1. San-o mahimo magin makuri an pag-alagad kan Jehova?

PARA ha imo, san-o an pinakamakuri nga panahon ha pag-alagad kan Jehova​—kon may gin-aatubang ka nga makuri nga mga problema o kon waray? Kon may mga problema kita, nasarig dayon kita kan Jehova. Pero ano an aton ginbubuhat kon murayaw an aton kinabuhi? Nahingangalimot ba kita usahay nga importante an pag-alagad ha Dios? Ginpahamangnoan ni Jehova an mga Israelita nga posible gud ini mahitabo.​—Deut. 6:10-12.

2. Ano nga ehemplo an iginpakita ni Hadi Asa?

² Hi Hadi Asa maopay gud nga ehemplo kay ginios hiya hin makinaadmananon pinaagi ha pagsarig hin bug-os kan Jehova. Nag-alagad hiya kan Jehova diri la ha maraot nga mga panahon kondi pati liwat ha murayaw nga mga panahon. Tikang ha tinikangan, “bug-os nga debotado an kasingkasing ni Asa ngadto kan Jehova.” (1 Hadi 15:14, ftn.) An usa nga paagi nga iginpakita ni Asa an iya debosyon amo an pagtapos han buwa nga pagsingba ha Juda. An Biblia nasiring nga “iya ginpananggal an mga halaran han mga dios han iba nga mga nasud ngan an higtaas nga mga lugar, gindugmok an sagrado nga mga harigi, ngan gin-utod an sagrado nga mga poste.” (2 Cron. 14:3, 5) Iya pa ngani gintanggal an iya lola nga hi Maaca ha iya hitaas nga katungdanan. Kay ano? Kay gin-aghat niya an mga tawo nga magsingba ha idolo.​—1 Hadi 15:11-13.

3. Ano an aton hihisgotan hini nga artikulo?

³ Labot pa han pagbungkag ha mga idolo, ginbuligan liwat ni Asa an mga tawo ha Juda nga magsingba utro kan Jehova. Ginbendisyonan ni Jehova hi Asa ngan an mga Israelita hin murayaw nga panahon. * Ha sulod hin napulo ka tuig durante han pagmando ni Asa, “waray samok ha tuna.” (2 Cron. 14:1, 4, 6) Hihisgotan  hini nga artikulo kon paonan-o gin-gamit ni Asa iton murayaw nga panahon. Katapos, hihisgotan naton an ehemplo han siyahan-siglo nga mga Kristiano nga ginsalingabot an murayaw nga panahon pariho kan Asa. Katima, babatunon naton ini nga pakiana: Kon naukoy ka ha nasud diin igintutugot an pagsingba kan Jehova, paonan-o mo magagamit hin maopay iton murayaw nga panahon?

4. Sumala ha 2 Cronicas 14:2, 6, 7, paonan-o gin-gamit ni Asa an murayaw nga panahon?

⁴ Basaha an 2 Cronicas 14:2, 6, 7. Ginsidngan ni Asa an katawohan nga hi Jehova an ‘naghatag ha ira hin kapahuwayan ha bisan diin.’ Waray hunahunaa ni Asa nga panahon ha pagrelaks inin murayaw nga panahon. Lugod, naghimo hiya hin mga syudad, mga pader, mga torre, ngan mga ganghaan. Ginsidngan niya an mga taga-Juda: “Aton pa an tuna.” Ano an iya karuyag sidngon? Karuyag sidngon niya nga an mga tawo makakagios-gios ha tuna nga iginhatag ha ira han Dios ngan makakagtukod nga waray pagkontra tikang ha mga kaaway. Gin-aghat niya an mga tawo nga salingabuton inin murayaw nga panahon.

5. Kay ano nga ginparig-on ni Asa an iya pwersa-militar?

⁵ Gin-gamit liwat ni Asa an murayaw nga panahon basi parig-unon an iya pwersa-militar. (2 Cron. 14:8) Nagpapasabot ba ito nga waray hiya pagsarig kan Jehova? Diri. Lugod, maaram hi Asa nga obligasyon niya sugad nga hadi nga iandam an katawohan ha mga problema nga mahimo nira atubangon. Maaram hiya nga an murayaw nga panahon nga napapahimulosan han Juda posible nga temporaryo la, ngan nagin tinuod ito.

6. Paonan-o gin-gamit han siyahan-siglo nga mga Kristiano an murayaw nga panahon?

⁶ Bisan kon damu ka beses nga gintimaraot an siyahan-siglo nga mga Kristiano, nagpahimulos  liwat hira hin murayaw nga mga panahon. Paonan-o gin-gamit han matinumanon nga mga disipulo ito nga mga panahon? Madasigon nga iginsangyaw nira an maopay nga sumat. An rekord ha Buhat nasiring nga ‘nagkinabuhi hira nga may kahadlok kan Jehova.’ Padayon hira nga nagsangyaw han maopay nga sumat, ngan an resulta, “padayon hira nga nagtikadamu.” Klaro nga ginbendisyonan ni Jehova an ira maduruto nga pagsangyaw ha murayaw nga mga panahon.​—Buh. 9:26-31.

7-8. Ano an ginbuhat ni Pablo ngan han iba han nagkaada hira oportunidad? Isaysay.

⁷ Ginsalingabot han siyahan-siglo nga mga disipulo an tagsa nga oportunidad basi maisangyaw an maopay nga sumat. Pananglitan, han nakita ni apostol Pablo an oportunidad nga makasangyaw ha damu nga tawo ha Efeso, nagpabilin hiya didto basi magsangyaw ngan manhimo hin disipulo.​—1 Cor. 16:8, 9.

⁸ Hi Pablo ngan an iba pa nga mga Kristiano nagkaada usa pa nga oportunidad nga makasangyaw ha damu nga tawo han nasulbad an isyu han pagturi han 49 C.E. (Buh. 15:23-29) Katapos maisumat ha mga kongregasyon an desisyon, an mga disipulo nangalimbasog gud nga ipasamwak an “maopay nga sumat han pulong ni Jehova.” (Buh. 15:30-35) Ano an resulta? An Biblia nasiring nga ‘an mga kongregasyon padayon nga nagin marig-on ha pagtoo ngan nagtikadamu kada adlaw.’​—Buh. 16:4, 5.

9. Ano an sitwasyon ha damu nga nasud yana, ngan ano an mahimo naton ipakiana ha aton kalugaringon?

⁹ Ha damu nga nasud yana, nakakasangyaw kita nga waray pagkontra. Naukoy ka ba ha nasud diin may kagawasan ka ha pagsingba? Kon oo, pakianhi an imo kalugaringon, ‘Paonan-o ko ginagamit ini nga kagawasan?’ Hinin eksayting nga kataposan nga mga adlaw, ginpapangunahan han organisasyon ni Jehova an pinakadaku nga kampanya han pagsangyaw ngan pagpanutdo nga yana pa gud la nahitabo ha kalibotan. (Mar. 13:10) Damu an aton mahihimo hini nga buruhaton!

10. Ano an igin-aaghat ha aton han 2 Timoteo 4:2?

¹⁰ Paonan-o mo mahimo salingabuton an murayaw nga panahon? (Basaha an 2 Timoteo 4:2.) Usisaha an imo kahimtang ngan kitaa kon puydi mo ba dugangan o han usa nga membro han iyo pamilya an pakigbahin ha pagsangyaw, bangin sugad nga payunir pa ngani. Diri yana an panahon para magtirok hin bahandi ngan materyal nga panag-iya​—mga butang nga diri matatalwas kaupod naton ha daku nga kasakitan.​—Prob. 11:4; Mat. 6:31-33; 1 Juan 2:15-17.

11. Ano an ginhihimo han iba basi masangyawan han maopay nga sumat an mas damu gud nga tawo?

¹¹ Damu nga magwarali an nag-aaram hin iba nga linggwahe basi magamit nira ito ha pagsangyaw ngan pagpanutdo. Ginsusuportaran hira han organisasyon han Dios pinaagi ha paghimo hin basado ha Biblia nga mga materyal ha nagtitikadamu nga linggwahe. Pananglitan han 2010, an aton mga literatura available ha mga 500 nga linggwahe. Yana, nadugangan ito, ngan nagin sobra 1,000 nga linggwahe na!

12. Paonan-o nagpapahimulos an mga tawo kon nababatian nira an mensahe han Ginhadian ha ira kalugaringon nga linggwahe? Paghatag hin ehemplo.

¹² Ano an epekto ha mga tawo kon nababatian nira an kamatuoran han Pulong han Dios ha ira kalugaringon nga linggwahe? Tagda an eksperyensya han sister nga nakapahimulos ha usa nga regional nga kombensyon ha Memphis, Tennessee, U.S.A. Kinyarwanda an linggwahe han kombensyon; ginagamit ito ha Rwanda, Congo (Kinshasa), ngan Uganda. Katapos han kombensyon, an sister nga Kinyarwanda an linggwahe, nagsiring: “Yana ko pa gud la bug-os nga naintindihan an usa nga kombensyon tikang han binalhin ako ha United States, 17 ka tuig na an naglabay.” Klaro nga nabantad gud an kasingkasing han sister han nabatian niya an programa ha iya kalugaringon  nga linggwahe. Kon igintutugot han imo kahimtang, puydi ka ba mag-aram hin iba nga linggwahe basi buligan an iba ha iyo teritoryo? Posible ba nga maopay gud ito himoon kay may mga tawo ha iyo teritoryo nga mas komportable gud ha iba nga linggwahe? An imo pangalimbasog makakapalipay gud ha imo.

13. Paonan-o gin-gamit han aton kabugtoan ha Russia an murayaw nga panahon?

¹³ Diri ngatanan han aton kabugtoan may kagawasan ha pagsangyaw. May mga panahon nga limitado gud an aton nahihimo ha ministeryo tungod han mga pagdiri han gobyerno. Pananglitan, tagda an aton kabugtoan ha Russia. Gintimaraot hira ha sulod hin damu ka tuig, pero han Marso 1991, gintagan hira han gobyerno hin kagawasan ha pagsingba. Hito nga panahon, mga 16,000 an mga magwarali ha Russia. Paglabay hin 20 ka tuig, nadugangan ito ngan nagin sobra 160,000 na! Klaro nga ginsalingabot han aton kabugtoan an panahon nga may kagawasan hira ha pagsangyaw. Iton murayaw nga panahon waray magpadayon. Pero bisan kon nagbag-o an ira kahimtang, waray gud maibani an ira kadasig. Padayon nga ginbuhat nira an tanan nga ira mahihimo ha pag-alagad kan Jehova.

14-15. Paonan-o iginpakita ni Jehova an iya gahum ha pagbulig kan Asa?

¹⁴ Ha panahon ni Asa, an murayaw nga panahon, ha urhi natapos. Usa nga daku nga pwersa-militar​—usa ka milyon nga kasundalohan—​an inabot tikang ha Etiopia. An kumander hito nga hi Zera, kompyansa gud nga mapipirde niya ngan han iya kasundalohan an Juda. Pero hi Hadi Asa sinarig, diri ha kadamu han iya kasundalohan, kondi ha iya Dios nga hi Jehova. Hi Asa nag-ampo: “Buligi kami, O Jehova nga amon Dios, kay nasarig kami ha imo, ngan ha imo ngaran kinanhi kami kontra hini nga damu nga tawo.”​—2 Cron. 14:11.

¹⁵ Bisan kon haros doble an kadamu han  kasundalohan han Etiopia, maaram hi Asa nga may gahum ngan abilidad hi Jehova ha pagbulig ha Iya katawohan. Ngan ginbuhat gud ito ni Jehova; an kasundalohan han Etiopia nakaeksperyensya hin makaarawod nga kapirdihan.​—2 Cron. 14:8-13.

16. Paonan-o naton nahibaroan nga an murayaw nga panahon diri magpapadayon?

¹⁶ Bisan kon diri kita maaram han mga detalye kon ano an mahitatabo ha tagsa ha aton ha tiarabot nga panahon, maaram kita nga an murayaw nga panahon nga napapahimulosan han katawohan han Dios yana temporaryo la. Ngani, gintagna ni Jesus nga ha kataposan nga mga adlaw, an iya mga disipulo “kangangalasan . . . han ngatanan nga nasud.” (Mat. 24:9) Sugad man, hi apostol Pablo nagsiring nga “pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.” (2 Tim. 3:12) Hi Satanas “may daku nga kasina,” ngan ginlilimbongan naton an aton kalugaringon kon ginhuhunahuna naton nga malilikyan ta an iya kasina.​—Pah. 12:12.

17. Ha ano nga mga paagi bangin masarihan an aton pagtoo?

¹⁷ Diri mag-iiha, tanan kita maatubang hin mga pagsari ha aton integridad. Magkakaada “daku nga kasakitan nga waray pa mahitabo tikang ha tinikangan han kalibotan tubtob yana.” (Mat. 24:21) Hito nga panahon, bangin kontrahon kita han aton mga kapamilya ngan igdiri an aton buruhaton. (Mat. 10:35, 36) Pariho kan Asa, masarig ba kita ha bulig ngan proteksyon ni Jehova?

18. Sumala ha Hebreo 10:38, 39, ano an mabulig ha aton basi magin andam para ha kataposan han murayaw nga panahon?

¹⁸ Igin-aandam kita ni Jehova yana basi magin marig-on an aton pagtoo. Gin-gigiyahan niya an “matinumanon ngan maaramon nga uripon” basi magtagana hin espirituwal nga “pagkaon ha husto nga panahon” para mabuligan kita nga magpabilin nga marig-on ha aton pagsingba. (Mat. 24:45) Pero kinahanglan naton buhaton an aton bahin ngan parig-unon an aton pagtoo kan Jehova.​—Basaha an Hebreo 10:38, 39.

19-20. Uyon ha 1 Cronicas 28:9, ano an angay naton igpakiana ha aton kalugaringon, ngan kay ano?

¹⁹ Pariho kan Hadi Asa, kinahanglan naton “pamilngon hi Jehova.” (2 Cron. 14:4; 15:1, 2) Ginbibiling naton hi Jehova pinaagi ha pagkilala ha iya ngan pagpabawtismo. Ginbubuhat naton an tanan nga aton mahihimo basi magin marig-on  an aton gugma kan Jehova. May kalabotan hito, mahimo naton pakianhan an aton kalugaringon, ‘Regular ba ako nga natambong ha mga katirok han kongregasyon?’ Kon natambong kita ha mga katirok nga igin-aandam han organisasyon ni Jehova, nakakakarawat kita hin tinuod nga karepreskohan ha espirituwal ngan makaparig-on nga pakig-upod. (Mat. 11:28) Mahimo liwat naton pakianhan an aton kalugaringon, ‘Regular ko ba nga gin-aadman an Biblia?’ Kon naukoy ka upod han imo pamilya, naggagahin ka ba hin panahon kada semana para ha pagsingba han pamilya? O kon nag-uusahan ka, naggagahin ka ba gihapon hin panahon nga sugad hin bahin ka han usa nga pamilya? Ngan bug-os ka ba nga nakikigbahin ha pagsangyaw ngan panhimo hin mga disipulo?

²⁰ Kay ano nga kinahanglan naton ito ipakiana ha aton kalugaringon? An Biblia nagsusumat ha aton nga gin-uusisa ni Jehova an aton panhunahuna ngan an aton kasingkasing, salit ito liwat an angay naton himoon. (Basaha an 1 Cronicas 28:9.) Kon nakikita naton nga kinahanglan maghimo kita hin mga pagbag-o ha aton mga tumong, disposisyon, o panhunahuna, kinahanglan mangaro kita kan Jehova hin bulig basi mahimo ito. Yana na an panahon basi iandam an aton kalugaringon para ha maabot nga mga pagsari. Ayaw gud tuguti an bisan ano nga makaulang ha imo ha pagsalingabot han murayaw nga panahon!