1, 2. (a) Ano an pagtratar ni Jehova ha mga tawo kon ikukompara ha pagtratar ha ira han gamhanan nga mga tawo? (b) Ano an aton hihisgotan hini nga artikulo?

AN GAMHANAN ngan maimpluwensya nga mga tawo kasagaran nga “nagpapakaagaron” ha iba ngan nanraraugdaog pa ngani ha ira. (Mat. 20:25; Ekles. 8:9) Kabaliktaran gud hito hi Jehova! Bisan kon hiya an Makagarahum-ha-ngatanan, makonsiderasyon gud hiya ha diri perpekto nga mga tawo. Buotan ngan matinagaron hiya. Ginkukonsiderar niya an aton mga pagbati ngan mga panginahanglan. Tungod kay “nahinunumdum hiya nga mga tapotapo kita,” diri hiya naglalaom hin labaw kay han aton mahihimo.​—Sal. 103:13, 14.

² Ha Biblia, damu an aton mababasa nga ehemplo nga nagpapakita han pagin makonsiderasyon ni Jehova ha iya mga surugoon. Aton hisgotan an tulo hito. Siyahan, an pagin makonsiderasyon ni Jehova han ginbuligan niya an bata nga hi Samuel ha pagsumat hin mensahe han paghukom ha hitaas nga saserdote nga hi Eli; ikaduha, an pagin mapailubon ni Jehova kan Moises han inabat ni Moises nga diri niya kaya pangunahan an Israel; ngan ikatulo, an pagin makonsiderasyon ni Jehova ha paggiya ha mga Israelita paggawas ha Ehipto. Samtang  ginpapamalandong naton ini nga mga ehemplo, hibaroi kon ano an igintututdo hito ha aton mahitungod kan Jehova ngan kon ano nga mga leksyon an mahimo naton iaplikar.

3. Ano nga urusahon nga panhitabo an naeksperyensyahan han bata nga hi Samuel han usa ka gab-i, ngan ano nga pakiana an nabangon? (Kitaa an retrato ha tinikangan hini nga artikulo.)

³ Bata pa hinduro hi Samuel han nagtikang hiya ‘pag-alagad kan Jehova’ ha tabernakulo. (1 Sam. 3:1) Usa ka gab-i han nakaturog na hi Samuel, may nahitabo nga urusahon gud. * (Basaha an 1 Samuel 3:2-10.) May nabatian hiya nga nagtatawag han iya ngaran. Tungod kay kahuna niya nga an lagas nga hitaas nga saserdote nga hi Eli an nagtatawag ha iya, dinalagan dayon hiya ngadto kan Eli ngan nagsiring: “Iini ako; kay ikaw nagtawag ha akon.” Pero ginsidngan hiya ni Eli nga waray hiya pagtawag ha iya. Han nahitabo ito hin duha pa ka beses, nasantop ni Eli nga an Dios an nagtatawag kan Samuel. Salit ginsumatan niya hi Samuel kon ano an ibabaton, ngan ginbuhat ito ni Samuel. Kay ano nga waray dayon magpakilala hi Jehova, pinaagi han iya anghel, ha siyahan nga pagtawag niya kan Samuel? Waray ginsisiring an Biblia, pero posible nga ginbuhat ito ni Jehova tungod kay ginhunahuna niya an aabaton han bata nga hi Samuel.

4, 5. (a) Ano an reaksyon ni Samuel ha toka nga iginhatag ha iya han Dios, ngan ano an nahitabo pagkaaga? (b) Ano an igintututdo ha aton mahitungod kan Jehova hini nga asoy?

⁴ Basaha an 1 Samuel 3:11-18. An Balaud ni Jehova nagsusugo ha kabataan nga tahuron an mga lagas, labi na an usa nga lider o may awtoridad. (Eks. 22:28; Leb. 19:32) Salit posible nga mahunahuna naton nga makuri gud para ha usa nga bata pariho kan Samuel nga kumadto kan Eli pagkaaga basi maisugon nga isumat ha iya an mapwersa nga mensahe han paghukom han Dios. Ngani, an Biblia nagsusumat ha aton nga hi Samuel “nahadluk pagpakita [o, pagsumat] han bisyon kan Eli.” Pero klaro nga iginpakita han Dios kan Eli nga Hiya an nagtatawag kan Samuel. Sugad nga resulta, ginsidngan ni Eli hi Samuel nga diri itago ha iya an ginsiring han Dios. Sumugot hi Samuel ngan ‘iginsumat niya an ngatanan’ kan Eli.

⁵ Posible gud nga waray na mahipausa hi Eli ha mensahe ni Samuel. Sugad liwat hito an mensahe nga iginsumat ha iya han waray ngarani nga “tawo han Dios” nga nakiistorya hadto ha iya. (1 Sam. 2:27-36) An asoy mahitungod kanda Samuel ngan Eli nagtututdo ha aton nga makonsiderasyon ngan maaramon gud hi Jehova.

6. Ano nga mga leksyon an aton mahibabaroan ha paagi han Dios ha pagbulig ha bata nga hi Samuel?

⁶ Usa ka ba nga batan-on? Kon oo, an asoy mahitungod han bata nga hi Samuel nagpapakita nga nasasabtan ni Jehova an mga pagsari nga imo naieksperyensyahan ngan an imo inaabat. Bangin naaawod ngan nakukurian ka pagsumat ha mga adulto han mensahe han Ginhadian o pagpabilin nga naiiba ha imo mga igkasi-batan-on. Sarig nga karuyag ni Jehova nga buligan ka. Salit isumat ha iya an imo inaabat pinaagi ha pag-ampo. (Sal. 62:8) Pamalandonga an mga ehemplo ha Biblia han mga batan-on pariho kan Samuel. Ngan pakiistorya ha imo mga igkasi-Kristiano​—batan-on o edaran—​nga naglampos ha pag-atubang han mga problema nga pariho han imo naieksperyensyahan. Posible nga sumatan ka nira han mga panahon nga ginbuligan hira ni Jehova, bangin ha mga paagi nga diri nira ginlalaoman.

7, 8. Paonan-o iginpakita ni Jehova nga gintatagad gud niya an inaabat ni Moises?

⁷ Han 80 anyos hi Moises, gintagan hiya ni Jehova hin makuri nga toka. Tatalwason ni Moises an mga Israelita tikang ha pagkauripon ha Ehipto. (Eks. 3:10) Posible gud nga waray hiya makatoo hito tungod kay usa la hiya nga paraataman hin karnero ha Midian ha sulod hin 40 ka tuig. Hiya nagsiring: “Hin-o ako nga makadto kan Paraon,  ngan magdadara han mga anak ni Israel tikang ha Egipto?” An Dios nagpasarig kan Moises: “Ha pagkamatuud ako maupud ha imo.” (Eks. 3:11, 12) Nagsaad liwat Hiya: An katigurangan han Israel “manmamati . . . ha imo tingug.” Bisan pa hito, hi Moises binaton: ‘Kon pananglit diri hira mamati ha akon?’ (Eks. 3:18; 4:1; Maupay nga Sumat) Sugad hin ginkukontra ni Moises an ginsiring ni Jehova. Pero nagpabilin nga mapailubon hi Jehova. Gintagan pa ngani niya hi Moises hin gahum ha paghimo hin mga milagro. Ngani, hi Moises an siyahan nga tawo nga iginrekord ha Biblia nga nagkaada han sugad nga gahum.​—Eks. 4:2-9, 21.

⁸ Bisan pa hito, nagpasangil la gihapon hi Moises; nagsiring hiya nga diri hiya maopay magyakan. Sugad nga baton, an Dios nagsiring ha iya: “Ako maupud ha imo baba, ngan magtututdo ha imo kon ano an imo pagyayaknon.” Nakombinse na ba hi Moises nga karawaton an toka? Waray, kay naghangyo hiya ha Dios nga iba na la an sugoon. Hito nga higayon, nasina hi Jehova. Pero ginhunahuna la gihapon niya an inaabat ni Moises, salit ginsugo niya hi Aaron basi magin tagapagyakan ni Moises.​—Eks. 4:10-16.

9. Paonan-o an pagin mapailubon ngan makonsiderasyon ni Jehova nakabulig kan Moises nga magin maopay nga lider?

⁹ Ano an igintututdo ha aton mahitungod kan Jehova hini nga asoy? Sugad nga Dios nga Makagarahum-ha-ngatanan, mahimo unta niya hadlukon hi Moises basi sumugot dayon ha iya. Pero waray ito buhata ni Jehova, lugod nagin mapailubon ngan buotan hiya, ngan ginpasarig niya an iya mapainubsanon nga surugoon. Nakabulig ba kan Moises an pagin makonsiderasyon ni Jehova? Oo! Nagin maopay gud nga lider hi Moises ngan nangalimbasog hiya nga magin malumo ngan makonsiderasyon ha iba pariho han paagi han pagtratar ha iya ni Jehova.​—Num. 12:3.

10. Paonan-o kita nagpapahimulos kon ginsusubad naton an pagin makonsiderasyon ni Jehova?

¹⁰ Ano nga mga leksyon an mahimo naton iaplikar? Kon usa ka nga bana, kag-anak, o tigurang ha kongregasyon, may-ada ka awtoridad. Salit importante gud nga subaron mo hi Jehova pinaagi ha pagin makonsiderasyon, buotan, ngan mapailubon ha mga tawo nga aada ha ilarom han imo awtoridad! (Col. 3:19-21; 1 Ped. 5:1-3) Kon  mangangalimbasog ka ha pagsubad kan Jehova ngan kan Jesu-Kristo, an mas Harangdon nga Moises, magigin mas masayon ka madaop ngan magigin nakakarepresko ha iba. (Mat. 11:28, 29) Magigin maopay ka liwat nga susbaranan ha ira.​—Heb. 13:7.

11, 12. Han gin-giyahan ni Jehova an mga Israelita paggawas ha Ehipto, ano an iya ginbuhat basi umabat hira nga talwas hira ngan may seguridad?

¹¹ Han binaya an mga Israelita ha Ehipto han 1513 B.C.E., posible nga sobra tulo ka milyon an ira kadamu. Ito nga grupo ginkukompwesto hin tulo o upat pa ngani nga henerasyon, salit may-ada mga kabataan, lagas, ngan posible pipira nga may sakit o may depekto ha lawas. Basi mapangunahan an sugad kadamu nga tawo ha paggawas ha Ehipto, ginkikinahanglan gud an mahigugmaon ngan makonsiderasyon nga lider. Pinaagi kan Moises, ginpamatud-an ni Jehova nga sugad gud hiya hito. Salit, inabat han mga Israelita nga talwas hira samtang nabaya hira ha lugar nga nahiaraan na gud nira.​—Sal. 78:52, 53.

¹² Ano an ginbuhat ni Jehova basi umabat an iya katawohan nga talwas hira ngan may seguridad? Gin-giyahan niya hira paggawas ha Ehipto nga sugad hin kasundalohan nga nakaorganisar ha pakiggirra. (Eks. 13:18) Tungod han ira pagin organisado, sigurado nga inabat han mga Israelita nga kontrolado gud han ira Dios an sitwasyon. Dugang pa, ginpahinabo ni Jehova nga makita nira an iya presensya pinaagi hin “dampog” ha adlaw ngan hin “lamrag hin kalayo” ha gab-i. (Sal. 78:14) Sugad hin nasiring hi Jehova ha ira: “Ayaw kahadlok. Gigiyahan ngan papanalipdan ko kamo.” Oo, ginkikinahanglan gud han mga Israelita ito nga pasarig tungod han sunod nga mahitatabo!

13, 14. (a) Paonan-o iginpakita ni Jehova an iya pagin makonsiderasyon ha mga Israelita ha Dagat nga Pula? (b) Paonan-o iginpakita ni Jehova an iya gahum kontra ha mga Ehiptohanon?

¹³ Basaha an Eksodo 14:19-22. Handurawa nga kaupod ka han mga Israelita ngan aada na kamo ha atubangan han Dagat nga Pula ngan an kasundalohan han Ehipto aada na ha iyo luyo. Waray na kamo mapapalagiwan. Katapos, gumios an Dios. An dampog nga sugad hin harigi bumalhin ha luyo han iyo kampo. Tungod hito, naulang an mga Ehiptohanon ngan nagin masirom an ira kampo. Pero an iyo kampo mapawa tungod han milagroso nga lamrag! Katapos nakita mo nga igin-unat ni Moises an iya kamot ngadto ha dagat, ngan nagkaada makusog nga hangin tikang ha este nga nagtunga han tubig ngan nagkaada haluag nga dalan tipakadto ha tabok nga bahin han dagat. Katapos, ikaw, an imo pamilya, ngan an iyo mga hayop kaupod an iba pa naglakat dida hito nga dalan ha organisado nga paagi. Ngan may naobserbaran ka nga urusahon. An salad han dagat diri malapok o madalunot; mamara ngan matig-a ito, salit masayon an paglakat dida hito. Sugad nga resulta, talwas nga nakatabok bisan adton maghinay maglakat.

¹⁴ Basaha an Eksodo 14:23, 26-30. Katapos, an mapahitas-on ngan diri maaramon nga hi Paraon umagi liwat hito nga dalan basi lanaton kamo. Gin-unat utro ni Moises an iya kamot ngadto ha dagat. Hito nga takna, an tubig nga nagin sugad hin duha nga pader nabungkag. An dagat ha magkaluyo nga bahin pinusak, pariho hin duha nga tsunami nga nagtapo. Waray gud makatalwas hi Paraon ngan an iya kasundalohan!—Eks. 15:8-10.

15. Ano an igintututdo ha imo mahitungod kan Jehova hini nga asoy?

¹⁵ Hini nga asoy, makikita naton nga hi Jehova organisado nga Dios, ngan ini nga kalidad nabulig ha aton nga umabat nga talwas kita ngan may seguridad. (1 Cor. 14:33) Iginpapakita liwat ni Jehova nga mahigugmaon hiya nga paraataman; ginmamangnoan niya an iya katawohan ha praktikal nga mga paagi. Gintitipigan niya hira nga talwas ngan iya hira ginpapanalipdan tikang ha ira mga kaaway. Ini nga mga kamatuoran nagpapasarig gud ha aton samtang nagtitikahirani kita ha kataposan hini nga sistema.​—Prob. 1:33.

16. Paonan-o kita magpapahimulos ha pagrepaso ha paagi han pagtalwas ni Jehova ha mga Israelita?

¹⁶ Yana, ginmamangnoan liwat ni Jehova an iya  katawohan sugad nga grupo, ha espirituwal ngan pisikal nga paagi. Padayon niya ito nga bubuhaton durante han daku nga kasakitan nga hirani na gud umabot. (Pah. 7:9, 10) Salit an katawohan han Dios, batan-on man o lagas, mahimsog o may depekto ha lawas, diri matatarantar o mahahadlok durante han daku nga kasakitan. * Ngani, kabaliktaran gud hito an ira bubuhaton! Hihinumdoman nira ini nga ginsiring ni Jesu-Kristo: “Tindog kamo hin tadong ngan hangad kamo kay an iyo katalwasan hirani na.” (Luc. 21:28) An katawohan han Dios padayon nga masarig nga papanalipdan hira ni Jehova bisan pa han pag-atake han Gog han Magog​—usa nga grupo hin mga nasud nga mas gamhanan gud kay ha Paraon ha kadaan nga Ehipto. (Esek. 38:2, 14-16) Kay ano nga may-ada hira hito nga pagsarig? Maaram hira nga hi Jehova diri nagbabag-o. Papamatud-an utro ni Jehova nga mahigugmaon ngan makonsiderasyon hiya nga Paratalwas.​—Isa. 26:3, 20.

17. (a) Paonan-o kita magpapahimulos ha mga asoy han Biblia mahitungod ha paagi han pagmangno ni Jehova ha iya katawohan? (b) Ano an aton hihisgotan ha sunod nga artikulo?

¹⁷ An mga ehemplo nga ginhisgotan hini nga artikulo pipira la han damu nga asoy nga nagpapakita han pagin buotan ngan pagin makonsiderasyon ni Jehova ha pagmangno, paggiya, ngan pagtalwas ha iya katawohan. Samtang ginpapamalandong mo ito nga mga asoy, pangalimbasog nga mahibaro hin bag-o nga mga butang mahitungod kan Jehova pinaagi ha pag-usisa han mga detalye nga bangin waray mo tagi hin atensyon hadto. Samtang mas nahibabaroan mo an mag-opay nga kalidad ni Jehova, mas maghihilarom an imo gugma ngan magigin marig-on an imo pagtoo ha iya. Ha sunod nga artikulo, hihisgotan naton an mga paagi nga masusubad naton hi Jehova ha pagin makonsiderasyon ha aton kapamilya, ha kabugtoan ha kongregasyon, ngan ha mga tawo ha ministeryo.