1. Ano nga praktikal nga tumong an mahimo naton himoon samtang nagtitikalagas kita?

SAMTANG nagtitikalagas kita, bangin mabaraka kita nga diri na damu an aton mabuhat para ha pag-alagad kan Jehova kon ikompara hadto. Bisan kon tinuod nga an aton kusog diri na pariho han hadto, magagamit naton an aton kinaadman ngan mga eksperyensya basi mabuligan an burobata nga kabugtoan nga mas damu an ira mahimo ha pag-alagad kan Jehova ngan kumarawat hin dugang nga mga responsabilidad. Usa nga maiha na nga tigurang an nagsiring, “Han limitado na an akon mga nahihimo tungod han akon edad, mapasalamaton ako nga may kwalipikado nga burobata nga mga brother nga andam magbuhat han buruhaton.”

2. Ano an aton hihisgotan hini nga artikulo?

² Ginhisgotan han nauna nga artikulo nga nagpapahimulos an burobata nga kabugtoan kon nakikigsangkay hira ha lagas na nga kabugtoan. Hini nga artikulo, mahibabaroan naton kon paonan-o an mga kalidad sugad han pagin mapainubsanon, pagkilala han mga limitasyon, pagin mapasalamaton, ngan pagin mahinatagon makakabulig ha lagas nga kabugtoan samtang nagbubuhat hira kaupod han burobata nga kabugtoan, ngan magigin bendisyon ito ha bug-os nga kongregasyon.

3. Sumala ha Filipos 2:3, 4, ano an pagkamapainubsanon, ngan paonan-o ito makakabulig ha usa nga Kristiano?

³ Kinahanglan magin mapainubsanon an lagas nga kabugtoan kon karuyag nira buligan an mga burobata. Ginhuhunahuna han mapainubsanon nga tawo nga labaw ha iya an iba. (Basaha an Filipos 2:3, 4.) An mapainubsanon nga lagas nga kabugtoan maaram nga ha damu nga kahimtang diri la usa an Kasuratanhon ngan epektibo nga paagi ha pagtuman han usa nga toka. Salit  diri hira naglalaom nga an paagi han iba ha pagbuhat han usa nga butang magigin pariho han ira paagi ha pagbuhat hito hadto. (Ecles. 7:10) Bisan kon damu an ira maitututdo ha mga burobata tungod han ira mga eksperyensya, maaram hira nga “nagbabag-o an mga panhitabo hini nga kalibotan” ngan bangin kinahanglan magpahiuyon hira ha bag-o nga mga kahimtang.​—1 Cor. 7:31.

4. Paonan-o iginpapakita han mga paramangno han sirkito an disposisyon nga pariho han kanan mga Levita?

⁴ Ginkakarawat han mapainubsanon nga lagas nga kabugtoan nga samtang nagkakaedad hira, diri na sugad kadamu an ira nahihimo kay han hadto. Pananglitan, tagda an mga paramangno han sirkito. Kon mag-70 anyos hira, gintatagan hira hin iba nga toka. Bangin makuri ito para ha ira. Nalilipay hira ha pribilehiyo nga magserbi ha kabugtoan. Hinigugma gud nira an ira toka, ngan karuyag pa gihapon nira mag-alagad hito nga paagi. Pero nasasabtan nira nga mas maopay kon burobata an magbubuhat hito nga buruhaton. Salit iginpapakita nira an disposisyon nga pariho han kanan mga Levita ha kadaan nga Israel, nga kon nag-iedad na hin 50 anyos, gin-oobligar hira nga diri na mag-alagad ha tabernakulo. An kalipay hiton edaran na nga mga Levita diri nakadepende ha usa nga partikular nga pribilehiyo. Bug-os nga ginpapahimulsan nira an mga pribilehiyo nga abrido ha ira, ngan ginbubuhat nira an ira bug-os nga makakaya basi buligan an mga burobata. (Num. 8:25, 26) Yana, an mga paramangno han sirkito hadto, bisan kon diri na nabisita ha damu nga kongregasyon, bendisyon gud ha kongregasyon diin hira nakatoka.

5. Ano an imo nahibaroan ha ehemplo nira Dan ngan Katie?

 ⁵ Tagda an ehemplo ni Dan, nga nagin paramangno han sirkito hin 23 ka tuig. Han nag-70 anyos na hiya, hiya ngan an iya asawa nga hi Katie, igintoka sugad nga espesyal payunir. Paonan-o hira nag-i-enjoy ha ira bag-o nga toka? Hi Dan nagsiring nga nagin mas busy gud hiya yana! Gintutuman niya an iya mga responsabilidad ha kongregasyon, ginbubuligan an mga brother nga magin kwalipikado sugad nga mga ministeryal nga surugoon, ngan ginbabansay an iba ha pagsangyaw ha mga syudad ngan ha mga prisohan. Mga lagas na nga kabugtoan, aada ka man ha bug-os-panahon nga pag-alagad o waray, damu an imo mahihimo ha pagbulig ha iba. Paonan-o? Ig-enjoy an imo bag-o nga kahimtang, paghimo hin bag-o nga mga tumong, ngan pagpokus ha imo makakaya imbes ha diri mo kaya buhaton.

6. Kay ano nga maaramon kon kikilalahon naton an aton mga limitasyon? Iilustrar.

⁶ Importante nga kilalahon han usa nga tawo an iya mga limitasyon. Kon ginkikilala niya an iya mga limitasyon, diri hiya maglalaom hin labaw kay han iya makakaya. Salit magpapabilin hiya nga malipayon ngan maduruto ha buruhaton. An usa nga tawo nga may sugad hito nga kalidad maipapariho naton ha usa nga nagdadrayb ha sagkahon nga dalan. Kinahanglan ibanan han drayber an kambyo basi padayon hiya nga makasagka. Oo, posible nga magin mas mahinay an iya dalagan, pero padayon hiya nga maabante. Sugad man, an usa nga naakseptar han iya mga limitasyon maaram kon san-o niya angay ibanan an kambyo, siring pa, basi padayon hiya nga magin aktibo ngan damu an mabuhat ha pag-alagad kan Jehova.​—Fil. 4:5.

7. Paonan-o iginpakita ni Barzilai nga ginkikilala niya an iya mga limitasyon?

⁷ Hunahunaa an ehemplo ni Barzilai, nga 80 anyos na han gin-imbitar ni Hadi David nga magin membro han palasyo. Maaram hi Barzilai nga limitado na an iya mahihimo tungod han iya edad, salit waray niya ito karawata. Lugod, iginrekomendar niya an burobata nga hi Kimham nga sumaliwan ha iya. (2 Sam. 19:35-37) Pariho kan Barzilai, nalilipay an lagas na nga mga brother nga ihatag ha burobata nga mga brother an oportunidad nga mag-asikaso han mga buruhaton.

8. May kalabotan ha pagtukod han templo, paonan-o iginpakita ni Hadi David nga ginkikilala niya an iya mga limitasyon?

⁸ Hi Hadi David nagpakita liwat hin maopay gud nga ehemplo may kalabotan ha pagkilala han mga limitasyon. Karuyag gud niya magtukod hin balay para kan Jehova. Pero han ginsidngan hiya ni Jehova nga ito nga pribilehiyo ihahatag ha batan-on nga hi Solomon, gin-akseptar ni David an desisyon ni Jehova ngan bug-os-kasingkasing nga ginsuportaran niya ito nga proyekto. (1 Cron. 17:4; 22:5) Waray hunahunaa ni David nga mas maopay kon hiya an magbubuhat hito nga toka tungod kay hi Solomon “batan-on pa ngan waray eksperyensya.” (1 Cron. 29:1) Maaram hi David nga an kalamposan han pagtukod hito nga proyekto nakadepende ha bendisyon ni Jehova, diri ha edad o ha eksperyensya han mga nangunguna hito. Sugad nga pagsubad kan David, an lagas nga kabugtoan yana nagpapabilin nga aktibo bisan kon nagbabag-o an ira toka. Ngan maaram hira nga bibendisyonan ni Jehova an mga batan-on nga nagbubuhat han buruhaton nga ira hadto ginhihimo.

9. Paonan-o iginpakita han usa nga membro han Branch Committee nga ginkikilala niya an iya mga limitasyon?

⁹ An usa nga maopay nga ehemplo ha aton panahon nga naakseptar han iya mga limitasyon amo hi Brother Shigeo. Han 1976, han 30 anyos hiya, ginpili hiya sugad nga membro han usa nga Branch Committee. Han 2004, nagin koordinetor hiya han Branch Committee. Ha urhi, nasantop niya nga nagtitikaluya na hiya ngan diri dayon niya natatapos an iya mga buruhaton. Igin-ampo niya ito ngan ginpamalandong kon kay  ano nga mas maopay kon burobata nga brother an tatagan hito nga toka. Bisan kon diri na hi Shigeo an koordinetor, padayon la gihapon hiya nga nakooperar ha iba nga mga membro han Branch Committee. Sugad han aton nahibaroan ha ehemplo nira Barzilai, Hadi David, ngan Shigeo, an usa nga tawo nga mapainubsanon ngan naakseptar han iya mga limitasyon magpupokus diri ha kakulang hin eksperyensya han mga batan-on kondi ha ira kusog. Huhunahunaon niya hira diri sugad nga kakompetensya, kondi sugad nga mga igkasi-magburuhat.​—Prob. 20:29.

10. Ano an panhunahuna han lagas na nga kabugtoan ha mga batan-on ha kongregasyon?

¹⁰ Ginhuhunahuna han lagas na nga kabugtoan nga regalo ni Jehova an mga batan-on, ngan mapasalamaton hira tungod hito. Samtang nagtitikaluya hira, mapasalamaton hira nga adton magkusog pa nga mga batan-on andam ngan kaya magtuman han mga responsabilidad ngan magserbi ha kongregasyon.

11. Paonan-o iginpapakita han Ruth 4:13-16 nga nagpapahimulos gud an mga lagas kon ginkakarawat nira an bulig han mga burobata?

¹¹ An tawohan ha Biblia nga hi Noemi usa nga maopay gud nga ehemplo hin lagas na nga mapasalamaton nga kinarawat hin bulig tikang ha usa nga burobata. Ha siyahan, gin-aghat ni Noemi an iya balo na nga umagad nga hi Ruth nga bumalik ha iya pamilya. Pero han nag-insister hi Ruth nga maupod hiya kan Noemi pagbalik ha Bethlehem, ginkarawat niya an bulig ni Ruth. (Ruth 1:7, 8, 18) Ngan bendisyon gud ito ha ira nga duha! (Basaha an Ruth 4:13-16.) An pagin mapainubsanon magpapagios ha lagas na nga kabugtoan nga subaron an ehemplo ni Noemi.

12. Paonan-o iginpakita ni apostol Pablo an iya pagin mapasalamaton?

¹² Hi apostol Pablo mapasalamaton ha bulig nga iya nakarawat. Pananglitan, ginpasalamatan  niya an mga Kristiano ha Filipos ha mga regalo nga ira iginpadara para ha iya. (Fil. 4:16) Iya iginpahayag an iya pagpasalamat ha bulig nga iginhatag ha iya ni Timoteo. (Fil. 2:19-22) Ngan ginpasalamatan ni Pablo an Dios tungod hadton kinadto ha iya basi parig-unon hiya han iginbibiyahe hiya ngadto ha Roma sugad nga priso. (Buh. 28:15) Hi Pablo matibaksi nga tawo nga nagbiyahe hin yinukot ka kilometro basi magsangyaw ngan magparig-on ha mga kongregasyon. Bisan pa hito, mapainubsanon nga ginkarawat niya an bulig han iya kabugtoan.

13. Paonan-o maipapakita han lagas na nga kabugtoan nga mapasalamaton hira ha mga batan-on?

¹³ Mga lagas na nga kabugtoan, maipapakita niyo nga mapasalamaton kamo ha mga batan-on ha iyo kongregasyon ha damu nga paagi. Kon karuyag nira nga buligan kamo ha transportasyon, ha pamalit, o ha iba pa nga buruhaton, mapasalamaton nga karawata an ira bulig. Hunahunaa an ira bulig sugad nga kapahayagan han gugma ni Jehova ha iyo. Bangin magin duok niyo hira nga kasangkayan. Pangalimbasog pirme nga buligan an iyo batan-on nga kasangkayan nga mag-uswag ha espirituwal, ngan isumat ha ira nga nalilipay gud kamo kon nakikita niyo an mga batan-on nga naniningkamot nga magbuhat hin dugang pa ha kongregasyon. Ngan paghatag hin panahon nga isumat ha ira an iyo mga eksperyensya. Kon bubuhaton niyo ito, maipapakita niyo an iyo pagkamapasalamaton kan Jehova tungod han mga batan-on nga iya iginpahirani ha kongregasyon.​—Col. 3:15; Juan 6:44; 1 Tes. 5:18.

14. Paonan-o iginpakita ni Hadi David an iya pagin mahinatagon?

¹⁴ Ha ehemplo ni Hadi David, may mahibabaroan kita nga usa pa nga importante nga kalidad nga kinahanglan ipakita han lagas na nga kabugtoan​—an pagin mahinatagon. Naghatag hiya hin damu nga donasyon tikang ha iya personal nga mga bahandi basi suportaran an konstruksyon han templo. (1 Cron. 22:11-16; 29:3, 4) Ginbuhat niya ito bisan kon an iya anak nga hi Solomon an kikilalahon nga naghimo hito nga proyekto. Kon diri na kaya han aton kusog para makaboluntaryo ha mga proyekto ha pagpanukod han organisasyon ni Jehova, makakasuporta la gihapon kita hito pinaagi ha paghatag hin mga donasyon nga aton makakaya. Ngan mabubuligan naton an mga batan-on nga makapahimulos tikang ha aton mga eksperyensya ha naglabay nga katuigan.

15. Ano nga importante nga mga regalo an iginhatag ni apostol Pablo kan Timoteo?

¹⁵ May kalabotan ha pagin mahinatagon, tagda an ehemplo nga iginpakita ni apostol Pablo. Gin-imbitar niya hi Timoteo nga umupod ha iya mga pagbiyahe sugad nga misyonero, ngan igintutdo niya hini nga batan-on an iya mga pamaagi ha pagsangyaw ngan pagtutdo. (Buh. 16:1-3) An pagbansay ni Pablo kan Timoteo nakabulig ha iya nga magin epektibo ha pagpasamwak han maopay nga sumat. (1 Cor. 4:17) Katapos, gin-gamit liwat ni Timoteo an mga pamaagi ni Pablo basi bansayon an iba.

16. Kay ano nga ginbansay ni Shigeo an iba?

¹⁶ An lagas nga kabugtoan yana diri nababaraka nga magigin waray na hira pulos kon babansayon nira an mga burobata ha pagbuhat han buruhaton nga ira hadto ginhihimo ha kongregasyon. Pananglitan, ha naglabay nga mga tuig, hi Shigeo nga gin-unabi kanina naghatag hin praktikal nga pagbansay ha burobata nga mga membro han Branch Committee. Ginbuhat niya ito basi makabulig ha mga buruhaton han Ginhadian ha nasud diin hiya nag-aalagad. Sugad nga resulta, han inabot an panahon nga kinahanglan na hiya saliwnan, may-ada na brother nga ginbansay hin maopay nga masaliwan ha iya sugad nga koordinetor. Padayon nga igintututdo ni Shigeo ha burobata nga mga brother an iya mga eksperyensya ha iya sobra 45 ka tuig na nga  pagin membro han Branch Committee. Bendisyon gud ha katawohan han Dios an sugad nga kabugtoan!

17. Uyon ha Lucas 6:38, ano an maihahatag han lagas na nga kabugtoan?

¹⁷ Kamo nga lagas na nga kabugtoan ebidensya gud nga an pag-alagad kan Jehova nga may pagtoo ngan integridad amo an pinakamaopay nga paagi han pagkinabuhi. Pinaagi han iyo ehemplo, iginpapakita niyo nga diri gud karag an mga pangalimbasog nga mahibaroan an mga prinsipyo ha Biblia ngan maiaplikar ito ha iyo kinabuhi. Tikang ha iyo eksperyensya, maaram kamo kon paonan-o ginbubuhat an mga buruhaton hadto. Pero nasasabtan liwat niyo nga kinahanglan kamo magpahiuyon ha nagbabag-o nga mga sitwasyon. Kamo nga lagas na nga kabugtoan nga bag-o pa la nga nabawtismohan may-ada liwat damu nga maihahatag. Mahimo niyo isumat kon paonan-o kamo nagin malipayon han nakilala niyo hi Jehova durante hito nga iyo pangidaron. Malilipay gud an mga burobata nga mabatian an iyo mga eksperyensya ngan an mga leksyon nga iyo nahibaroan. Kon babatasanon niyo an paghatag tikang ha iyo damu nga eksperyensya, hura nga bibendisyonan kamo ni Jehova.​—Basaha an Lucas 6:38.

18. Kon magbibinuligay an mga lagas ngan an burobata nga kabugtoan, ano an mapapahimulsan nira ha usa kag usa?

¹⁸ Hinigugma nga mga lagas nga kabugtoan, samtang nangangalimbasog kamo nga magin duok ha burobata nga kabugtoan, mabubuligan niyo an usa kag usa. (Roma 1:12) An kada tagsa may-ada maihahatag nga importante nga waray ha iba. An lagas na nga kabugtoan may-ada kinaadman ngan eksperyensya nga ira natirok ha paglabay han panahon. An mga burobata may-ada kusog. Kon an mga batan-on ngan an lagas na nga kabugtoan magkaupod nga nagbubuhat sugad nga magsarangkay, nadadayaw nira an aton mahigugmaon nga Amay ha langit ngan bendisyon hira ha ngatanan nga kabugtoan ha kongregasyon.