Temprano ha dekada han 1940, an akon mga kag-anak nagpa-Bible study ha mga Saksi ni Jehova. Waray hira magpadayon, pero an akon nanay padayon nga nakakarawat hin mga kopya han Watchtower ngan Awake! nga mga magasin. Han 1950 nagkaada internasyonal nga kombensyon ha New York City, ngan ginkarawat han akon pamilya an imbitasyon nga umatender.

Waray pag-iha katapos hito, hi Brother Lawrence Jeffries nagtikang pagbisita ha amon. Naningkamot hiya nga buligan ako nga mahibaro han kamatuoran. Ha siyahan, nariwa ako ha prinsipyo han mga Saksi ni Jehova, an diri nira pag-api ha politika ngan ha militar. Siring ko nga kon an tanan ha Amerika magdumiri nga makiggirra, puydi sulungon ngan sakupon han mga kaaway an bug-os nga nasud. Hi Brother Jeffries mapailubon nga nangatadongan: “Ha imo hunahuna, ano an hihimoon ni Jehova nga Dios kon an tanan nga tawo ha Amerika nag-aalagad ha iya ngan sulungon hira han mga kaaway?” An iya ginsiring mahitungod hito ngan ha iba pa nga isyu nakabulig ha akon nga makita nga waray basihan an akon pagriwa. Salit nagin mas interesado ako.

Damu ka oras nga ginbasa ko an daan nga mga isyu han The Watchtower ngan Awake! nga iginbutang ni Nanay ha bodega ha sirong han balay. Paglabay han panahon, nasantop ko nga kamatuoran an akon nahibabaroan, salit ginkarawat ko an tanyag ni Brother Jeffries nga mag-Bible study. Nagtikang liwat ako pag-atender hin regular ha mga katirok. An kamatuoran nakabantad gud han akon kasingkasing, ngan nagin magwarali ako han maopay nga sumat. Nabag-o an akon mga tumong han nasabtan ko nga “an daku nga adlaw ni Jehova hirani na.” (Zep. 1:14) Diri ko na karuyag umiskwela ha  unibersidad, lugod karuyag ko buligan an iba nga mahibaro han kamatuoran ha Biblia.

Naggradwar ako ha hayskul han Hunyo 13, 1956, ngan paglabay hin tulo ka adlaw, nabawtismohan ako ha sirkito nga asembleya. Hito nga panahon, diri ako maaram nga damu gud nga bendisyon an akon makakarawat tungod ha paggamit han akon kinabuhi ha paghibaro ngan pagtutdo parte kan Jehova.

Unom ka bulan katapos han akon bawtismo, nagin regular payunir ako. An Disyembre 1956 nga Kingdom Ministry may artikulo nga “Can You Serve Where the Need Is Great?” Para liwat ha akon ito nga imbitasyon. Karuyag ko bumulig ha lugar nga pipira la an nagsasangyaw han maopay nga sumat.—Mat. 24:14.

Binalhin ako ha Edgefield, South Carolina. Upat la an magwarali hito nga kongregasyon. Ako an nagin ikalima. Nagkakatirok kami ha prente nga kwarto han balay han usa nga brother. Kada bulan, 100 ka oras an akon ginagamit ha ministeryo. Busy ako ha pagpanguna ha pagsangyaw ngan pagdumara han mga bahin ha katirok. Makapainteres nga samtang mas damu an akon ginbubuhat, mas damu an akon nahibabaroan parte kan Jehova.

May ginba-Bible study ako nga babaye nga tag-iya hin punerarya ha Johnston, usa nga bungto pipira ka kilometro an kahirayo. Buotan hiya ngan gintagan niya ako hin part-time nga trabaho, ngan ginpagamit niya kami hin gutiay nga bilding basi magin amon Kingdom Hall.

Hi Brother Jolly Jeffries, nga anak han brother nga nag-study ha akon, binalhin tikang ha Brooklyn, New York, ngan nagin partner ko ha pagpayunir. Nag-ukoy kami ha gutiay nga treyler nga iginpagamit ha amon han usa nga brother.

Gutiay la an sweldo ha South. Duha o tulo ka dolyar an amon sweldo para ha usa ka adlaw nga trabaho. Makausa, nagamit ko pa la an akon ultimo nga mga sinselyo para pumalit hin pagkaon ha tindahan. Paggawas ko, usa nga lalaki an dumaop ha akon ngan nagpakiana: “Karuyag mo ba magtrabaho? Susweldohan ko ikaw hin usa ka dolyar kada oras.” Gintagan niya ako hin tulo ka adlaw nga trabaho ha paglimpyo han usa nga construction site. Klaro nga ginbubuligan ako ni Jehova nga magpabilin ha Edgefield. Pero nakaatender gihap ako ha 1958 nga internasyonal nga kombensyon ha New York City.

Ha ikaduha ka adlaw han kombensyon, may espesyal nga nahitabo. Nakilala ko hi Ruby Wadlington, usa nga regular payunir ha Gallatin, Tennessee. Tungod kay pariho namon karuyag nga magmisyonero, nag-atender kami ha Gilead meeting hito nga kombensyon. Ha urhi, nagtikang kami pagsuratay. Katapos, gin-imbitar ako ha Gallatin basi mag-public talk. Ginsalingabot ko ito nga higayon basi hangyoon hiya nga magpakasal ha akon. Binalhin ako ha kongregasyon ni Ruby, ngan ginkasal kami han 1959.

Han 23 anyos ako, ginpili ako nga magin congregation servant (gintatawag yana nga koordinetor han lawas han mga tigurang) ha Gallatin. Kami an  siyahan nga kongregasyon nga ginbisita ni Charles Thompson sugad nga paramangno han sirkito. Eksperyensyado gud hiya; pero nangaro hiya han akon opinyon kon ano an kinahanglan han kabugtoan ngan kon paonan-o ito gin-aasikaso han iba nga mga paramangno han sirkito. Nahibaroan ko ha iya nga maopay nga magpakiana anay ngan kuhaon an tanan nga impormasyon antes magdesisyon.

Han Mayo 1964, gin-imbitar ako nga umiskwela ha usa ka bulan nga Kingdom Ministry School ha South Lansing, New York. An mga brother nga nagdumara hini nga eskwelahan nakabulig ha akon nga magkaada daku nga hingyap nga mahibaro hin dugang pa ngan mag-uswag sugad nga espirituwal nga tawo.

Han Enero 1965, nakakarawat kami ni Ruby hin imbitasyon nga sumulod ha sirkito nga buruhaton. Gin-asayn kami ha usa nga sirkito nga haluag an sakop, tikang ha Knoxville, Tennessee, ngan haros tubtob ha Richmond, Virginia. Nag-uupod ito hin mga kongregasyon ha North Carolina, Kentucky, ngan West Virginia. An mga kongregasyon la nga itom an kabugtoan an akon ginbibisita, kay hito nga panahon igindidiri han mga balaud ha southern United States nga magtarampo an mga itom ngan mga busag ha mga katirok. Pobre an kabugtoan, ngan nahibaro kami nga maghatag ha mga nanginginahanglan han anoman nga may-ada kami. Gintutdoan ako han usa nga maiha na nga paramangno han sirkito hin importante gud nga leksyon: “Magin usa nga bugto. Ayaw pagpakaagaron kon nabisita ka ha kongregasyon. Mabubuligan mo la hira kon bugto an pagkita nira ha imo.”

Samtang ginbibisita namon an usa nga gutiay nga kongregasyon, may gintikangan hi Ruby pag-study nga batan-on nga babaye nga may anak nga babaye nga usa ka tuig an edad. Han waray bisan hin-o ha kongregasyon nga nakakahimo pag-study ha iya, ginbuhat ito ni Ruby pinaagi hin surat. Han sunod namon nga pagbisita, inatender an babaye ha tanan nga katirok. Han may duha nga espesyal payunir nga mga sister nga binalhin ngadto, iginpadayon nira an pag-study, ngan waray pag-iha nabawtismohan hiya. Paglabay hin mga 30 ka tuig han 1995, ha Patterson Bethel, may batan-on nga sister nga nagpakilala kan Ruby. Hiya an anak han study hadto ni Ruby. Ito nga sister ngan an iya bana mga estudyante ha ika-100 nga klase han Gilead School.

Ha sentro han Florida an amon ikaduha nga sirkito. Hito nga panahon nagkinahanglan kami hin awto, salit may ginpalit kami nga barato gud la. Pero han siyahan nga semana, naruba an water pump ha makina. Waray na kami kwarta ha pagpaayad hito. May gintawagan ako nga brother nga nahunahuna ko nga makakabulig ha amon. Iginpaayad niya an awto ha usa niya nga trabahador ngan nadiri hiya pagpabayad. Sumiring la hiya, “Okey na, waray kamo baraydan.” Ginregalohan pa ngani niya kami hin kwarta! Maopay gud ito nga ehemplo han pag-ataman ni Jehova ha iya mga surugoon. Nagpahinumdom ito ha amon nga magin mahinatagon.

Kon nabisita kami ha mga kongregasyon, naukoy kami ha balay han kabugtoan. Salit nagkaada kami damu nga mag-opay nga kasangkayan. Usa ka adlaw, ginbayaan ko ha akon typewriter an diri pa tapos nga report parte ha kongregasyon. Pagbalik ko hito nga gab-i, nahibaroan ko nga an tres anyos nga anak nga lalaki han pamilya nga amon gin-uukyan nagpinanulpok ha typewriter, salit kinahanglan ko utruhon an report. Damu ka tuig nga ginsinunlog ko hiya mahitungod hito.

Han 1971, nakakarawat ako hin surat nga gin-aasayn ako nga magin paramangno han distrito ha New York City. Natigdaan gud kami! Han binalhin kami ngadto, 34 anyos pa la ako. An kabugtoan mahigugmaon nga nag-abiabi ha akon, an ira siyahan nga itom nga paramangno han distrito.

Sugad nga paramangno han distrito, nalipay ako ha pagtutdo parte kan Jehova kada weekend ha sirkito nga asembleya. Damu han mga paramangno han sirkito an mas eksperyensyado ha akon. An usa ha ira amo an nagpahayag ha akon bawtismo. An usa pa nga brother, hi Theodore Jaracz, ha urhi nagin membro han Nagmamando nga Lawas. Damu liwat an eksperyensyado nga mga brother nga nag-aalagad ha Brooklyn Bethel. Mapasalamaton gud ako nga tungod han maopay nga pagtratar han mga paramangno han sirkito ngan mga Bethelite nagin komportable ako. Nakita ko mismo nga mahigugmaon hira nga mga paraataman, nga nasarig ha Pulong han Dios ngan maunungon nga nasuporta  ha organisasyon. An ira pagkamapainubsanon nakapasayon han akon pag-alagad sugad nga paramangno han distrito.

Han 1974, iba naman nga grupo han mga paramangno han sirkito an gin-asayn han Nagmamando nga Lawas ha distrito nga buruhaton, ngan binalik ako ha pagin paramangno han sirkito, ha South Carolina. Maopay na la kay hito nga panahon puydi na pagtarampuhon an busag ngan itom nga mga kongregasyon, nga nakapalipay ha kabugtoan.

Ha ikatarapos han 1976, gin-asayn ako ha usa nga sirkito ha Georgia butnga han Atlanta ngan Columbus. Nahinunumdoman ko gud nga nagpahayag ako ha lubong han lima nga itom nga kabataan nga namatay han may mga nagsunog han ira balay. Nahospital an nanay tungod han iya mga injury. Damu nga itom ngan busag nga kabugtoan an sunod-sunod nga kumadto ha hospital basi liawon an mga kag-anak. Nakita ko nga daku gud an ira gugma. An sugad nga pagpaid makakabulig ha mga surugoon han Dios nga makaya an pinakamakuri nga mga kahimtang.

Han 1977 ginpakadto kami ha Brooklyn Bethel hin pipira ka bulan para bumulig ha usa nga proyekto. Han tikahuman na ito, duha nga membro han Nagmamando nga Lawas an nakiistorya ha akon ngan nagpakiana kon andam ba kami ni Ruby nga mag-alagad hin permanente ha Bethel. Ginkarawat namon an imbitasyon.

Ha sulod hin 24 ka tuig, nagtrabaho ako ha Service Department, diin an kabugtoan agsob nga nabulig ha pagbaton ha magkuri nga pakiana. Damu na ka tuig nga an Nagmamando nga Lawas nagtatagana hin giya nga uyon ha mga prinsipyo ha Biblia. Ginagamit ini nga basihan ha pagbaton ha mga pakiana, pero ini liwat an basihan ha pag-train ha mga paramangno han sirkito, mga tigurang, ngan mga payunir. Nakabulig ini ha damu nga kabugtoan nga mag-uswag ha espirituwal. Ngan tungod hito, nagin marig-on an organisasyon ni Jehova.

Tikang han 1995 tubtob 2018, ginbisita ko an iba-iba nga sanga nga opisina sugad nga representante han world headquarters, nga gintatawag hadto nga zone overseer. Nakikigmiting ako ha mga Branch Committee, Bethelite, ngan misyonero basi dasigon hira ngan buligan ha ira mga problema. Kami naman ni Ruby pirme napaparig-on han mga eksperyensya nga ira iginsusumat ha amon. Pananglitan, han 2000 ginbisita namon an Rwanda. Nabantad gud kami han nabatian namon kon paonan-o an kabugtoan ngan an pamilya han Bethel nakatalwas ha pagpoo han lahi han 1994. Damu an namatayan hin mga hinigugma. Bisan pa han gin-ilob hito nga kabugtoan, nagpakita hira hin pagtoo, paglaom, ngan kalipay.

Sobra 80 anyos na kami yana. Ha sulod han naglabay nga 20 ka tuig, nag-aalagad ako sugad nga membro han Branch Committee ha United States. Waray gud ako magkaada edukasyon ha unibersidad; pero nakarawat ko an pinakahitaas nga edukasyon tikang kan Jehova ngan ha iya organisasyon. Nakabulig ini ha akon nga itutdo ha iba an mga kamatuoran ha Biblia nga ira mapapahimulsan ha kadayonan. (2 Cor. 3:5; 2 Tim. 2:2) Nakita ko kon paonan-o an mensahe han Biblia nakabulig ha mga tawo nga magkaada mas maopay nga kinabuhi ngan maopay nga relasyon ha ira Maglalarang. (San. 4:8) Ha bisan san-o nga may oportunidad kami ni Ruby, padayon nga gindadasig namon an iba nga pabilhan an pribilehiyo han paghibaro parte kan Jehova ngan pagtutdo ha iba han mga kamatuoran ha Biblia—an pinakadaku nga pribilehiyo nga makakarawat han usa nga surugoon ni Jehova!