1. Sumala ha Malakias 3:16, ano nga libro an ginsusurat ni Jehova, ngan ano an aada hito?

 HA SULOD hin yinukot na ka tuig, hi Jehova may ginsusurat nga espesyal nga libro. Ini nga libro may lista hin mga ngaran, nga nagtitikang ha siyahan nga matinumanon nga saksi, hi Abel. * (Luc. 11:50, 51) Tikang hito nga panahon, hi Jehova nagdudugang hin mga ngaran dida hito nga libro, ngan yana minilyon na nga ngaran an aada hito. Ha Biblia, ito nga libro gintatawag nga “libro han hinumdóman,” “libro han kinabuhi,” ngan “linukot nga basahon han kinabuhi.” Hini nga artikulo, tatawagon naton ito nga “libro han kinabuhi.”—Basaha an Malakias 3:16; Pah. 3:5; 17:8.

2. Kan kanay mga ngaran an nakasurat ha libro han kinabuhi, ngan paonan-o mahiuupod an aton ngaran hito nga libro?

² Aada hinin espesyal nga libro an mga ngaran han ngatanan nga nagsisingba kan Jehova nga may kahadlok, o hilarom nga respeto, ngan nahigugma ha iya ngaran. Magkakaada hira oportunidad nga makakarawat hin kinabuhi nga waray kataposan. Yana, an aton ngaran mahimo mahisurat hito nga libro kon magkukultibar kita hin duok ngan personal nga relasyon kan Jehova nga iginbase ha halad-lukat han iya Anak, hi Jesu-Kristo. (Juan 3:16, 36) Karuyag naton ngatanan nga an aton ngaran mahisurat hito nga libro—may paglaom man kita nga mabuhi ha langit o ha tuna.

3-4. (a) Mabubuhi ba kita ha waray kataposan kon an aton ngaran nakasurat yana ha libro han kinabuhi? Isaysay. (b) Ano an hihisgotan hini nga artikulo ngan ha masunod?

³ Nagpapasabot ba ini nga an ngatanan nga tawo nga an ngaran  nakasurat hini nga libro sigurado nga makakakarawat hin kinabuhi nga waray kataposan? An baton hito makikita ha ginsiring ni Jehova kan Moises, nga mababasa ha Exodo 32:33. Hi Jehova nagsiring: “An bisan hin-o nga nakasala ha akon, paparaon ko hiya tikang ha akon libro.” Salit an mga ngaran nga nakasurat yana hito nga libro puydi pa mapara, nga sugad hin lapis la anay an gin-gamit ni Jehova ha pagsurat hito nga mga ngaran. (Pah. 3:5) Kinahanglan siguruhon ta nga an aton ngaran magpabilin hito nga libro tubtob nga permanente na ito nga maisurat gamit an tinta, siring pa.

⁴ Tungod hini, may nabangon nga mga pakiana. Pananglitan, ano an ginsisiring han Biblia mahitungod ha mga tawo nga an ngaran nakasurat ha libro han kinabuhi ngan ha mga tawo nga an ngaran diri nakasurat didto? San-o an mga tawo nga an mga ngaran nagpapabilin hito nga libro makakakarawat hin kinabuhi nga waray kataposan? Kumusta man adton nagkamatay nga waray magkaada oportunidad nga makilala hi Jehova? Posible ba nga an ira mga ngaran mahisurat hito nga libro? Ini nga mga pakiana babatunon hini nga artikulo ngan ha masunod.

KAN KANAY MGA NGARAN AN AADA HA LIBRO?

5-6. (a) Sugad han ginpapabug-atan ha Filipos 4:3, kan kanay mga ngaran an kaapi hadton nakasurat ha libro han kinabuhi? (b) San-o permanente nga isusurat ha libro han kinabuhi an ira mga ngaran?

⁵ Kan kanay mga ngaran an nakasurat ha libro han kinabuhi? Basi mabaton ito nga pakiana, hihisgotan naton an lima nga grupo hin mga tawo. An pipira nga grupo nakasurat an ira ngaran ha libro han kinabuhi, pero an iba diri.

⁶ An siyahan nga grupo ginkukompwesto han mga ginpili nga magmando upod ni Jesus ha langit. An ira ba mga ngaran nakasurat yana ha libro han kinabuhi? Oo. Sumala ha ginsiring ni apostol Pablo ha iya mga “igkasi-magburuhat” ha Filipos, an mga ngaran han mga dinihogan, nga gintawag basi magmando upod ni  Jesus, aada yana ha libro han kinabuhi. (Basaha an Filipos 4:3.) Pero basi matipigan dida hiton simboliko nga libro an ira mga ngaran, kinahanglan magpabilin hira nga matinumanon. Katapos, kon makarawat na nira an ultimo nga pagselyo ha ira, antes man hira mamatay o antes magtikang an daku nga kasakitan, an ira mga ngaran permanente na nga isusurat dinhi hini nga libro.—Pah. 7:3.

7. Uyon ha ginsisiring ha Pahayag 7:16, 17, ano an aton masasabtan mahitungod ha kon san-o permanente nga isusurat ha libro han kinabuhi an mga ngaran han daku nga grupo han iba nga mga karnero?

⁷ An ikaduha nga grupo ginkukompwesto han daku nga grupo han iba nga mga karnero. An ira ba mga ngaran nakasurat yana ha libro han kinabuhi? Oo. An ira ba mga ngaran aada la gihapon ha libro han kinabuhi katapos nira makatalwas ha Armagedon? Oo. (Pah. 7:14) Hi Jesus nagsiring nga ini nga sugad-karnero nga mga tawo makakakarawat “hin kinabuhi nga waray kataposan.” (Mat. 25:46) Pero diri dayon makakarawat hito nga mga makakatalwas ha Armagedon an kinabuhi nga waray kataposan. Nakalapis la gihapon, siring pa, an ira mga ngaran ha libro han kinabuhi. Ha panahon han Usa ka Yukot ka Tuig nga Pagmando, hi Jesus “mag-aataman ha ira ngan maggigiya ha ira ngadto ha mga burabod han tubig han kinabuhi.” Adton masunod ha paggiya han Kristo ngan ha kataposan huhukman nga matinumanon kan Jehova, an ira mga ngaran permanente na nga isusurat ha libro han kinabuhi.—Basaha an Pahayag 7:16, 17.

8. Kan kanay mga ngaran an diri nakasurat ha libro han kinabuhi, ngan ano an mahitatabo ha ira?

⁸ An ikatulo nga grupo ginkukompwesto han mga kanding, nga bubungkagon ha Armagedon. Waray ha libro han kinabuhi an ira mga ngaran. Nagsiring hi Jesus nga “mamamatay [hira] ha kadayonan.” (Mat. 25:46) Ha paggiya han Dios, hi Pablo nagsumat ha aton nga “ini hira mismo makakakarawat han hudisyal nga sirot nga waray kataposan nga kabungkagan.” (2 Tes. 1:9; 2 Ped. 2:9) Ito liwat an masisiring mahitungod ha mga tawo nga, ha paglabay han panahon, tinuyo nga nakasala ha baraan nga espiritu. Hira liwat mabubungkag ha kadayonan, diri mabubuhi ha waray kataposan. Klaro nga diri hira babanhawon. (Mat. 12:32; Mar. 3:28, 29; Heb. 6:4-6) Yana, usisahon naton hin mas maopay an duha nga grupo han mga tawo nga babanhawon dinhi ha tuna.

AN MGA BABANHAWON

9. Sugad han mababasa ha Buhat 24:15, ano an duha nga grupo han mga tawo nga babanhawon dinhi ha tuna, ngan ano an kaibahan hinin duha nga grupo?

⁹ An Biblia nag-uunabi hin duha nga grupo han mga tawo nga babanhawon nga may paglaom nga mabuhi ha waray kataposan dinhi ha tuna, an “mga magtadong” ngan an “mga diri magtadong.” (Basaha an Buhat 24:15.) An “mga magtadong” amo adton matinumanon nga nag-alagad kan Jehova han buhi pa hira. An “mga diri magtadong” naman waray mag-alagad hin matinumanon kan Jehova. Ngani, an panggawi han kadam-an ha ira diri matadong. Tungod kay babanhawon iton duha nga grupo, makakasiring ba kita nga an ira mga ngaran nakasurat ha libro han kinabuhi? Basi mabaton ito nga pakiana, hisgotan naton an tagsa nga grupo.

10. Kay ano nga babanhawon an “mga magtadong,” ngan ano an magigin pribilehiyo han pipira ha ira? (Kitaa liwat hini nga isyu an “Mga Pakiana Tikang ha mga Magbarasa” may kalabotan ha pagkabanhaw dinhi ha tuna.)

¹⁰ An “mga magtadong” amo an ikaupat nga grupo. Antes hira namatay, an ira mga ngaran nakasurat na ha libro han kinabuhi. Gintanggal ba tikang hito nga libro an ira mga ngaran han namatay hira? Waray, kay buhi la gihapon hira ha panumdoman ni Jehova. “Dios [hi Jehova], diri han mga patay, kondi han mga buhi, kay para ha iya hira ngatanan buhi.” (Luc. 20:38)  Nagpapasabot ini nga kon an mga magtadong banhawon na dinhi ha tuna, an ira mga ngaran hiaagian nga nakasurat ha libro han kinabuhi, pero “nakalapis” la anay. (Luc. 14:14) Sigurado nga an pipira hito nga mga binanhaw tatagan han pribilehiyo nga magin “mga prinsipe ha bug-os nga tuna.”—Sal. 45:16.

11. Ano an kinahanglan mahibaroan han “mga diri magtadong” antes maisurat ha libro han kinabuhi an ira mga ngaran?

¹¹ An kataposan nga aton hihisgotan amo an ikalima nga grupo, an “mga diri magtadong.” Bangin tungod kay diri hira maaram han mga balaud ni Jehova, diri matadong an ira pagkinabuhi antes hira namatay. Salit an ira mga ngaran waray isurat ha libro han kinabuhi. Pero babanhawon hira han Dios basi hatagan hin oportunidad nga an ira mga ngaran maisurat dida hito nga libro. Ini nga “mga diri magtadong” magkikinahanglan hin daku nga bulig. Ha ira kinabuhi hadto, an pipira ha ira nagbuhat hin magraot gud nga butang. Salit kinahanglan hira tutdoan kon paonan-o magkikinabuhi uyon ha magtadong nga suruklan ni Jehova. Basi matuman ito, gigiyahan han Ginhadian han Dios an pinakadaku nga programa han pagpanutdo ha bug-os nga kasaysayan han tawo.

12. (a) Hin-o an magtututdo ha mga diri magtadong? (b) Ano an mahitatabo ha mga nadiri pagbuhat han ira nahibaroan?

¹² Hin-o an magtututdo ha mga diri magtadong? An daku nga grupo ngan an binanhaw nga mga magtadong. Basi mahisurat ha libro han kinabuhi an mga ngaran han mga diri magtadong, kinahanglan nira magkultibar hin maopay nga relasyon kan Jehova ngan magdedikar ha iya. An pag-uswag hini ngatanan nga diri magtadong oobserbaran hin maopay ni Jesu-Kristo ngan han iya mga igkasi-hukom. (Pah. 20:4) An bisan hin-o nga nadiri pagkarawat hito nga bulig diri tutugotan nga magpabilin nga buhi—bisan pa kon bangin 100 an ira edad. (Isa. 65:20) Hi Jehova ngan hi Jesus nakakabasa han kasingkasing ngan sisiguruhon nira nga waray bisan hin-o nga tutugotan nga makahimo hin kadaot ha bag-o nga kalibotan.—Isa. 11:9; 60:18; 65:25; Juan 2:25.

 PAGKABANHAW NGADTO HA KINABUHI NGAN HA PAGHUKOM

13-14. (a) Ano an aton pagsabot hadto ha mga pulong ni Jesus nga mababasa ha Juan 5:29? (b) Ano an dapat naton tigamnan mahitungod hito nga mga pulong?

¹³ Ginhisgotan liwat ni Jesus adton mababanhaw dinhi ha tuna. Pananglitan, nagsiring hiya: “Maabot an oras nga an ngatanan nga aadto ha handumanan nga mga lubnganan makakabati han iya tingog ngan magawas. An mga nagbuhat hin maopay makakakarawat hin pagkabanhaw ngadto ha kinabuhi, ngan an mga nagbuhat hin maraot makakakarawat hin pagkabanhaw ngadto ha paghukom.” (Juan 5:28, 29) Ano an karuyag sidngon ni Jesus?

¹⁴ An aton pagsabot hadto, an mga pulong ni Jesus nagtutudlok ha bubuhaton han mga binanhaw katapos hira banhawon; karuyag sidngon, an pipira mabubuhi ngan magbubuhat hin maopay, pero an iba naman mabubuhi ngan magbubuhat hin maraot. Pero pansina nga waray magsiring hi Jesus nga adton ginawas pa la tikang ha handumanan nga mga lubnganan magbubuhat hin maopay o magbubuhat hin maraot. Lugod, gin-unabi niya adton “nagbuhat hin maopay” ngan adton “nagbuhat hin maraot.” Iginpapakita hini nga ginbuhat nira ito antes hira namatay. Makatadunganon ini nga pagsabot, diri ba? Kay kon huhunahunaon, waray bisan hin-o nga tutugotan nga magbuhat hin maraot ha bag-o nga kalibotan. Sigurado nga ginbuhat han mga diri magtadong inin magraot nga butang antes hira namatay. Kon sugad, ano an karuyag sidngon han ginsiring ni Jesus mahitungod han “pagkabanhaw ngadto ha kinabuhi” ngan “pagkabanhaw ngadto ha paghukom”?

15. Hin-o an makakakarawat hin “pagkabanhaw ngadto ha kinabuhi,” ngan kay ano?

¹⁵ An mga magtadong, nga nagbuhat hin maopay antes hira namatay, makakakarawat hin “pagkabanhaw ngadto ha kinabuhi” kay an ira mga ngaran nakasurat na ha libro han kinabuhi. Nagpapasabot ini nga an pagkabanhaw han “mga nagbuhat hin maopay” nga iginhuhulagway ha Juan 5:29 amo gihapon an pagkabanhaw han “mga magtadong” nga gin-uunabi ha Buhat 24:15. Ini nga pagsabot nauyon ha mga pulong ha Roma 6:7, nga nasiring: “Hiya nga namatay gin-abswelto na ha iya sala.” An mga sala nga ginbuhat hini nga mga magtadong ginpasaylo han namatay hira, pero an ira rekord han pagkamatinumanon nagpapabilin. (Heb. 6:10) Syempre, kinahanglan magpabilin nga matinumanon inin matadong nga mga binanhaw basi magpabilin an ira mga ngaran ha libro han kinabuhi.

16. Ano an iginpapasabot han “pagkabanhaw ngadto ha paghukom”?

¹⁶ Kumusta man an mga nagbuhat hin maraot antes hira namatay? Bisan kon an ira mga sala ginpasaylo han namatay hira, waray hira makahimo hin rekord han pagkamatinumanon. An ira mga ngaran diri nakasurat ha libro han kinabuhi. Salit an pagkabanhaw han “mga nagbuhat hin maraot” amo gihapon an pagkabanhaw han “mga diri magtadong” nga gin-uunabi ha Buhat 24:15. “Pagkabanhaw ngadto ha paghukom” * an ira makakarawat. An mga diri magtadong huhukman, karuyag sidngon, oobserbaran ngan uusisahon. (Luc. 22:30) Magkikinahanglan hin panahon basi mahibaroan kon an ira ba mga ngaran angay isurat ha libro han kinabuhi. Kon babayaan hini nga mga diri magtadong an ira maraot nga pagkinabuhi hadto ngan ididedikar an ira kalugaringon kan Jehova,  dida pa la maisusurat an ira mga ngaran ha libro han kinabuhi.

17-18. Ano an kinahanglan buhaton han ngatanan nga babanhawon ngadto ha kinabuhi dinhi ha tuna, ngan ano an “mga buhat” nga gin-uunabi ha Pahayag 20:12, 13?

¹⁷ Matadong man o diri matadong hadto an mga binanhaw, kinahanglan sugton nira an mga balaud ha bag-o nga mga linukot nga basahon nga aabrihan ha panahon han 1,000 ka tuig. Iginhulagway ni apostol Juan an iya nakita ha bisyon: “Nakita ko an mga patay, an mga prominente ngan an mga ubos, nga naninindog ha atubangan han trono, ngan may ginbuklad nga mga linukot nga basahon. Pero may usa pa nga linukot nga basahon nga ginbuklad; ito an linukot nga basahon han kinabuhi. An mga patay ginhukman sumala ha mga butang nga nakasurat ha mga linukot nga basahon uyon ha ira mga buhat.”—Pah. 20:12, 13.

¹⁸ Ano nga “mga buhat” an magigin basihan ha paghukom ha mga binanhaw? An ira ba mga ginbuhat antes hira namatay? Diri! Hinumdumi nga gin-abswelto hira ha ira mga sala hadto han namatay hira. Salit an gin-uunabi dinhi nga “ira mga buhat” diri an ira mga ginbuhat han buhi hira hadto. Lugod, sigurado nga nagtutudlok ini ha ira mga bubuhaton sugad nga reaksyon ha pagbansay nga ira makakarawat ha bag-o nga kalibotan. Bisan an matinumanon nga kalalakin-an sugad kanda Noe, Samuel, David, ngan Daniel kinahanglan mahibaro mahitungod kan Jesu-Kristo ngan magpakita hin pagtoo ha iya halad. Labi na gud nga kinahanglan buhaton ito han mga diri magtadong!

19. Ano an magigin ultimo nga resulta para hadton diri makarawat hinin makalilipay nga oportunidad?

¹⁹ Ano an magigin ultimo nga resulta para hadton diri makarawat hinin makalilipay nga oportunidad? An Pahayag 20:15 nagsusumat ha aton: “An bisan hin-o nga waray hiagii nga nakasurat ha libro han kinabuhi iginlabog ngadto ha linaw nga kalayo.” Oo, bubungkagon hira ha kadayonan. Salit importante gud nga siguruhon nga an aton ngaran nakasurat ha libro han kinabuhi ngan magpabilin ito didto!

20. Ano nga eksayting nga buruhaton an hihimoon ha panahon han Usa ka Yukot ka Tuig nga Pagmando? (Kitaa an piktyur ha kobre.)

²⁰ Magigin eksayting gud nga panahon an Usa ka Yukot ka Tuig nga Pagmando! Bubuhaton hito nga panahon an pinakadaku nga programa han pagpanutdo nga hihimoon dinhi ha tuna. Pero magigin panahon liwat ito nga oobserbaran ngan uusisahon an panggawi han mga magtadong ngan han mga diri magtadong. (Isa. 26:9; Buh. 17:31) Paonan-o bubuhaton ini nga programa han pagpanutdo? An aton sunod nga artikulo mabulig ha aton nga masabtan ngan apresyaron inin maopay gud nga tagana.