Natawo ako han 1934 an akon mga kag-anak tikang ha Switzerland ngan binalhin ha Timmins, usa nga minahan nga bungto ha Ontario, Canada. Han mga 1939, an akon nanay nagtikang ha pagbasa han Watchtower nga magasin ngan inatender ha mga katirok han mga Saksi ni Jehova. Igin-upod niya ako ngan an akon unom nga bugto. Waray pag-iha, nagin usa hiya han mga Saksi ni Jehova.

Waray malipay hi Tatay ha iya desisyon, pero hinigugma ni Nanay an kamatuoran ngan determinado hiya nga magpabilin hito. Ginbuhat niya ito bisan pa han igindiri an buruhaton han mga Saksi ni Jehova ha Canada temprano han dekada 1940. Ngan pirme niya gintatratar hi Tatay nga may pagkabuotan ngan respeto, bisan pa kon ginyayaknan hiya hin maraot. An iya maopay gud nga ehemplo nakabulig ha akon ngan ha akon kabugtoan nga karawaton liwat an kamatuoran. Kamakalilipay nga hinay-hinay nga nagbag-o an batasan ni Tatay ngan mas buotan nga gintratar niya an amon pamilya.

Han summer han 1950, inatender ako ha Theocracy’s Increase Assembly ha New York City. Napagios gud ako nga pauswagon pa an akon pag-alagad kan Jehova katapos ko makaupod an kabugtoan tikang ha bug-os nga kalibotan ngan makapamati han eksayting nga mga interbyu han mga naggradwar ha Gilead School! Nagin mas determinado ako nga sumulod ha bug-os-panahon nga pagministeryo. Pakauli ko gud la, nag-aplay ako ha pagin regular payunir. Binalos an branch office han Canada nga nasiring nga magpabawtismo anay ako. Ito an akon ginbuhat han Oktubre 1, 1950. Paglabay hin usa ka bulan, nagin regular payunir ako ngan ha Kapuskasing an siyahan ko nga asaynment. Ito nga bungto hirayo gud ha akon gin-uukyan hito nga panahon.

 Ha spring han 1951, an branch office nag-imbitar hin mga Saksi nga maaram mag-French kon karuyag ba nira bumalhin ha probinsya han Quebec nga French an yinaknan. Mas daku an panginahanglan didto hin mga magwarali. Nagdaku ako nga nagyayakan hin French ngan Ingles, salit ginkarawat ko ito nga imbitasyon ngan igin-asayn ako ha Rouyn. Waray ako kilala didto. An may-ada la ako amo an usa nga adres, sugad han akon gin-unabi kanina. Pero nagin okey an ngatanan. Nagin maopay kami nga magsangkay ni Marcel, ngan na-enjoy ko an pag-alagad ha Quebec ha sumunod nga upat ka tuig, ngan ha urhi sugad nga espesyal payunir.

Samtang aadto ha Quebec, nalipay gud ako nga makarawat an imbitasyon ha ika-26 nga klase han Gilead School ha South Lansing, New York. Naggradwar ako han Pebrero 12, 1956, ngan igin-asayn ako ha gintatawag yana nga Ghana, b ha West Africa. Pero antes ako makakadto, kinahanglan bumalik ako ha Canada hin “pipira ka semana” tubtob nga makuha ko na an mga dokumento para ha pagbiyahe.

Naghulat ako hin pito ka bulan ha Toronto para hito nga mga dokumento. Hito nga panahon, ginpaukoy ako han pamilya nga Cripps ha ira balay, ngan nakilala ko an ira anak nga hi Sheila. Nagkahigugmaay kami. Han magpo-propose na ako, nakarawat ko an akon visa. Nag-ampo kami ni Sheila ngan nagdesisyon nga dapat ako kumadto ha akon asaynment. Pero nagdesisyon liwat kami nga magsusuratay ngan kitaon kon puydi ba kami magin mag-asawa. Diri ito masayon nga desisyon, pero ha urhi nasantop namon nga ito an tama nga desisyon.

Katapos hin usa kabulan nga pagbiyahe pinaagi hin tren, barko, ngan eruplano, inabot ako ha Accra, Ghana. Didto igin-asayn ako nga mag-alagad sugad nga district overseer. Salit kinahanglan ko magbiyahe ha bug-os nga Ghana pati na ha Ivory Coast (Côte d’Ivoire na yana) ngan Togoland (Togo na yana). Kasagaran, nagbibiyahe ako nga nag-uusahan ha usa nga jeep nga gintatag-iya han branch. Na-enjoy ko gud an pagbiyahe basi mabisita an kabugtoan!

 Ha mga weekend, may mga asaynment ako ha sirkito nga mga asembleya. Waray kami mga Assembly Hall. Salit an kabugtoan nagtutukod hin temporaryo nga masisirungan nga hinimo ha kawayan nga palma an atop basi makahatag hin proteksyon tikang ha sirak. Tungod kay waray refrigerator ha cafeteria, gintitipigan nga buhi an mga hayop ngan gin-iihaw kon ginkikinahanglan basi magin pagkaon han mga naatender.

May pipira kami nga makatatawa nga eksperyensya hito nga mga asembleya. Makausa, han nagpapahayag hi Herb Jennings, c usa nga igkasi-misyonero, may nakabuhi nga baka tikang ha cafeteria. Dinalagan ito ha butnga han stage ngan ha mga mamarati. Inundang hi Herb ha iya ginyayakan ngan an hayop baga hin nalilisang gud. Pero upat nga magkusog nga brother an nagdakop hito ngan iginbalik ito ha cafeteria samtang nan-gugugliat an mga mamarati tungod ha kalipay.

Hito nga semana, iginpakita ko an aton pelikula nga The New World Society in Action ha kahirani nga mga baryo. Basi mahimo ito, nagbibitay ako hin busag nga tela ha butnga han duha nga poste o duha nga puno ngan ipapasalida ko dida an pelikula. Naruyagan gud ito han mga taga-didto! Para ha damu, ito pa gud la nga pelikula an ira nakita. Namalakpak hira hin makusog han nakita nira ha mga eksena an mga tawo nga ginbabawtismohan. Ito nga pelikula nakabulig ha mga nakakita hito nga masantop nga bug-os-kalibotan kita nga organisasyon nga nagkakaurosa.

Paglabay hin mga duha ka tuig ha Africa, eksayted ako umatender ha 1958 nga internasyonal nga kombensyon ha New York City. Makalilipay gud nga makita hi Sheila, nga bumiyahe pa tikang ha Quebec, diin hiya nag-aalagad sugad nga espesyal payunir. Nagsusuratay na kami, pero yana nga nagkaupod kami utro, naghangyo ako ha iya nga magpakasal na kami, ngan sumige hiya. Nagsurat ako kan Brother Knorr d ngan naghangyo kon puydi ba hi Sheila makaeskwela ha Gilead ngan makaupod ko ha Africa. Tumugot hiya. Nakaabot gihapon ha Ghana hi Sheila. Iginkasal kami ha Accra, han Oktubre 3, 1959. Inabat namon nga ginbendisyonan gud kami ni Jehova kay gin-una namon hiya ha amon kinabuhi.

Han 1961 igin-asayn kami ha nasud han Cameroon. Ginhangyo ako nga magporma hin bag-o  nga branch office, salit nagin busy gud ako. Sugad nga bag-o nga branch servant, damu an kinahanglan ko mahibaroan. Ngan han 1965 nahibaroan namon nga burod hi Sheila. Gin-amin ko nga makuri gud para ha amon nga imadyinon an amon kalugaringon sugad nga mga kag-anak. Pero samtang eksayted na kami mahitungod ha amon bag-o nga responsabilidad ngan ha paghimo hin mga plano ha pagbalik ha Canada, may masakit gud nga nahitabo.

Napunitan hi Sheila. Ginsumatan kami han doktor nga an amon waray pa katatawo nga anak, lalaki. Nahitabo ito sobra 50 ka tuig na an naglabay, pero diri gud namon ito mangangalimtan. Bisan kon nasubo gud kami tungod han nahitabo, nagpabilin kami ha amon asaynment nga hinigugma gud namon.

An kabugtoan ha Cameroon agsob nga naatubang hin pagtimaraot tungod han ira pagin neutral ha politika. Makuri gud an sitwasyon ha mga panahon han presidential election. Nahitabo an amon ginkakahadlokan gud han Mayo 13, 1970, han opisyal nga igindiri an mga Saksi ni Jehova. An mahusay nga bag-o nga pasilidad han branch, diin lima pa la ka bulan tikang kami binalhin, ginkompiskar han gobyerno. Hito mismo nga semana, an ngatanan nga misyonero—upod na kami ni Sheila—an ginpwersa nga bumaya ha nasud. Makuri bayaan an kabugtoan kay hinigugma gud namon hira ngan nababaraka kami kon ano an mahitatabo ha ira.

An amon sumunod nga unom ka bulan gin-gamit namon ha branch office ha France. Iginpadayon ko didto an ngatanan ko nga mahihimo basi mapanginano an mga panginahanglan han aton kabugtoan ha Cameroon. Han Disyembre hito nga tuig, igin-asayn kami ha branch han Nigeria, ngan nagtikang ha pagpanginano ha buruhaton ha Cameroon. Mahigugmaon nga ginkarawat kami han kabugtoan ha Nigeria, ngan na-enjoy namon an pag-alagad didto hin pipira ka tuig.

Han 1973, kinahanglan namon maghimo hin makuri gud nga desisyon. Hi Sheila nag-iinantos hin seryoso nga mga sakit. Samtang aadto kami ha New York para ha usa nga kombensyon, nagtangis hiya ngan nagsiring ha akon: “Diri na ako makakapadayon! Kinakapoy na gud ako ngan pirme na la nagkakasakit.” Sobra 14 ka tuig na hiya nga nag-aalagad kaupod ko ha West Africa. Proud gud ako han iya matinumanon nga pag-alagad, pero kinahanglan namon maghimo hin pipira nga pagbag-o. Katapos namon pag-istoryahan an amon sitwasyon ngan maniguro ha pag-inampo mahitungod hito, nagdesisyon kami nga bumalik ha Canada, diin mas mapapanginano namon an iya kahimsog. An amon pagbaya ha amon asaynment sugad nga misyonero ngan ha amon bug-os-panahon nga pag-alagad amo an pinakamakuri ngan pinakamasakit nga desisyon nga kinahanglan namon himoon.

Han binalik kami ha Canada, nakatrabaho ako ha akon maiha na nga sangkay nga may-ada negosyo nga namamaligya hin sarakyan ha usa nga bungto ha norte han Toronto. Nagplete kami hin apartment, pumalit hin secondhand nga furniture, ngan nakabalhin kami nga waray magkautang. Karuyag namon tipigan nga simple an amon kinabuhi, ngan naglalaom nga maabot an panahon nga  makakabalik kami ha bug-os-panahon nga pag-alagad. Nasurprisa kami kay natuman ito hin mas temprano kay ha amon nahunahuna.

Nagtikang ako magboluntaryo ha mga Sabado ha gintutukod nga Assembly Hall ha Norval, Ontario. Inabot an panahon nga igin-asayn ako nga magin Assembly Hall overseer. An kahimsog ni Sheila nagtitikaopay, ngan inabat namon nga makakaya niya ini nga bag-o nga asaynment. Salit han Hunyo 1974, binalhin kami ha apartment han Assembly Hall. Nalipay gud kami nga makabalik ha bug-os-panahon nga pag-alagad!

Maopay na la, an kahimsog ni Sheila padayon nga nagtikaopay. Paglabay hin duha ka tuig, puydi na kami kumarawat hin asaynment ha sirkito nga buruhaton. An sirkito nahimumutang ha Manitoba, usa nga probinsya ha Canada nga kilala tungod han ira mahagkot hinduro nga winter. Pero na-enjoy gud namon didto an mapaso nga pagminagburugto. Nahibaroan namon nga diri importante kon diin kita nag-aalagad—an importante amo an padayon nga pag-alagad kan Jehova hain man kita.

Katapos han pipira ka tuig ha sirkito nga buruhaton, han 1978 gin-imbitar kami nga mag-alagad ha Bethel ha Canada. Waray pag-iha katapos hito, nahibaro ako hin masakit pero importante nga leksyon. Gintokahan ako nga magpahayag hin French ha sulod hin usa ngan tunga ka oras ha usa nga special meeting ha Montreal. Makasurubo, waray makapabilin nga nakapokus an mga mamarati ha akon pahayag, ngan usa nga brother tikang ha Service Department an nagsagdon ha akon mahitungod hito. Ha pagkatinuod, inabat ko nga diri ako maopay nga speaker. Pero waray ko karawata hin maopay an sagdon. An amon mga personalidad baga hin diri nagkakauyon. Inabat ko nga sobra hiya kakritiko—waray hiya maghatag hin bisan ano nga kumendasyon. Nagsayop ako nga ginhukman ko an sagdon tungod han paagi han paghatag hito ngan han akon inaabat han naghatag hito.

Paglabay hin pipira ka adlaw, usa nga membro han Branch Committee an nakiistorya ha akon mahitungod hito. Gin-amin ko nga waray ko karawta an sagdon ngan nasubo ako hito nga akon ginbuhat. Katapos, ginkaistorya ko an brother nga nagsagdon ha akon. May pagkabuotan nga ginpasaylo niya ako. Ito nga eksperyensya nagtutdo hin leksyon ha akon han pagkaimportante han pagin mapainubsanon nga diri ko gud mahingangalimtan. (Prob. 16:18) Makadamu ako pag-ampo kan Jehova mahitungod hini, ngan determinado ako nga diri na gud utro hunahunaon hin negatibo an sagdon.

Sobra 40 ka tuig na ako nga nag-aalagad ha Bethel ha Canada tikang pa han 1985, nakapribilehiyo ako nga mag-alagad sugad nga Branch Committee. Han Pebrero 2021, namatay an akon hinigugma nga hi Sheila. Labot han akon kamingaw ha iya, may-ada liwat ako mga problema ha kahimsog. Pero an pag-alagad kan Jehova nabulig ha akon nga magin busy gud ngan magin malipayon nga ‘haros diri ko abaton an paglabay han mga adlaw.’ (Ecles. 5:20) Bisan kon damu an akon nagin mga problema ha kinabuhi, mas damu an akon naeksperyensyahan nga makalilipay. An pag-una kan Jehova ha akon kinabuhi ngan an pag-alagad hin bug-os-panahon ha sulod hin 70 ka tuig makalilipay gud. Igin-aampo ko nga padayon liwat nga unahon han batan-on nga kabugtoan hi Jehova, kay kombinsido ako nga magpapahimulos liwat hira hin makalilipay ngan eksayting nga kinabuhi nga posible la kon nag-aalagad kita kan Jehova.