1-2. Sumala ha 1 Timoteo 6:20, ano an iginhatag kan Timoteo?

KAUROGAN nga igintatapod naton ha iba an aton importante gud nga mga butang. Pananglitan, bangin naton ideposito ha bangko an aton kwarta. Kon ginbubuhat naton ito, naglalaom kita nga hihirotan an aton kwarta ngan diri ito mawawara o makakawat. Salit nasasabtan naton kon ano an iginpapasabot han pagtapod ha iba han usa nga butang nga presyoso ha aton.

² Basaha an 1 Timoteo 6:20. Ginpahinumdoman ni apostol Pablo hi Timoteo nga may nakarawat hiya nga presyoso nga butang​—an husto nga kahibaro han katuyoan han Dios para ha katawohan. Gintaporan liwat hi Timoteo han pribilehiyo nga “isangyaw an pulong” ngan ‘buhaton an buruhaton han usa nga ebanghelisador.’ (2 Tim. 4:2, 5) Gin-aghat ni Pablo hi Timoteo nga bantayan an igintapod ha iya. Pariho kan Timoteo, gintaporan liwat kita hin importante gud nga mga butang. Ano ito? Ngan kay ano nga kinahanglan naton proteksyonan an bahandi nga iginhatag ha aton ni Jehova?

3-4. Ano an pipira nga rason kon kay ano nga presyoso an mga kamatuoran ha Biblia?

³ May pagkabuotan nga gintagan kita ni Jehova hin husto nga kahibaro han presyoso nga mga kamatuoran nga aada ha iya Pulong, an Biblia. Presyoso ini nga mga kamatuoran kay nagtututdo ito ha aton kon paonan-o magkakaada maopay nga relasyon kan Jehova ngan kon ano an maghahatag hin tinuod nga kalipay. Kon ginkakarawat ngan gin-aaplikar naton ito nga mga kamatuoran, nagkakaada kita kagawasan tikang ha pagkauripon ha buwa nga mga katutdoan ngan imoral nga mga buhat.​—1 Cor. 6:9-11.

⁴ Presyoso liwat an mga kamatuoran ha Pulong han Dios kay iginpapahayag la ito ni Jehova ha mga mapainubsanon nga “may husto nga disposisyon.” (Buh. 13:48) Ginkakarawat han sugad nga mga  indibiduwal an grupo nga gin-gagamit ni Jehova ha pagtutdo ha aton yana hito nga mga kamatuoran. (Mat. 11:25; 24:45) Diri naton masasabtan ini nga mga kamatuoran kon waray an bulig han iba, ngan an pakahibaro hito mas presyoso gud kay ha bisan ano nga butang.​—Prob. 3:13, 15.

5. Ano pa an igintapod ha aton ni Jehova?

⁵ Gintaporan liwat kita ni Jehova han pribilehiyo nga itutdo ha iba an kamatuoran mahitungod ha iya ngan ha iya mga katuyoan. (Mat. 24:14) Presyoso gud an mensahe nga iginsasangyaw naton kay nabulig ito ha mga tawo nga magin parte han pamilya ni Jehova ngan naghahatag ito ha ira hin oportunidad nga mabuhi ha waray kataposan. (1 Tim. 4:16) Daku man o gutiay an aton nahihimo ha ministeryo, ginsusuportaran naton an pinakaimportante nga buruhaton yana. (1 Tim. 2:3, 4) Daku gud nga pribilehiyo nga magin igkasi-magburuhat han Dios!​—1 Cor. 3:9.

6. Ano an nahitabo ha pipira nga waray magpabilin nga mabinantayon?

⁶ Ha panahon ni Timoteo, waray apresyara han pipira nga Kristiano an ira pribilehiyo nga magin igkasi-magburuhat han Dios. Tungod kay ginhigugma ni Demas an kalibotan, ginbayaan niya an iya pribilehiyo nga mag-alagad kaupod hi Pablo. (2 Tim. 4:10) Baga hin ginbayaan nira Figelo ngan Hermogenes an ira ministeryo kay nahahadlok hira nga maeksperyensyahan an klase han pagtimaraot nga gin-antos ni Pablo. (2 Tim. 1:15) Hira Himeneo, Alejandro, ngan Fileto nagin apostata ngan binaya ha kamatuoran. (1 Tim. 1:19, 20; 2 Tim. 2:16-18) Hira tanan may marig-on nga espirituwalidad hadto, pero nawara an ira apresasyon ha mga butang nga tinuod nga presyoso.

7. Ano nga mga taktika an gin-gagamit ni Satanas kontra ha aton?

⁷ Ano an ginhihimo ni Satanas basi aghaton kita nga bayaan an mga bahandi nga igintapod ha aton ni Jehova? Tagda an pipira han mga taktika ni Satanas. Gin-gagamit niya an kaliawan ngan media basi ipasarang an mga prinsipyo, panhunahuna, ngan panggawi nga ginlalaoman niya nga magpapaluya han aton pagkapot ha kamatuoran. Ginhahadlok kita niya pinaagi han mga pagtimaraot o han mga iginyayakan han mga tawo mahitungod ha aton basi diri na kita magsangyaw. Ngan naniniguro hiya nga aghaton kita nga mamati ha “sayop nga gintatawag nga ‘kahibaro’” han mga apostata basi bayaan naton an kamatuoran.​—1 Tim. 6:20, 21.

8. Ano an imo nahibaroan ha eksperyensya han brother nga hi Daniel?

⁸ Kon diri kita maghihirot, bangin hinay-hinay nga bumaya kita ha kamatuoran. Tagda an eksperyensya ni Daniel, * nga mahilig ha video game. Hiya nagsiring: “Nagtikang ako mag-uyag hin mga video game han mga dyes anyos ako. Han una, diri maraot an akon mga gin-uuyag. Pero  hinay-hinay nga nagtikang ako mag-uyag hin mga video game nga bayolente ngan may espiritismo.” Ha urhi, mga 15 ka oras kada adlaw na hiya nga nag-uuyag. “Maaram ako nga an klase han mga video game nga akon gin-uuyag ngan an kadamu han panahon nga akon gin-gagamit hito hinay-hinay nga nagpahirayo ha akon kan Jehova. Pero nagin matig-a an akon kasingkasing ngan naghunahuna ako nga diri aplikado ha akon an mga prinsipyo ha Biblia,” siring ni Daniel. An diri abat nga impluwensya han kaliawan mahimo magpaluya han aton pagkapot ha kamatuoran. Kon mahitabo ito, mawawara ha aton an importante gud nga mga butang nga iginhatag ni Jehova.

9. Sumala ha 1 Timoteo 1:18, 19, ha ano iginpariho ni Pablo hi Timoteo?

⁹ Basaha an 1 Timoteo 1:18, 19. Iginpariho ni Pablo hi Timoteo ha usa nga sundalo ngan gin-aghat hiya nga “magpadayon . . . ha maopay nga pakig-away.” Diri literal ito nga pakig-away, kondi espirituwal. Ha ano nga mga paagi an mga Kristiano pariho hin mga sundalo nga nakikig-away ha girra? Ano nga mga kalidad an kinahanglan naton kultibaron sugad nga mga sundalo han Kristo? Tagdon naton an lima nga leksyon nga aton mahibabaroan ha ilustrasyon ni Pablo. Makakabulig ini ha aton nga makaptan hin marig-on an kamatuoran.

10. Ano an debosyon ha Dios, ngan kay ano nga kinahanglan naton ito?

¹⁰ Magkaada debosyon ha Dios. Maunungon an maopay nga sundalo. Makikig-away gud hiya basi proteksyonan an iya hinigugma o an usa nga butang nga presyoso ha iya. Gin-aghat ni Pablo hi Timoteo nga magkaada debosyon ha Dios​—karuyag sidngon, maunungon nga gugma ha Dios. (1 Tim. 4:7) Kon mas hilarom an aton gugma ngan debosyon ha Dios, magigin mas makusog an aton hingyap nga kumapot hin marig-on ha kamatuoran.​—1 Tim. 4:8-10; 6:6.

11. Kay ano nga kinahanglan naton an disiplina ha kalugaringon?

¹¹ Magkaada disiplina ha kalugaringon. Kinahanglan disiplinahon han usa nga sundalo an iya kalugaringon basi pirme hiya andam ha pakiggirra. Andam hi Timoteo ha pakig-away ha mga impluwensya ni Satanas kay ginsunod niya an sagdon ni Pablo nga likyan an sayop nga mga hingyap, ipakita an mag-opay nga kalidad, ngan makig-upod ha mga igkasi-tumuroo. (2 Tim. 2:22) Nagkikinahanglan ito hin disiplina ha kalugaringon. Kinahanglan naton an disiplina ha kalugaringon basi magdaog ha pakig-away ha aton sayop nga mga hingyap. (Roma 7:21-25) Kinahanglan liwat naton ito basi padayon nga mahukas an daan nga personalidad ngan maisul-ot an bag-o. (Efe. 4:22, 24) Ngan kon kapoy gud kita kay busy kita ha bug-os nga adlaw, bangin kinahanglan naton piriton an aton kalugaringon nga umatender ha katirok.​—Heb. 10:24, 25.

12. Paonan-o naton mapapauswag an aton paggamit han Biblia?

¹² Kinahanglan magpraktis an usa nga sundalo ha paggamit han iya mga armas. Basi magin eksperto, kinahanglan niya ito buhaton hin regular. Sugad man, kinahanglan naton magin maopay gud ha paggamit han Pulong han Dios. (2 Tim. 2:15) Mahibabaroan naton an pipira hini nga paagi ha aton mga katirok. Pero kon karuyag naton makombinse an iba nga presyoso gud an kamatuoran ha Biblia, kinahanglan pag-adman naton ito hin regular. Kinahanglan naton gamiton an Pulong han Dios basi maparig-on an aton pagtoo. Nagpapasabot ito nga diri la naton basta babasahon an Biblia. Kinahanglan pamalandungon naton an aton ginbabasa ngan magsaliksik ha aton mga publikasyon basi tama an aton pagsabot ngan pag-aplikar han Kasuratan. (1 Tim. 4:13-15) Kon bubuhaton naton ito, magagamit naton an Pulong han Dios ha pagtutdo ha iba. Nagpapasabot liwat ini nga diri la naton basta babasahon ha ira an mga teksto. Karuyag naton buligan an aton mamarati nga masabtan an teksto  ngan kon paonan-o ito makakabulig ha ira. Kon may regular kita nga eskedyol han personal nga pag-aram han Biblia, mapapauswag naton an aton abilidad ha paggamit han giniyahan nga Pulong han Dios ha pagtutdo ha iba.​—2 Tim. 3:16, 17.

13. Uyon ha Hebreo 5:14, kay ano nga kinahanglan kita magkaada husto nga pagturotimbang?

¹³ Magkaada husto nga pagturotimbang. Kinahanglan maaram an usa nga sundalo han posible nga mga peligro ngan likyan ito. Kinahanglan mahibaro liwat kita ha pagkilala han mga sitwasyon nga makakadaot ha aton ngan gumios kita basi malikyan an peligro. (Prob. 22:3; basaha an Hebreo 5:14.) Pananglitan, kinahanglan naton pilion hin maopay an aton pagpahalibway ngan kaliawan. An mga salida ha TV ngan mga pelikula kaurogan nga nagpapakita hin imoral nga mga buhat. An sugad nga mga buhat nakakapasina ha Dios ngan sigurado nga makakadaot ha aton. Salit ginlilikyan naton an mga kaliawan nga hinay-hinay nga magpapaluya han aton gugma ha Dios.​—Efe. 5:5, 6.

14. Paonan-o an husto nga pagturotimbang nakabulig kan Daniel?

¹⁴ Ha urhi, nasabtan ni Daniel nga gin-unabi kanina, nga nakakadaot an pag-inuyag hin bayolente ngan may espiritismo nga mga video game. Nagsaliksik hiya ha Watchtower Library hin publikasyon nga mabulig ha iya basi malamposan an iya problema. Ano an epekto hito ha iya? Waray na hiya mag-uyag hin magraot nga video game. Ginkansela niya an iya subskripsyon ha online games ngan waray na makig-uyag ha iba nga parauyag. Hi Daniel nagsiring, “Imbes nga mag-uyag hin mga video game, gin-gamit ko an akon panahon ha mga aktibidad ha gawas o ha pakig-upod ha kabugtoan ha kongregasyon.” Yana, nag-aalagad hi Daniel sugad nga payunir ngan tigurang.

15. Kay ano nga delikado an buwa nga mga istorya?

¹⁵ Pariho kan Timoteo, kinahanglan liwat naton masabtan nga delikado an buwa nga impormasyon nga iginpapasarang han mga apostata. (1 Tim. 4:1, 7; 2 Tim. 2:16) Pananglitan, bangin magpasarang hira hin buwa nga istorya parte ha aton kabugtoan o maghimo hin mga paagi basi magruhaduha kita ha organisasyon ni Jehova. An sugad nga impormasyon makakapaluya ha aton pagtoo. Kinahanglan diri kita tumoo hinin buwa nga mga impormasyon. Kay ano? Kay iginpapasarang ini nga klase hin mga istorya “han mga tawo nga nadaot an panhunahuna ngan nawad-an han kamatuoran.” Tumong nira nga magpatikang hin “mga diskusyon ngan mga debate.” (1 Tim. 6:4, 5) Karuyag nira nga tumoo kita ha ira pakaraot ngan magsuspetsa ha aton kabugtoan.

16. Ano nga mga ulang an kinahanglan naton likyan?

 ¹⁶ Magpabilin nga nakapokus. Sugad nga “maopay nga sundalo ni Kristo Jesus,” kinahanglan magpabilin hi Timoteo nga nakapokus ha ministeryo imbes nga magpaulang ha materyal nga mga butang o ha sekular nga mga tumong. (2 Tim. 2:3, 4) Pariho kan Timoteo, diri naton tugotan nga mawara an aton pokus tungod han paghingyap hin dugang nga materyal nga mga butang. “An nakakalimbong nga gahum han karikohan” makakagwara han aton gugma kan Jehova, han aton apresasyon ha Pulong han Dios, ngan han aton hingyap nga isumat ito ha iba. (Mat. 13:22) Kinahanglan tipigan ta an simple nga pagkinabuhi ngan gamiton an aton panahon ngan kusog ha ‘padayon nga pag-una han pagpamiling han Ginhadian.’​—Mat. 6:22-25, 33.

17-18. Ano an mahimo naton buhaton basi malikyan nga madaot an aton espirituwalidad?

¹⁷ Magin andam ha paggios dayon. Kinahanglan abanse nga magplano an usa nga sundalo kon ano an iya hihimoon basi maproteksyonan an iya kalugaringon. Kon karuyag naton proteksyonan an mga butang nga igintapod ha aton ni Jehova, kinahanglan gumios kita dayon kon may nakikita kita nga peligro. Ano an mabulig ha aton basi mabuhat ito? Kinahanglan abanse kita nga magplano kon paonan-o magios ha usa nga sitwasyon.

¹⁸ Ha pag-ilustrar, kon may usa nga event, kaurogan nga ginsisidngan an mga naatender nga bilngon an pinakahirani nga exit antes magtikang an programa. Kay ano? Basi makabaya dayon hira kon may mahitabo nga emergency. Ha pariho nga paagi, mahimo kita magplano kon ano an aton bubuhaton kon tigda nga makakita kita hin imoral ngan bayolente gud nga eksena, o materyal tikang ha mga apostata samtang nag-i-Internet kita o nagkikita hin pelikula o programa ha TV. Kon mag-aandam kita han posible mahitabo, makakagios dayon kita basi diri madaot an aton espirituwalidad ngan magpabilin nga limpyo ha atubangan ni Jehova.​—Sal. 101:3; 1 Tim. 4:12.

19. Ano nga mga bendisyon an aton maieksperyensyahan kon puproteksyonan naton an importante gud nga mga butang nga iginhatag ha aton ni Jehova?

¹⁹ Kinahanglan naton bantayan o proteksyonan an importante gud nga mga butang nga iginhatag ha aton ni Jehova​—an presyoso nga mga kamatuoran ha Biblia ngan an pribilehiyo nga itutdo ito ha iba. Kon bubuhaton naton ito, magkakaada kita limpyo nga konsensya, kinabuhi nga may tinuod nga katuyoan, ngan kalipay ha pagbulig ha iba nga makilala hi Jehova. Pinaagi han iya bulig, mapuproteksyonan naton kon ano an iya igintapod ha aton.​—1 Tim. 6:12, 19.