1. Ano an reaksyon ni Pedro ha milagroso nga pakadakop nira hin damu nga isda?

 BUG-OS nga gab-i nga nangisda hira Pedro, kondi waray hira dakop. Pero urusahon nga ginsidngan hiya ni Jesus: “Pakadto ha lawod, ngan ihulog an iyo mga pukot basi makadakop.” (Luc. 5:4) Nagruhaduha hi Pedro kon may madadakop hira, pero ginsunod niya hi Jesus. An iginhulog nga mga pukot nagtikang magisi tungod han kadamu han ira dakop. Han nasantop ni Pedro ngan han iya mga kaupod nga usa ito nga milagro, ‘nahipausa gud hira.’ Hi Pedro nagsiring: “Pahirayo ha akon, Ginoo, kay makasasala ako nga tawo.” (Luc. 5:6-9) Posible nga inabat ni Pedro nga diri hiya takos nga makaupod ni Jesus.

2. Kay ano nga mapulsanon para ha aton nga usisahon an ehemplo ni Pedro?

² Husto hi Pedro—‘makasasala hiya nga tawo.’ Iginpapakita han Kasuratan nga usahay may-ada hiya ginsisiring ngan ginbubuhat nga ha urhi iya ginbabasolan. Gin-abat mo na ba an gin-abat ni Pedro? May-ada ka ba kinaiya nga ginpapanigurohan nga bag-uhon o kaluyahan nga gin-aatohan? Kon oo, mapaparig-on ka kon aadman mo an ehemplo ni Pedro. Paonan-o? Tagda ini: Puydi unta diri irekord ha Biblia an mga sayop ni Pedro. Pero iginpasurat ito basi may mahibaroan kita tikang hito. (2 Tim. 3:16, 17) An paghibaro mahitungod hini nga tawo nga may mga kaluyahan ngan mga pagbati nga pariho ha aton makakabulig ha aton nga makita nga hi Jehova diri naglalaom nga diri na kita makakasayop. Karuyag niya nga magpadayon kita ngan mangalimbasog bisan pa han aton mga kaluyahan.

3. Kay ano nga kinahanglan naton magpadayon?

³ Kay ano nga kinahanglan naton magpadayon? Kay kon padayon ta nga bubuhaton an usa nga butang, mag-uuswag kita. Ha pag-ilustrar: An usa nga musikero mahimo maggahin hin damu nga panahon ha pagpraktis basi magin makarit ha iya instrumento.  Hito nga panahon, bangin damu an iya sayop, pero kon magpadayon hiya ha pagpraktis, mag-uuswag hiya. Pero bisan magin makarit hiya nga musikero, mahimo hiya magsayop ha panapanahon. Bisan pa hito, diri hiya naundang. Padayon hiya nga nagpapraktis basi mag-uswag. Ha pariho nga paagi, bisan kon inabat naton nga nalamposan ta na an usa nga kaluyahan, bangin mahimo naton utro ito nga sayop. Pero padayon kita nga nangangalimbasog nga malamposan ito. Nakakayakan kita o nakakabuhat hin mga butang nga ha urhi ginbabasolan naton; pero kon magpapadayon kita, bubuligan kita ni Jehova nga mag-uswag. (1 Ped. 5:10) Hisgotan ta an ehemplo ni Pedro han diri pag-undang. An pagpaid nga iginpakita ni Jesus bisan pa han mga sayop ni Pedro magpapagios ha aton nga magpadayon ha pag-alagad kan Jehova.

4. Sugad han mababasa ha Lucas 5:5-10, paonan-o iginhulagway ni Pedro an iya kalugaringon, pero paonan-o hiya ginpasarig ni Jesus?

⁴ An Kasuratan waray magsiring kon kay ano nga iginhulagway ni Pedro an iya kalugaringon sugad nga ‘makasasala nga tawo’ o kon ano nga sala an nakada ha iya hunahuna. (Basaha an Lucas 5:5-10.) Pero posible nga nakahimo hiya hin pipira nga seryoso nga sayop. Maaram hi Jesus nga nahahadlok hi Pedro, bangin tungod kay inaabat niya nga diri hiya takos. Pero maaram liwat hi Jesus nga mahimo magpabilin nga matinumanon hi Pedro. Salit may pagkabuotan nga ginsidngan ni Jesus hi Pedro nga “ayaw na kahadlok.” An pagtapod ni Jesus kan Pedro may daku nga epekto ha iya. Ha urhi, ginbayaan nira Pedro ngan han iya bugto nga hi Andres an ira negosyo nga pagpangisda ngan nagin bug-os-panahon nga sumurunod han Mesias. Tungod hito, ginbendisyonan hira ni Jehova ha damu nga paagi.—Mar. 1:16-18.

5. Ano nga mga bendisyon an nakarawat ni Pedro tungod kay nadaog niya an iya kahadlok ngan ginkarawat niya an imbitasyon ni Jesus?

⁵ Damu an mag-opay nga eksperyensya ni Pedro sugad nga sumurunod han Kristo. Nakita niya hi Jesus nga nanambal hin may sakit, nagpagawas hin mga demonyo, ngan nagbanhaw pa ngani. b (Mat. 8:14-17; Mar. 5:37, 41, 42) Nakita liwat ni Pedro an urusahon nga bisyon ha tiarabot nga papel ni Jesus sugad nga Hadi han Ginhadian han Dios. Waray gud hingalimti ni Pedro ini nga panhitabo. (Mar. 9:1-8; 2 Ped. 1:16-18) Oo, nakakita hi Pedro hin mga butang nga waray unta niya makita kon waray hiya sumunod kan Jesus. Sigurado nga nalipay gud hiya nga nalamposan niya an negatibo nga mga pagbati ngan naeksperyensyahan ini ngatanan nga bendisyon!

6. Nalamposan ba dayon ni Pedro an iya mga kaluyahan? Isaysay.

 ⁶ Bisan pa han iya mga nakita ngan nabatian, nakurian la gihapon hi Pedro tungod han iya mga kaluyahan. Tagda an pipira nga ehemplo. Han iginsaysay ni Jesus kon paonan-o hiya mag-aantos ngan mamamatay sugad nga katumanan han tagna ha Biblia, ginsaway hiya ni Pedro. (Mar. 8:31-33) Pauroutro nga nagdiskusyon hira Pedro ngan an iba nga apostol kon hin-o ha ira an pinakalabaw. (Mar. 9:33, 34) Ha ultimo nga gab-i antes mamatay hi Jesus, tigda nga gintigbas ni Pedro an talinga han usa nga lalaki. (Juan 18:10) Hito liwat nga gab-i, nagpadara hi Pedro ha iya kahadlok salit tulo ka beses nga iginnigar niya nga kilala niya an iya sangkay nga hi Jesus. (Mar. 14:66-72) Sugad nga resulta, nagtangis hi Pedro tungod han duro nga kasubo.—Mat. 26:75.

7. Ano nga higayon an iginhatag kan Pedro katapos mabanhaw hi Jesus?

⁷ Waray pabay-i ni Jesus an iya nasusubo gud nga apostol. Katapos niya mabanhaw, gintagan niya hin higayon hi Pedro basi pamatud-an nga hinigugma la gihapon hiya ni Pedro. Ginsugo ni Jesus hi Pedro nga mapainubsanon nga atamanon an iya mga karnero. (Juan 21:15-17) Andam hi Pedro nga buhaton an ginsugo ni Jesus. Salit nakadto hiya ha Jerusalem ha adlaw han Pentekostes ngan usa hiya han siyahan nga gindihogan pinaagi han baraan nga espiritu.

8. Ano nga seryoso nga sayop an nahimo ni Pedro ha Antiokia?

⁸ Bisan kon dinihogan na nga Kristiano hi Pedro, kinahanglan la gihapon niya atohan an iya mga kaluyahan. Han 36 C.E., presente hi Pedro han gindihogan pinaagi han baraan nga espiritu an diri turi nga Hentil nga hi Cornelio, nga klaro nga nagpapakita nga “an Dios waray pinaurog” ngan an mga Hentil mahimo magin bahin han Kristiano nga kongregasyon. (Buh. 10:34, 44, 45) Katapos hito, nakaon na hi Pedro kaupod han mga Hentil, usa nga butang nga diri gud niya hihimoon hadto. (Gal. 2:12) Pero inabat han pipira nga Judio nga mga Kristiano nga diri dapat magkaupod ha pagkaon an mga Judio ngan mga Hentil. Han kinadto ha Antiokia an pipira nga may sugad hito nga panhunahuna, waray na liwat hi Pedro kumaon kaupod han iya Hentil nga kabugtoan, posible nga tungod ha kahadlok nga mapakdol an Judio nga mga Kristiano. Nakita ni apostol Pablo an ginbuhat ni Pedro ngan ginsaway hiya ha publiko. (Gal. 2:13, 14) Bisan pa hini nga sayop, waray umundang hi Pedro. Ano an nakabulig ha iya?

9. Paonan-o ginpapabug-atan han Juan 6:68, 69 an pagkamaunungon ni Pedro?

⁹ Hi Pedro maunungon; waray niya tuguti an bisan ano nga makapaundang ha iya ha pagsunod kan Jesus. Pananglitan, ha usa ka higayon, iginpakita niya an iya pagkamaunungon han may ginsiring hi Jesus nga waray masabti han iya mga disipulo. (Basaha an Juan 6:68, 69.) Damu an inundang pagsunod kan Jesus; waray man la hira maghulat o mangaro han iya esplikasyon. Pero iba hi Pedro. Ginkilala niya nga hi Jesus la “an may mga pulong han kinabuhi nga waray kataposan.”

10. Paonan-o hi Jesus nagpakita hin pagsarig kan Pedro? (Kitaa liwat an piktyur.)

¹⁰ Waray bayai ni Jesus hi Pedro. Ha iya ultimo nga gab-i dinhi ha tuna, maaram hi Jesus nga babayaan hiya ni Pedro ngan han iba pa nga apostol. Bisan pa hito, iginpahayag ni Jesus an iya pagsarig nga mabalik hi Pedro ngan magpapabilin nga matinumanon. (Luc. 22:31, 32) Nasasabtan ni Jesus nga “an espiritu disidido, pero an unod maluya.” (Mar. 14:38) Salit bisan katapos hiya ignigar ni Pedro, waray mawara an pagsarig ni Jesus hini nga iya apostol. Katapos ni Jesus mabanhaw, nagpakita hiya kan Pedro —ha panahon nga nag-uusahan hi Pedro. (Mar. 16:7; Luc. 24:34; 1 Cor. 15:5) Sigurado nga naparig-on gud hito inin masurub-on nga apostol!

11. Paonan-o ginpasarig ni Jesus hi Pedro nga bubuligan hiya ni Jehova?

¹¹ Ginpasarig ni Jesus hi Pedro nga bubuligan hiya ni Jehova. An ginbanhaw nga hi Jesus naghimo hin milagro para kanda Pedro ngan ha iya mga igkasi-apostol pinaagi ha pakadakop hin damu hinduro nga isda. (Juan 21:4-6) Ini nga milagro sigurado nga nagpasarig kan Pedro nga hi Jehova makakagtagana han iya materyal nga panginahanglan. Posible nga nahinumdoman niya an ginsiring ni Jesus nga tataganahan ni Jehova adton padayon nga ‘gin-uuna an pagpamiling han Ginhadian.’ (Mat. 6:33) Tungod hito, gin-una niya an ministeryo, diri an iya negosyo nga pagpangisda. Maisugon nga nagsangyaw hiya ha adlaw han Pentekostes 33 C.E., diin ginbuligan niya an yinukot nga tawo nga karawaton an maopay nga sumat. (Buh. 2:14, 37-41) Katapos, ginbuligan niya an mga Samaritano ngan an mga Hentil nga karawaton an Kristo. (Buh. 8:14-17; 10:44-48) Sigurado nga gin-gamit ni Jehova hi Pedro ha urusahon nga paagi basi buligan an ngatanan nga klase han tawo nga makasulod ha kongregasyon.

12. Paonan-o makakabulig an ehemplo ni Pedro kon nakukurian kita pag-ato ha nagpapadayon nga kaluyahan?

¹² Mabubuligan kita ni Jehova nga diri umundang. Bangin makurian kita nga magpadayon, labi na kon may-ada kita gin-aatohan nga kaluyahan. Usahay, bangin mas makuri atohan an aton kaluyahan kay ha naeksperyensyahan ni Pedro. Pero mahimo kita tagan ni Jehova hin kusog nga diri umundang. (Sal. 94:17-19) Pananglitan, usa nga brother an may homoseksuwal nga pagkinabuhi ha sulod hin damu ka tuig antes hiya mahibaro han kamatuoran. Ginbayaan niya hin bug-os iton imoral nga mga buhat ngan nagkinabuhi uyon ha ginsisiring han Biblia. Pero usahay nabalik an iya sayop nga mga hingyap. Ano an nakabulig ha iya nga magpadayon? Nagsiring hiya: “Ginpaparig-on kita ni Jehova.” Nagdugang hiya: “Ha bulig han espiritu ni Jehova . . . , nahibaroan ko nga posible nga padayon nga magkinabuhi ha paagi nga karuyag ni Jehova . . . Padayon ako nga ginagamit ni Jehova, ngan bisan pa han akon mga kaluyahan pirme niya ako ginpaparig-on.”

13. Paonan-o naton masusubad an ehemplo ni Pedro, sugad han nakarekord ha Buhat 4:13, 29, 31? (Kitaa liwat an piktyur.)

¹³ Sugad han aton nahibaroan, hi Pedro diri la makausa nga nagpadara ha iya kahadlok ha  tawo. Pero tungod kay nag-ampo hiya para hin kaisog, nadaog niya ito. (Basaha an Buhat 4:13, 29, 31.) Mahimo liwat naton madaog an aton mga kahadlok. Pansina an nahitabo kan Horst, usa nga batan-on nga brother ha Nazi Germany. May mga panahon nga nagpadara hiya ha presyur ha eskwelahan ngan nagsiring hin “Heil Hitler!” Imbes nga isgan hiya han iya mga kag-anak, nag-ampo hira kaupod niya ngan naghangyo kan Jehova nga tagan hiya hin kaisog. Tungod ha bulig han iya mga kag-anak ngan ha pagsarig kan Jehova, ha urhi nagkaada hi Horst hin kaisog nga diri magkompromiso. Ha urhi hiya nagsiring: “Waray gud ako bayai ni Jehova.” c

14. Paonan-o mapaparig-on han mahigugmaon nga mga paraataman an mga nanluluya?

¹⁴ Diri kita babayaan ni Jehova ngan ni Jesus. Katapos ni Pedro ignigar hi Jesus, kinahanglan niya maghimo hin importante nga desisyon. Maundang ba hiya, o magpapadayon ha pagsunod ha Kristo? Nangamuyo hi Jesus kan Jehova nga diri unta magluya an pagtoo ni Pedro. Ginsumatan ni Jesus hi Pedro parte hito nga pag-ampo ngan iginpahayag niya an iya pagsarig nga ha urhi paparig-unon ni Pedro an iya kabugtoan. (Luc. 22:31, 32) Sigurado nga naparig-on hi Pedro han nahinumdoman niya an ginsiring ni Jesus! Kon kinahanglan naton maghimo hin importante nga desisyon, mahimo gamiton ni Jehova an mahigugmaon nga mga paraataman basi maghatag hin pagparig-on nga aton ginkikinahanglan para makapabilin nga matinumanon. (Efe. 4:8, 11) An maiha na nga tigurang nga hi Paul nangalimbasog nga maihatag an sugad nga pagliaw. Ginhahangyo niya an mga nanluluya nga hinumdoman kon paonan-o hira iginpahirani ni Jehova ha kamatuoran. Katapos, ginpapasarig niya hira nga an maunungon  nga gugma ni Jehova nagpapagios ha Iya nga diri bumaya ha ira. Hiya nagsiring: “Nakita ko an damu nga nanluya nga nagpadayon ha bulig ni Jehova.”

15. Paonan-o an mga ehemplo nira Pedro ngan Horst nagpapakita nga tinuod an ginsisiring ha Mateo 6:33?

¹⁵ Sugad la nga igintagana ni Jehova an materyal nga panginahanglan ni Pedro ngan han iba nga apostol, itatagana liwat niya an aton materyal nga panginahanglan kon uunahon ta an ministeryo ha aton kinabuhi. (Mat. 6:33) Katapos han Girra ha Kalibotan II, hi Horst, nga gin-unabi kanina, nagpayunir. Pero pobre gud hiya, ngan nagruhaduha hiya kon kaya niya masuportahan an iya kalugaringon ngan magpabilin ha bug-os-panahon nga pag-alagad. Ano an iya hihimoon? Nagdesisyon hiya nga sarihan hi Jehova. Salit igin-gahin niya an bug-os nga usa ka semana para ha ministeryo ha panahon han pagbisita han paramangno han sirkito. Ha kataposan hito nga semana, nahipausa hi Horst han an paramangno han sirkito naghatag ha iya hin sobre pero waray isumat kon kanay ito tikang. May sulod ito nga kwarta nga makakasuporta ha iya pagpayunir hin pipira ka bulan. Ini nga regalo ginhunahuna ni Horst nga usa nga pasarig nga hi Jehova magtatagana ha iya. Gin-gamit niya an iya bug-os nga kinabuhi ha pag-una ha Ginhadian.—Mal. 3:10.

16. Kay ano nga mapulsanon ha aton an pag-usisa han ehemplo ni Pedro ngan han iya mga sinurat?

¹⁶ Sigurado nga nalipay gud hi Pedro nga waray hiya bayai ni Jesus, sugad han iya ginhangyo hadto! Padayon nga ginbansay han Kristo hi Pedro basi magin matinumanon nga apostol ngan magin maopay nga ehemplo para ha mga Kristiano. Ngan damu nga mag-opay nga leksyon an aton nahibaroan tikang hito nga pagbansay. Iginsumat ni Pedro an pipira hito nga leksyon ngan an iba pa ha duha nga giniyahan nga surat nga iya iginpadara ha mga kongregasyon ha siyahan nga siglo. Ha sunod nga artikulo, aton hihisgotan an pipira nga pahinumdom tikang hito nga mga surat ngan kon paonan-o ta ito maiaaplikar yana.