1. Kay ano nga malipayon an mga magsiringba ni Jehova? (Kitaa an retrato hini nga pahina.)

AN MGA Saksi ni Jehova malipayon gud nga mga tawo. Ha ira mga katirok, asembleya, ngan pagturotarampo makikita an malipayon nga pag-uroistorya ngan katatawa. Kay ano nga malipayon gud hira? An nangunguna nga rason tungod kay nakilala, nag-aalagad, ngan nangangalimbasog hira nga subaron hi Jehova, an “malipayon nga Dios.” (1 Tim. 1:11; Sal. 16:11) Tungod kay an Dios an Surok han kalipay, karuyag niya nga magin malipayon kita, ngan gintatagan kita niya hin damu nga rason nga magin malipayon.​—Deut. 12:7; Ekles. 3:12, 13.

2, 3. (a) Ano an kalipay? (b) Kay ano nga bangin makuri para ha usa nga magin malipayon?

² Kumusta ka man? Malipayon ka ba? Karuyag mo ba magin mas malipayon? An kalipay mahimo mangahulogan hin usa nga maopay nga pag-abat nga nagpapadayon, nag-uupod ini hin pagin kontento o hin duro nga katagbaw ha pagkinabuhi, ngan hin natural nga hingyap nga magpadayon ito. Iginpapakita han Biblia nga adton may duok la nga relasyon kan Jehova an nakakaeksperyensya hin tinuod nga kalipay. Pero ha aton panahon, bangin makuri para ha usa nga magin malipayon. Kay ano?

 ³ An magkuri nga kahimtang​—sugad han kamatyi hin hinigugma o pagpaiwasa ha kongregasyon han usa nga kapamilya o pagbulag han bana o asawa o kawad-i hin trabaho—​mahimo makagwara han aton kalipay. Mahimo liwat mawara an aton kalipay kon masamok ngan waray mamurayawon nga relasyon an aton pamilya, kon gintatamay kita han aton mga katrabaho o kaeskwela, kon gintitimaraot o napriso kita tungod han aton pag-alagad kan Jehova. Sugad man, mahimo mawara an aton kalipay tungod han nagtitikaluya nga kahimsog, grabe nga sakit, o depresyon. Pero tigamni nga hi Jesu-Kristo, “an malipayon ngan amo la nga Gamhanan,” naruruyag gud paghatag hin pagliaw ngan kalipay ha mga tawo. (1 Tim. 6:15; Mat. 11:28-30) Ha iya Sermon ha Bukid, gin-unabi ni Jesus an pipira nga kalidad nga makakabulig ha aton nga magin malipayon bisan kon naatubang kita hin mga pagsari ha kalibotan ni Satanas.

4, 5. Ano an mahimo naton buhaton basi magin malipayon ngan matipigan ito nga kalipay?

⁴ An siyahan nga gin-unabi ni Jesus an labi nga importante: “Malipayon an mga mahunahunaon han ira espirituwal nga panginahanglan, kay para ha ira an Ginhadian han langit.” (Mat. 5:3) Paonan-o naton iginpapakita nga mahunahunaon kita hito nga panginahanglan? Pinaagi ha pagkaon hin espirituwal nga pagkaon, pagsunod ha mga prinsipyo han Dios, ngan pagprayoridad han aton pagsingba ha malipayon nga Dios. Kon bubuhaton naton ito, magigin mas malipayon kita. Mapaparig-on naton an aton pagtoo nga an mga saad han Dios hirani na matuman. Mapaparig-on liwat kita han “makalilipay nga paglaom” nga igintatagana han Pulong han Dios para ha tinuod nga mga magsiringba.​—Tito 2:13.

⁵ An pagkaada duok nga relasyon kan Jehova importante gud basi maeksperyensyahan an nagpapadayon nga kalipay. Hi apostol Pablo giniyahan ha pagsurat: “Magmalipayon kamo pirme ha Ginoo [nga hi Jehova]. Uutruhon ko, Magmalipayon kamo!” (Fil. 4:4) Basi magin duok nga sangkay ni Jehova, kinahanglan magkaada kita han kinaadman nga tikang ha Dios. An Pulong han Dios nasiring: “Malipayon an tawo nga nakaagi han kinaadman, ngan an tawo nga nakakuha han sarabutan. [Ito] an kahoy ha kinabuhi ha ira nga nakaput [hito]: ngan malipayon an tagsatagsa nga magtipig [hito].”​—Prob. 3:13, 18.

6. Ano pa an sadang naton buhaton basi padayon nga magin malipayon?

⁶ Pero basi padayon nga magin malipayon, importante gud nga basahon naton an Pulong han Dios ngan iaplikar ito. Basi pabug-atan an pagkaimportante han pagbuhat han aton hinbabaroan, hi Jesus nagsiring: “Tungod kay maaram na kamo hini, malipayon kamo kon iyo ini buhaton.” (Juan 13:17; basaha an Santiago 1:25.) Importante gud ini basi matagbaw an aton espirituwal nga panginahanglan ngan padayon nga magin malipayon. Pero paonan-o kita magigin malipayon kon damu an mga butang nga mahimo makagwara han aton kalipay? Hisgotan naton an sunod nga ginsiring ni Jesus ha Sermon ha Bukid.

7. Paonan-o mahimo magin malipayon an mga nabibido?

⁷ “Malipayon an mga nabibido, kay liliawon hira.” (Mat. 5:4) An iba bangin magpakiana, ‘Paonan-o posible magin malipayon an usa bisan kon nabibido hiya?’ An gintutudlok ni Jesus diri an ngatanan nga nabibido tungod ha bisan ano la nga rason. Bisan an magraot nga tawo nabibido ha magkuri nga kahimtang nga ira naieksperyensyahan hinin “peligroso gud nga mga panahon nga makuri pakiangayan.” (2 Tim. 3:1) Pero ira la kalugaringon an ira ginhuhunahuna, salit ito nga ira kabido diri nakakabulig ha ira nga magin duok kan Jehova ngan magin malipayon. An gintutudlok  ni Jesus amo an mga tawo nga mahunahunaon han ira espirituwal nga panginahanglan. Nabibido hira tungod kay nakikita nira nga damu nga tawo an nagsasalikway ha Dios ngan diri nagkikinabuhi uyon han iya mga suruklan. Ginkakarawat nira nga makasasala hira ngan nakikita nira an magraot nga resulta han pagin makasasala han tawo. Nakikita ni Jehova ini nga mga indibiduwal nga sinsero nga nabibido; ginliliaw niya hira pinaagi han iya Pulong, ginbibendisyonan hin kalipay, ngan tatagan hin kinabuhi nga dayon.​—Basaha an Esekiel 5:11; 9:4.

8. Isaysay kon paonan-o an pagin mapainubsanon makakabulig ha usa nga magin malipayon.

⁸ “Malipayon an mga mapainubsanon, kay mapapanunod nira an tuna.” (Mat. 5:5) Paonan-o an pagin mapainubsanon makakabulig ha usa nga magin malipayon? Katapos magkaada husto nga kahibaro han kamatuoran, damu nga tawo an naghimo hin mga pagbag-o. Hadto, bangin madarahog hira, makiawayon, ngan agresibo. Pero yana ira na iginsul-ot “an bag-o nga personalidad” ngan iginpapakita an “pagpalangga nga may kalooy, pagkabuotan, pagpaubos, pagkamalumo, ngan pagkapasensyoso.” (Col. 3:9-12) Sugad nga resulta, mamurayawon na hira, mahigugmaon, ngan mas malipayon. Dugang pa, an Pulong han Dios nagsasaad nga ini nga mga indibiduwal ‘makakapanunod han tuna.’​—Sal. 37:8-10, 29.

9. (a) Ha ano nga paagi an mga mapainubsanon ‘makakapanunod han tuna’? (b) Kay ano nga magigin malipayon an mga “nagugutom ngan nauuhaw han katadongan”?

⁹ Ha ano nga paagi an mga mapainubsanon ‘makakapanunod han tuna’? An dinihogan nga mga disipulo ni Jesus makakapanunod han tuna kon pagmandoan na nira ito sugad nga mga hadi ngan saserdote. (Pah. 20:6) Ha luyo nga bahin, an minilyon nga iba pa nga waray paglaom nga mabuhi ha langit makakapanunod han tuna kay tutugotan hira nga mag-ukoy dida hito ha waray kataposan. Magigin perpekto hira, mamurayawon, ngan malipayon. Ini gihapon nga mga indibiduwal an gintutudlok ni Jesus nga malipayon kay “nagugutom ngan nauuhaw [hira] han katadongan.” (Mat. 5:6) An ira espirituwal nga kagutom ngan kauhaw ha katadongan bug-os nga matatagbaw ha bag-o nga kalibotan. (2 Ped. 3:13) Hito nga panahon, magigin malipayon na an mga matadong ngan diri na gud masusubo kay bug-os nga wawad-on han Dios an ngatanan nga karaotan.—Sal. 37:17.

10. Ano an kahulogan han pagin maloloy-on?

¹⁰ “Malipayon an mga malolooyon, kay kakalooyan hira.” (Mat. 5:7) An Hebreo nga berbo nga ginagamit may kalabotan ha kalooy nangangahulogan hin “pagkaada hilarom nga pagbati nga may pagpalangga; . . . pagin mapinairon.” Sugad man, an Griego nga berbo para hito nga pulong nag-uupod hin pagkaada simpatiya ha usa nga nag-aantos. Kondi an kalooy diri kay basta pag-abat la. Ha Biblia, an pagin maloloy-on nag-uupod hin pagbuhat hin mga butang basi buligan an iba.

11. Ano an aton mahibabaroan ha ilustrasyon mahitungod ha maloloy-on nga Samaritano?

¹¹ Basaha an Lucas 10:30-37. An ilustrasyon ni Jesus mahitungod ha maloloy-on nga Samaritano matin-aw nga nagpapakita kon ano an iginpapasabot han pagin maloloy-on. Tungod han daku nga pagpaid ngan kalooy han Samaritano, ginios hiya basi buligan an usa nga lalaki nga nag-aantos. Katapos unabihon ni Jesus ito nga ilustrasyon, hiya nagsiring: “Lakat, ngan buhata liwat ito.” Salit mahimo naton pakianhan an aton kalugaringon: ‘Ito ba liwat an akon ginbubuhat? Ginbubuhat ko ba an ginbuhat han maloloy-on nga Samaritano? Ano pa an mahimo ko buhaton basi mas maipakita an kalooy ngan mabuligan an mga tawo nga nag-aantos? Pananglitan, mahimo ko ba buligan an edaran nga kabugtoan, mga balo, ngan mga batan-on nga diri Saksi an mga kag-anak? Mahimo ba ako mangalimbasog nga “liawon an mga nasusubo”?’​—1 Tes. 5:14; San. 1:27.

12. Paonan-o an pagin maloloy-on nakakabulig nga magin malipayon kita?

 ¹² Pero kay ano nga an pagin maloloy-on nagriresulta hin kalipay? Kon nagpapakita kita hin kalooy ha iba, inaabat naton an kalipay nga resulta han paghatag. Dugang pa, maaram kita nga napapalipay naton hi Jehova. (Buh. 20:35; basaha an Hebreo 13:16.) May kalabotan ha usa nga nagpapakita hin kalooy, hi Hadi David nagsiring: “Pagbabantayan hiya, ngan pagtatagan hin kinabuhi ni Jehova, ngan magiginbaraanon [o, malipayon] hiya ha tuna.” (Sal. 41:1, 2) Kon magpapakita kita hin kalooy, makakarawat liwat naton an kalooy ni Jehova, ngan tungod hito magigin malipayon kita ha waray kataposan.​—San. 2:13.

13, 14. Ano an koneksyon han pagkaada putli nga kasingkasing ngan han kalipay?

¹³ “Malipayon an mga putli an kasingkasing, kay makikita nira an Dios,” siring ni Jesus. (Mat. 5:8) Basi matipigan nga putli an aton kasingkasing, kinahanglan naton tipigan nga limpyo o putli an aton mga pagbati ngan hingyap. Importante nga tipigan liwat naton nga limpyo an aton hunahuna kon karuyag naton nga karawaton ni Jehova an aton pagsingba.​—Basaha an 2 Corinto 4:2; 1 Tim. 1:5.

¹⁴ Adton putli an kasingkasing mahimo magkaada maopay nga relasyon kan Jehova, hiya nagsiring: “Malipayon an naglalaba han ira higlaba nga bado.” (Pah. 22:14) Ano an iginpapasabot han ira ‘paglaba han ira higlaba nga bado’? Para ha dinihogan nga mga Kristiano, nagpapasabot ito nga limpyo hira ha pagkita ni Jehova ngan tatagan niya hira hin imortal nga kinabuhi ha langit ngan magigin malipayon hira ha waray kataposan. Para ha daku nga grupo, nga naglalaom nga mabuhi ha tuna, nagpapasabot ito nga gintutugotan hira ni Jehova nga magin iya mga sangkay tungod kay gintatagad niya hira nga magtadong. An Biblia nasiring nga ‘ira ginlalabhan an ira higlaba nga bado ngan ginpapabusag ito ha dugo han Kordero.’​—Pah. 7:9, 13, 14.

15, 16. Paonan-o an mga putli an kasingkasing ‘makakakita ha Dios’?

¹⁵ Pero paonan-o an mga putli an kasingkasing ‘makakakita ha Dios,’ nga ha pagkamatuod, “waray tawo nga makakakita ha [Dios] ngan mabubuhi”? (Eks. 33:20) An Griego nga pulong nga iginhubad nga “makikita” mahimo mangahulogan hin “makita pinaagi ha hunahuna, masabtan, mahibaroan.” Adton nakakakita ha Dios pinaagi han ‘mga mata han ira kasingkasing’ amo adton tinuod nga nakilala ha iya ngan nagsusubad han iya mga kalidad. (Efe. 1:18) Perpekto nga ginsubad ni Jesus an personalidad han Dios, salit makakasiring hiya: “An nakakita ha akon nakakita liwat ha Amay.”​—Juan 14:7-9.

¹⁶ Labot ha paghibaro han mga kalidad han Dios, an tinuod nga mga magsiringba ‘makakakita ha Dios’ pinaagi ha pag-obserbar kon paonan-o niya hira ginbubuligan. (Job 42:5) Iginpupokus liwat nira an ‘mga mata han ira kasingkasing’ ha makalilipay nga mga bendisyon  nga ihahatag han Dios ha mga nangangalimbasog nga magpabilin nga putli ngan mag-alagad ha iya nga maunungon. Syempre, literal nga makikita han binanhaw nga mga dinihogan hi Jehova kon makarawat na nira an ira langitnon nga balos.​—1 Juan 3:2.

17. Kay ano nga malipayon an mga nakikigmurayaw?

¹⁷ Sunod, hi Jesus nagsiring: “Malipayon an mga nakikigmurayaw.” (Mat. 5:9) Adton nangangalimbasog nga makigmurayaw may maopay nga rason nga magin malipayon. An disipulo nga hi Santiago nagsurat: “An liso han bunga han katadongan igintatanom han mga nakikigmurayaw samtang murayaw an mga kahimtang.” (San. 3:18) Kon nagkaada kita diri maopay nga relasyon ha aton kakongregasyon o kapamilya, mahimo kita mangamuyo ha Dios nga buligan kita nga magin andam ha pakigmurayaw. Kon bubuhaton naton ito, tatagan kita ni Jehova han baraan nga espiritu, nga mabulig ha aton nga maipakita an mag-opay nga kalidad, ngan sugad nga resulta, magigin mas malipayon kita. Ginpabug-atan ni Jesus an pagkaimportante han pagin andam ha pakigmurayaw han hiya nagsiring: “Kon maghahalad ka ngan nahinumdoman mo nga an imo bugto may reklamo ha imo, bayai an imo halad ha halaran ngan kadtoa an imo bugto. Pakigtuhay anay ha iya, katapos, ha imo pagbalik mahimo ka na maghalad.”​—Mat. 5:23, 24.

18, 19. Kay ano nga mahimo magin malipayon an mga Kristiano bisan kon gintitimaraot hira?

¹⁸ “Malipayon kamo kon an mga tawo nag-iinsulto ha iyo, nagtitimaraot ha iyo, ngan nagyayakan han ngatanan nga buwa nga pakaraot ha iyo tungod ha akon.” Ano an iginpapasabot ni Jesus? Hiya dugang nga nagsiring: “Magkalipay kamo ngan magrayhak, kay daku an iyo balos ha langit. Kay an mga propeta hadto gintimaraot liwat nira ha sugad nga paagi.” (Mat. 5:11, 12) Han ginkastigo an mga apostol ngan ginsugo nga diri na magsangyaw, “malipayon nga binaya hira ha Sanhedrin.” Syempre, waray hira malipay nga ginkastigo hira. Kondi nalipay hira “kay nagkaada hira pribilehiyo nga mag-antos hin kaalohan tungod han [kan Jesus] ngaran.”​—Buh. 5:41.

¹⁹ Yana, an katawohan ni Jehova malipayon liwat nga nagpapailob kon nag-aantos hira tungod han ngaran ni Jesus o kon naatubang hira hin magkuri nga pagsari. (Basaha an Santiago 1:2-4.) Pariho han mga apostol, diri kita nalilipay ha bisan ano nga pag-antos. Pero kon gintitipigan naton an aton integridad ha Dios durante han mga pagsari, bubuligan kita ni Jehova nga makapailob nga may kaisog. Pananglitan, han Agosto 1944, iginpadara han mga awtoridad hi Henryk Dornik ngan an iya bugto ha usa nga prisohan. Pero an mga parakontra nagsiring: “Imposible nga maaghat hira nga magkompromiso. Nalilipay hira ha pagin martir.” Hi Bugto Dornik nagsaysay: “Bisan kon diri ko hingyap magin martir, nalilipay gud ako nga mag-antos nga may kaisog ngan dignidad basi makagpabilin nga maunungon kan Jehova. . . . An kinasingkasing nga pag-ampo nakabulig ha akon nga magin mas duok kan Jehova, ngan nagin masasarigan gud hiya nga Parabulig.”

20. Kay ano nga nalilipay kita ha pag-alagad ha “malipayon nga Dios”?

²⁰ Kon may-ada kita han pag-uyon han “malipayon nga Dios,” magigin malipayon kita bisan pa han mga pagtimaraot, pagkontra han pamilya, sakit, o kalagas. (1 Tim. 1:11) Nalilipay liwat kita tungod han makaruruyag nga mga saad han aton Dios, “nga diri makakagbuwa.” (Tito 1:2) Magigin urusahon gud an katumanan han mga saad ni Jehova nga tungod hito diri na naton mahinunumdoman an mga kakurian ngan pagsari nga aton naieksperyensyahan yana. Ha Paraiso, an mga bendisyon nga ihahatag ni Jehova labaw gud kay ha aton nahuhunahuna yana. Ngan sigurado nga magpapahimulos kita hin duro nga kalipay. Oo, “maglilipay [kita] tungud han kahuraan han kamurayaw.”​—Sal. 37:11.