Inin makapainteres nga bersikulo nasiring: “Kon may makita ka nga pagtalumpigos ha pobre ngan pagtalapas ha hustisya ngan katadongan ha imo distrito, ayaw kahipausa hito. Kay ito nga hitaas nga opisyal gin-iinobserbaran han mas hitaas pa ha iya, ngan may-ada pa iba nga mas hitaas pa kay ha ira.”​—Ecles. 5:8.

Ha panhunahuna han mga tawo, ini nga teksto nagtutudlok la ha mga tawo nga may awtoridad ha gobyerno. Pero kon huhunahunaon pa gud naton ito, nagsusumat liwat ito hin usa nga kamatuoran mahitungod kan Jehova, nga magliliaw ngan magpapasarig ha aton.

An Eclesiastes 5:8 nag-uunabi hin usa nga magmarando nga nagtatalumpigos ha mga pobre ngan diri nagpapakita ha ira hin hustisya. Kinahanglan hinumdoman hito nga magmarando nga posible nga gin-iinobserbaran hiya han usa nga mas hitaas an katungdanan o mas daku an awtoridad ha gobyerno kay ha iya. Ngan posible nga may iba pa nga mas hitaas pa ngani an katungdanan. Makasurubo, ha mga gobyerno han tawo, ini ngatanan nga mga magmarando mahimo magin korap, ngan an ordinaryo nga mga tawo nag-aantos tungod hini nga kawaray-hustisya.

Pero, bisan kon baga hin waray na paglaom an mga kahimtang, maliliaw kita ha paghibaro nga hi Jehova ‘nag-iinobserbar bisan ha hitaas nga mga opisyal’ ha gobyerno han tawo. Mahimo kita manginyupo ha Dios ngan ipasa ha iya an aton mga pinas-an. (Sal. 55:22; Fil. 4:6, 7) Maaram kita nga “an mga mata ni Jehova nagkikita ngadto-nganhi ha bug-os nga tuna basi ipakita an iya kusog para hadton bug-os an kasingkasing ngadto ha iya.”​—2 Cron. 16:9.

Salit an Eclesiastes 5:8 nagpapahinumdom ha aton han tinuod nga sitwasyon han mga tawo ha gobyerno; pirme may-ada usa nga mas daku an awtoridad. Ngan an mas importante, ini nga teksto nagpapahinumdom ha aton nga hi Jehova an pinakahitaas, oo, an Supremo nga Awtoridad. Nagmamando na hiya yana pinaagi han iya Anak, nga hi Jesu-Kristo, an Hadi han Ginhadian. An Makagarahum-ha-ngatanan, nga nag-iinobserbar ha kada tagsa, nagpapakita gud hin hustisya, ngan sugad man an iya Anak.