Pansina an baton han Biblia.

An Buhat 24:15 nagsusumat ha aton nga magkakaada “pagkabanhaw han mga magtadong ngan han mga diri magtadong.” An mga magtadong amo adton nagsugot ha Dios antes hira namatay, salit an ira mga ngaran nakasurat ha libro han kinabuhi. (Mal. 3:16) An mga diri magtadong amo adton namatay nga waray magkaada igo nga oportunidad nga mahibaro parte kan Jehova, salit an ira mga ngaran diri nakasurat ha libro han kinabuhi.

An Juan 5:28, 29 nagtutudlok ha amo gihapon nga duha nga grupo nga gin-uunabi ha Buhat 24:15. Hi Jesus nagsiring nga “an mga nagbuhat hin maopay” makakakarawat hin “pagkabanhaw ngadto ha kinabuhi, ngan an mga nagbuhat hin maraot makakakarawat hin pagkabanhaw ngadto ha paghukom.” An mga magtadong nagbuhat hin maopay antes hira namatay. Makakakarawat hira hin pagkabanhaw ngadto ha kinabuhi kay an ira mga ngaran nakasurat la gihapon ha libro han kinabuhi. Pero an mga diri magtadong nagbuhat hin maraot antes hira namatay. Makakakarawat hira hin pagkabanhaw ngadto ha paghukom. An ira mga ngaran diri pa nakasurat ha libro han kinabuhi, ngan ha sulod hin pipira ka panahon huhukman hira, o oobserbaran ngan uusisahon. Hito nga panahon, magkakaada hira oportunidad nga mahibaro parte kan Jehova ngan mahisurat an ira mga ngaran ha libro han kinabuhi.

An Pahayag 20:12, 13 nagsasaysay nga kinahanglan sugton han ngatanan nga binanhaw an “mga butang nga nakasurat ha mga linukot nga basahon,” karuyag sidngon, an bag-o nga mga balaud nga ipapatuman ha bag-o nga kalibotan. Adton diri masugot bubungkagon.—Isa. 65:20.

An Daniel 12:2 nagtatagna nga an pipira hadton nangangaturog ha kamatayon magkakamata “ngadto ha kinabuhi nga waray kataposan ngan an iba naman ngadto ha kaalohan ngan ha waray kataposan nga pagtamay.” Ini nga bersikulo nagtutudlok ha magigin ultimo nga resulta han ira pagkabanhaw—“kinabuhi nga waray kataposan” o “waray kataposan nga pagtamay.” Salit ha kataposan han 1,000 ka tuig, an pipira makakakarawat hin kinabuhi nga waray kataposan ngan an iba bubungkagon ha kadayonan.—Pah. 20:15; 21:3, 4.

Pansina an usa nga ilustrasyon. An sitwasyon han duha nga grupo han mga binanhaw maipapariho ha sitwasyon han mga dayo nga karuyag umukoy ha iba nga nasud. An mga magtadong pariho han mga dayo nga gintagan hin work visa o resident visa nga nagpapakita nga gintutugotan hira nga umukoy hito nga nasud hin hilawig nga panahon. Ha kabaliktaran, an mga diri magtadong pariho hin mga dayo nga bangin gintagan hin temporary visa o visitor’s visa. Kinahanglan may pamatud-an anay hira antes tugotan nga magpadayon ha pag-ukoy hiton bag-o nga nasud. Ha pariho nga paagi, kinahanglan sugton han nabanhaw nga mga diri magtadong an mga balaud ni Jehova ngan pamatud-an nga matadong hira basi makapabilin ha Paraiso. Ngan anoman nga visa an siyahan nga ihatag ha mga dayo pagsulod nira ha iba nga nasud, an pipira bangin ha urhi magin mga tuminungnong hito pero an iba naman bangin i-deport. An resulta igbabase ha ira disposisyon ngan panggawi ha bag-o nga nasud. Ha pariho nga paagi, an ultimo nga resulta para ha ngatanan nga binanhaw madepende ha ira pagkamatinumanon ngan panggawi ha bag-o nga kalibotan.

Hi Jehova diri la kay Dios nga mapinairon kondi hiya liwat an Dios nga patas ngan nagpapakita hin hustisya. (Deut. 32:4; Sal. 33:5) Ipapakita niya an iya gugma pinaagi ha pagbanhaw han mga magtadong ngan han mga diri magtadong. Pero lalaoman niya nga susundon nira ngatanan an iya higtaas nga suruklan ha moral. An mga mahibabaro la ha paghigugma ha iya ngan pagsugot ha iya mga suruklan an tutugotan nga padayon nga mabuhi ha bag-o nga kalibotan.