1. Paonan-o naton mahibabaroan kon matataporan an usa nga tawo?

 AN MATATAPORAN nga tawo nangangalimbasog nga tumanon an iya mga saad ngan nagsusumat hin tinuod. (Sal. 15:4) Maaram an iba nga makakasarig hira ha iya. Karuyag ta nga ito an abaton han kabugtoan ha aton. Ano an makakabulig ha aton nga makuha an ira pagtapod?

2. Paonan-o naton mapapamatud-an nga matataporan kita?

² Diri naton mapipirit an iba nga taporan kita. Kinahanglan ta ito pagtrabahoan. An pagtapod pariho hin kwarta. Makuri ito makuha; masayon la ito mawara. Sigurado nga nakuha ni Jehova an aton pagtapod. Pirme kita makakatapod ha iya kay “an ngatanan nga iya ginbubuhat masasarigan.” (Sal. 33:4) Ngan naglalaom hiya nga susubaron naton hiya. (Efe. 5:1) Hisgotan naton an pipira nga ehemplo han mga surugoon ni Jehova nga nagsubad ha ira langitnon nga Amay ngan nagpamatuod nga matataporan hira. Aton liwat uusisahon an lima nga kalidad nga mabulig ha aton nga magin matataporan.

3-4. Paonan-o ginpamatud-an ni propeta Daniel nga matataporan hiya, ngan tungod hito, ano an angay naton igpakiana ha aton kalugaringon?

³ Hi propeta Daniel nagpakita hin maopay gud nga ehemplo ha pagin matataporan. Bisan kon ginbihag hiya han mga taga-Babilonya, waray pag-iha nagkaada hiya reputasyon sugad nga matataporan nga tawo. Mas gintaporan hiya han mga tawo han iginhatag niya an kahulogan han mga inop ni Hadi Nabucodonosor han Babilonya pinaagi han bulig ni Jehova. Makausa, kinahanglan sumatan ni Daniel an hadi nga hi Jehova diri nalilipay ha iya. Diri ito an klase han mensahe nga karuyag mabatian han usa nga hadi. Nagkinahanglan ito hin kaisog, kay hi Nabucodonosor masisinahon gud! (Dan. 2:12; 4:20-22, 25) Paglabay hin damu ka tuig, napamatud-an na liwat ni Daniel nga matataporan hiya han  iginhatag niya an husto nga kahulogan han misteryoso nga mensahe nga nakita ha bungbong han palasyo ha Babilonya. (Dan. 5:5, 25-29) Ha urhi, hi Dario nga Mediano ngan an iya pinili nga mga opisyal nakapansin liwat han “diri ordinaryo nga hunahuna” ni Daniel. Ginkilala nira nga “masasarigan hiya ngan waray nakikita ha iya nga pagpasibaya o pagkadiri-tangkod.” (Dan. 6:3, 4) Oo, ginkilala bisan han pagano nga mga magmarando nga matataporan ini nga magsiringba ni Jehova!

⁴ Ha aton pagpamalandong ha ehemplo ni Daniel, puydi ta pakianhan an aton kalugaringon: ‘Ano an akon reputasyon ha gawas han kongregasyon? Kilala ba ako nga nagtutuman han akon mga responsabilidad ngan matataporan?’ Kay ano nga kinahanglan naton batunon ito nga mga pakiana? Kay kon matataporan kita, naghahatag kita hin kadayawan kan Jehova.

5. Kay ano nga kilala hi Hananias ha pagin matataporan?

⁵ Han 455 B.C.E., katapos matukod utro ni Gobernador Nehemias an mga pader han Jerusalem, namiling hiya hin masasarigan nga kalalakin-an nga manginginano hin maopay han syudad. Usa han ginpili ni Nehemias amo an lider han Kuta nga hi Hananias. Ginhuhulagway han Biblia hi Hananias sugad nga ‘matataporan gud nga tawo nga mas may kahadlok ha tinuod nga Dios kay han damu nga iba pa nga mga tawo.’ (Neh. 7:2) An gugma kan Jehova ngan kahadlok nga mapasubo hiya nagpagios kan Hananias nga seryosohon an bisan ano nga toka nga iginhatag ha iya. Ito nga mga kalidad mabulig liwat ha aton nga magin masasarigan ha aton pag-alagad ha Dios.

6. Paonan-o ginpamatud-an ni Tiquico nga matataporan hiya nga sangkay ni apostol Pablo?

⁶ Hunahunaa an ehemplo ni Tiquico, nga  tinaporan nga kaupod ni apostol Pablo. Samtang priso hi Pablo ha usa nga balay, sinarig hiya kan Tiquico ngan iginhulagway hiya sugad nga “matinumanon nga ministro.” (Efe. 6:21, 22) Gintaporan hiya ni Pablo diri la basi magdara hin mga surat ha kabugtoan ha Efeso ngan Colosas kondi basi dasigon liwat ngan liawon hira. Hi Tiquico nagpapahinumdom ha aton han matinumanon ngan masasarigan nga kalalakin-an nga nag-aataman han aton espirituwal nga mga panginahanglan yana.—Col. 4:7-9.

7. Ano an imo mahibabaroan ha pagin matataporan han mga tigurang ngan mga ministeryal nga surugoon ha iyo kongregasyon?

⁷ Yana gin-aapresyar gud naton an aton matataporan nga mga tigurang ngan mga ministeryal nga surugoon. Pariho kanda Daniel, Hananias, ngan Tiquico, ira ginsiseryoso an ira mga responsabilidad. Pananglitan, kon naatender kita ha katirok ha midweek, maaram kita nga igintoka na an ngatanan nga bahin ha programa. Ngan gin-aapresyar han mga tigurang kon adton ira gintokahan matataporan ha pag-andam ngan pagpresenta han ira mga bahin! Ha pag-ilustrar, diri kita nag-aalang ha pag-imbitar han aton mga Bible study nga umatender ha katirok ha weekend, kay sigurado kita nga may maghahatag han pahayag publiko. Ngan nasarig kita nga magigin available an literatura nga aton kinahanglan para ha ministeryo. Gin-aataman gud kita hinin matinumanon nga mga brother, ngan iginpapasalamat naton hira kan Jehova! Pero ha ano nga mga paagi naton mapapamatud-an nga matataporan kita?

8. Paonan-o kita magigin balanse kon nagpapakita hin interes ha iba? (Proberbios 11:13)

⁸ Hinigugma naton an aton kabugtoan, ngan interesado kita ha ira kaopayan. Pero kinahanglan magin balanse kita ngan irespeto an ira pribado nga kinabuhi. An pipira ha siyahan-siglo nga Kristiano nga kongregasyon ‘mahilig magtsismis ngan nanginginlabot ha ginbubuhat han iba, nga nag-iiristorya mahitungod han mga butang nga diri nira angay pag-iristoryahan.’ (1 Tim. 5:13) Sigurado nga diri naton karuyag nga magin pariho ha ira. Pero ano man kon may nagsumat ha aton hin personal nga impormasyon ngan naghangyo nga diri ito igsumat ha iba? Pananglitan, bangin may sister nga magsumat ha aton nga may-ada hiya sakit o iba pa nga problema, ngan naghangyo hiya nga diri naton ito isumat bisan kan kanay. Angay naton irespeto an iya hangyo. * (Basaha an Proberbios 11:13.) Yana hisgotan naton an iba pa nga sitwasyon diin importante an pagtipig hin kompidensyal nga impormasyon.

9. Paonan-o mapapamatud-an han mga membro han pamilya nga matataporan hira?

⁹ Ha pamilya. An tagsa nga membro han pamilya may responsabilidad nga isekreto an pipira nga butang parte ha pamilya. Pananglitan, an usa nga Kristiano nga asawa bangin may batasan nga pataraw-an para ha iya bana. Ipapanumat ba ito han bana ha iba ngan magin hinungdan nga maalohan hiya? Syempre diri! Hinigugma niya an iya asawa, ngan diri gud niya karuyag magbuhat hin bisan ano nga makakapasakit ha iya. (Efe. 5:33) Karuyag han mga tin-edyer nga irespeto hira. Importante nga hinumdoman ito han mga kag-anak. Diri nira papakaalohan an ira mga anak pinaagi ha pagsumat ha iba han ira mga sayop. (Col. 3:21) Kinahanglan mahibaro an mga anak ha pagin maaramon ngan diri magsumat ha iba hin impormasyon nga mahimo magpakaalo ha ira mga  kapamilya. (Deut. 5:16) Kon an tagsa nga membro han pamilya naghihimo han iya bahin nga isekreto an pribado nga mga butang parte ha pamilya, magigin mas duok hira ha kada tagsa.

10. Ano an nahiuupod ha pagin tinuod nga sangkay? (Proberbios 17:17)

¹⁰ Ha aton kasangkayan. May mga panahon nga an kadam-an ha aton naabat nga kinahanglan naton isumat ha usa nga duok nga sangkay kon ano gud an aton inaabat. Usahay bangin magin makuri ito. Bangin diri kita hiara nga isumat ha bisan kan kanay kon ano gud an aton ginhuhunahuna, ngan masusubo gud kita kon nahibaroan naton ha urhi nga iginsumat han aton sangkay ha iba an aton ginsiring. Pero gin-aapresyar gud naton an usa nga nakakatipig hin sekreto! “Tinuod [hiya] nga sangkay.”—Basaha an Proberbios 17:17.

11. (a) Paonan-o iginpapakita han mga tigurang ngan han ira asawa nga matataporan hira? (b) Ano nga leksyon an aton mahibabaroan ha usa nga tigurang nga nag-asikaso hin kompidensyal nga butang ha kongregasyon ngan ha urhi nakaupod an iya pamilya? (Kitaa an piktyur.)

¹¹ Ha kongregasyon. An mga tigurang nga nagtitipig hin kompidensyal nga impormasyon “taragoan tikang ha hangin, usa nga sirongan” para ha ira kabugtoan. (Isa. 32:2) Mahimo naton makaistorya an mga tigurang parte ha bisan ano, kay sigurado kita nga an aton isisiring ha ira magpapabilin nga kompidensyal. Diri ta hira ginpipresyur nga sumatan kita han mga butang nga angay nira tipigan nga pribado. Dugang pa, gin-aapresyar naton an asawa han aton mga tigurang kay diri nira gin-aaghat an ira bana nga magsumat hin kompidensyal nga impormasyon. Ha totoo la, bendisyon nga an asawa han tigurang diri ginsusumatan hin personal nga impormasyon parte ha kabugtoan. An asawa han usa nga tigurang nagsiring: “Mapasalamaton ako nga an akon bana diri nagsusumat hin bisan ano nga impormasyon mahitungod ha ira ginsi-shepherding o hadton nanginginahanglan hin espirituwal nga bulig; diri ngani niya iginsusumat an ira ngaran. Naaapresyar ko nga diri ako nabubug-atan han mga isyu nga waray man ako mahihimo. Salit diri ako nag-aalang pakiistorya ha tanan ha kongregasyon. Ngan makakatapod ako nga kon  iginsusumat ko ha akon bana an akon mga inaabat o mga problema, magpapabilin liwat ito nga kompidensyal.” Syempre, karuyag naton ngatanan nga magkaada reputasyon ha pagin matataporan. Ano nga mga kalidad an mabulig ha aton nga makab-ot ito nga tumong? Aton hisgotan an lima hito.

12. Kay ano nga makakasiring kita nga gugma an pundasyon han pagtapod? Paghatag hin ehemplo.

¹² Gugma an pundasyon han pagtapod. Hi Jesus nagsiring nga an duha nga pinakaimportante nga sugo amo an paghigugma kan Jehova ngan paghigugma ha aton igkasi-tawo. (Mat. 22:37-39) An aton gugma kan Jehova nagpapagios ha aton nga subaron an iya perpekto nga ehemplo ha pagin matataporan. Pananglitan, an gugma ha aton kabugtoan nagpapagios ha aton nga tipigan nga pribado an ira personal nga mga impormasyon. Diri gud naton karuyag magsumat hin bisan ano nga mahimo magin hinungdan nga madaot, maalohan, o masakitan hira.—Juan 15:12.

13. Ha ano nga paagi an pagkamapainubsanon mabulig ha aton nga magin matataporan?

¹³ An pagkamapainubsanon mabulig ha aton nga magin matataporan. An mapainubsanon nga Kristiano diri nagpapaimpres pinaagi ha pagin siyahan ha pagsumat han usa nga butang. (Fil. 2:3) Diri hiya naghahatag hin impresyon nga may nahibabaroan hiya nga impormasyon nga diri niya puydi isumat. An pagkamapainubsanon mabulig liwat ha aton nga likyan an pagsumat han aton opinyon ha mga butang nga diri ginhihisgotan ha Biblia o ha aton mga publikasyon nga basado ha Biblia.

14. Paonan-o an husto nga pagturotimbang mabulig ha aton nga magin matataporan?

¹⁴ An husto nga pagturotimbang mabulig ha usa nga Kristiano nga mahibaroan kon san-o an ‘panahon han paghilom ngan panahon han pagyakan.’ (Ecles. 3:7) Ini an usa nga komon nga ekspresyon ha pipira nga kultura: “Silber an pagyakan, pero bulawan an paghilom.” Ha iba nga pagkayakan, may mga panahon nga mas maopay nga magpabilin nga hilom imbes nga magyakan. Salit an Proberbios 11:12 nagsasagdon: “An tawo nga may husto nga pagturotimbang nahilom la.” Pansina an usa nga ehemplo. Usa nga eksperyensyado nga tigurang an agsob hangyoon nga bumulig ha iba nga kongregasyon ha ira magkuri nga problema. May kalabotan hini, nagsiring an iya igkasi-tigurang, “Pirme hiya naghihirot nga diri gud magsumat hin kompidensyal nga impormasyon parte ha iba nga kongregasyon.” Tungod han husto nga pagturotimbang hini nga tigurang, nakarawat niya an respeto han iba pa nga tigurang ha iya kongregasyon. Sigurado hira nga diri niya isusumat ha iba an ira kompidensyal nga mga butang.

15. Paghatag hin ehemplo nga nagpapakita kon kay ano nga tataporan ka han iba kon tangkod ka.

¹⁵ An pagin tangkod kinahanglan liwat ha pagin matataporan. Natapod kita ha tangkod nga tawo kay maaram kita nga pirme tinuod an iya iyayakan. (Efe. 4:25; Heb. 13:18) Pananglitan, sidngon ta nga karuyag mo pauswagon an imo abilidad ha pagtutdo. Salit naghangyo ka ha usa nga bugto nga pamatian an imo bahin ngan maghatag hin mag-opay nga suhestyon kon paonan-o ka mag-uuswag. Hin-o an imo tataporan nga maghahatag ha imo hin tangkod nga sagdon? An usa ba nga nagsusumat han karuyag mo mabatian o an usa nga nagsusumat ha imo han tinuod ha buotan nga paagi? Klaro an baton. An Biblia nasiring: “An dayag nga pagsaway mas maopay kay ha tinago nga gugma. An mga samad nga iginhatag han usa nga sangkay pamatuod han iya pagin maunungon.” (Prob. 27:5, 6) Bisan kon makuri pamatian ha  siyahan, an tangkod nga mga komento han usa nga sangkay amo an makakabulig ha aton ha paglabay han panahon.

16. Paonan-o ginpapabug-atan han Proberbios 10:19 nga kinahanglan an pagpugong ha kalugaringon?

¹⁶ An pagpugong ha kalugaringon importante gud kon karuyag naton nga taporan kita han iba. Ito nga kalidad mabulig ha aton nga magpabilin nga hilom kon nasusulay kita nga isumat an usa nga sekreto nga iginsumat ha aton. (Basaha an Proberbios 10:19.) Bangin makurian kita nga magpugong ha kalugaringon kon nagamit hin social media. Kon diri kita maghihirot, bangin diri tinuyo nga maisumat naton ha damu nga tawo an kompidensyal nga mga butang. Ngan kon maipasarang na naton an impormasyon ha elektroniko nga paagi, diri na naton makukontrol kon paonan-o ito gagamiton o kon ano kadaku nga problema an ihahatag hito. An pagpugong ha kalugaringon nabulig liwat ha aton nga magpabilin nga hilom kon nangangalimbasog an mga parakontra nga uwaton kita basi isumat an mga butang nga mahimo magin hinungdan nga mameligro an aton kabugtoan. Bangin mahitabo ini kon iimbestigaran kita han mga pulis ha nasud diin igindidiri o may restriksyon an aton buruhaton. Hini ngan ha iba pa nga sitwasyon, mahimo naton sundon an prinsipyo nga ‘bantayan an aton baba pinaagi hin busal.’ (Sal. 39:1) Nakikig-upod man kita ha aton kapamilya, kasangkayan, kabugtoan, o ha bisan hin-o, kinahanglan magin matataporan kita. Ngan basi magin matataporan, kinahanglan may pagpugong kita ha kalugaringon.

17. Paonan-o kita makakabulig nga magkaada pagtapod ha sulod han kongregasyon?

¹⁷ Mapasalamaton gud kita nga gindara kita ni Jehova ha espirituwal nga pamilya nga ginkukompwesto hin mga tawo nga mahigugmaon ngan matataporan! Kita ngatanan may responsabilidad nga mangalimbasog nga makuha an pagtapod han aton kabugtoan. Kon an tagsa ha aton maniningkamot ha pagpakita hin gugma, pagkamapainubsanon, husto nga pagturotimbang, pagin tangkod, ngan pagpugong ha kalugaringon, makakabulig kita nga magkaada pagtapod ha sulod han kongregasyon. Kinahanglan padayon kita nga mangalimbasog nga magin matataporan. Hinaot subaron ta an aton Dios nga hi Jehova ngan padayon nga pamatud-an nga matataporan kita.