1-2. Ano an koneksyon han Eclesiastes 11:6 ngan han pagsangyaw nga buruhaton?

HA PIPIRA nga nasud, eksayted an damu nga tawo nga mahibaro hin dugang pa kon nababatian nira an maopay nga sumat. Ito gud an ira ginhihinulat! Ha iba naman nga nasud, diri masyado interesado an mga tawo ha Dios o ha Biblia. Ano an reaksyon han kadam-an nga tawo ha iyo lugar ha maopay nga sumat? Anoman an ira reaksyon, karuyag ni Jehova nga padayon kita nga magsangyaw tubtob nga sumiring hiya nga tapos na an buruhaton.

² Ha itinanda nga panahon ni Jehova, matatapos an pagsangyaw nga buruhaton ngan “maabot an kataposan.” (Mat. 24:14, 36) Samtang waray pa ito, paonan-o ta masusunod an mga pulong nga “ayaw papahuwaya an imo kamot”? *​—Basaha an Eclesiastes 11:6.

3. Ano an hihisgotan naton hini nga artikulo?

³ Ha una nga artikulo, ginhisgotan naton an upat nga kinahanglan buhaton basi magin epektibo kita nga “parapangisda hin mga tawo.” (Mat. 4:19) Hihisgotan hini nga artikulo an tulo nga paagi nga mapaparig-on naton an aton determinasyon nga magsangyaw, anoman an aton maeksperyensyahan. Mahibabaroan naton kon kay ano nga importante nga (1) magpabilin kita nga nakapokus, (2) magin mapailubon, ngan (3) magkaada pirme marig-on nga pagtoo.

4. Kay ano nga kinahanglan naton magpokus pirme ha buruhaton nga iginhatag ha aton ni Jehova?

⁴ Nagtagna hi Jesus hin mga panhitabo ngan kahimtang nga magigin tigaman han kataposan nga mga adlaw. Ngan mahimo  ito magin hinungdan nga diri na makapokus an iya mga sumurunod ha pagsangyaw nga buruhaton. Iya ginsidngan an iya mga disipulo nga “padayon nga magbantay.” (Mat. 24:42) Ha panahon ni Noe, damu nga butang an nakaulang ha mga tawo ha pagpamati han iya pahamangno. Ngan mahimo liwat ito makaulang ha aton yana. (Mat. 24:37-39; 2 Ped. 2:5) Salit, karuyag naton magpokus pirme ha buruhaton nga iginhatag ha aton ni Jehova.

5. Paonan-o iginpapakita han Buhat 1:6-8 an lukop han pagsangyaw nga buruhaton?

⁵ Yana, kinahanglan gud naton magpokus ha pagsangyaw han Ginhadian. Igintagna ni Jesus nga magigin mas haluag an lukop hini nga buruhaton ngan magpapadayon ini hin hilawig nga panahon katapos han iya kamatayon. (Juan 14:12) Han namatay hi Jesus, binalik ha pagpangisda an iba nga mga disipulo. Han nabanhaw hiya, naghimo hiya hin milagro; iya ginbuligan an iba niya nga mga disipulo nga makadakop hin damu nga isda. Hito nga higayon, ginpabug-atan niya nga an ira toka sugad nga parapangisda hin mga tawo mas importante kay ha bisan ano nga buruhaton. (Juan 21:15-17) Antes sumaka hi Jesus ha langit, ginsidngan niya an iya mga disipulo nga an pagsangyaw nga iya gintikangan makakaabot lahos pa ha mga giutan han Israel. (Basaha an Buhat 1:6-8.) Paglabay hin mga tuig, naghatag hi Jesus hin bisyon kan apostol Juan basi ipakita ha iya an mahitatabo ha “adlaw han Ginoo.” * Usa han mga nakita ni Juan amo an urusahon nga bisyon mahitungod hin anghel nga “may-ada . . . waray kataposan nga maopay nga sumat” nga iginpapasamwak “ha tagsa nga nasud ngan tribo ngan pinulongan ngan katawohan.” (Pah. 1:10; 14:6) Klaro, kaburut-on ni Jehova nga makigbahin kita hinin bug-os-kalibotan nga pagsangyaw tubtob matapos ini nga buruhaton.

6. Paonan-o kita makakapabilin nga nakapokus ha pagsangyaw nga buruhaton?

⁶ Makakapabilin kita nga nakapokus ha pagsangyaw  kon papamalandungon naton an tanan nga ginbubuhat ni Jehova para ha aton. Pananglitan, nagtatagana hiya hin damu nga espirituwal nga pagkaon pinaagi ha inimprinta ngan elektroniko nga publikasyon, audio ngan video nga rekording, ngan broadcasting ha Internet. Hunahunaa la: Ha aton opisyal nga website, may mga impormasyon ha sobra 1,000 nga linggwahe! (Mat. 24:45-47) An mga tawo ha kalibotan nagkakabahin-bahin tungod han politika, relihiyon, ngan estado ha kinabuhi pero an sobra walo ka milyon nga surugoon han Dios ha bug-os nga kalibotan nagkakaurosa gud sugad nga magburugto. Pananglitan han Biernes, Abril 19, 2019, an mga Saksi ha bug-os nga kalibotan nagkaurosa ha paghisgot han inadlaw nga teksto. Han gab-i, nagkatirok an 20,919,041 basi isaurog an Memoryal han kamatayon ni Jesus. Napapagios kita nga magpabilin nga nakapokus ha pagsangyaw han Ginhadian kon ginhuhunahuna naton an aton pribilehiyo nga makita inin urusahon nga mga panhitabo yana ngan magin bahin hito.

7. Paonan-o an susbaranan ni Jesus mabulig ha aton nga makapabilin nga nakapokus?

⁷ Usa pa nga paagi nga makakapabilin kita nga nakapokus ha pagsangyaw amo an pagsunod han susbaranan ni Jesus. Waray niya tuguti an bisan ano nga makaulang ha iya ha pagsangyaw han kamatuoran. (Juan 18:37) Waray hiya masulay han gintanyagan hiya ni Satanas han ‘ngatanan nga ginhadian han kalibotan ngan han ira himaya’; ngan waray liwat hiya masulay han karuyag han iba nga himoon hiya nga hadi. (Mat. 4:8, 9; Juan 6:15) Waray hiya maimpluwensyahi han hingyap nga magkaada materyal nga karikohan; waray liwat hiya mahadlok ha bayolente nga pagkontra. (Luc. 9:58; Juan 8:59) Kon nasasarihan an aton pagtoo, makakapabilin kita nga nakapokus kon dudumdumon naton an sagdon ni apostol Pablo. Gin-aghat niya an mga Kristiano nga sundon an susbaranan ni Jesus basi ‘diri hira kapuyon ngan diri umundang.’​—Heb. 12:3.

8. Ano an pagpailob, ngan kay ano nga labi nga kinahanglan ito yana?

⁸ An pagpailob amo an abilidad nga maghulat hin kalmado tubtob nga magbag-o an usa nga sitwasyon. Kinahanglan naton magin mapailubon ha iba-iba nga sitwasyon. Bangin karuyag naton matapos na an usa nga maraot nga kahimtang o matuman an maiha na naton nga ginhihiningyap. Ginhingyap ni propeta Habakuk nga matapos na an kamadarahog ha Juda. (Hab. 1:2) Naglaom an mga disipulo ni Jesus nga “maabot dayon” an Ginhadian ngan tatalwason hira tikang ha pagmando han Roma. (Luc. 19:11) Ginpapamulat gud naton an adlaw nga wawad-on han Ginhadian han Dios an karaotan ngan ig-iestablisar an bag-o nga kalibotan nga puno hin magtadong nga tawo. (2 Ped. 3:13) Pero kinahanglan naton magin mapailubon ngan maghulat ha nakaeskedyol nga panahon ni Jehova. Tagda an pipira nga paagi nga gintututdoan kita ni Jehova nga magin mapailubon.

9. Ano nga mga ehemplo an nagpapakita nga mapailubon hi Jehova?

⁹ Hi Jehova an perpekto nga susbaranan han pagin mapailubon. Gintagan niya hi Noe hin eksakto nga panahon basi himoon an arka ngan magin “parasangyaw han katadongan.” (2 Ped. 2:5; 1 Ped. 3:20) Namati hi Jehova han pauroutro nga nagpakiana hi Abraham mahitungod han Iya desisyon nga bungkagon an magraot nga tawo ha Sodoma ngan Gomorra. (Gen. 18:20-33) Nagpailob gud hi Jehova hin hilawig nga panahon ha diri matinumanon nga nasud han Israel. (Neh. 9:30, 31) Nakikita naton yana an pagin mapailubon ni Jehova kay gintatagan niya hin panahon nga “magbasol” an tanan nga  iya iginpapahirani ha iya. (2 Ped. 3:9; Juan 6:44; 1 Tim. 2:3, 4) An susbaranan ni Jehova naghahatag ha aton hin maopay nga rason nga magin mapailubon samtang padayon kita nga nagsasangyaw ngan nagtututdo ha iba. Gintututdoan liwat kita niya nga magin mapailubon pinaagi hin ilustrasyon nga aada ha iya Pulong.

10. Ano an igintututdo ha aton han ehemplo han parauma nga nakarekord ha Santiago 5:7, 8?

¹⁰ Basaha an Santiago 5:7, 8. An ehemplo han parauma nga may mga tanom nagtututdo ha aton kon paonan-o magin mapailubon. Oo, an iba nga tanom malaksi tumubo. Pero an kadam-an, labi na adton namumunga, mas maiha antes anihon. An panahon ha pagtubo han mga tanom ha Israel naabot hin mga unom ka bulan. Igintatanom han parauma an iya mga binhi katapos han una nga uran ha katrakdag ngan nag-aani hiya katapos han urhi nga uran ha katsaringsing. (Mar. 4:28) Hinaot subaron naton an pagin mapailubon han parauma. Pero bangin diri ini masayon.

11. Paonan-o an pagin mapailubon mabulig ha aton ha ministeryo?

¹¹ Kasagaran na, karuyag han diri perpekto nga mga tawo nga makita dayon an resulta han ira mga ginhimo. Pero kon karuyag naton mamunga an aton mga tanom, kinahanglan naton ito pirme tagan hin atensyon. Kinahanglan naton mag-ukab, magtanom, tanggalan ito hin mga banwa, ngan saribohan ito. An panhimo hin disipulo nagkikinahanglan liwat hin padayon nga pangalimbasog. Kinahanglan hin panahon basi mabuligan an aton mga Bible study nga magin mahigugmaon ngan diri magpaurog. An pagin mapailubon mabulig ha aton nga diri manluya kon diri namamati ha aton an mga tawo. Kinahanglan magin mapailubon liwat kita kon andam mamati ngan mahibaro an mga tawo. Diri naton mapipirit an usa nga Bible study nga magtubo an iya pagtoo. Usahay, bisan an mga disipulo ni Jesus nagin mahinay ha pag-intindi han kahulogan han iya mga igintutdo. (Juan 14:9) Oo, bangin kita an nagtatanom  ngan nagsasaribo, pero aton hinumdoman nga an Dios an nagpapatubo hito.​—1 Cor. 3:6.

12. Paonan-o naton maipapakita an pagpailob kon nagsasangyaw kita ha aton diri Saksi nga kapamilya?

¹² Bangin makurian kita nga magin mapailubon kon nagsasangyaw kita ha aton mga kapamilya nga diri Saksi. Makakabulig ha aton an prinsipyo ha Eclesiastes 3:7. Ito nasiring: “May panahon han paghilom ngan may panahon han pagyakan.” An aton maopay nga panggawi makakabulig nga mainteres an aton mga kapamilya ha aton mensahe. Pero kinahanglan andam kita pirme ha pagsumat ha ira han kamatuoran. (1 Ped. 3:1, 2) Kinahanglan magin mapailubon kita ha ngatanan​—pati na ha aton mga kapamilya—​samtang nagsasangyaw ngan nagtututdo kita nga may kadasig.

13-14. Ano an pipira nga ehemplo han pagpailob an puydi naton subaron?

¹³ Mahibabaro kita ha pagin mapailubon tikang ha ehemplo han magtinumanon nga tawohan ha Biblia pati na ha magtinumanon nga surugoon yana. Karuyag gud ni Habakuk nga matapos na an karaotan, pero nagpakita hiya hin pagpailob han hiya nagsiring: “Ha akon pwesto sugad nga gwardya padayon ako nga matindog.” (Hab. 2:1) Hi apostol Pablo nagsiring nga hingyap gud niya nga “matapos” an iya ministeryo. Pero mapailubon nga nagpadayon hiya “basi bug-os nga magpamatuod han maopay nga sumat.”​—Buh. 20:24.

¹⁴ Tagda an ehemplo han mag-asawa nga naggradwar ha Gilead ngan gintoka ha nasud diin gutiay la an mga Saksi ngan an kadam-an nga tawo diri Kristiano. Gutiay gud la an naruruyag mag-aram han Biblia. Pero an ira mga kaklase ha Gilead nga nag-aalagad ha iba nga mga nasud nag-iistorya ha ira mahitungod han damu nira nga nag-uuswag nga Bible study. Bisan kon diri namamati an kadam-an nga tawo, mapailubon nga nagpadayon an mag-asawa ha ira ministeryo. Katapos hin walo ka tuig nga pagsinangyaw ha teritoryo nga baga hin diri mabungahon, nalipay gud hira han nabawtismohan an usa han ira mga Bible study. Ano an igintututdo hini nga mga ehemplo han mga magsiringba ni Jehova hadto ngan yana? Ini nga mga matinumanon waray magin hubya o waray nira papahuwaya an ira kamot, ngan ginbalosan ni Jehova an ira pagin mapailubon. Hinaot ‘magsubad kita ha mga nakakapanunod han mga saad pinaagi han pagtoo ngan pagpailob.’​—Heb. 6:10-12.

15. Ano an usa nga paagi nga napaparig-on han pagtoo an aton determinasyon nga magsangyaw?

¹⁵ May pagtoo kita ha mensahe nga aton iginsasangyaw, salit karuyag gud naton ito isumat ha mas damu gud nga tawo. Nasarig kita ha mga saad nga aada ha Pulong han Dios. (Sal. 119:42; Isa. 40:8) May mga tagna ha Biblia nga natutuman na yana. Nakikita naton nga mas nag-oopay an kinabuhi han mga tawo kon gin-aaplikar nira an sagdon han Biblia. Tungod hini nga ebidensya, mas nagigin kombinsido kita nga an maopay nga sumat han Ginhadian kinahanglan gud mabatian han ngatanan.

16. Uyon ha Salmo 46:1-3, paonan-o an pagtoo kan Jehova ngan kan Jesus nagpaparig-on han aton determinasyon nga magsangyaw?

¹⁶ May pagtoo liwat kita kan Jehova, an gintitikangan han mensahe nga aton iginsasangyaw, ngan ha gintagan niya hin awtoridad nga magin Hadi han Ginhadian, hi Jesus. (Juan 14:1) Anoman an aton maeksperyensyahan, hi Jehova pirme an aton arayopan ngan kusog. (Basaha an Salmo 46:1-3.) Dugang pa, makakasarig kita nga gin-gigiyahan ni Jesus tikang ha langit an pagsangyaw nga buruhaton pinaagi han gahum ngan awtoridad nga iginhatag ha iya ni Jehova.​—Mat. 28:18-20.

17. Paghatag hin ehemplo kon kay ano nga kinahanglan padayon kita nga magsangyaw.

 ¹⁷ Tungod han pagtoo, nagigin mas kombinsido kita nga bibendisyonan ni Jehova an aton pangalimbasog, usahay ha mga paagi nga diri naton ginlalaoman. (Ecles. 11:6) Pananglitan kada adlaw, yinukot nga tawo an nakakakita han aton mga lamesa o cart nga may displey nga mga literatura. Epektibo ba ini nga paagi han pagsangyaw? Oo. An Nobyembre 2014 nga isyu han An Aton Ministeryo ha Ginhadian nag-unabi hin usa nga estudyante ha unibersidad nga karuyag magsurat hin essay mahitungod ha mga Saksi ni Jehova. Waray hiya makabiling hin Kingdom Hall, pero nakakita hiya hin displey hin mga literatura ha kampus, ngan nakakita liwat hiya hin materyal para ha iya essay. Ha urhi, nagin bawtismado hiya nga Saksi, ngan yana, regular payunir na hiya. An sugad nga eksperyensya nagpapagios ha aton nga padayon nga magsangyaw kay may mga tawo pa nga kinahanglan mahibaro han mensahe han Ginhadian.

18. Kay ano nga sigurado kita nga matatapos an pagsangyaw nga buruhaton uyon ha karuyag ni Jehova?

¹⁸ Makakasiguro kita nga matatapos ha eksakto nga panahon an pagsangyaw nga buruhaton. Tagda an nahitabo ha panahon ni Noe. Ginpamatud-an ni Jehova nga pirme niya ginbubuhat an mga butang ha pinakamaopay nga panahon. Mga 120 ka tuig antes an Baha, nagdesisyon na hi Jehova kon san-o ito mahitatabo. Paglabay hin damu ka tuig, ginsugo ni Jehova hi Noe nga maghimo hin arka. Posible 40 o 50 ka tuig antes an Baha, padayon nga nagin maduruto hi Noe ha iya buruhaton. Bisan kon diri namamati ha iya an mga tawo, padayon hiya nga nagpahamangno tubtob nga nagsiring hi Jehova nga panahon na basi pasudlon ha arka an mga hayop. Katapos, ha eksakto nga panahon, “ginsadhan ni Jehova an purtahan.”​—Gen. 6:3; 7:1, 2, 16.

19. Ano an aton malalaoman kon diri naton papahuwayon an aton kamot?

¹⁹ Diri mag-iiha, pahuhunungon na ni Jehova an pagsangyaw nga buruhaton. Katapos, bubungkagon niya an sistema ni Satanas ngan ig-iestablisar an bag-o nga kalibotan nga puno hin magsinugtanon nga tawo. Samtang waray pa ito, hinaot subaron naton hira Noe, Habakuk, ngan an iba pa nga waray papahuwaya an ira kamot. Hinaot magpabilin kita nga nakapokus, mapailubon, ngan magkaada kita pirme marig-on nga pagtoo kan Jehova ngan ha iya mga saad.