1. Ano an mahimo magin epekto ha aton han makikalugaringon nga disposisyon han kalibotan?

KAY ano nga diri masayon an pag-aplikar han aton mga nahibabaroan ha Pulong han Dios? Usa nga rason kay an pagbuhat han husto nagkikinahanglan hin pagpaubos, ngan damu an impluwensya nga nagpapakuri ha aton nga magpabilin nga mapainubsanon. Hinin “kataposan nga mga adlaw,” napapalibotan kita hin mga tawo nga “mahigugmaon ha ira la kalugaringon, mahigugmaon ha kwarta, hambog, daku an buot,” ngan “waray pagpugong ha kalugaringon.” (2 Tim. 3:1-3) Kon may maraot nga buhat nga nababantog ngan gindadayaw pa ngani, bangin masina hito nga buhat an usa nga surugoon ni Jehova pero bangin maawa hiya ha mga resulta hito. (Sal. 37:1; 73:3) Bangin maghunahuna pa ngani an usa: ‘May kapulsanan gud ba an akon pag-una han kaopayan han iba kay ha akon kalugaringon? Kon magawi ako “sugad nga ubos,” rirespetuhon pa ba gihapon ako han mga tawo?’ (Luc. 9:48) Kon magpapaimpluwensya kita ha makikalugaringon nga disposisyon hini nga kalibotan, mahimo madaot an aton maopay nga relasyon ha kabugtoan ngan an aton pangirilal-an sugad nga Kristiano. Pero magpapahimulos kita kon pag-aadman naton an mag-opay nga ehemplo  nga gin-uunabi ha Biblia ngan susubaron naton hira.

2. Ano an aton mahibabaroan tikang ha matinumanon nga mga surugoon han Dios hadto?

² Kon karuyag naton subaron an matinumanon nga mga surugoon han Dios hadto, kinahanglan naton usisahon kon ano an ira mga ginbuhat nga nagkaada mag-opay nga resulta. Paonan-o hira nagin sangkay han Dios, nakakarawat han iya pag-uyon, ngan nagkaada kusog ha pagbuhat han iya kaburut-on? An pag-usisa han sugad nga mga butang importante nga bahin han aton pagkaon hin espirituwal nga pagkaon.

3, 4. (a) Paonan-o kita nakakakarawat hin espirituwal nga instruksyon? (b) Kay ano nga masisiring naton nga an espirituwal nga pagkaon diri la basta pagkuha hin kahibaro?

³ Nakakakarawat kita hin damu nga mag-opay nga sagdon ngan pagtutdo pinaagi han Biblia, aton mga publikasyon, aton mga website, JW Broadcasting, ngan mga katirok ngan asembleya. Pero sumala ha ginsiring ni Jesus ha Juan 4:34, an espirituwal nga pagkaon diri la basta pagkuha hin kahibaro. Ano pa an nahiuupod hito? Hi Jesus nagsiring: “An akon pagkaon amo an pagbuhat han kaburut-on han nagsugo ha akon ngan paghuman han iya buruhaton.”

⁴ Para kan Jesus, an espirituwal nga pagkaon nag-uupod ha pagbuhat uyon ha giya han Dios. Ha ano nga paagi pariho ini hin pagkaon? Sugad la nga natatagbaw ngan nagigin mahimsog an aton lawas kon nakaon kita hin masustansya nga pagkaon, nagigin mas marig-on liwat an aton pagtoo kon nagbubuhat kita han kaburut-on han Dios. Pananglitan, nakaeksperyensya ka na ba nga umatender hin katirok para ha pagsangyaw bisan kon diri maopay an imo inaabat pero katapos han sangyaw, inuli ka nga malipayon ngan narepreskohan?

5. Ano an aton mapapahimulosan kon may-ada kita kinaadman?

⁵ Kon ginsusunod naton an mga sugo han Dios, iginpapakita naton nga maaramon kita. (Sal. 107:43) Damu gud an aton mapapahimulosan kon may-ada kita kinaadman. “Waray han mga butang nga imo maoongara mahatatanding ha iya. . . . Hiya an kahoy ha kinabuhi ha ira nga nakaput ha iya: ngan malipayon an tagsatagsa nga magtipig ha iya.” (Prob. 3:13-18) Hi Jesus nagsiring: “Tungod kay maaram na kamo hini, malipayon kamo kon iyo ini buhaton.” (Juan 13:17) Magigin malipayon an mga disipulo kon padayon nira nga bubuhaton an mga iginsugo ni Jesus. An pagsunod han mga katutdoan ni Jesus ngan pagsubad han iya ehemplo sadang magin bahin han ira kinabuhi.

6. Kay ano nga kinahanglan naton padayon nga iaplikar an aton mga hinbabaroan?

⁶ Yana, kinahanglan liwat naton padayon nga iaplikar an aton hinbabaroan. Ha pag-ilustrar, an usa nga mekaniko bangin may-ada mga garamiton, materyales, ngan kahibaro. Pero magpapahimulos la hiya hito nga mga butang kon iya ito gagamiton. Kon nagtrabaho na hiya hadto sugad nga mekaniko ngan nagin eksperyensyado paglabay han panahon, kinahanglan padayon niya nga gamiton an iya mga nahibaroan basi matipigan an iya kaabtik ngan pagin produktibo. Ha pariho nga paagi, han siyahan naton nga hinbaroan an kamatuoran, nalipay kita kay igin-aplikar naton an aton hinbaroan ha Biblia. Pero, magkakaada kita nagpapadayon nga kalipay kon mapainubsanon nga magkikinabuhi kita uyon ha giya ni Jehova kada adlaw.

7. Basi magkaada kinaadman, ano an sadang naton buhaton may kalabotan ha mga ehemplo nga mababasa ha Biblia?

⁷ Hini nga artikulo, aton hihisgotan an pipira nga sitwasyon diin mahimo masarihan an aton pagin mapainubsanon ngan kikitaon naton kon paonan-o nalamposan han matinumanon nga mga surugoon han Dios hadto an pariho nga mga pagsari. An marig-on nga espirituwalidad diri resulta han basta paghibaro la han impormasyon. Salit hunahunaa kon paonan-o mo maiaaplikar an tagsa nga punto, ngan buhata dayon ito.

8, 9. Ano an iginpapakita han panhitabo ha Buhat 14:8-15 mahitungod han pagin mapainubsanon ni apostol Pablo? (Kitaa an retrato ha tinikangan hini nga artikulo.)

⁸ Kaburut-on han Dios nga “matalwas an ngatanan nga klase hin tawo ngan magkaada husto nga kahibaro ha kamatuoran.” (1 Tim. 2:4) Ano an imo pagkita ha mga tawo nga waray pa mahibaro han kamatuoran? Bisan kon kumadto hi apostol Pablo ha mga sinagoga basi masangyawan adton may hinbabaroan na mahitungod ha Dios, sigurado nga nangalimbasog liwat hiya nga masangyawan an mga diri Judio. An reaksyon hini nga mga tawo nga nagsisingba ha iba nga mga dios magsasari han pagin mapainubsanon ni Pablo.

⁹ Pananglitan, ha siyahan nga pagbiyahe ni Pablo sugad nga misyonero, ginhunahuna han mga taga-Licaonia nga hiya pati hi Bernabe diri ordinaryo nga mga tawo​—nga hira an ira mga dios nga hira Zeus ngan Hermes nga nagpakatawo. Nasulay ba hira Pablo ngan Bernabe nga salingabuton ito nga higayon nga magin popular? Naghunahuna ba hira nga higayon ito basi makapahuway tikang ha mga pagtimaraot nga ira naeksperyensyahan ha duha nga syudad nga ira pa la ginbisita? Naghunahuna ba hira nga an ira pagin popular makakabulig nga maisangyaw an maopay nga sumat? Waray! Iginpakita nira nga diri hira nauyon hito pinaagi ha paggisi han ira pantungbaw nga panapton, pagdalagan ngadto ha mga tawo, ngan pagguliat: “Kay ano nga ginbubuhat niyo ini? Mga tawo liwat kami nga may mga kaluyahan pariho ha iyo.”​—Buh. 14:8-15.

10. Kay ano nga waray hunahunaa nira Pablo ngan Bernabe nga labaw hira ha mga taga-Licaonia?

¹⁰ Han nagsiring hira Pablo ngan Bernabe nga diri hira perpekto, diri nira iginpapasabot nga an ira paagi han pagsingba pariho la ha paagi han pagsingba hito nga mga pagano. Diri ba hira nga duha mga misyonero nga ginsugo mismo han Dios? (Buh. 13:2) Diri ba gindihogan hira hin baraan nga espiritu ngan may-ada hira mahimayaon nga paglaom? Oo, pero maaram hira Pablo ngan Bernabe nga mahimo liwat makarawat han mga taga-Licaonia an pariho nga mga pribilehiyo kon karawaton nira an maopay nga sumat.

11. Paonan-o naton masusubad an pagin mapainubsanon ni Pablo kon nagsasangyaw kita?

¹¹ Paonan-o naton masusubad an pagin mapainubsanon ni Pablo? Siyahan, sadang naton isalikway an pagsulay nga maghingyap o kumarawat hin pagdayaw tungod han aton mga nahihimo ha bulig ni Jehova. Maopay nga pakianhan naton an aton kalugaringon: ‘Ano an akon pagkita ha mga tawo nga akon ginsasangyawan? May ginpapaurog ba ako nga partikular nga mga tawo pariho han ginbubuhat han damu ha amon komunidad?’ Ha bug-os nga kalibotan, an mga Saksi ni Jehova nangangalimbasog nga usisahon an ira teritoryo kon may mga tawo pa ba nga mahimo kumarawat han maopay nga sumat. Usahay, bangin kinahanglan naton pag-adman an linggwahe ngan kustomre han mga tawo nga ginmiminos han kadam-an. An mga Saksi nga nangangalimbasog nga maabot an sugad nga mga tawo diri naghuhunahuna nga labaw hira hini nga mga indibiduwal. Lugod, nangangalimbasog hira nga masabtan an tagsa nga indibiduwal basi maabot an iya kasingkasing han mensahe han Ginhadian.

12. Paonan-o iginpakita ni Epapras nga matinagaron hiya ha iba?

¹² Usa pa nga paagi nga iginpapakita naton nga mapainubsanon nga ginsusunod naton an giya han Dios amo an pag-ampo para hadton ‘nagkaada na hin pagtoo nga sugad kapresyoso han aton.’ (2 Ped. 1:1) Ito an ginbuhat ni Epapras. Tulo ka beses la hiya nga gin-unabi ha Biblia​—ngatanan ha giniyahan nga surat ni Pablo. Han priso hi Pablo ha Roma, nagsiring hiya ha iya surat ha mga Kristiano ha Colosas nga hi Epapras ‘pirme nag-aampo hin sinsero para ha ira.’ (Col. 4:12) Kilala gud ni Epapras an kabugtoan, ngan hinigugma niya hira. An iya sitwasyon sugad nga “igkasi-priso” ni Pablo waray makaulang ha iya nga hunahunaon an espirituwal nga panginahanglan han iba.  (Filem. 23) Ngan may ginbuhat hiya basi buligan hira. Diri ba nagpapakita ito nga matinagaron hiya? An pag-ampo para ha aton mga igkasi-magsiringba may daku gud nga epekto, labi na kon igin-aampo naton an tagsa ha ira ngan gin-uunabi pa ngani an ira ngaran.​—2 Cor. 1:11; San. 5:16.

13. Paonan-o mo masusubad hi Epapras kon nag-aampo ka?

¹³ Hunahunaa an mga ngaran hadton mahimo mo ig-ampo. Pariho kan Epapras, igin-aampo han damu nga kabugtoan an ira mga kakongregasyon ngan an ira mga kapamilya nga may mabug-at nga mga responsabilidad o adton kinahanglan maghimo hin seryoso nga desisyon o naatubang hin mga pagsulay. Igin-aampo han damu nga kabugtoan an mga bugto nga nakalista an ngaran ha artikulo ha jw.org/tl nga “Mga Saksi ni Jehova na Nakabilanggo Dahil sa Kanilang Pananampalataya.” (Kitaa an NEWSROOM > LEGAL NA USAPIN.) Dugang pa, mahimo liwat naton ig-ampo an mga namatyan hin hinigugma, an mga nakaeksperyensya hin kalamidad o girra, ngan an mga nagkukuri ha pinansyal. Matin-aw, damu nga kabugtoan an nagkikinahanglan han aton pag-ampo ngan magpapahimulos hito. Kon igin-aampo naton hira, iginpapakita naton nga ginhuhunahuna naton diri la an aton kaopayan, kondi pati liwat an kaopayan han iba. (Fil. 2:4) Ginpapamatian ni Jehova an sugad nga mga pag-ampo.

14. Paonan-o iginpapakita ni Jehova an pinakamaopay nga susbaranan ha pagpamati?

¹⁴ An usa pa nga paagi nga maipapakita naton nga mapainubsanon kita amo an aton pagin andam mamati. An Santiago 1:19 nasiring nga sadang kita magin “andam mamati.” Hi Jehova mismo an pinakamaopay nga susbaranan hini. (Gen. 18:32; Jos. 10:14) Kitaa kon ano an aton mahibabaroan tikang ha pag-istorya ni Jehova ngan ni Moises nga nakarekord ha Eksodo 32:11-14. (Basaha.) Bisan kon diri kinahanglan an opinyon ni Moises, gintagan hiya ni Jehova hin higayon nga ipahayag an iya inaabat. May-ada ba tawo nga magigin mapailubon ha pagpamati ha pangatadongan han usa nga indibiduwal nga nakahimo hin mga sayop hadto ngan katapos bubuhaton an ginsiring hito nga indibiduwal? Hi Jehova mapailubon nga namamati ha mga tawo nga nag-aampo ha iya nga may pagtoo.

15. Paonan-o naton masusubad hi Jehova ha pagpasidungog ha iba?

¹⁵ Maopay nga pakianhan naton an aton kalugaringon: ‘Kon hi Jehova andam magpaubos basi maghatag hin atensyon ha mga tawo ngan mamati ha ira, sugad han iya ginbuhat kanda Abraham, Raquel, Moises, Josue, Manoa, Elias, ngan Hesekia, diri ba sadang liwat ako mas mangalimbasog nga pasidunggan an ngatanan nga kabugtoan pinaagi ha pagtratar ha ira nga may dignidad, pagpamati han ira mga ideya, ngan pagbuhat pa ngani han ira mag-opay nga ideya? May kakongregasyon ba ako o kapamilya nga kinahanglan ko tagan hin atensyon yana? Ano an akon bubuhaton basi mahimo ini?’​—Gen. 30:6; Huk. 13:9; 1 Hadi 17:22; 2 Kron. 30:20.

16. Ano an reaksyon ni David han gintratar hiya hin maraot ni Simei?

¹⁶ An pagin mapainubsanon nabulig liwat ha aton nga maipakita an pagpugong ha kalugaringon kon may nakakapasina ha aton. (Efe. 4:2) May mababasa kita nga maopay nga ehemplo hini ha 2 Samuel 16:5-13. (Basaha.) Hi David ngan an iya mga surugoon nagpailob ha panginsulto ngan pag-atake ni Simei, nga paryente ni Hadi Saul. Ginbuhat ini ni David bisan kon may kapas hiya nga paundangon ito. Ano an nakabulig kan David nga maipakita an pagpugong ha kalugaringon? Mahibabaroan naton an baton hito pinaagi ha pag-usisa han Salmos 3.

17. Ano an nakabulig kan David nga magpakita hin pagpugong ha kalugaringon, ngan paonan-o naton hiya masusubad?

¹⁷ An superskripsyon han Salmos 3 nagpapakita nga ginkomposo ito han hi David ‘napalagiw kan  Absalon nga iya anak.’ An bersikulo 1 ngan 2 nagsasaysay hin puropariho nga hitabo nga mababasa ha kapitulo 16 han ikaduha nga libro han Samuel. An Salmos 3:4 nagpapabug-at han pagsarig ni David: “Nagtatawag ako ngadto kan Jehova han akon tingog, ngan binaton ako niya tikang ha iya bukid nga baraan.” Mahimo liwat kita mag-ampo kon gintatratar kita hin maraot. Babatunon ito ni Jehova pinaagi ha paghatag ha aton han iya baraan nga espiritu, nga makakabulig ha aton nga magpailob. May nahuhunahuna ka ba nga sitwasyon diin kinahanglan mo magpugong ha kalugaringon o kinasingkasing nga magpasaylo ha usa nga nakapasina ha imo? Kombinsido ka ba nga nakikita ni Jehova an imo makuri nga sitwasyon ngan bibendisyonan ka niya?

18. Ano an aton mapapahimulosan kon padayon naton nga susundon an mga instruksyon han Dios?

¹⁸ Kon ginbubuhat naton an mga butang nga maaram kita nga husto, makakarawat naton an hura nga bendisyon. Diri urusahon nga an Proberbios 4:7 nasiring nga “an kinaadman amo an butang nga labaw.” Bisan kon an kinaadman basado ha kahibaro, diri la paghibaro han impormasyon an nahiuupod hito. Nag-uupod ito han mga desisyon nga aton ginhihimo. Bisan an mga tubak nagpapakita hin kinaadman. Iginpapakita han mga tubak an natural nga kinaadman pinaagi ha pag-andam han ira pagkaon durante han katpaso. (Prob. 30:24, 25) An Kristo, “an kapahayagan han . . . kinaadman han Dios,” pirme nagbubuhat han mga butang nga nakakapalipay ha iya Amay. (1 Cor. 1:24; Juan 8:29) Maaram an Dios han kaibahan han paghimo han husto nga desisyon ngan paggios uyon hito nga desisyon. Ngan babalosan kita niya kon magpapabilin kita nga mapainubsanon ngan bubuhaton naton an mga butang nga maaram kita nga husto. (Basaha an Mateo 7:21-23.) Salit pangalimbasog nga makultibar mo an pagin mapainubsanon. Kon bubuhaton mo ini, maaaghat mo an iba ha kongregasyon nga magin mapainubsanon liwat ha pag-alagad kan Jehova. An pagbuhat han mga butang nga maaram kita nga husto nagkikinahanglan hin panahon ngan pagpailob, pero ebidensya ini han aton pagin mapainubsanon. Ngan an aton pagin mapainubsanon mabulig ha aton nga magin malipayon yana ngan ha waray kataposan.