1. Ano nga eksayting nga mga hitabo an naghuhulat ha aton ha panahon han Usa ka Yukot ka Tuig nga Pagmando?

 MAKALILIPAY gud an adlaw han pagtikang han pamanhaw dinhi ha tuna ha panahon han Usa ka Yukot ka Tuig nga Pagmando han Kristo! An ngatanan nga namatayan hin mga hinigugma naghihingyap nga magkita hira utro. Ito liwat an inaabat ni Jehova. (Job 14:15) Imadyina la an makalilipay nga pagkirigta utro nga mahitatabo ha bug-os nga tuna. Sugad han nahibaroan naton ha nauna nga artikulo, an “mga magtadong,” nga an mga ngaran nakasurat ha libro han kinabuhi, magkakaada “pagkabanhaw ngadto ha kinabuhi.” (Buh. 24:15; Juan 5:29) Bangin damu han aton mga hinigugma an kaupod ha temprano nga bubuhion utro ha panahon han pamanhaw dinhi ha tuna. * Dugang pa, an “mga diri magtadong,” sugad hadton waray magkaada igo nga oportunidad nga makilala hi Jehova o mag-alagad hin matinumanon ha iya antes hira namatay, magkakaada “pagkabanhaw ngadto ha paghukom.”

2-3. (a) Sugad han iginpapakita han Isaias 11:9, 10, ano an magigin pinakadaku nga programa han pagpanutdo ha bug-os nga kasaysayan han tawo? (b) Ano an aton hihisgotan hini nga artikulo?

² An tanan nga nabanhaw kinahanglan tutdoan. (Isa. 26:9; 61:11) Salit kinahanglan buhaton an pinakadaku nga programa han pagpanutdo ha bug-os nga kasaysayan han tawo. (Basaha an Isaias 11:9, 10.) Kay ano? An usa nga rason, an mga diri magtadong nga mababanhaw kinahanglan mahibaro mahitungod  kan Jesu-Kristo, ha Ginhadian han Dios, ha lukat, ngan ha isyu ha bug-os nga uniberso may kalabotan ha ngaran ngan pagkasoberano ni Jehova. Bisan an mga magtadong kinahanglan mahibaro han pinakabag-o nga mga impormasyon nga hinay-hinay nga iginsumat ni Jehova may kalabotan ha iya katuyoan para ha tuna. An pipira hito nga mga matinumanon namatay maiha pa antes makompleto an Biblia. Damu an kinahanglan mahibaroan han mga diri magtadong ngan han mga magtadong.

³ Hini nga artikulo, hihisgotan naton an masunod nga mga pakiana: Paonan-o hihimoon inin daku nga programa han pagpanutdo? Ano an mahitatabo ha mga tawo kon maopay an ira reaksyon hito nga programa, ngan ano an mahitatabo kon diri? Importante ha aton yana an baton hito nga mga pakiana. Sugad han aton makikita, an pipira nga makapainteres nga tagna nga nakarekord ha mga libro han Daniel ngan Pahayag mabulig basi magin klaro an aton pagsabot ha kon ano an mahitatabo kon banhawon na an mga patay. Siyahan, aton hisgotan an eksayting nga mga hitabo nga ginsisiring ha tagna ha Daniel 12:1, 2.

4-5. Ano an iginsusumat han Daniel 12:1 mahitungod ha panahon han kataposan?

⁴ Basaha an Daniel 12:1. Iginsusumat han libro han Daniel an pagkasunod-sunod han eksayting nga mga butang nga mahitatabo ha panahon han kataposan. Pananglitan, an Daniel 12:1 nagsusumat nga hi Miguel, nga amo hi Jesu-Kristo, ‘natindog para ha kaopayan han katawohan’ han Dios. Ito nga bahin han tagna nagtikang matuman han 1914 han hi Jesus gintuinan nga magin Hadi han Ginhadian han Dios ha langit.

⁵ Pero ginsumatan liwat hi Daniel nga hi Jesus “matindog” ha “panahon han kasakitan nga waray pa mahitabo tikang han nagkaada nasud tubtob hito nga panahon.” Ito nga “panahon han kasakitan” amo an “daku nga kasakitan” nga gin-uunabi ha Mateo 24:21. Hi Jesus matindog, o magios basi depensahan an katawohan han Dios, ha kataposan hito nga panahon han kasakitan, karuyag sidngon, ha Armagedon. Ini hira gintatawag ha libro han Pahayag nga ‘daku nga grupo nga nakatalwas ha daku nga kasakitan.’—Pah. 7:9, 14.

6. Ano an mahitatabo katapos makatalwas an daku nga grupo ha daku nga kasakitan? Isaysay. (Kitaa liwat hini nga isyu an “Mga Pakiana Tikang ha mga Magbarasa” may kalabotan ha pagkabanhaw ngadto ha kinabuhi dinhi ha tuna.)

⁶ Basaha an Daniel 12:2. Ano an mahitatabo katapos makatalwas an daku nga grupo hito nga panahon han kasakitan? Ini nga tagna diri nagtutudlok ha simboliko nga pagkabanhaw, usa nga espirituwal nga pagpahiuli han mga surugoon han Dios nga nahitatabo ha panahon han kataposan nga mga adlaw, nga amo an aton pagsabot hadto. * Lugod, ini nga mga pulong nagtutudlok ha pagkabanhaw han mga patay nga mahitatabo ha tiarabot nga bag-o nga kalibotan. Kay ano nga makakasiring kita hito? An pulong nga “tapotapo” ginagamit liwat ha Job 17:16 sugad nga kapariho han pulong nga “Lubnganan.” Iginpapakita hini nga an Daniel 12:2 nagtutudlok ha literal nga pagkabanhaw nga mahitatabo kahuman han kataposan nga mga adlaw ngan katapos han girra han Armagedon.

7. (a) Ha ano nga paagi an iba mababanhaw ngadto ha “kinabuhi nga waray kataposan”? (b) Ha ano nga paagi “mas maopay [ito] nga pagkabanhaw”?

⁷ Pero ano an iginpapasabot han Daniel 12:2  han nagsiring ito nga an iba mababanhaw ngadto ha “kinabuhi nga waray kataposan”? Iginpapasabot hito nga adton mababanhaw ngan padayon nga makilala ngan masugot kan Jehova ngan kan Jesus ha panahon han 1,000 ka tuig makakakarawat ha kataposan hin kinabuhi ha kadayonan. (Juan 17:3) Magigin “mas maopay [ito] nga pagkabanhaw” kay ha pagkabanhaw hadto nga nakarawat han pipira nga tawo. (Heb. 11:35) Kay ano? Kay ito nga diri perpekto nga mga tawo namatay utro.

8. Ha ano nga paagi an iba mababanhaw “ngadto ha kaalohan ngan ha waray kataposan nga pagtamay”?

⁸ Pero diri ngatanan nga binanhaw maruruyag pagkarawat han kan Jehova programa han pagpanutdo. An tagna ni Daniel nasiring nga an iba mababanhaw “ngadto ha kaalohan ngan ha waray kataposan nga pagtamay.” Tungod kay magpapakita hira hin rebelyoso nga disposisyon, an ira mga ngaran diri isusurat ha libro han kinabuhi ngan diri hira makakakarawat hin kinabuhi nga waray kataposan. Lugod, makakakarawat hira hin “waray kataposan nga pagtamay,” o kabungkagan. Salit an Daniel 12:2 naghihisgot han magigin ultimo nga resulta para ha ngatanan nga binanhaw basado ha ira bubuhaton katapos hira banhawon. * (Pah. 20:12) An iba magkakaada kinabuhi nga waray kataposan; an iba diri.

9-10. Ano pa an mahitatabo katapos han daku nga kasakitan, ngan hin-o an “masanag hin sugad kalamrag han langit”?

⁹ Basaha an Daniel 12:3. Ano pa an mahitatabo katapos han tiarabot nga “panahon han kasakitan”? Labot la han Daniel 12:2, an bersikulo 3 may gin-uunabi liwat nga mahitatabo katapos han daku nga kasakitan.

¹⁰ Hin-o an “masanag hin sugad kalamrag han langit”? Makakabulig ha aton an ginsiring ni Jesus nga nakarekord ha Mateo 13:43: “Hito nga panahon an magtadong masanag hin sugad kalamrag han adlaw ha Ginhadian han ira Amay.” Ha konteksto hini nga mga pulong, hi Jesus naghihisgot mahitungod han “mga anak han Ginhadian,” an iya dinihogan nga kabugtoan, nga makakaupod niya ha Ginhadian ha langit. (Mat. 13:38) Salit an Daniel 12:3 sigurado nga nagtutudlok ha mga dinihogan ngan ha ira bubuhaton ha panahon han Usa ka Yukot ka Tuig nga Pagmando.

11-12. Ano an bubuhaton han 144,000 ha panahon han 1,000 ka tuig?

¹¹ Paonan-o an mga dinihogan magtutugway “han damu ngadto ha katadongan”? An mga dinihogan mabulig kan Jesu-Kristo ha paggiya han programa han pagpanutdo nga bubuhaton dinhi ha tuna ha panahon han 1,000 ka tuig. An 144,000 diri la kay magmamando sugad nga mga hadi kondi mag-aalagad liwat sugad nga mga saserdote. (Pah. 1:6; 5:10; 20:6) Salit mabulig hira ha “pagtambal ha mga nasud”—hinay-hinay nga ibabalik an mga tawo ha pagin perpekto. (Pah. 22:1, 2; Ezek. 47:12) Malilipay gud an mga dinihogan ha pagbuhat hito!

¹² Hin-o an kaapi han “damu” nga tutugwayan ngadto ha katadongan? Hira amo an mga nabanhaw sugad man an mga nakatalwas ha Armagedon ngan an bisan hin-o nga bangin ig-aanak ha bag-o nga kalibotan. Ha kataposan han 1,000 ka tuig, perpekto na an ngatanan nga nabubuhi dinhi ha tuna. Salit san-o an ira mga ngaran isusurat hin permanente ha libro han kinabuhi gamit an tinta ngan diri an lapis?

13-14. Ano an kinahanglan ipakita han tanan nga perpekto nga tawo dinhi ha tuna antes hira makakarawat han kinabuhi nga waray kataposan?

¹³ Kinahanglan naton hinumdoman nga an pagin perpekto diri nangangahulogan nga an usa nga tawo awtomatiko nga magkakaada kinabuhi nga waray kataposan. Hunahunaa hira Adan ngan Eva. Perpekto hira, pero kinahanglan nira ipakita nga masinugtanon hira kan Jehova nga Dios antes hira tagan hin kinabuhi nga waray kataposan. Ngan makasurubo nga waray hira sumugot ha iya.—Roma 5:12.

¹⁴ Ano an magigin kahimtang han mga tawo dinhi ha tuna ha kataposan han 1,000 ka tuig? Perpekto na an ngatanan. Ito ba ngatanan nga perpekto nga tawo bug-os nga masuporta ha pagmando ni Jehova ha kadayonan? O an iba magigin pariho kanda Adan ngan Eva—nga nagin diri matinumanon bisan kon perpekto hira? Kinahanglan mabaton ini nga mga pakiana, pero paonan-o?

15-16. (a) San-o an ngatanan nga tawo magkakaada oportunidad nga ipakita an ira pagin maunungon kan Jehova? (b) Ano an magigin ultimo nga resulta hito nga pagsari?

¹⁵ Piprisuhon hi Satanas ha sulod han 1,000 ka tuig. Hito nga panahon, diri niya malilimbongan an bisan hin-o. Pero ha kataposan han 1,000 ka tuig, bubuhian hi Satanas tikang ha iya kapriso. Hito nga panahon, mangangalimbasog hiya nga limbongan an perpekto nga mga tawo. Hito nga pagsari, an tanan nga perpekto nga tawo dinhi ha tuna magkakaada  oportunidad nga ipakita gud kon hain hira nadapig ha isyu mahitungod ha ngaran ngan pagkasoberano han Dios. (Pah. 20:7-10) An ira reaksyon ha pangalimbasog ni Satanas an magigin basihan kon an ira ba mga ngaran angay isurat hin permanente ha libro han kinabuhi.

¹⁶ An pipira, nga waray unabiha an kadamu, magigin pariho kanda Adan ngan Eva ngan magsasalikway han pagmando ni Jehova. Ano an mahitatabo ha ira? An Pahayag 20:15 nagsusumat ha aton: “An bisan hin-o nga waray hiagii nga nakasurat ha libro han kinabuhi iginlabog ngadto ha linaw nga kalayo.” Oo, iton rebelyoso nga mga tawo bubungkagon ha kadayonan. Pero an kadam-an han perpekto nga mga tawo magpapabilin nga matinumanon hiton ultimo nga pagsari. Katapos, an ira mga ngaran permanente nga isusurat ha libro han kinabuhi.

17. Ano an ginsiring kan Daniel nga mahitatabo ha aton panahon? (Daniel 12:4, 8-10)

¹⁷ Eksayting gud hunahunaon iton tiarabot nga mga panhitabo! Pero nakakarawat liwat hi Daniel hin importante nga impormasyon tikang ha usa nga anghel mahitungod ha aton panahon, an “panahon han kataposan.” (Basaha an Daniel 12:4, 8-10; 2 Tim. 3:1-5) An anghel nagsiring kan Daniel: “Magigin hura an  tinuod nga kahibaro.” Oo, an mga tagna ha iya libro mas masasabtan pa gud han katawohan han Dios. Nagsiring liwat an anghel nga hini nga panahon “an magraot magbubuhat hin maraot, ngan waray bisan usa han magraot an makakasabot.”

18. Ano an hirani na mahitabo ha magraot?

¹⁸ Yana, an magraot baga hin diri nasisirotan ha ira maraot nga panggawi. (Mal. 3:14, 15) Pero diri mag-iiha, huhukman ni Jesus an sugad-kanding nga mga tawo ngan ibubulag hira ha sugad-karnero nga mga tawo. (Mat. 25:31-33) Inin magraot nga tawo diri makakatalwas ha daku nga kasakitan, ngan diri liwat hira babanhawon basi mabuhi ha bag-o nga kalibotan. An ira mga ngaran diri ibubutang ha “libro han hinumdóman” nga gin-uunabi ha Malakias 3:16.

19. Ano an angay naton buhaton yana, ngan kay ano? (Malakias 3:16-18)

¹⁹ Kinahanglan pamatud-an naton yana nga diri kita kaapi ha magraot. (Basaha an Malakias 3:16-18.) Gintitirok ni Jehova adton iya ginkikilala nga iya “espesyal nga propyedad,” o presyoso nga panag-iya. Sigurado nga karuyag naton nga magin usa ha ira.

20. Ano an ultimo nga iginsaad kan Daniel, ngan kay ano nga ginpapamulat mo an katumanan hito nga saad?

²⁰ Nagkikinabuhi gud kita ha eksayting nga mga panahon. Pero hirani na mahitabo an mas urusahon pa nga mga butang. Diri mag-iiha, makikita na naton an kabungkagan han ngatanan nga karaotan. Katapos hito, makikita na naton an katumanan han saad ni Jehova kan Daniel: “Matindog ka ha pagkarawat han imo malon ha kataposan han mga adlaw.” (Dan. 12:13) Ginhihingyap mo ba an adlaw nga hi Daniel, pati an imo mga hinigugma, “matindog” utro? Kon oo, himoa an imo pinakamaopay yana nga magin matinumanon, ngan makakasiguro ka nga an imo ngaran magpapabilin nga nakasurat ha kan Jehova libro han kinabuhi.