1-2. Kay ano nga dapat naton adman an rekord parte kan Samson?

 ANO an imo nahuhunahuna kon nababatian mo an ngaran nga Samson? Bangin nahuhunahuna mo an usa nga makusog gud nga lalaki. Husto ka! Pero nakahimo hi Samson hin sayop nga desisyon nga nagresulta han iya damu nga pag-antos. Bisan pa hito, nagpokus hi Jehova ha ngatanan nga ginbuhat ni Samson ha pag-alagad ha Iya, ngan Iya igin-upod ito ha Biblia para ha aton kapulsanan.

² Gin-gamit ni Jehova hi Samson ha pagtuman hin urusahon nga mga butang basi buligan an Iya pinili nga katawohan, an Israel. Paglabay hin damu ka siglo katapos mamatay hi Samson, gin-giyahan ni Jehova hi apostol Pablo nga ig-upod an ngaran ni Samson ha lista han kalalakin-an nga may daku nga pagtoo. (Heb. 11:32-34) An ehemplo ni Samson makakadasig ha aton. Sinarig hiya kan Jehova, bisan pa han magkuri nga sitwasyon. Hini nga artikulo, hihisgotan ta kon ano an aton mahibabaroan kan Samson ngan kon paonan-o an iya ehemplo makakadasig ha aton.

3. Ano nga toka an nakarawat ni Samson?

³ Han natawo hi Samson, an mga Filisteo maraugdaog nga nagmando ha bug-os nga nasud han Israel. (Huk. 13:1) Tungod han ira mapintas nga pagmando, nag-antos gud an mga Israelita. Ginpili ni Jehova hi Samson nga ‘manguna ha pagtalwas ha Israel tikang ha kamot han mga Filisteo.’ (Huk. 13:5) Makuri gud ito nga toka! Basi matuman ito, kinahanglan ni Samson sumarig kan Jehova.

4. Paonan-o ginbuligan ni Jehova hi Samson nga makabuhi tikang ha mga Filisteo? (Hukom 15:14-16)

⁴ Pansina an ehemplo han pagsarig ni Samson kan Jehova ngan han bulig nga iya iginhahatag. Ha usa nga higayon, an kasundalohan  nga Filisteo inabot ha Lehi, posible ha Juda, basi dakpon hi Samson. An kalalakin-an han Juda nahadlok, salit nagdesisyon hira nga itubyan hi Samson ha mga kaaway. Gin-gapos hi Samson hin maopay han iya mga igkasi-Israelita hin duha nga bag-o nga pisi ngan gindara ha mga Filisteo. (Huk. 15:9-13) Pero “an espiritu ni Jehova naghatag ha iya hin kusog” ngan nakabuhi hiya ha mga pisi. Katapos, “nakakita hiya hin tul-an han panga han asno nga lalakí nga bag-o pa la nga namatay,” ginpurot niya ito ngan gin-gamit ha pagpatay ha 1,000 nga lalaki nga Filisteo!—Basaha an Hukom 15:14-16.

5. Ano an iginpapakita han paggamit ni Samson han tul-an han panga han asno mahitungod han iya pagsarig kan Jehova?

⁵ Kay ano nga gin-gamit ni Samson an tul-an han panga han usa nga asno? Kakaiba gud ito nga armas! Sigurado nga maaram hi Samson nga an iya kadaogan nakadepende kan Jehova, diri ha armas nga iya gin-gamit. Oo, gin-gamit hinin matinumanon nga lalaki kon ano la an may-ada hiya basi tumanon an kaburut-on ni Jehova. Sugad nga resulta han iya pagsarig kan Jehova, ginbendisyonan hiya hin daku nga kadaogan.

6. Ha pagtuman han aton teokratiko nga mga toka, ano an aton mahibabaroan kan Samson?

⁶ Kita liwat mapapakusog ni Jehova basi matuman an aton mga toka, bisan adton baga hin imposible. Ngan mahimo kita buligan han Dios ha paagi nga bangin diri naton ginlalaoman. Sarig nga bubuligan ka ni Jehova, nga nagpakusog kan Samson, nga mabuhat an Iya kaburut-on samtang nasarig ka ha Iya para hin bulig.—Prob. 16:3.

7. Ano nga ehemplo an nagpapakita nga importante an pangaro han giya ni Jehova?

⁷ Damu nga kabugtoan nga binulig ha mga proyekto han teokratiko nga pagpanukod an nagpakita hin pagsarig kan Jehova. Ha naglabay, an kabugtoan an kasagaran na nga nagdidisenyo ngan nagtutukod han kadam-an nga bag-o nga mga Kingdom Hall ngan iba pa nga mga pasilidad. Pero ha urhi, kinahanglan maghimo hin mga pagbag-o tungod kay nagtitikadaku an organisasyon ni Jehova. An kabugtoan  nga nangunguna nangaro hin giya kan Jehova ngan naggamit hin bag-o nga mga pamaagi, sugad han pagpalit hin mga pasilidad ngan pag-renovate hito. “Ha siyahan, diri masayon para ha iba an pagkarawat hini nga bag-o nga paagi,” siring ni Robert, nga binulig ha damu nga proyekto han pagpanukod ha bug-os nga kalibotan ha naglabay nga mga tuig. Siring pa niya: “Iba gud ito ha amon ginhihinimo ha sulod hin damu na nga katuigan. Pero an kabugtoan andam gud magpahiuyon, ngan klaro nga ginbibendisyonan ni Jehova ini nga mga pagbag-o.” Usa la ini nga ehemplo ha kon paonan-o ginigiyahan ni Jehova an iya katawohan ha pagtuman han iya kaburut-on. Ha panapanahon, dapat naton pakianhan an aton kalugaringon, ‘Nangangaro ba ako hin giya kan Jehova ngan nagpapabilin nga mapauyon-uyon ha akon pag-alagad ha iya?’

8. Ha usa ka higayon nga nauhaw gud hi Samson, ano an iya ginbuhat?

⁸ Bangin nabasa mo an iba nga mga higayon diin hi Samson naghimo hin urusahon nga mga butang. Nag-uusahan nga ginpatay niya an usa nga leon, ngan ha urhi nagpatay hiya hin 30 nga lalaki ha Askelon, nga syudad han mga Filisteo. (Huk. 14:5, 6, 19) Maaram hi Samson nga diri gud niya mahihimo an sugad nga mga butang kon waray an bulig ni Jehova. An usa nga ebidensya hito han nauhaw gud hiya katapos niya patayon an 1,000 nga Filisteo. Ano an iya ginhimo? Imbes nga sumarig ha iya kalugaringon basi mamiling hin tubig nga maiinom, nagtawag hiya kan Jehova para hin bulig.—Huk. 15:18.

9. Paonan-o ginbaton ni Jehova an hangyo ni Samson para hin bulig? (Hukom 15:19 ngan footnote)

⁹ Ginbaton ni Jehova an pangaro ni Samson hin bulig pinaagi hin milagroso nga paghimo hin burabod hin tubig. Han ininom hi Samson dida hito, “binalik an iya kusog ngan nagin matibaksi hiya utro.” (Basaha an Hukom 15:19 ngan footnote.) Ngan paglabay han mga katuigan, ini nga burabod han tubig posible nga nakada pa han gin-giyahan hi propeta Samuel ha pagsurat han libro han mga Hukom. An mga Israelita nga nakakita hiton nag-aawas nga tubig posible napahinumdoman nga kon sumarig hira kan Jehova, bubuligan niya an iya matinumanon nga mga magsiringba ha panahon han ira panginahanglan.

10. Ano an kinahanglan naton buhaton basi makarawat an bulig ni Jehova? (Kitaa liwat an piktyur.)

¹⁰ Kinahanglan liwat kita mangaro hin bulig kan Jehova anoman an aton talento o abilidad o mga nahimo na ha pag-alagad ha iya. Kinahanglan mapainubsanon naton nga karawaton nga an tinuod nga kalamposan posible la kon sumarig kita kan Jehova. Sugad la nga nagkusog hi Samson han ininom hiya han tubig nga igintagana ni Jehova, mapapakusog liwat kita ha espirituwal kon sasalingabuton naton an mga tagana ni Jehova ha aton.—Mat. 11:28.

11. Paonan-o naton bug-os nga mapapahimulosan an bulig ni Jehova? Iilustrar.

¹¹ Pansina an ehemplo ni Aleksey, nga usa han aton brother ha Russia nga nag-aantos hin duro nga pagtimaraot. Ano an nakabulig ha iya nga magpabilin nga marig-on hini nga magkuri gud nga kahimtang? Hiya ngan an iya asawa may-ada maopay nga rutina ha espirituwal. Nagsiring hiya: “Ginpapangalimbasogan ko nga diri mapabay-an an akon personal nga pag-aram ngan an pagbasa han Biblia kada adlaw. Kada aga, ginhihisgotan namon nga mag-asawa an inadlaw nga teksto ngan nag-aampo kami kan Jehova nga magkaupod.” Ano an aton mahibabaroan tikang hito? Imbes nga sumarig ha aton kalugaringon, kinahanglan naton sumarig kan Jehova. Paonan-o? Pinaagi han regular nga pagbuhat han mga butang nga nagpaparig-on han aton pagtoo, sugad han pag-aram ha Biblia, pag-ampo, pag-atender ha mga katirok, ngan pagsangyaw. Kon bubuhaton naton ito, hura nga bibendisyonan ni Jehova an aton paningkamot ha pag-alagad ha iya. Ginpakusog niya hi Samson, ngan sigurado nga mapapakusog kita niya.

12. Ano nga sayop nga desisyon an nahimo ni Samson, ngan kay ano nga naiiba ito ha iya nahiuna nga mga eksperyensya?

¹² Hi Samson diri perpekto pariho ha aton, salit may mga panahon nga nakahimo hiya hin sayop nga mga desisyon. An usa han iya mga desisyon nagkaada makasurubo nga mga resulta. Katapos ni Samson mag-alagad sugad nga hukom hin pipira ka panahon, “nahigugma hiya ha usa nga babaye ha Walog han Sorek nga an ngaran hi Delaila.” (Huk. 16:4) Antes hito, karuyag ni Samson nga magin asawa an usa nga Filisteo nga babaye, pero ito nga pag-asawa ‘tikang kan Jehova,’ nga ‘namimiling hin higayon kontra ha mga Filisteo.’ Ha urhi, hi Samson umukoy ha balay han usa nga hostes ha Gaza, nga syudad han mga Filisteo. Hito nga higayon, ginpakusog han Dios hi Samson basi dad-on an mga purtahan han ganghaan han syudad, salit madali na la ito sulungon. (Huk. 14:1-4; 16:1-3) Pero iba ha kahimtang ni Delaila, kay posible nga usa hiya nga Israelita.

13. Ano an ginhimo ni Delaila basi mahingadto hi Samson ha maraot nga sitwasyon?

¹³ Hi Delaila kumarawat hin daku nga kantidad hin kwarta tikang ha mga Filisteo sugad nga bayad ha pagtraydor kan Samson. Sobra ba an pagtapod ngan gugma ni Samson kan Delaila, nga tungod hito waray na niya mahunahuna an karuyag buhaton ni Delaila ha iya? Anoman an kahimtang, pauroutro nga ginpinirit ni Delaila hi Samson nga isumat kon diin tikang an iya kusog, ngan ha urhi iginsumat ni Samson an ngatanan. Makasurubo, gintugotan ni Samson an iya kalugaringon nga mahingada ha usa nga sitwasyon nga nagresulta ha kawara han iya kusog ngan han pag-uyon ni Jehova ha pipira ka panahon.—Huk. 16:16-20.

14. Ano nga mga problema an naeksperyensyahan ni Samson tungod kay sinarig hiya kan Delaila?

¹⁴ Naeksperyensyahan ni Samson an mapait nga mga resulta han iya pagsarig kan Delaila imbes nga kan Jehova. Gindakop ngan ginbuta han mga Filisteo hi Samson. Ginpriso hiya ha Gaza, diin an mga tawo dida hito iya ginpakaalohan ha naglabay, ngan ginhimo hiya nga uripon nga paragiling hin lugas. Katapos, ginpakaalohan hiya han an mga Filisteo nagtirirok para ha usa nga selebrasyon. Naghatag hira hin daku nga halad ha ira buwa nga dios nga hi Dagon, kay natoo hira nga ginbuligan hira ni Dagon nga madakop hi Samson. Tikang ha prisohan, gindara nira hi Samson ngadto ha ira selebrasyon basi himoon nga “pataraw-an.”—Huk. 16:21-25.

15. Paonan-o iginpakita ni Samson nga sinarig hiya utro kan Jehova? (Hukom 16:28-30) (Kitaa an piktyur ha kobre.)

¹⁵ Nakahimo hi Samson hin seryoso nga sayop, pero waray hiya umundang pag-alagad kan Jehova. Namiling hiya hin higayon basi matuman an iya hatag han Dios nga toka, nga amo an pakig-away ha mga Filisteo. (Basaha an Hukom 16:28-30.) Hi Samson nakimalooy kan Jehova: “Tuguti ako nga bumulos ha mga Filisteo.” Ginbaton han tinuod nga Dios an hangyo ni Samson ngan iginbalik an iya diri ordinaryo nga kusog. Sugad nga resulta, mas damu nga Filisteo an napatay ni Samson hini nga higayon kay han naglabay.

16. Ano an aton mahibabaroan tikang ha sayop ni Samson?

¹⁶ Bisan kon naeksperyensyahan ni Samson an mapait nga mga resulta han iya sayop, waray hiya umundang paningkamot ha pagbuhat han kaburut-on ni Jehova. Bisan kon makahimo kita hin sayop ngan kinahanglan sawayon o tanggalan hin pribilehiyo, diri kita dapat umundang. Hinumdumi nga andam hi Jehova magpasaylo ha aton. (Sal. 103:8-10) Bisan pa han aton mga sayop, puydi la gihap kita magamit ni Jehova, pariho kan Samson.

17-18. Kay ano nga an ehemplo ni Michael nakaparig-on ha imo? (Kitaa liwat an piktyur.)

¹⁷ Pansina an ehemplo han usa nga batan-on nga brother nga hi Michael. Busy hiya ha teokratiko nga mga buruhaton; usa hiya nga ministeryal nga surugoon ngan regular payunir. Pero makasurubo, nakahimo hiya hin sayop, salit nawad-an hiya hin mga pribilehiyo ha kongregasyon. “Antes ito mahitabo,” siring niya, “busy gud ako ha pag-alagad kan Jehova. Katapos, tigda la nga inabat ko nga waray na ako mahihimo ha pag-alagad ha iya. Waray ko gud mahunahuna nga babayaan ako ni Jehova, pero nahunahuna ko kon maibabalik ko pa ba an akon duok nga relasyon ha iya o kon makakag-alagad pa ba ako hin bug-os ha kongregasyon pariho han una.”

¹⁸ Maopay na la nga waray umundang hi Michael. Nagsiring pa hiya: “Nangalimbasog ako nga maibalik an akon duok nga relasyon kan Jehova pinaagi ha regular nga pag-ampo, pag-aram, ngan pagpamalandong.” Ha urhi, naibalik ni Michael an iya mga pribilehiyo ha kongregasyon. Nag-aalagad hiya yana sugad nga tigurang ngan regular payunir. Hiya nagsiring: “An suporta ngan pagparig-on nga akon nakarawat, labi na tikang ha mga tigurang, nakabulig ha akon nga makahunahuna nga hinigugma la gihap ako ni Jehova. Makakag-alagad na utro ako ha kongregasyon nga may limpyo nga konsensya. Ini nga eksperyensya nagtutdo ha akon nga papasayloon ni Jehova an bisan hin-o nga tinuod nga nagbabasol.” Makakasarig kita nga gagamiton kita ni Jehova ngan bibendisyonan liwat kita niya bisan kon makahimo kita hin mga sayop, kon bubuhaton ta an aton mahihimo nga tadungon an aton mga dalan ngan padayon nga sumarig ha iya.—Sal. 86:5; Prob. 28:13.

19. Paonan-o ka naparig-on han ehemplo ni Samson?

¹⁹ Hini nga artikulo, ginhisgotan ta an pipira nga makapainteres nga mga panhitabo ha kinabuhi ni Samson. Diri hiya perpekto; pero waray hiya umundang ha pangalimbasog ha pag-alagad kan Jehova, bisan katapos niya makasayop tungod kan Delaila. Ngan waray hi Jehova mawad-i hin pagsarig ha iya. Gin-gamit utro han Dios hi Samson ha urusahon nga paagi. Gintagad la gihap ni Jehova hi Samson nga usa nga lalaki nga may daku nga pagtoo, ngan igin-upod hiya ha lista han mga matinumanon nga mababasa ha Hebreo kapitulo 11. Makapadasig gud mahibaroan nga nag-aalagad kita ha mahigugmaon nga langitnon nga Amay nga karuyag kita pakusgon, labi na kon maluya kita! Salit pariho kan Samson, makimalooy kita kan Jehova: “Alayon hinumdumi gad ako, ngan . . . pakusga gad ako.”—Huk. 16:28.