-o na nga toka o usa nga brother o sister nga nakakapahimulos han bag-o nga kahikayan, hinumdumi pirme nga ginpapabilhan ni Jehova an pagin maunungon hadton maiha na nga nag-aalagad ha iya ngan adton padayon nga nagbubuhat hito.