Sumala ha 1 Corinto 15:8, hi Pablo nagsiring: “Katapos han ngatanan, nagpakita liwat hiya ha akon nga sugad hin nagpakita ha usa nga igin-anak nga diri pa panahon.” Hadto, iginsaysay naton nga posible gud nga an iya gin-uunabi amo an iya eksperyensya han nagkaada hiya bisyon parte kan Jesus ha langitnon nga himaya. Sugad hin gintagan hiya han dungog nga ig-anak, o banhawon, hin abanse ngadto ha kinabuhi sugad nga espiritu, mga siglo antes mahitabo ito nga klase han pamanhaw. Pero katapos hin dugang nga pag-aram hini nga bersikulo, baga hin kinahanglan bag-uhon an pagsaysay hini.

Oo, gin-uunabi dinhi ni Pablo an nahitabo han nakombirte hiya. Pero ano an iya iginpapasabot han nagsiring hiya nga “igin-anak [hiya] nga diri pa panahon”? May pipira nga posibilidad.

An iya kakombirte tigda ngan nakakatruma. Agsob nga napakalas an katawo nga diri pa panahon. Samtang hi Saul (nga nakilala ha urhi nga Pablo) tipakadto ha Damasco basi timarauton an mga Kristiano didto, diri hiya naglalaom nga makakita hin bisyon mahitungod han binanhaw nga hi Jesus. Diri la hi Pablo an nakalasan ha iya kakombirte kondi pati liwat an mga Kristiano nga iya ginpaplanohan pagtimaraot dida hito nga syudad. Dugang pa, nakakatruma gud ito nga eksperyensya salit temporaryo nga nabuta hiya.—Buh. 9:1-9, 17-19.

Nakombirte hiya ha “sayop nga panahon.” An orihinal nga Griego nga pulong nga iginhubad nga “usa nga igin-anak nga diri pa panahon” puydi liwat ighubad nga “usa nga igin-anak ha sayop nga panahon.” Ini an pagkahubad han The Jerusalem Bible: “Sugad hin natawo ako han waray bisan hin-o nga naglalaom hito.” Ha panahon nga nakombirte hi Pablo, hi Jesus nakabalik na ha langit. Diri pariho han mga tawo nga gin-unabi ni Pablo ha nauna nga mga bersikulo, waray niya makita an binanhaw nga hi Jesus antes hi Jesus sumaka ha langit. (1 Cor. 15:4-8) An diri ginlalaoman nga pagpakita ni Jesus kan Pablo naghatag ha iya hito nga oportunidad, bisan kon baga hin nahitabo ito ha “sayop nga panahon.”

Iya ginhihisgotan an iya kalugaringon ha mapainubsanon nga paagi. Sumala ha pipira nga eskolar, an mga pulong nga gin-gamit ni Pablo dinhi mahimo magpasabot hin pagminos ha kalugaringon. Kon ito an iya ginhuhunahuna, gin-aamin niya nga diri hiya angay han pribilehiyo nga iginhatag ha iya. Ngani, nagsiring liwat hiya: “Ako an pinakaubos ha mga apostol, ngan diri ako takos tawagon nga apostol, kay gintimaraot ko an kongregasyon han Dios. Kondi pinaagi han diri matupngan nga pagkabuotan han Dios nagin sugad ako hini.”—1 Cor. 15:9, 10.

Salit baga hin an gin-uunabi ni Pablo amo an diri ginlalaoman ngan tigda nga pagpakita ha iya ni Jesus, an diri ginlalaoman nga tayming han iya kakombirte, o an iya pagin diri angayan ha pagkarawat hin sugad kaurusahon nga kapahayagan. Anoman an karuyag sidngon ni Pablo, klaro nga presyoso gud ha iya ito nga eksperyensya. Ginpamatud-an gud hito ha iya nga ginbanhaw na hi Jesus. Diri urusahon nga agsob niya unabihon iton diri ginlalaoman nga eksperyensya kon nagsasangyaw hiya parte ha pagkabanhaw ni Jesus.—Buh. 22:6-11; 26:13-18.