1. Antes mamatay hi apostol Pedro, ha ano hiya gin-gamit ni Jehova?

 MAARAM hi apostol Pedro nga hirani na hiya mamatay. Ha damu ka dekada han iya matinumanon nga pag-alagad, nagin sumurunod hiya ni Jesus, nagtikang pagsangyaw ha bag-o nga mga teritoryo, ngan nag-alagad sugad nga membro han nagmamando nga lawas. Pero damu pa an kan Pedro nahimo. Han mga 62-64 C.E., gin-gamit hiya ni Jehova ha paghimo hin duha nga surat—an mga libro han Biblia nga 1 ngan 2 Pedro. Naglalaom hi Pedro nga ini nga mga surat makakabulig ha mga Kristiano kamatay niya.—2 Ped. 1:12-15.

2. Kay ano nga napapanahon gud an mga surat ni Pedro?

² Ginhimo ni Pedro an iya giniyahan nga mga surat ha panahon nga an iya mga igkasi-tumuroo “nagsasakit . . . tungod han magkalain-lain nga mga pagsari.” (1 Ped. 1:6) An magraot nga tawo nangalimbasog nga maisulod ha Kristiano nga kongregasyon an buwa nga katutdoan ngan maghugaw nga binuhatan. (2 Ped. 2:1, 2, 14) Hirani na maeksperyensyahan han mga Kristiano nga naukoy ha Jerusalem “an kataposan han ngatanan nga butang”—an kabungkag hito nga syudad ngan han Judio nga mga sistema pinaagi han Romano nga kasundalohan. (1 Ped. 4:7) Sigurado nga an mga surat ni Pedro nakabulig ha mga Kristiano nga makita kon ano an ira mahihimo basi makapailob ha presente nga mga kakurian ngan makapangandam ha tiarabot nga mga pagsari. b

3. Kay ano nga dapat naton usisahon an giniyahan nga mga surat ni Pedro?

³ Bisan kon para ha siyahan-siglo nga mga Kristiano an surat  ni Pedro, igin-upod ni Jehova ini nga mga surat ha iya Pulong. Salit mahimo kita yana makapahimulos tikang hito nga mga surat. (Roma 15:4) Tungod kay nagkikinabuhi kita ha kalibotan nga puno hin maghugaw nga binuhatan, naatubang liwat kita hin mga problema nga mahimo magpakuri han aton pag-alagad kan Jehova. Dugang pa, hirani na kita makaeksperyensya hin kasakitan nga labaw pa kay ha kasakitan nga nagbungkag ha Judio nga mga sistema. Makakaagi kita hin importante nga mga pahinumdom ha duha nga surat ni Pedro. Mabulig ini ha aton nga padayon nga pamulaton an adlaw ni Jehova, madaog an kahadlok ha tawo, ngan makultibar an hilarom nga gugma ha usa kag usa. An sugad nga mga pahinumdom makakabulig liwat ha mga tigurang nga makita kon paonan-o nira malampuson nga maitatagana an panginahanglan han panon.

4. Sugad han iginpapakita han 2 Pedro 3:3, 4, ano an posible magpaluya han aton pagtoo?

⁴ Napapalibotan kita hin mga tawo nga diri natoo ha tagna han Biblia. Bangin tamayon kita han mga parakontra kay damu ka tuig na kita nga naghihinulat han kataposan. An pipira nga kritiko nasiring nga diri gud ito maabot. (Basaha an 2 Pedro 3:3, 4.) Kon makabati kita hin sugad nga mga komento tikang ha aton ginsasangyawan, katrabaho, o kapamilya, bangin magluya an aton pagtoo. Iginsumat ni Pedro kon ano an makakabulig ha aton.

5. Ano an mabulig ha aton nga matipigan an husto nga panhunahuna parte ha kataposan hini nga sistema? (2 Pedro 3:8, 9)

⁵ Para ha pipira, hi Jehova mahinay ha pagtapos han presente nga maraot nga sistema. An mga pulong ni Pedro makakabulig ha aton nga matipigan an husto nga panhunahuna, kay nagpapahinumdom ito ha aton nga an panhunahuna ni Jehova ha panahon iba gud kay ha mga tawo. (Basaha an 2 Pedro 3:8, 9.) Para kan Jehova, an usa ka yukot ka tuig sugad la hin usa ka adlaw. Hi Jehova mapailubon, ngan diri niya karuyag nga mabungkag an bisan hin-o. Pero kon umabot na an iya adlaw, ini nga sistema matatapos. Pribilehiyo gud naton nga gamiton an nahibibilin nga panahon basi magsangyaw ha mga tawo han ngatanan nga nasud.

6. Paonan-o naton “ginhuhunahuna pirme” an adlaw ni Jehova? (2 Pedro 3:11, 12)

⁶ Gin-aaghat kita ni Pedro nga ‘hunahunaon pirme’ an adlaw ni Jehova. (Basaha an 2 Pedro 3:11, 12.) Paonan-o? Kada adlaw, mahimo naton hunahunaon kon ano kaopay an magigin kinabuhi ha bag-o nga kalibotan. Imadyina an imo kalugaringon nga nahinggot hin malimpyo nga hangin, nakaon hin masustansya nga pagkaon, natapo ha imo mga hinigugma nga ginbanhaw, ngan nagtututdo ha mga tawo nga maiha na nga namatay mahitungod ha katumanan han mga tagna han Biblia. An sugad nga pagpamalandong mabulig ha imo nga magpadayon ha pagpamulat ngan masiguro nga nagkikinabuhi na kita ha panahon han kataposan. Tungod kay ‘hinbabaroan naton nga daan’ an mahitatabo ha tiarabot, ‘diri kita maisisimang’ han buwa nga mga magturutdo.—2 Ped. 3:17.

7. Ano an mahimo magin epekto ha aton han kahadlok ha tawo?

⁷ Samtang padayon naton nga ginhuhunahuna an adlaw ni Jehova, napapagios kita nga isangyaw an maopay nga sumat ha iba. Bisan pa hito, may mga panahon nga bangin mag-alang kita pagbuhat hito. Kay ano? Bangin temporaryo nga magpadara kita ha kahadlok ha tawo. Ito an nahitabo kan Pedro. Ha gab-i han pagbista kan Jesus, nahadlok hi Pedro nga magpakilala sugad nga usa han mga disipulo ni Jesus ngan pauroutro nga iginnigar niya nga diri niya kilala hi Jesus! (Mat. 26:69-75) Pero ha urhi, ini  gihap nga apostol an nagsiring nga may kombiksyon: “Ayaw kahadlok han ira nahahadlokan, ngan ayaw liwat kalisang.” (1 Ped. 3:14) An mga pulong ni Pedro nagpapasarig ha aton nga puydi ta madaog an kahadlok ha tawo.

8. Ano an makakabulig ha aton nga madaog an kahadlok ha tawo? (1 Pedro 3:15)

⁸ Ano an makakabulig ha aton nga madaog an kahadlok ha tawo? Hi Pedro nagsiring: “Baraana an Kristo sugad nga Ginoo dida ha iyo kasingkasing.” (Basaha an 1 Pedro 3:15.) Nag-uupod ini han pagpamalandong han papel ngan gahum han aton Ginoo ngan Hadi, hi Kristo Jesus. Kon naabat ka hin kakulba o kahadlok ha panahon nga nagkakaada ka higayon nga magsangyaw ha iba, hinumdumi an aton Hadi. Imadyina hiya nga nagmamando ha langit ngan napapalibotan hin minilyon nga anghel. Hinumdumi nga may-ada hiya han “ngatanan nga awtoridad ha langit ngan ha tuna” ngan “kaupod niyo [hiya] ha ngatanan nga adlaw tubtob ha ikatarapos han sistema han mga butang.” (Mat. 28:18-20) Gin-aaghat kita ni Pedro nga magin “andam pirme” ha pagdepensa han aton pagtoo. Karuyag mo ba magsangyaw ha trabaho, ha eskwelahan, o ha iba pa nga diri pormal nga paagi? Abanse nga hunahunaa kon san-o mo ito mahimo buhaton, katapos, pangandam kon ano an imo isisiring. Pag-ampo para hin kaisog, ngan sarig nga bubuligan ka ni Jehova nga madaog an kahadlok ha tawo.—Buh. 4:29.

9. Ha usa ka higayon, ha ano nga paagi waray makapakita hin gugma hi Pedro? (Kitaa liwat an piktyur.)

⁹ Nahibaro hi Pedro kon paonan-o ipapakita an gugma. Presente hiya han hi Jesus nagsiring: “Naghahatag ako ha iyo hin bag-o nga sugo, nga higugmaon niyo an usa kag usa; sugad la han paghigugma ko ha iyo, higugmaa liwat niyo an usa kag usa.” (Juan 13:34) Bisan pa hito, ha urhi nagpadara hi Pedro ha presyur ngan waray na kumaon kaupod han mga Hentil nga kabugtoan. Ito nga ginbuhat ni Pedro gintawag ni apostol Pablo nga “pagpakunokuno,” o usa nga buhat han pagin hipokrito. (Gal. 2:11-14) Ginkarawat ni Pedro an pagtadong ni Pablo ngan nahibaro tikang hito. Ha iya duha nga surat, iya ginpabug-atan nga dapat diri la kita basta naabat hin gugma ha aton kabugtoan, kondi dapat ipakita liwat naton ito nga gugma.

10. An “minagburugto nga gugma nga diri hipokrito” resulta han ano? Isaysay. (1 Pedro 1:22)

¹⁰ Hi Pedro nagsiring nga dapat magkaada kita “minagburugto nga gugma nga diri hipokrito” para ha aton mga igkasi-magsiringba. (Basaha an 1 Pedro 1:22.) An sugad nga gugma resulta han “pagkamasinugtanon ha kamatuoran.” Ini nga kamatuoran nag-uupod han katutdoan nga “an Dios waray pinaurog.” (Buh. 10:34, 35) Diri naton masusugot an sugo ni Jesus mahitungod ha gugma kon pipira la nga kabugtoan ha kongregasyon an papakitaan naton hin gugma ngan diri an ngatanan. Syempre, bangin magin mas duok kita ha pipira nga kabugtoan, sugad han ginbuhat ni Jesus. (Juan 13:23; 20:2) Pero ginpapahinumdoman kita ni Pedro nga dapat higugmaon naton an ngatanan naton nga kabugtoan kay bahin hira han aton pamilya.—1 Ped. 2:17.

11. Ano an karuyag sidngon han ‘higugmaon gud an usa kag usa tikang ha kasingkasing’?

¹¹ Gin-aaghat kita ni Pedro nga ‘higugmaon gud an usa kag usa tikang ha kasingkasing.’ Hini nga konteksto, an mga pulong nga ‘higugmaon gud’ nangangahulogan nga higugmaon an usa bisan kon makuri hiya higugmaon. Pananglitan, ano man kon may bugto nga nakapasina o nakapasakit ha aton? An aton siyahan nga reaksyon bangin amo an pagbulos imbes nga magpakita hin gugma. Pero nahibaroan ni Pedro kan Jesus nga an pagbulos diri nakakapalipay ha Dios. (Juan 18:10, 11) Hi Pedro nagsurat: “Ayaw pagbulos hin kadaot ha kadaot o hin insulto ha insulto. Lugod, pagbalos hin bendisyon.” (1 Ped. 3:9) Kon may hilarom ka nga gugma, magigin buotan ka ngan makonsiderasyon bisan ha mga tawo nga bangin nakasakit ha imo.

12. (a) Mapapagios kita han hilarom nga gugma nga buhaton pa an ano? (b) Ano an karuyag mo nga pangalimbasogan nga buhaton, sugad han iginpapakita ha video nga Tipigi an Presyoso nga Regalo nga Pagkaurosa?

¹² Ha siyahan nga surat ni Pedro, gin-gamit niya an mga pulong nga “hilarom nga gugma.” An sugad nga gugma diri la nagtatabon hin pipira nga sala, kondi hin “damu nga sala.” (1 Ped. 4:8) Posible, nahinumdoman ni Pedro an leksyon parte ha pagpasaylo nga igintutdo ha iya ni Jesus damu ka tuig na an naglabay. Hito nga panahon, posible nga naghunahuna hi Pedro nga maopay gud hiya nga tawo han nagsiring hiya nga papasayloon niya an iya bugto “tubtob ha pito ka beses.” Pero hi Jesus nagtutdo ha iya—ngan pati ha aton—nga magpasaylo “tubtob ha 77 ka beses,” karuyag sidngon waray limitasyon. (Mat. 18:21, 22) Kon nakukurian ka nga iaplikar ini nga sagdon, ayaw kahulop! An ngatanan nga diri perpekto nga surugoon ni Jehova may mga panahon nga nakukurian ha pagpasaylo. An importante nga butang yana amo an paghimo han ginkikinahanglan nga mga pitad basi pasayloon an imo bugto ngan makigmurayaw ha iya. c

13. Kay ano nga bangin makuri para ha mga tigurang an pag-ataman ha ira kabugtoan?

¹³ Sigurado nga waray gud mahingalimti ni Pedro an ginyakan ha iya ni Jesus katapos niya mabanhaw: “Atamana an akon gudtiay nga mga karnero.” (Juan 21:16) Kon usa ka nga tigurang, maaram ka nga ito nga mga instruksyon naaplikar liwat ha imo. Pero mahimo magin makuri para ha usa nga tigurang an pamiling hin panahon para tumanon ito nga importante nga toka. Kinahanglan unahon han mga tigurang an panginahanglan han ira kalugaringon nga pamilya ha pisikal, emosyonal, ngan espirituwal. Nangunguna liwat hira ha pagsangyaw nga buruhaton sugad man ha pagpangandam ngan pagpresentar ha mga bahin ha mga katirok, asembleya, ngan kombensyon. An pipira liwat may mga responsabilidad sugad nga membro han Hospital Liaison Committee o may mga toka ha Local Design/Construction Department. Oo, busy gud an mga tigurang!

14. Ano an mahimo makapagios ha mga tigurang nga atamanon an panon? (1 Pedro 5:1-4)

¹⁴ Gin-aghat ni Pedro an iya mga igkasi-tigurang: “Atamana an panon han Dios.” (Basaha an 1 Pedro 5:1-4.) Kon usa ka nga tigurang, maaram kami nga hinigugma mo an imo kabugtoan ngan karuyag mo nga atamanon hira. Pero usahay bangin inaabat mo nga busy ka gud o kapoy hinduro salit diri mo na kaya matuman ito nga toka. Ano an mahimo mo buhaton? Isumat kan Jehova an imo mga inaabat. Hi Pedro nagsurat: “Kon nagsiserbi an bisan hin-o, buhaton niya ito sugad nga nasarig ha kusog nga iginhahatag han Dios.” (1 Ped. 4:11) An imo kabugtoan bangin may mga problema nga diri bug-os nga masusulbad dinhi hini nga sistema. Pero hinumdumi nga an “nangunguna nga paraataman,” hi Jesu-Kristo, mas makakabulig ha ira labaw kay han imo mahihimo. Mabubuhat niya ito yana ngan ha bag-o nga kalibotan. Ginhahangyo han Dios an mga tigurang nga higugmaon an ira kabugtoan, atamanon hira, ngan magin “mga susbaranan ha panon.”

15. Paonan-o gin-aataman han usa nga tigurang an panon? (Kitaa liwat an piktyur.)

¹⁵ Hi William, nga maiha na nga tigurang, maaram kon ano kaimportante an pag-shepherding. Han nagtikang an COVID-19 nga pandemya, ginhimo niya ngan han iya mga igkasi-tigurang nga prayoridad nga kontakon kada semana an tagsa nga bugto ha ira nakatoka nga grupo. Iya iginsaysay kon kay ano:  “Damu nga kabugtoan an nag-uusahan la ha ira balay, ngan posible nga madali la hira makapanhunahuna hin negatibo.” Kon an usa nga bugto may problema, hi William namamati hin maopay basi masabtan kon ano an iya panginahanglan ngan ginkakabarak-an. Katapos, namimiling hiya hin espisipiko nga mga reperensya, kasagaran nga mga video tikang ha aton website, basi makabulig ha bugto. Hiya nagsiring: “An pag-shepherding labi gud nga ginkikinahanglan yana. Nangangalimbasog gud kita nga buligan an mga tawo nga mahibaro parte kan Jehova; kinahanglan liwat kita mangalimbasog nga atamanon an panon ngan buligan an mga karnero ni Jehova nga magpabilin ha kamatuoran.”

16. Paonan-o naton maiaaplikar an mga leksyon nga aton nahibaroan ha mga surat ni Pedro?

¹⁶ Nahisgotan naton an pipira nga leksyon tikang ha duha nga giniyahan nga surat ni Pedro. Bangin may nakita ka nga bahin nga karuyag mo pauswagon. Pananglitan, karuyag mo ba pamalandungon hin mas agsob an mga bendisyon ha tiarabot nga bag-o nga kalibotan? Ginhimo mo ba nga tumong nga magsangyaw ha trabaho, ha eskwelahan, o ha iba pa nga diri pormal nga paagi? May nahuhunahuna ka ba nga mga paagi nga mas maipapakita mo an hilarom nga gugma ha imo kabugtoan? Mga tigurang, determinado ba kamo ngan andam ha pag-ataman ha mga karnero ni Jehova? Kon uusisahon niyo hin tangkod an iyo kalugaringon, bangin may makita kamo nga pipira niyo nga kaluyahan, pero ayaw kahulop. “An Ginoo buotan,” ngan bubuligan niya kamo nga mag-uswag. (1 Ped. 2:3) Ginpapasarig kita ni Pedro: “An Dios . . . mismo an magtatapos han iyo pagbansay. Paparig-unon kamo niya, pakukusgon kamo niya, ibubutang kamo niya ha marig-on nga pundasyon.”—1 Ped. 5:10.

17. Kon magpapadayon kita ngan magpapabansay kan Jehova, ano an magigin resulta?

¹⁷ Han una, inabat ni Pedro nga diri hiya takos nga makaupod an Anak han Dios. (Luc. 5:8) Pero ha mahigugmaon nga bulig ni Jehova ngan ni Jesus, hi Pedro nakapadayon sugad nga sumurunod han Kristo. Sugad nga resulta, hi Pedro nagin kwalipikado ha “pagsulod ngadto ha waray kataposan nga Ginhadian han aton Ginoo ngan Paratalwas nga hi Jesu-Kristo.” (2 Ped. 1:11) Maopay gud ito nga balos ha iya! Kon magpapadayon ngan magpapabansay ka kan Jehova pariho kan Pedro, makakarawat mo liwat an balos nga kinabuhi nga waray kataposan. ‘Makakab-ot mo an tumong han imo pagtoo, an imo katalwasan.’—1 Ped. 1:9.