1-2. Ano an nakakapalipay ha mga surugoon han Dios? (Santiago 1:​22-25)

 KARUYAG ni Jehova ngan han iya hinigugma nga Anak nga magin malipayon kita. An nagsurat han Salmo 119:2 nasiring: “Malipayon an mga nasunod ha iya mga pahinumdom, nga namimiling ha iya ha ira bug-os nga kasingkasing.” Hi Jesus naghatag hin dugang pa nga pasarig, nga nasiring: “Malipayon an mga namamati ha pulong han Dios ngan nagtutuman hito!”—Luc. 11:28.

² Sugad nga mga magsiringba ni Jehova, malipayon kita nga katawohan. Kay ano? Damu an aton rason, pero an importante nga rason amo an aton regular nga pagbasa han Pulong han Dios ngan an aton paningkamot nga iaplikar an aton nahibaroan.​—Basaha an Santiago 1:​22-25.

3. Ano an aton napapahimulsan kon gin-aaplikar naton an aton nababasa ha Pulong han Dios?

³ May pipira nga paagi nga magpapahimulos kita kon magin “magburuhat [kita] han pulong.” Pananglitan, kon iaplikar naton an aton nahibaroan ha Pulong han Dios, mapapalipay naton hi Jehova, ngan magigin malipayon kita. (Ecles. 12:13) Samtang aton igin-aaplikar an aton nabasa ha giniyahan nga Pulong han Dios, mapapauswag naton an aton relasyon ha aton kapamilya ngan kakongregasyon. Posible gud nga nagin tinuod ito ha imo kinabuhi. Dugang pa, malilikyan naton an damu nga problema nga naieksperyensyahan han mga tawo kon diri nira ginsusugot an mga sugo ni Jehova. Sugad gud hito an ginsiring ni Hadi David. Katapos niya unabihon ha kanta an balaud, mga sugo, ngan mga paghukom ni Jehova, hiya nagsiring: “Ha pagsunod hito, may daku nga balos.”​—Sal. 19:​7-11.

4. Kay ano nga diri pirme masayon an pagin magburuhat han Pulong han Dios?

⁴ Diri pirme masayon para ha aton an pagin magburuhat han  Pulong han Dios. Bisan kon busy kita, dapat kita maggahin hin panahon ha pagbasa ngan pag-aram ha Biblia basi masabtan an karuyag ni Jehova nga buhaton naton. Salit aton repasuhon an pipira nga suhestyon nga makakabulig ha aton nga mabasa ito hin regular. Hihisgotan liwat naton kon ano an mabulig ha aton nga mahunahuna an mahitungod ha aton ginbabasa ngan makita kon diin naton puydi iaplikar ha aton kinabuhi an aton nahibaroan.

PAGGAHIN HIN PANAHON NGA BASAHON AN PULONG HAN DIOS

5. Ano nga mga responsabilidad an nakakapa-busy ha aton?

⁵ Busy gud an kadam-an han katawohan ni Jehova. Naggagahin kita hin daku nga panahon ha pagtuman han aton iba-iba nga Kasuratanhon nga mga responsabilidad. Pananglitan, an kadam-an ha aton may sekular nga trabaho basi taganahan an aton kalugaringon ngan an aton mga pamilya. (1 Tim. 5:8) Damu nga Kristiano an nag-aataman hin may sakit o lagas na nga kapamilya. Ngan dapat liwat naton atamanon an aton kalugaringon nga kahimsog, nga nagkikinahanglan hin panahon. Labot pa hini nga mga responsabilidad, may mga asaynment kita ha kongregasyon. An usa nga importante nga responsabilidad amo an pagin madasigon ha pakigbahin ha pagsangyaw nga buruhaton. Bisan pa han imo mga obligasyon, paonan-o ka magkakaada panahon ha regular nga pagbasa ha Biblia, ha pagpamalandong ha imo ginbabasa, ngan ha pag-aplikar hito?

6. Paonan-o mo mahimo magin prayoridad an pagbasa ha Biblia? (Kitaa liwat an piktyur.)

⁶ An pagbasa ha Biblia usa han “mas importante nga mga butang” para ha aton nga mga Kristiano, salit dapat ta ito iprayoridad. (Fil. 1:10) May kalabotan ha malipayon nga tawo, an siyahan gud nga salmo nasiring: “An iya kalipay aada ha balaud ni Jehova, ngan ginbabasa niya an Iya balaud ha mahinay nga tingog ha adlaw ngan gab-i.” (Sal. 1:​1, 2) Klaro nga nagpapasabot ito nga kinahanglan naton maggahin hin panahon nga basahon an Biblia. San-o an pinakamaopay nga panahon ha pagbasa ha Biblia? Bangin iba-iba an baton han tagsa ha aton. Pero an importante dapat naton pilion  an panahon nga mabulig ha aton nga magin regular an aton pagbasa ha Biblia. An brother nga hi Victor nagsiring: “Karuyag ko magbasa ha Biblia ha aga, bisan kon diri ako hiara magmata hin temprano kay hito nga mga oras diri damu an nakakadisturbo ha akon. Murayaw pa an akon hunahuna ngan mas nakakapokus ako.” Bangin ito liwat an imo kahimtang? Pakianhi an imo kalugaringon, ‘Para ha akon, san-o an pinakamaopay nga panahon nga basahon an Biblia?’

PAMALANDONGA AN IMO GINBABASA

7-8. Ano an bangin makaulang ha aton ha bug-os nga pagpahimulos han aton ginbabasa? Iilustrar.

⁷ Pero an reyalidad bangin regular nga nagbabasa kita hin damu kondi diri ito nasulod ha aton hunahuna. Nagbasa ka na ba ngan katapos waray pag-iha, guti na la an imo nahihinumdoman ha imo ginbasa? Nahitabo na ito ha aton ngatanan. Makasurubo, mahimo ini mahitabo ha aton pagbasa ha Biblia. Bangin naghimo kita hin goal nga magbasa hin pipira ka kapitulo han Biblia kada adlaw. Maopay gud ito. Dapat kita maghimo hin mga goal ngan maningkamot nga sundon ito. (1 Cor. 9:26) Pero labaw pa ha pagbasa ha Biblia an dapat naton buhaton kon karuyag naton nga magpahimulos gud tikang hito.

⁸ Hunahunaa ini nga pagkompara: Nagkikinahanglan an tanom hin uran basi mabuhi. Pero kon sobra kadamu an uran ha sulod hin gutiay la nga panahon, an tuna magigin tubigon. Kon ito an mahitabo, diri na magigin mapulsanon an sobra nga uran. Kinahanglan hin panahon basi masalupsop han tuna an uran ngan mabulig ito ha mga tanom nga tumubo. Ha pariho nga paagi, dapat likyan naton an dinalidali nga pagbasa ha Biblia, karuyag sidngon sobra kalaksi nga diri na naton nasasalupsop ngan nahihinumdoman ngan nagagamit an aton ginbabasa.​—San. 1:24.

9. Ano an dapat naton buhaton kon nabatasan na naton an madagmit nga pagbasa ha Biblia?

⁹ Napansin mo ba nga may mga panahon nga basta na la nga gindadagmit mo an pagbasa ha Biblia? Ano an dapat mo buhaton? Paghinay-hinay. Paningkamuti nga hunahunaon an imo ginbabasa o an imo pa la ginbasa. Diri man ini makuri. Kon para ha imo baga hin makuri an  pagdasig nga mamalandong, bangin puydi mo ito tagdon sugad nga paghunahuna la mahitungod ha imo ginbasa. Puydi mo mas pahilabaon an imo pag-aram basi iupod an panahon para ha paghunahuna o pagpamalandong. O puydi ka magbasa hin mas gutiay nga mga bersikulo ngan gamiton an nabibilin nga panahon ha paghunahuna mahitungod ha imo ginbasa. “Ginpahalipot ko an akon pagbasa ha Biblia, mga usa nga kapitulo,” siring ni Victor nga gin-unabi na. “Tungod kay an akon pagbasa temprano ha aga, napapamalandong ko ha bug-os nga adlaw an akon ginbasa.” Anoman nga paagi an imo gamiton, dapat magbasa ka ha eksakto nga kalaksihon basi mahunahuna mo an imo ginbabasa.​—Sal. 119:97; kitaa an kahon nga “ Mga Pakiana nga Angay Ikonsiderar.”

10. Iilustrar kon paonan-o mo maiaaplikar an imo nahibabaroan. (1 Tesalonica 5:​17, 18)

¹⁰ Anoman nga oras an imo pagbasa ha Biblia ngan anoman kadaku nga panahon an igin-gagahin mo hito, hunahunaa kon paonan-o mo maiaaplikar ito. Samtang nagbabasa ka han usa nga bahin han Pulong han Dios, pakianhi an imo kalugaringon, ‘Paonan-o ko ini maiaaplikar nga impormasyon yana o ha tiarabot?’ Pananglitan, sidngon ta nga kaupod an 1 Tesalonica 5:​17, 18 (Basaha.) ha imo pagbasa ha Biblia. Katapos mo basahon ito nga duha nga bersikulo, puydi ka umundang ngan maghunahuna kon ano ka kaagsob ngan kasinsero ha imo pag-ampo. Puydi mo liwat pamalandungon an mga butang nga imo gud iginpapasalamat. Mahimo ka magpasalamat kan Jehova para ha tulo nga espisipiko nga butang. Bisan ha pipira la ka minuto han sugad nga pokus nga atensyon, magigin parapamati ka ngan magburuhat han Pulong han Dios. Hunahunaa kon paonan-o ka magpapahimulos pinaagi ha pauroutro nga pagbuhat hini kada adlaw ha iba nga bahin han Biblia nga imo nabasa! Oo, mag-uuswag ka sugad nga magburuhat han Pulong han Dios. Pero ano man kon baga hin damu gud an kinahanglan mo pauswagon?

PAGHIMO HIN MAKATADUNGANON NGA MGA GOAL

11. Kay ano nga usahay bangin abaton mo an panluya? Paghatag hin ehemplo.

¹¹ Kon nagbabasa ka ha Biblia ngan nagbibiling hin mga paagi ha pag-aplikar han giya hito, bangin abaton mo usahay an panluya. Hunahunaa ini nga sitwasyon: Yana an imo eskedyol ha pagbasa ha Biblia nag-uupod han sagdon mahitungod ha pagpakita hin paboritismo. (San. 2:​1-8) Nakita mo nga puydi mo pauswagon an imo pagtratar ha iba salit nagdesisyon ka nga maghimo hin pipira nga pagbag-o. Maopay gud ito! Katapos, kinabuwasan ginbasa mo an pipira nga bersikulo nga nagpapabug-at han  pagkaimportante han pagkontrol han imo panyakan. (San. 3:​1-12) Nasantop mo nga usahay negatibo an imo panyakan. Salit nagdesisyon ka nga magin mas positibo ngan makaparig-on. Ha sunod nga adlaw, an imo pagbasa ha Biblia nag-uupod hin pahamangno kontra ha pakigsangkay ha kalibotan. (San. 4:​4-12) Napansin mo nga kinahanglan mo mas maghirot ha imo pagpili hin kaliawan. Ngan ha ikaupat na ka adlaw, baga hin nanluya ka lugod tungod han tanan nga butang nga kinahanglan mo bag-uhon.

12. Kay ano nga diri ka dapat manluya kon nakita mo ha imo pagbasa ha Biblia nga dapat ka maghimo hin mga pagbag-o? (Kitaa liwat an footnote.)

¹² Kon dapat ka maghimo hin damu nga pagbag-o o pag-uswag, ayaw panluya. Ebidensya ini nga maopay an imo kasingkasing. An tawo nga mapainubsanon ngan tangkod ha iya kalugaringon nagbabasa han Kasuratan nga may goal nga mahibaroan kon ano an iya dapat pauswagon. a Hinumdumi liwat nga an pagsul-ot han “bag-o nga personalidad” usa nga nagpapadayon nga proseso. (Col. 3:10; ikompara an study note ha Tagalog nga “nagiging bago.”) Ano an mabulig ha imo nga padayon nga magin magburuhat han Pulong han Dios?

13. Paonan-o ka makakahimo hin makatadunganon nga kadamu hin goal? (Kitaa liwat an piktyur.)

¹³ Imbes nga maningkamot nga durungan nga iaplikar an ngatanan nga imo ginbabasa, paghimo hin makatadunganon nga kadamu han goal. (Prob. 11:2) Mahimo mo testingan ini nga pamaagi: Ilista an mga butang nga kinahanglan mo pauswagon, ngan katapos pagpili hin usa o duha nga imo uunahon pauswagon, ngan ha sunod na la an iba. Ano an dapat mo unahon?

14. Ano nga mga goal an puydi mo unahon?

¹⁴ Puydi mo unahon an goal nga mas masayon  mo makab-ot. O puydi ka magdesisyon nga paningkamotan an usa nga bahin nga inaabat mo nga kinahanglan gud hin pag-uswag. Kon nagdesisyon ka na kon ano an gusto mo paningkamotan, pag-research ha aton mga publikasyon, mahimo mo gamiton an Watch Tower Publications Index o Tulong sa Pag-aaral ng mga Saksi ni Jehova. Pag-ampo kan Jehova ngan hangyoa hiya nga tagan ka han “hingyap ngan han gahum ha pagbuhat.” (Fil. 2:13) Katapos, paningkamuti nga iaplikar an imo nahibaroan. Kon nag-uuswag ka han siyahan mo nga goal, posible nga mas mapapagios ka nga paningkamotan an usa pa nga goal. Ha pagkamatuod, kon nag-uuswag ka ha usa nga bahin han Kristiano nga pagkinabuhi o ha usa nga Kristiano nga kalidad, posible nga magigin mas masayon para ha imo nga buhaton an iba pa nga mga pagbag-o.

TUGUTI AN PULONG HAN DIOS NGA ‘GUMIOS HA IYO’

15. Ha ano nga paagi an katawohan ni Jehova naiiba ha damu nga nagbabasa han Biblia? (1 Tesalonica 2:13)

¹⁵ May mga tawo nga nasiring nga nabasa na nira an Biblia hin makadamu ka beses. Pero natoo gud ba hira ha Biblia? Ira ba ito gin-aaplikar o gintutugotan nga makaapekto ha ira pagkinabuhi? Makasurubo, agsob nga diri an baton. Iba gud an katawohan ni Jehova! Pariho han mga Kristiano ha siyahan nga siglo, ginkakarawat naton an Biblia “kon ano gud ito, sugad nga pulong han Dios.” Dugang pa, naniningkamot kita nga ipakita nga gin-aaplikar naton ito ha aton kinabuhi.​—Basaha an 1 Tesalonica 2:13.

16. Ano an makakabulig ha aton nga magin magburuhat han Pulong?

¹⁶ Diri pirme masayon an pagbasa ngan pag-aplikar han Pulong han Dios. Posible kita makurian pagbiling hin panahon ha pagbasa. O bangin may tendensya kita nga magbasa hin duro kadagmit ngan diri na makapamalandong ha aton ginbabasa. O bangin umabat kita hin panluya tungod han ngatanan nga dapat naton pauswagon. Anoman an imo magin problema, may solusyon ito. Ha bulig ni Jehova malalamposan mo ito. Hinaot magin determinado kita nga karawaton an iya bulig ngan magin diri limtanon nga parapamati, kondi magburuhat han Pulong. Sigurado nga kon mas ginbabasa naton an Pulong han Dios ngan gin-aaplikar ito ha aton kinabuhi, magigin mas malipayon kita.​—San. 1:25.